A conselleira de Política Social e Igualdade, Fabiola García, presentou esta mañá o programa de vacacións familiares nas Residencias de Tempo Libre (RTL) autonómicas que se desenvolverá entre os meses de xullo e outubro nas instalacións do Carballiño e Nigrán. O Diario Oficial de Galicia (DOG) publicará mañá esta convocatoria anual, á que as familias interesadas poderán presentar as súas solicitudes desde o día 8 ata o 21 de maio.

A conselleira detallou que neste 2025 ofértanse un total de 2.415 prazas, o que supón un total de 14.400 pernoitas nas residencias. Así o sinalou na súa visita á RTL do Carballiño na que estivo tamén acompañada do Director Xeral de Familia, Infancia e Dinamización Demográfica, Jacobo Rey, do Delegado da Xunta en Ourense, Manuel Pardo, do alcalde do Carballiño, Francisco Fumega, e do tenente de alcalde, José Castro.

En concreto, a residencia do Carballiño ofertará 1.215 prazas e contará con dez quendas entre o 24 de xuño e o 2 de outubro. Pola súa banda, a residencia de Patos, en Nigrán, ofrecerá 1.200 prazas. A conselleira lembrou que o Goberno galego ampliou en 2023 as quendas ata o mes de outubro para que as familias con fillos maiores ou sen fillos poidan desfrutar tamén destas residencias. Ademais, antes da pandemia as quedas eran de entre nove e dez noites, e agora son de seis, co cal se poden beneficiar máis familias.

Como cada ano, as familias numerosas, monoparentais, acolledoras e de vítimas de violencia de xénero, contarán con acceso prioritario en todas as quendas. As solicitudes deberán realizarse por sede electrónica da Xunta e as tarifas terán prezos asequibles para as familias.

Venres, 9 no Auditorio
ás 20.00 / 22.30 h VOS CINE – “LA RED FANTASMA”
(Cineclub O Carballiño)

Sábado, 10 no Auditorio ás 20.00 h
TEATRO (reaOU - Rede Provincial de Auditorios)
“ESCANDALO´S” de A.C. ESTETA-ESCOLA DE TEATRO DE TABOADELA
Público: apta para tódolos públicos
Entrada: de balde
SINOPSE
Comedia reivindicativa. Despois do funeral da súa nai Escarlata e todos os traballadores do Escándalo´s Club, un cabaret atípico, deberán facer fronte a unha gran débeda se queren salvar o negocio. Sen embargo Valentino intentará por todos os medios separalos para facerse co local onde o seu xefe quere montar unha nova Macro Discoteca. A través de números de maxia, clown, actuacións musicais e drag queens entraremos no Escándalo´s, un lugar que reivindica a liberdade sexual, os corpos non normativos e que rompe con todos os estereotipos da sociedade enviando unha clara mensaxe ao público: "A niña vida é a que eu elixo, a que eu decido para min". Unha verdadeira historia que nos educa sobre a diversidade.

https://www.youtube.com/watch?v=AlPz1JmgjB8

Domingo, 11 no Auditorio ás 19.30 h
CONCERTO CARMELA
Rede de dinamización lingüística
Carmela é un proxecto musical que basea o seu repertorio na música de tradición oral galega, a través do canto e a percusión de man como elementos definitorios. Iniciando o traballo dende informantes e arquivos musicais, o obxectivo do proxecto é trasladar aos palcos a esencia destas melodías acompañadas dunha visión propia e actual, empregando non só criterios estéticos, senón outros vinculados coa análise musical e de contexto da música coa que se traballa, un achegamento que suma a investigación etnomusicolóxica coa interpretación e arranxo musical. Carmela utiliza a tradición como un ente flexible e moldeable que se adapta ao contexto musical actual a través de sons que viaxan dende as percusións ata referencias electrónicas. Un proxecto diferente no seu discurso tanto musical coma extramusical que posiciona a tradición oral e a perspectiva de xénero no centro.
Carmela é a visión musical da tradición oral de Carme López, proxecto que nace no 2022 subíndose aos palcos con diferentes propostas escénicas, e editando en novembro de 2024 o seu primeiro álbum: Vinde todas (editado coa discográfica Microscopi). A presentación deste disco confórmase cun directo en formato trío.
Carme López voz e percusións
Camille Hedouin electrónica e voces
Sara Méndez saxofón
https://www.youtube.com/watch?v=xgCD-daHSWI
https://youtu.be/lvAAwhFo7Io

