Correos e o Concello do Carballiño asinaron un acordo polo que se promociona a Festa do Polbo en oficinas de Correos de 8 provincias españolas.

Os cidadáns poderán coñecer esta festa declarada de Interese Internacional a través de pantallas colocadas en oficinas de Alacante, Barcelona, Madrid, Segovia, Sevilla, Valencia, Zamora e Zaragoza.

A Festa do Polbo celebra en 2022 a súa edición número 60, dedicada ao ano Xacobeo e que se celebrará, como é tradición, o segundo domingo de agosto. O parque municipal do Carballiño acollerá a gran romaría na que miles de persoas degustarán este emblemático produto gastronómico, salienta Correos no seu comunicado informativo.

Con este novo servizo de pantallas nas oficinas de Correos, o Concello do Carballiño atopa unha nova canle de promoción para a Festa do Polbo repartido pola xeografía española. As pantallas colocadas en Correos contan cunha gran visibilidade entre os cidadáns: en 2021 as oficinas españolas rexistraron máis de 89 millóns de visitas.

O delegado territorial da Xunta en Ourense, Gabriel Alén, desprazouse esta maña ao concello do Carballiño para participar, xunto coa comisaria do Xacobeo 21-22, Cecilia Pereira, na presentación do 1º Concerto Xacobeo en Cámara, onde tamén estiveron presentes a directora de institución de CaixaBank, María Jesús García Piñeiro, o director da Orquestra de Cámara Galega, Rogelio Groba, e o párroco do Carballiño, Jorge Juan Pérez.

O delegado territorial explicou que o Xacobeo en cámara é unha proposta que xungue modernidade e tradición por medio da realización de concertos en lugares que, de seu, manifestan un enorme interese como destino turístico diferente, único e especial, non só durante o Xacobeo. Deste xeito, o delegado agradeceu a implicación da Fundación La Caixa no patrocinio desta serie de concertos da Orquestra de Cámara Galega, que forman parte da programación do Xacobeo 2021-2022; o eixo principal da cultura ao longo do ano que mantén unha oferta espallada por toda Galicia, sumando esforzos cun obxectivo común.

Gabriel Alén informou que o vindeiro 5 de agosto, no Templo da Veracruz do Carballiño ás 21:00 horas, desenvolverase o concerto da Orquestra de Cámara Galega que será de balde e terá unha duración duns 80 minutos. O repertorio contará con obras coñecidas de autores como Holst, Britten, Grieg entre outros e sempre haberá un espazo para escoitar obras de compositores españois como Albéniz, Malats ou Groba.

“O Camiño é desde os seus inicios unha vía importante de desenvolvemento cultural e foi un dos piares fundamentais da construción cultural europea” – manifestou Gabriel Alén- engadindo que “ todo ese camiño deixou un sinal patrimonial importantísima que se reflicte nas innumerables igrexas, mosteiros, pazos e castelos onde foron focos vehiculares das facetas artísticas que marcaron unha historia de viaxes e coñecemento”.

“Así, a literatura, a pintura e a música foron, son e serán piares fundamentais da construción cultural europea”; subliñou o delegado territorial, que significou a unión da tradición e o patrimonio histórico e artístico dunha coidada selección de espazos declarados como Bens de Interese Cultural unida á creación autóctona do noso país que marca claramente nosa fantástica singularidade onde a historia e a modernidade danse a man para maior goce dun espazo artístico único; e nese contexto, “a aportación da Orquestra

A Xunta de Galicia construirá un novo centro de saúde na parcela da antiga estación de autobuses do Carballiño que duplicará a superficie da actual infraestrutura sanitaria. Así o acordaron hoxe os conselleiros Sanidade e de Infraestruturas e Mobilidade e de Sanidade, Julio García Comesaña e Ethel Vázquez, respectivamente, co alcalde do Carballiño, Francisco José Fumega. Os representantes públicos asinaron un protocolo de colaboración que dá luz verde á execución desta importante e necesaria infraestrutura sanitaria para o municipio.

No protocolo asinado hoxe, o Concello do Carballiño comprométese a realizar os trámites oportunos para a transmisión, en pleno dominio e libre de cargas e gravames, da parcela da antiga estación de autobuses emprazada no número 66 da Avenida do Balneario para a construción do centro de saúde coa cualificación urbanística axeitada ao Plan Funcional e de Espazos, así como ao cambio de uso do equipamento como sanitario.

O novo Centro de Saúde duplicará a superficie do actual, pois terá 4.500 m² fronte aos 1.800 do antigo local. “Vai ser un inmoble moderno, que permitirá contar con máis consultas de medicina e enfermaría, froito das prazas que se crearon neste centro a través do Plan Galego de Atención Primaria”, explicou o conselleiro de Sanidade, Julio García Comesaña, que engadiu que o espazo contará tamén con importantes melloras para a asistencia a pacientes e profesionais, pois incorporará as áreas bucodental e de saúde mental, así como salas de críticos e de observación no PAC.

