A Ponte Esperela, no de Leiro, loce xa a súa nova iluminación ornamental, na que a Xunta realizou un investimento de máis de 360.000€. A conselleira de Vivenda e Planificación de Infraestruturas, María Martínez Allegue, xunto ao delegado territorial da Xunta en Ourense, Manuel Pardo, supervisou os traballos realizados nesta emblemática ponte, que segundo subliñou, “a poñen aínda máis en valor”.

As actuacións realizadas buscaban completar unha anterior intervención de limpeza neste elemento patrimonial do concello de Leiro, que conecta o núcleo urbano de Leiro e a súa área fluvial co núcleo rural da Esperela e a súa área de lecer, coñecida como Campo da Esperela. Deste xeito, dotouse á ponte dunha nova iluminación nos seus alzados e na calzada, e tamén se renovou o pavimento da propia estrada OU-209 sobre a ponte.

Trátase, como subliñou a conselleira, dunha intervención “que ademais de acentuar a estética da ponte, aumenta a súa funcionalidade e seguridade, sempre respectando a contorna natural desta infraestrutura e a súa importancia patrimonial”.

Allegue destacou así mesmo que se cumpre tamén coa máxima de acadar a eficiencia enerxética, “requisitos sempre presentes nas obras que impulsa a Xunta para a mellora das infraestruturas que forman parte do noso patrimonio”.

Neste alumeado ornamental, tivéronse en conta aspectos fundamentais como a tipoloxía e imaxe desta ponte de pedra, a súa contorna pouco urbanizada, cos espazos recreativos nas marxes do río Avia, así como as directrices de paisaxe de Galicia. Así, optouse por unha iluminación cálida e sutil, que baña de xeito uniforme o volume da ponte sen resaltar ningún dos seus elementos en particular, e con especial coidado en evitar a contaminación lumínica.

Logrouse coa instalación de proxectores situados en ambas marxes do río, augas arriba e abaixo, e tamén con proxectores de parede situados no terreo para iluminar o muro de acompañamento na beira dereita, o único visible desde a área fluvial de Leiro. Iluminouse tamén con proxectores a calzada sobre a ponte e o tramo de vía dos muros de acompañamento.

A conselleira anunciou que no vindeiro ano completaranse as actuacións na ponte coa instalación de sinalización semafórica, en base a unha proposta do Concello. Neste senso, apuntou que a Xunta seguirá a colaborar coa entidade local “para abordar actuacións que poidan seguir a mellorar a calidade de vida da veciñanza”.

A conselleira do Medio Rural, María José Gómez, acompañada polo director xeral de Gandaría, Agricultura e Industrias Agroalimentarias, José Balseiros, e polo director da Axencia Galega da Calidade Alimentaria, Martín Alemparte, mantivo en San Caetano unha xuntanza cos responsables do Consello Regulador da Denominación de Orixe Ribeiro encabezados pola súa presidenta, Concha Iglesias.

No encontro avaliouse a situación actual e as perspectivas de futuro desta zona vitivinícola no que atinxe tanto ao ámbito da produción como da industria, a comercialización ou a calidade. Os representantes da Xunta reiteraron o seu apoio a esta denominación, a máis antiga de Galicia, e a súa vontade de continuar traballando para garantir a súa sustentabilidade.

Neste sentido, avanzouse por exemplo na implementación dos diferentes instrumentos da Lei de recuperación da terra agraria -en particular, os polígonos agroforestais- para poñer en valor áreas abandonadas ou infrautilizadas no territorio da DO. Así mesmo, avaliáronse aspectos relacionados coa sanidade vexetal e nomeadamente coa loita fronte a doenzas da vide, con especial atención á flavescencia dourada.

Tamén se abordou a situación do mercado no que atinxe en particular aos viños tintos e, en relación con este tema, á necesidade de sumar esforzos nos eidos da promoción e a comercialización, diante da tendencia internacional de baixada de consumo, que incide nos excedentes de produción.
Datos da denominación de orixe Ribeiro

Con datos a 31 de decembro de 2023, a DO Ribeiro conta cunha superficie inscrita de 1.185 hectáreas, preto de 1.600 viticultores e 102 industrias. A produción de uva na última campaña superou os 11,5 millóns de quilos e o valor económico estimado situouse en preto dos 26,4 millóns de euros.

O portavoz de Espazo Común foi moi crítico coa decisión de excluir desta mesa de contratación a representates da corporación municipal, estaba previsto que fosen o alcalde Fumega por parte do goberno e Pachi Vázquez pola oposición, xunto con seis técnicos da administración.

Finalmente, o concello do Carballiño -tal como demandaba o portavoz do Partido Popular Pepe Castro-Gil, decide que esta mesa de contratación estea formada só con técnicos, serán 3 designados polo concello e outros 3 nomeados pola Deputación. Espazo Común considera que "estamos ante un pelotazo" no que se decide deixar unha decisión transcendental para o concello do Carballiño en mans da Deputación.