Luns, 12 no Auditorio Manuel Manuel
ás 18.00 h RECITAL FIN DE GRAO do CMUS

Martes, 13 no Auditorio
ás 10.30 h e ás 12.00 h CAXOTO - UNHA NOITE NO MUÍÑO... (Servizo de Normalización Lingüística)
Público: 3º e 4º de EP
Duración: 60 min.
Sinopse: Se unha tradición temos clara na nosa cultura é que non se remata ningún gran traballo sen celebralo por todo o alto. As vendimas, os fiandóns, a colleitas e sementes, a malla, ir ao muíño moer... eran traballos que conxugaban ao remate da xornada baile, música e festa rachada.
Neste espectáculo Caxoto fai un percorrido po esas tradicións cóntannos como se divertían as nosas avoas e avós e converte o escenario nun local de baile improvisado onde pasodobre, ... ao son dos nosos instrumentos: gaita, pandeireta, acordeón,... e quen sabe?... cun pouco de sorte incluso aprendamos a bailar unha sinxela muiñeira.

Venres, 16 (lugar e hora pendente de confirmar)
ACTUACIÓN DE PANDERETEIRAS – AS RISCADEIRAS DO CENTRO SOCIOCOMUNITARIO

Venres, 16 no Auditorio
ás 20.00 / 22.30 h VOS CINE – “PARTHENOPE”
(Cineclub O Carballiño)

Domingo, 18 no Auditorio ñas 18 h
TEATRO INFANTIL – COMEDIA (RGTA)
“Máis Saaabor!” de CULTURACTIVA
Público: infantil e familiar
Entrada: 3,50 €
Sinopse: Logo de 200 funcións con Saaabor! chega unha nova proposta cómica dirixida por Avelino González e protagonizada por Félix Rodríguez e Fran Rei sobre o mundo da gastronomía e a alimentación saudable. Máis Saaabor! mestura música en directo, maxia, humor, moito ritmo e participación do público. A nova cociña mundial abre o seu novo establecemento na vosa localidade e ides ter que probalo!
Un menú elaborado en directo coa participación do público digno dos maiores recoñecementos do mundo culinario.
https://www.youtube.com/watch?v=dKPtYXc-3xU

Luns, 19 no Auditorio ás 11.30 h
TEATRO (reaOU - Rede Povincial de Auditorios)
“MADE IN GALICIA” de SARABELA TEATRO
Público: 3º – 4º ESO e 1º BAC / Público en xeral
Entrada: de balde
Sinopse: Como quen se deixa roubar o seu tesouro máis prezado, a actitude das galegas e dos galegos respecto á súa lingua non “resistiría” ningunha análise. E será que o galego é a lingua máis difícil do mundo? E será de deberemos constituír unha oficina de palabras perdidas? Palabras perdidas, roubadas… Fronte ao “es que no me sale”, “es que no se me da” “MADE IN GALIZA” é un convite á República Independente da nosa lingua. Non imos perdela nin en soños!
A obra de Sende (Padrón, 1972) abre as portas ao humor reflexivo, á poética ao alcance de todo o mundo, a través dun texto que move e conmove. O teatro feito emoción, sentimento, plasticidade, e confronto. Cada historia é diferente e está protagonizada por personaxes retranqueiros, combativos, tenros, cómicos e poéticos. Aguerrida defensa da lingua galega.
https://www.youtube.com/watch?v=GzFZIrmYWQ4

21 e 22 desde o anfiteatro da Vera Cruz ás 11.00 h
ROTEIRO MANUEL MARÍA – A.C. AVANTAR

Venres, 23 no Auditorio ás 21.00 h
MONÓLOGO de TOURIÑÁN – AQUÍ TOU! (M2 Producións)
https://vimeo.com/802981921

Sábado, 24 na tenda Ozoco GZ
FOLIADA DE AVANTAR
ás 18.30 h: presentación libro: Cantareiras de Icía Varela e Xosé Manuel Varela e obradoiro de pandeireta
ás 20.30 h: foliada

Sábado, 24 no Auditorio ás 18.30 h
MAXIA – SHADO CLEPTÓMAGO (Pares o Nones)

https://www.youtube.com/watch?v=FnLGr2hOh_8

Domingo, 25
de 10.00 h a 14.00 h
PON UNHA FOTO NA RÚA. LEMBRANZA DOS DECORADOS DO FOTÓGRAFO GABRIEL ALONOS “O POTIÑOS”
(A. C. O Potiños)

