A Xunta vén de pechar senllos proxectos piloto nos Polos de emprendemento e apoio ao emprego de Ferrol e do Carballiño como preludio da aposta a prol da dinamización de sectores económicos estratéxicos que seguirá desenvolvendo neste ano 2025 no marco da Rede que conta con 15 centros operativos. Avogando pola revitalización de eidos como o da construción, o tecnolóxico ou o comercio no caso ferrolán; e do sector primario, o do turismo ou o dos coidados no do Carballiño, esta estratexia enmárcase nos 32 millóns de euros que investirá o Goberno galego neste exercicio para darlle un pulo ao emprendemento aliñado co territorio atraendo o talento de colectivos prioritarios.

En concreto, os proxectos piloto calibraron o nivel de necesidade por parte dos diferentes axentes das respectivas contornas dun traballo dinamizador arredor das distintas transicións en marcha, así como a aproximación diferente que se poida requirir en comarcas urbanas e rurais. Tamén buscaban capacitar as organizacións do territorio para este proceso de catalización do ecosistema local.

Así, ao abeiro das iniciativas en Ferrol e no Carballiño o obxectivo era avanzar cara a unha especialización intelixente desde a complexidade de cada territorio, centrándose en servizos esenciais para cada zona e apostando polo aproveitamento dos recursos propios coa prioritaria implicación dos axentes involucrados en beneficio da cidadanía.

Primeiras conclusións dos proxectos piloto
Os proxectos piloto que tiveron os Polos de Ferrol e do Carballiño como impulsores lograron unificar os axentes locais en senllas estratexias colaborativas de dinamización emprendedora que avogaron por respectar e potenciar a identidade de cada contorna como marca mirando sempre ao futuro económico de cada bisbarra.

Nesa liña, no caso de Ferrolterra púxose o foco na rehabilitación do corazón da cidade, no reimpulso do comercio local, na súa conexión co resto de territorio ou na súa proxección ás novas tecnoloxías enerxéticas. No do Carballiño, abordáronse os retos de integración e atracción de poboación ou de posta en valor dos recursos propios conectando sectores estratéxicos como o turismo e o agro.

Tras a realización dos pilotos, o obxectivo é seguir avanzando en diversas reunións dirixidas por ambos Polos, traballando na especialización intelixente que se persegue de cara a reflectir a esencia de cada lugar como marca con valor propio. Unha metodoloxía que se busca estender neste 2025 ao resto de centros que integran a Rede de polos de emprendemento e apoio ao emprego establecida en Galicia no verán de 2021.

Balance da Rede
Desde a súa posta en marcha, a Rede de polos leva atendido máis de 3.000 proxectos empresariais, dos que preto de 500 se localizan na oficina ferrolá e case 200 na do Carballiño. Entre o total de iniciativas a nivel galego, destacan os servizos, seguidos do comercio e da hostalaría, representando un 7% delas negocios que buscan remuda.

Ás persoas emprendedoras que se achegaron á Rede de polos —un 59% delas, mulleres— prestáronselles preto de 8.400 titorías. Canto ás actividades, téñense realizado máis dun milleiro entre reunións con entidades do territorio, formacións e eventos da Rede.

A Consellería de Emprego, Comercio e Emigración destinará neste 2025 máis de 32 millóns de euros a darlle un pulo ao emprendemento aliñado co territorio, a través da Rede de polos e atraendo o talento de colectivos prioritarios como a xente nova ou os galegos retornados, con especial apoio aos traballadores autónomos. Un investimento que terá lugar no ano no que Galicia ostentará o recoñecemento de Rexión emprendedora europea, unha distinción outorgada non só polo bo funcionamento da Rede senón tamén por outros proxectos de impulso emprendedor como as comunidades para atraer nómades dixitais ao rural galego.

A Xunta licitará neste mes de xaneiro no que andamos a obra de construción do novo centro de saúde de Boborás, cun investimento que vai rondar os 2 millóns de euros.

O futuro centro de saúde de Boborás suporá a ampliación da súa superficie en máis de 200 m2, ata chegar aos 682 m2, e permitirá contar como novidade cunha consulta para a saúde da muller, unha consulta polivalente de urxencias e outra de pacientes respiratorios, así como unha sala de xuntas. Ademais permitirá contar con dúas consultas de medicina e dúas de enfermaría nun edificio novo.

O deseño elixido para o novo centro de saúde busca a mellor integración coa contorna en todos os seus aspectos: implantación da parcela, volumetría, deseño ou emprego de materiais característicos da zona, como a pedra e a madeira.