Escoita aquí a entrevista a Adofo Nogueira:

A Confederación Empresarial de Ourense celebrou hoxe no restaurante A Carballeira de Santa Cruz de Arrabaldo o acto de entrega dos seus premios anuais, entre eles este premio "Excelencia" á responsablidade social empresarial, que foi para recoñecer á Cooperativa de Santa Mariña de Loureiro, no Irixo, "polo seu compromiso constante cos seus socios, familias e a comunidade na que se ubica".

Fundada en 1966 polo que foi o párrroco -xa falecido- Antonio González Bernárdez, sumando xa 58 anos de actividade, e a pesar de non poucas dificultades que mesmo puxeron en perigo a súa continuidade, continúa na actualidade elaborando os seus productos lácteos, que tanto recoñecemento teñen no mercado local e galego.

Foron nove as propostas recibidas unha vez que remataba o prazo para presentarse a esta licitación, unha delas resultará adxudicataria do contrato.

As empresas que presentaron as súas ofertas foron Acciona Agua Servicios, Espina y Delfín, Gestagua, GS Inima Environmet, Sacyr Agua e Viaqua, asi como as UTE Copasa-Geseco-Espina obras hidráulicas, Aqualia-Petrolam e Facsa-Oreco Balgón.

Cun orzamento base de licitación de 60.873.004,11 euros, impostos incluidos,o contrato extenderáse por un periodo de 20 anos. A xestión incluirá operacións, mantemento e modernización de infraestruturas hidráulicas, así como a implementación de tecnoloxías avanzadas, e comprende a xestión integral dos servizos de abastecemento de auga potable e saneamento no termo municipal do Carballiño, tanto no casco urbano como nas parroquial do rural.

As tarefas abarcan desde a operación de estacións de tratamento de auga potable e depuración, ata a detección e reparación de fugas en redes. A adxudicataria tamén será responsable da atención ao usuario, actualización de censos, facturación e elaboración de plans estratéxicos, como un Plan Director a cinco anos para optimizar recursos e infraestruturas.

En canto á oferta de melloras, a empresa adxudicataria poderá ofertar diferentes solucións innovadoras, como sistemas de telecontrol e xestión comercial dixitalizada, co fin de garantir a calidade da auga fornecida conforme a normativas vixentes. Así mesmo, comprometerase a realizar investimentos obrigatorios para renovar e ampliar infraestruturas, incluíndo a sectorización de redes e a instalación de novos contadores con telelectura.

A Deputación de Ourense reforza o programa EsquiOU, unha iniciativa para que nenos e nenas da provincia aprendan a esquiar na única estación de montaña de Galicia, Manzaneda, pero tamén permite que teñan a oportunidade de realizar diferentes actividades lúdicas e deportivas. Este programa liderado pola institución provincial aumenta para a próxima edición o número de prazas, ata superar por primeira vez a barreira das mil prazas (1.050), para dar resposta a altísima demanda das familias que apostan dende 2015 por este programa para os seus rapaces.

Ademais, o EsquiOU contará con importantes novidades, como o avance no compromiso coa inclusión social, xa que haberá prazas reservadas para menores con discapacidade, co obxectivo de que estes rapaces poidan acceder ao deporte e a diversión sen barreiras de ningún tipo.

A vicepresidenta primeira da Deputación, Marta Nóvoa, e o director de Turismo de Galicia, Xosé Merelles, firmaron hoxe no Pazo Provincial o convenio de colaboración para a próxima edición do programa EsquiOU, cuxa inscrición se pode realizar a partir de hoxe a través dun formulario electrónico, dispoñible na web da Deputación. O prazo para presentar as solicitudes remata o 27 de decembro ás 14,00 horas.

Durante a firma do convenio, Marta Nóvoa puxo en valor o aumento de prazas "para dar resposta ás familias" e o "compromiso social" coa novidade de reservas para menores con discapacidade.

Pola súa banda, Xosé Merelles, amosou a súa "satisfacción por ver fortalecida a demanda da estación de montaña na época de menor demanda, durante a semana".

Prezo moi reducido

O prezo da estancia por participante será de 30 euros, xa que a Deputación subvenciona o resto do custe do programa. Neste sentido, o orzamento adicado ao EsquiOU 2025 alcanza cifras históricas, con 102.000 euros de inversión, un 45% máis que o adxudicado en anos anteriores, como solución ao crecente interese das familias da provincia por anotar aos seus rapaces no programa.

A selección dos beneficiarios farase por estrita orde de inscrición. Se algún participante quedase sen praza na quenda que lle corresponde, pasaría a unha lista de agarda para ser inscrito no caso de quedar prazas baleiras noutras quendas.