O titular de Sanidade destacou que esta infraestrutura sanitaria suporá unha mellora substancial para un centro no que reciben asistencia máis de 20.000 pacientes e no que acoden a traballar máis de 30 profesionais.

As tres administracións públicas coincidiron ademáis na necesidade de que o novo centro de saúde dea resposta á demanda de aparcadoiro que se vai necesitar, polo que a Xunta buscará unha solución arquitectónica que cubra dita demanda e destinará unha parte do espazo libre de 1.000 metros cadrados para aparcadoiro en superficie. O Concello comprometese ao mantemento desta área cun regulamento de uso compartido.

O Concello adaptará o seu plan urbanístico á edificabilidade que demanda o Plan de Espazos de 4.500 m² e propiciará un ordenamento que permita conseguir o mellor aproveitamento do centro de saúde e do espazo libre para aparcadoiro en superficie.

Unha vez posta a disposición a parcela necesaria, a Xunta levará a cabo os trámites e iniciará as obras de construcción deste novo centro de saúde no Concello de O Carballiño.

A Consellería de Infraestruturas e Mobilidade estará involucrada en todo o proceso, “pois será a encargada de contratar e executar a obra deste novo centro de saúde” segundo sinalou hoxe o conselleiro de Sanidade. O departamento que dirixe Ethel Vázque se encargará de xestionar “o futuro dos autobuses do Carballiño noutra parcela, como do futuro desta parcela despois de que salgan dela os autobuses”.

A conselleira de Infraestruturas e Mobilidade, Ethel Vázquez, puxo en valor esta colaboración para executar o novo Centro de Saúde do Carballiño na parcela que ocupa a estación de autobuses.

Salientou a dobre satisfacción da Consellería de Infraestruturas pola execución do equipamento sanitario e tamén por habilitar unha parada de autobús intermodal na estación de tren, cun financiamento autonómico que ascende a 190.000 €.

Ethel Vázquez explicou que se acometerá unha parada con marquesiña disposta a ambos os dous lados, xerando así dúas zonas de parada: a primeira, en dirección de acceso á vila, sobre a propia avenida; e a outra na marxe oposta, para os autobuses que saen do municipio.

Sinalou que se está co proceso de contratación destas obras, polo que se prevé comezalas o vindeiro ano co fin de poñer á disposición dos veciños o próximo verán esa parada intermodal que axilice o intercambio do autobús e do tren.

A Xunta tamén traballa co Concello para dispor unha parada na actual estación, para atender as demandas dos veciños e favorecer a súa mobilidade.

O Goberno galego continúa a aposta polo transporte público, con iniciativas como a tarxeta Xente Nova, que no Carballiño permite que 240 mozos viaxen gratis por toda Galicia, podendo ir de balde a Ourense a estudar, significando un aforro de máis de 750 euros no curso.

A titular de Infraestruturas e Mobilidade instou ao Goberno central a apostar tamén polo transporte de competencia estatal, bonificando o 100% os bonos multiviaxe dos trens de media distancia entre Ourense e Santiago; recupendo a totalidade dos servizos de tren previos á pandemia; ou facendo unha reflexión sobre o seu mapa concesional de transporte en autobús, que suprime servizos e paradas en 23 concellos, entre eles, Ribadavia.

A Insua dos Poetas acolle este venres, día 5 de agosto, o concerto gratuíto do grupo de folk arxentino-galego Sete Netos. A cita, na que colabora a Deputación de Ourense e a Consellería de Cultura a través da Secretaría Xeral de Política Lingüística, comezará as 20,30 horas na Esgueva (Madarnás - O Carballiño).

Sete Netos é unha banda de música folk, tradicional galega con fusión de folclore arxentino e iberoamericano- formada en 1998 en Buenos Aires. A maioría dos seus integrantes proceden do Grupo de Música e Danza do Centro Galicia de Buenos Aires.

O grupo está formado por netos de emigrantes galegos -de aí o nome da banda- que se formaron dende rapaces na música tradicional de Galicia. Teñen colaborado con grupos de prestixio internacional como Milladoiro, The Chieftains, Carlos Núñez, Luar na Lubre, Berrogüetto e outros grandes que visitaron Bos Aires, sendo eles mesmos unha referencia neste tipo de música en toda Latinoamérica.

A crítica resalta o traballo de Sete Netos combinando instrumentos tradicionais con outros máis contemporáneos, establecendo interesantes conexións entre a música do universo celta e a música tradicional de América. Son os difusores na República Arxentina e noutros países de forte emigración galega -Uruguay, Chile, Brasil, Venezuela, México e Panamá- dunha mestizaxe entre a música dos seus ancestros, dándolle un matiz moderno e innovador, con expresións tradicionais da Arxentina e toda Iberoamérica.