Domingo, 25 no Auditorio
ás 19.00 h CINE filmoteca – “PREFIRO CONDENARME”
(Cineclub O Carballiño)

Martes, 27 no Auditorio
a partir das 10.30 h MUSILANDIA. CMUS

Mércores, 28 no Auditorio a partir das 11.30 h
ESPECTÁCULO DAS CANTAREIRAS: “AXÚDAME A CANTAR”
LETRAS GALEGAS 2025. 75 ANIVERSARIO ED. GALAXIA
Duración: 50 minutos
Sinopse: Felisa Segade e Montse Rivera (fundadoras de Leilía, primeiro grupo que dá protagonismo á voz e á pandeireta nun escenario) afondarán neste espectáculo de canto, enfocado á campaña escolar, palabra e toque, no porqué destas cantigas, a súa creación, os momentos en que se cantaban, o papel que xogaban no día a día das nosas antepasadas.
Axudádeme a cantar é un encontro con xente moza que ten como obxectivo fundamental servir de ponte entre antano e hogano, poñendo en valor un patrimonio inmaterial que é parte da nosa historia e que debemos protexer e evitar que esmoreza, que caia no esquecemento.
En 2025 o Día das Letras Galegas está dedicado ao Cancioneiro popular galego e ás mulleres que crearon cantigas que se transmitiron de nais a fillas.

30 e 31 no Auditorio – consultar programa
II FESTIVAL DE PERCUSIÓN – CARBALLIÑO SOA
Entrada: de balde

Outras actividades

- MURAL CONMEMORATIVO “AS CANTAREIRAS E A POESÍA GALEGA ORAL” – LETRAS GALEGAS 2025

- EXPOSICIÓNS FOTOGRÁFICAS – A. F “O POTIÑOS”
POTIEXPO2025 – Casa do Concello
MIRADAS DE E. PARDO BAZAN - Casino
SOMBRAS – Casa Ramón (R/ Principal)
O RIO ARENTEIRO – Asador Veracruz
PREMIOS CONCURSO 2024 – Cafetería Plaza
INSPIRACIONS – Galería Ango
POTIEXPO23 – Manxares (R/ Calvo Sotelo)
OSEIRA – Balneario do Carballiño
FOTOS XOCIVIGA – Cafetería Amelie (Praza de San Ramón)

O presidente da Xunta de Galicia e o alcalde do concello de Maside reúnense para impulsar o desenvolvemento de dous proxectos no municipio masidao

O presidente da Xunta de Galicia, Alfonso Rueda, e o alcalde do concello de Maside, José Manuel Iglesias, veñen de manter esta mañá unha reunión de traballo en San Caetano na que abordaron temas moi importantes e de interese para o concello masidao en materia de erradicación do chabolismo e accesibilidade e dotacións educativas.

Por una banda, a posibilidade de estudiar unha serie de actuacións encamiñadas á erradicación do chabolismo no lugar da Fontela entre as que se contemplaría a limpeza das marxes das estradas N‐541 e OU‐504, a demolición das chabolas e o traslado da poboación residente a unhas novas vivendas localizadas en terreos propiedade da Xunta, localizados ao sur oeste do actual asentamento e para os que que se conta cun plan parcial aprobado no ano 2011 que contempla un ámbito cunha extensión 2,76 hectáreas.

Outras actuacións incluídas serían a adecuación, clausura e selado do vertedoiro de RSU ao carón do asentamento, a limpeza e a recuperación das marxes do regato do Varón, cun nivel de degradación ecolóxica do medio moi elevado e cun nivel de salubridade moi deficiente, localizado entre a antiga estrada a Ourense (que discorre polo centro do poboado) e a marxe esquerda da N‐541.

Por outra banda, no encontro tamén tiveron ocasión de analizar outras necesidades deste concello como a construción dun novo aparcadoiro para o profesorado e o alumnado do CPI Terras de Maside que contaría cun novo acceso, una nova vía dende a avenida do Grupo Escolar e a rúa Outeiro Grande. A inversión nunha primeira fase ascendería a 350.000 euros para os traballos de urbanización, dun total de 900.000 euros que precisará finalmente esta actuación.

A entrevista entre o presidente da Xunta, Alfonso Rueda, e o alcalde de Maside José Manuel Iglesias, para sentar as bases do proxecto de erradicación do chabolismo na Fontela, e doutra parte, o novo servizo de limpeza viaria no concello do Carballiño para os próximo dous anos adxudicado á empresa FCC, entre os asuntos estelares na Tertulia de Cope O Carballiño deste venres 2 de maio.