As 1.050 prazas do EsquiOU están destinadas a nenos nacidos entre o 1 de xaneiro de 2013 e o 31 de decembro de 2016 na provincia de Ourense. O total de prazas estará dividido en 10 quendas de 105 prazas cada unha. De estas, cinco estarán reservadas para menores con algún tipo de discapacidade. Os rapaces, ademais de estar permanentemente supervisados por monitores formados e cualificados no tratamento de nenos con algunha dificultade física ou intelectual, tamén poderán ir acompañados dun pai, nai, titor ou membro do centro educativo ao que pertenzan.

Tres días en réxime completo

A duración da estancia é de tres días e dúas noites, sempre de luns a mércores, e inclúe aloxamento, pensión alimenticia completa, curso de esquí e as demais actividades complementarias, como poden ser tiro con arco, sendeirismo ou natación. Ademais, se as condicións meteorolóxicas non foran favorables, substituirase o programa de esquí pola oferta de actividades de montaña, como multiaventura ou rocódromo.

O programa desenvolverase por quendas, nas que se fai un reparto dos nenos por proximidade xeográfica para lograr grupos máis homoxéneos. A primeira quenda será do 20 ao 22 de xaneiro de 2025, para os nenos das comarcas de Terra de Celanova e Baixa Limia; do 27 ao 29 de xaneiro será a quenda dos de O Ribeiro e O Carballiño; do 3 de febreiro ao 5 de febreiro, Verín e Viana; do 10 ao 12 de febreiro, Valdeorras; do 17 ao 19 de febreiro, Allariz-Maceda-A Limia; do 24 ao 26 de febreiro, Terra de Caldelas e Terra de Trives; do 3 ao 5 de marzo, Ourense; do 10 ao 12 de marzo, Ourense rural: do 17 ao 19 de marzo, segunda quenda da zona de Ourense e, por último, do 24 ao 26 de marzo, a segunda quenda de Ourense rural.

A Deputación de Ourense, na súa aposta pola cultura, traballa na posta en marcha dunha páxina web renovada onde se poderá atopar o catálogo editorial da institución, que recolle todo o que publicou ata o momento a Deputación. Trátase dunha nova ferramenta que facilitará o acceso a obras científicas, artísticas, literarias ou musicais, tanto de autores ourensáns como de outros divulgadores da realidade de Ourense.

A Deputación ten editados case 600 títulos, que reflicten o importante esforzo que o organismo provincial dedica a este tipo de difusión. A web pretende facilitar a compra online destas obras, que ata agora se podían mercar a través de librarías ou da propia oficina de Publicacións.

Na web pódese consultar o catálogo editorial de diferente formas: por palabras chave, por autor, título ou ano de publicación. Ademais, pódese acceder a diferentes categorías ou temas aos que se refiren as publicacións, como a provincia en imaxes, biografías e personaxes de Ourense, compilacións de artigos publicados en prensa, emigración, patrimonio ou termalismo.

Obxectivo de dar cabida a traballos inéditos

Ademais, tamén poden consultar as revistas editadas pola Deputación e tamén outras que, sen ser editadas pola institución provincial, pertencen a entidades sen ánimo de lucro que deron autorización para que se poda acceder a elas dende a web da Deputación.

“Pretendemos que, nun futuro, esta páxina sirva tamén de repositorio no que teñan cabida traballos inéditos de interese para a nosa provincia cuxos autores busquen unha difusión dixital”, engade Ana Malingre, responsable da Sección Arquivo e Publicacións da Deputación.

Outra das novidades nas que se traballa é na posibilidade de que os autores, cuxas obras estean esgotadas, dean o seu consentimento para dixitalizar os seus traballos en PDF e poñelos dispoñibles nesa nova páxina web.

Un servizo con historia

A Deputación comezou a publicar en 1976, a través do “Instituto de Estudios Orensanos Padre Feijoo”, cuxos fins eran realizar, promover, subvencionar e coordinar as investigacións e estudos de natureza científica, histórica, literaria e artística referida á provincia ou rexión que redundasen no prestixio e honra de Ourense e asesorar á Deputación en materia cultural.

Disolto o instituto, creouse o Servizo de Publicacións. Hoxe, existe un Negociado, dependente da Sección de Arquivo e Publicacións, desde o que a institución continúa co mesmo obxectivo, afanándose en profundar no coñecemento da provincia.

Cada ano, elaborase dende a Deputación de Ourense un Plan de publicacións e tamén se pon en marcha un concurso, para elixir as obras que se publicarán ao longo do exercicio.

Todos os títulos editados pola institución chegan de forma gratuíta á rede de bibliotecas públicas da provincia, ás máis importantes do resto de Galicia e a calquera outro punto de lectura que o solicite.

Esta nova canle permitirá achegar aínda máis a cultura aos cidadáns e a todos aqueles interesados na realidade da provincia, no seu sentido máis amplo.
--