O edificio conformarase como un elemento lonxitudinal, paralelo á vía de acceso, Evaristo Riande, próximo ao borde sur da parcela. O acceso de ambulancias e de persoal situarase na zona sueste da parcela.

A construción do novo centro de saúde de Boborás está previsto que poida estar finalizada a finais de 2026 ou comezos de 2027, despois de que se formalice o contrato de obra no verán, cun prazo de execución de 16 meses.

Escoita aquí a entrevista en COPE O Carballiño á alcaldesa de Boborás, Patricia Torres:

O Cine-Club Carbaliño comeza a súa programación para 2025 o día 10 con Marco, con 5 nominacións nos premios Goya, entre elas as de Mellor película, Mellor actor protagonista (un Eduard Fernández en estado de gracia este último ano) ou a de Mellor guión. O filme foi nominado tamén á mellor película no Festival de Venecia. Público e crítica coinciden en sinalala como unha das grandes películas deste ano.

Continuaremos o venres día 17 con unha comedia, a última película de Dani de la Orden, Casa en llamas, gañadora do premio do púlico nos Premios Forqué e con moitas nominacións nos Goya (8), nos Premios Feroz (8) e nos Premios Gaudí (nada menos que 14). Outra das grandes favoritas para ser nomeada como mellor película española do ano.

O venres 24 teremos unha das sorpresas do cine español, Las chicas de la estación, de Juana Macías, que se confirma como unha das grandes cineastas do noso país. Drama social baseado en feitos reais, é un filme de denuncia á vez que unha fermosa historia de amizade entre mulleres.

E pecharemos o mes de xaneiro o día 31 co debut trala cámara de Paz Vega. O seu filme, Rita, valeulle a nominación á Mellor director novel nesta edición dos Goya e o aplauso unámime da crítica. Unha auténtica e grata sorpresa.

Coma sempre os pases serán ás 20:00 e ás 22:30 horas no Auditorio Manuel María do Carballiño.

Primeiro venres do ano neste dia 3 de xaneiro, en consecuencia primeira tertulia do ano en COPE O Carballiño, na que participan Fátima Gómez, Sebas Lamazares e Manuel Nogueira, xunto a Xan Pinal.

Escóitaa aquí:

O concello do Carballiño decide suspender a Cabalgata de Reis e o espectáculo que estaba programado para celebrar na torre do Templo da Veracruz, ante a previsión dun empeoramento das condicións meteorolóxicas para este domingo 5 de xaneiro no Carballiño, con previsión de chuvias xeralizadas.

No seu lugar, a concellería de cultura anuncia que o recibimento aos magos de Oriente será no auditorio do Carballiño, no  transcurso dun espectáculo artístico e musical que terá unha duración aproximada de dúas horas, entre as 5 e as 7 da tarde.

A Xunta de Galicia amplía o crédito do Bono Concilia Familia para chegar neste 2024 a 14.800 familias, un 37% máis respecto das beneficiadas na convocatoria anterior e 1.300 máis sobre as previsións iniciais fixadas para este exercicio. O Diario Oficial de Galicia (DOG) publicou o pasado 31 de decembro un aumento do orzamento destinado a este programa en 128.300 euros para acadar un montante total de preto de 2,8 millóns de euros, que é a maior dotación económica asignada ao Bono Concilia Familia desde a súa posta en marcha.

O obxectivo destas axudas é facilitar a conciliación ás familias con nenos de ata 13 anos nas que os dous proxenitores traballan ou un único proxenitor no caso das familias monoparentais. Están pensadas para que as nais e pais poidan atender as súas necesidades de conciliación de carácter puntual, por exemplo: por enfermidade, cuestións laborais ou en períodos das vacacións escolares.

A Administración autonómica xa resolveu unha parte das solicitudes de axudas presentadas, cuxo prazo para facelo rematou a mediados do pasado mes de outubro. As contías que están a recibir as familias poden ser de 500 euros para a contratación dunha persoa empregada do fogar ou servizos de atención á infancia a domicilio; ou de 200 euros por cada neno para o pago de campamentos ou doutros recursos de conciliación, como ludotecas ou espazos infantís. Polo tanto, unha familia con tres fillos pode chegar a percibir unha axuda de ata 600 euros.

O Bono Concilia Familia forma parte das medidas de apoio ás nais e pais que ten en marcha a Xunta de Galicia, tales como: a gratuidade das escolas infantís de 0 a 3 anos, as casas niño e as casas do maior ou a tarxeta Benvida.