Coa opinión e comentarios de Fátima Gómez, Sebas Lamazares, Maria Luisa Rodríguez e Manuel Nogueira, nos estudos de COPE O Carballiño xunto a Xan Pinal. 

Escóitaa aquí:

O Carballiño acolle este 1 de maio a primeira das catro etapas da "1ª Volta Internacional BTT a Galicia", en cuxa organización figura o Club de BTT "Os Mosqueteiros" do Carballiño.

A saída (9:30 h.) e tamén a meta á que comezarán a chegar os primeiros clasificados a partir das 12:30 horas, estarán na Praza da Veracruz do Carballiño. 

A competición, que reunirá a 250 ciclistas procedentes tanto de América, Europa como da xeografía española, percorrerá pola ruta BTT creada polo club carballiñés de BTT a través de camiños dos concellos do Carballiño, Boborás e O Irixo.

A competición conta coa colaboración da Xunta, e das Deputacións de Ourense, Pontevedra e A Coruña.

O Carballiño celebra o Día da Nai coa campaña “Unha nai, unha flor” e sortea premios entre quen compre no comercio local Con motivo do Día da Nai, o Centro Comercial Aberto de Carballiño lanza a campaña “Unha nai, unha flor”, unha iniciativa pensada para poñer en valor o papel das nais e, ao mesmo tempo, fomentar as compras no comercio de proximidade.

Durante toda a campaña, as persoas que realicen compras nos establecementos asociados recibirán unha papeleta de participación para o sorteo dun tratamento de beleza.

Ademais, tamén poderán optar a unha sesión de balneario, rexistrando o seu ticket de compra a través do QR habilitado ou directamente na web: www.comerciocarballino.com.

Como acción destacada, os días venres 2 e sábado 3 de maio, instalarase unha caseta do CCA na Praza Maior do Carballiño, onde se regalará unha flor a todas as persoas que se acheguen a depositar a súa papeleta de participación.

Horarios da caseta:

• Venres 2 de maio: de 11:00 a 13:30 h e de 18:00 a 20:00 h

• Sábado 3 de maio: de 11:00 a 13:30 h

Ademais, quen o prefira tamén poderán deixar a súa papeleta directamente no establecemento onde realizaron a compra. O presidente do Centro Comercial Aberto, Julián Garriga, anima á cidadanía para participar nesta campaña: “O Día da Nai é unha ocasión moi especial, e desde o CCA queremos convidar a todos os veciños e veciñas a facer as súas compras no comercio local. Porque regalar con corazón tamén é apoiar ás tendas que dan vida ás nosas rúas.”

Pola súa banda, a xerente do CCA, Noelia Mares, destaca o valor deste tipo de iniciativas: “Campañas como esta son fundamentais para incentivar o consumo local, xerar movemento nos establecementos e premiar a fidelidade dos nosos clientes. Queremos que a experiencia de compra sexa tamén unha forma de celebración.”

Esta campaña está pensada para dinamizar o comercio de Carballiño nunha data clave, xerando proximidade, emoción e beneficios tanto para os comercios como para os seus clientes. Esta campaña conta co apoio da Consellería de Emprego, Comercio e Emigración da Xunta de Galicia, no marco do Plan Estratéxico de impulso ao Comercio de proximidade, que ten como obxectivo dinamizar e incentivar a actividade comercial nos núcleos urbanos galegos.

A Deputación de Ourense xa dispón dun estudo pioneiro sobre as claves da lonxevidade na provincia, despois dunha análise cualitativa e cuantitativa a partir de entrevistas a centenarios de Ourense, realizadas por un equipo de expertos multidisciplinar e financiado pola institución provincial.

“O fenómeno das persoas centenarias”, investigación liderada pola asociación Ourensividade, foi presentada hoxe nun acto no Centro Cultural Marcos Valcárcel ao que acudiron tamén dúas das participantes no estudo, Elisa Soria e Laura Fernández. O presidente provincial, Luis Menor, felicitou ás centenarias por acadar a súa idade con calidade de vida e puxo en valor as “políticas sociais” da Deputación de Ourense, anunciando a potenciación do actual servizo de teleasistencia, para chegar a unha inversión de dous millóns de euros en catro anos.