A Insua dos Poetas, un referente no mundo literario e no campo das artes plásticas que xa ten acollido no Anfiteatro Nós concertos de Sés, Milladoiro, Luar na Lubre ou Iván Ferreiro

A Insua dos Poetas, unha iniciativa levada a cabo ao longo de quince anos de actividade cultural inintorrompida, constitúe un referente no mundo literario e no campo das artes plásticas. E desde a inauguración en 2020 do Anfiteatro NÓS, conmemorativo do centenario da revista Nós, ten acollido importantes concertos musicais como o de Sés, Milladoiro, Luar na Lubre, A banda da Loba, Iván Ferreiro ou Xisco Feijóo.

"E agora, fiel aos nosos principios de ter en conta a Galicia do alén, o quefacer a prol da nosa lingua e a nosa cultura na diáspora, a Insua dos Poetas será o escenario natural do Grupo Sete Netos de Bos Aires", explica o presidente da Fundación Insua dos Poetas, o poeta Luís González Tosar.

Longa traxectoria dun grupo de referencia na difusión da música tradicional galega

Sete Netos lanzou o seu primeiro disco -homónimo- o 20 de abril de 2002, nun concerto no auditorio de Belgrano, en Bos Aires, diante de máis de 5.000 persoas. O 10 de maio de 2008 presentaron o seu segundo traballo discográfico, "Fogaxe". Esta vez no Teatro del Globo, unha das principais salas porteñas. Pouco despois levarían a cabo a súa primeira xira por Galicia, con concertos en Santiago, A Coruña, Vigo ou Pontevedra.

Nesta segunda andaina de Sete Netos por Galicia estarán presentes por primeira vez na provincia de Ourense.

Integran Sete Netos Gabriel Alberto Ponte -gaita, flautas, tin whistle e percusión-, Alberto López Barros -gaita, flautas, saxo, low whistle, ocarina, acordeón e teclados-, Jorge Alberto Sisto Mellid -guitarra, bandurria, laúd, batería, tambor e derbake-, Hugo Edgardo Reverditto Antúnez -pandeireta, bombo, cunchas, bodhran, djembe, derbake e percusión-, Marcelo Olveira Cambeiro -batería, djembe, derbake e guitarras-, Pablo Rouco -teclados, gaita, acordeón e arpa- e Nicolás Pérez -gaita, flautas, tin whistle, guitarras, violín e acordeón-.

O Concello do Carballiño vén de adxudicar o proxecto de musealización da Fábrica de Papel “A Labandeira” á empresa valenciana Ingeniería Interactiva del Ocio s.XXI S.L., despois de levarse a cabo a correspondente Mesa de Contratación. Tal e como informou o alcalde, Francisco Fumega, ao tratarse dun proceso aberto ao que se presentaron tres empresas conseguiuse unha rebaixa de 30.000 euros. Así, foi adxudicada de forma provisional por 170.000 euros e as empresas teñen un prazo de 15 días para presentar alegacións.

O proxecto ten como principal obxectivo potenciar a cultura e a economía local do concello. A Fábrica de Papel conta cun proxecto redactado polo arquitecto Manuel Gallego Jorreto. A súa rehabilitación levouse a cabo en distintas fases e con este contrato preténdese levar a cabo a musealización para a dar a coñecer a historia do proceso de industrialización decimonónica da comarca do Carballiño.

As obras de musealización levaranse a cabo en diferentes espazos. Así, na área de recepción de visitantes realizarase a elaboración artesanal dun mostrador a dúas alturas para a recepción, tallos e cadeiras, armarios de almacenamento e estantes. No andar semisoto, cunha superficie de 45,2 metros cadrados, instalarase o taller de elaboración de follas de papel e fabricaranse, en madeira de piñeiro, elementos a escala real como unha bañeira grande para a pasta de papel. Tamén se elaborarán outros a escala reducida e incluso un batán que, aproveitando o curso da auga, transmitirá un movemento alterno en un mazo para o prensado e satinado dos pregos de papel. Tamén haberá nesta zona paneis explicativos con gráficas correspondentes a cada proceso que se dará a coñecer na sala.

No andar de abaixo haberá tres zonas diferenciadas: A de encolado, onde irán aquelas follas de papel que recibirán tinta para facelas máis impermeábeis; a de brunido, onde o papel recibe outros tratamentos como o prensado e a zona de clasificación e preparación para o mercado.
O primeiro andar, cunha superficie útil de 115 metros cadrados, estará dedicado ao sequeiro de papel, cos tendais e mesas de colocación e o resto da sala a documentos históricos.

Un auditorio para 40 persoas será acondicionado no segundo andar (89 metros cadrados) e dotarase de medios audiovisuais e informáticos relacionados con elementos temáticos do mundo do papel. Tamén dará cabida a un mirador sobre o resto do conxunto da fábrica de papel, instalada nas marxes do río Arenteiro. O proxecto terá un prazo de execución de 9 meses e a financiación corre a cargo da Consellería de Cultura.
O alcalde, Francisco Fumega, destacou a importancia destas obras “para que a fábrica se converta no Museo do Papel de Galicia e colaboraremos coa Xunta para integralo na Rede Galega”.