Menor tamén fixo referencia a plans contra a soidade non desexada, poñendo énfase na accesibilidade á vivenda, cunha convocatoria de axudas técnicas para crear fogares adaptados, que sairá proximamente. Así, prevese que a teleasistencia acade unha cobertura de máis de 3.000 persoas na provincia, con melloras tecnolóxicas grazas á cooperación con Illumium, entidade do grupo Fundación Once.

O presidente provincial tamén lembrou que os servizos públicos que cofinancia a Deputación en materia de axuda no fogar contan cun millón de euros de investimento, a través das iniciativas prestadas polos concellos. Ademais, Luis Menor fixo referencia ao termalismo social, destacando este programa de acceso aos balnearios como “moi exitoso” e con novidades, xa que proximamente se vai poñer en marcha unha iniciativa para combater o Deterioro Cognitivo Leve.

“Somos exemplo dunha institución volcada coa xente maior e coas súas condicións de vida, queremos seguir fomentando que a xente poida vivir na súa casa, mellorando a nosa resposta”, sinalou Menor sobre os programas da Deputación en materia de axuda aos maiores de Ourense. Por outra banda, felicitou aos responsables da investigación, “pioneira e científica”, que servirá como “folla de ruta” para deseñar programas de atención á cidadanía.

126 variables analizadas

Pola súa banda, Roberto Fernández, investigador principal do estudo científico, citou algunhas conclusións clave. Tras analizar 126 variables nunha mostra de centenarios da provincia, os expertos chegaron á conclusión de que o 41% dos entrevistados carecía de deterioro cognitivo ou tíñao nun estado moi leve. Ademais, só un 12% dos centenarios tiña sobrepeso.

En canto a alimentación, os expertos probaron que o autoconsumo, a través dos produtos da horta, era un factor común na maioría dos entrevistados. Outro dos resultados relevantes para os investigadores foi a gran laboriosidade, concluíndo que para o 70% das persoas era importante este aspecto, xirando a súa vida en torno ao traballo.

Por último, tamén puxeron en valor a resiliencia dos maiores, no sentido de adaptarse aos cambios e repoñerse de situacións adversas, como factor coincidente entre os lonxevos. O estudo científico, levado a cabo por profesionais de diferentes ámbitos como a medicina, a enfermería ou a farmacia foi aprobado polo Comité de Ética da Investigación de Pontevedra-Vigo-Ourense.

As centenarias

Durante o acto, tamén interviñeron dúas das centenarias que participaron no estudo científico financiado pola Deputación de Ourense. “Hai que seguir tendo inquedanzas, cultivándose tanto física como intelectualmente, esa é a forma de adaptarse á vida actual”, dixo Elisa Soria durante o acto. Pola súa banda, Laura Fernández atribuíu a “familia e amigos” os segredos da felicidade. Ligazón ao enlace O estudo pode atoparse na seguinte ligazón:

https://oqg-primary-prod-content.s3.us-east-1.amazonaws.com/uploads/pdf/1745930437919_6809f10523aef.pdf

-- 

O Templo da Veracruz, declarado Ben de Interese Cultural (BIC) dende o ano 1995 coa categoría de Monumento Histórico-Artístico, será obxecto dunha actuación integral na súa iluminación ornamental exterior e no contorno axardinado da praza da Veracruz.

Búscase así paliar as deficiencias no seu funcionamento e resaltar a singularidade arquitectónica do edificio.

Dado o alto valor patrimonial do templo, os traballos desenvolveranse co máximo respecto ao conxunto arquitectónico e a nova instalación traducirase en puntos de luz máis respectuosos coa arquitectura orixinal.

Así mesmo, o uso de tecnoloxía LED suporá unha mellora substancial na eficiencia enerxética, ao tempo que contribuirá á redución da contaminación luminosa e ao control do exceso de iluminación sobre o monumento.

Como parte do proxecto, tamén se recuperarán os xogos de luz ideados polo arquitecto Antonio Palacios, autor do templo, coincidindo coa conmemoración do 150 aniversario do seu nacemento.

Así pois, esta iluminación contribuirá non só á mellora estética e funcional do contorno, senón tamén á valorización do interior do templo e á súa identidade histórica e cultural.

O concelleiro de turismo, Manolo Dacal, indica que a obra supón un investimento de 87.000 euros e comezará a súa execución no vindeiro mes. Esta actuación forma parte das actuacións de mellora da eficiencia enerxética do Plan de Sostibilidade Turística en Destino “O Carballiño e a gastronomía do polbo”, enmarcado no Plan de Recuperación, Transformación e Resiliencia e financiado pola Unión Europea a través dos fondos
NextGenerationEU.