Trátase dunha cafetería sita nos soportais da rúa Rosalía de Castro do Carballiño, á que visitaron os cacos cun intervalo de apenas 24 horas nas dúas noites da pasada fin de semana.

En ambos casos, conseguiron entrar no interior do local forzando a porta principal acristalada, causando diversos estropicios. Na primeira noite, conseguiron levarse a recadación da máquina "tragaperras" e na segunda noite apoderaronse dunhos 400 euros en efectivo, o importe de propinas que se gardaba nun bote.

Outros establecementos comerciais e de hostelería do mesmo entorno foron obxeto de intento de roubo nestas mesmas últimas noites no Carballiño.

Xunta e Deputación de Ourense veñen de asinar un novo convenio de colaboración que vai permitir a ampliación dos efectivos, asi como a actualizacións dos custos salariais dos GES da provincia, entre eles o do concello de Avión.

Consecuencia inmediata do novo convenio entre ambas administracións, será a ampliación en 3 profesionais do Grupo de Emerxencias Supramunicipal do concello de Avión, que pasa a contar con 12 efectivos.

O custo anual do servizo ascenderá agora, coa actualización salarial, aos 313.000 euros, unha cantidade da que o 52,5% corresponderá á Xunta, o 40% á Deputación e o 7,5% restante ao concello de Avión.

Este Grupo de Emerxencias Supramunicipais de Avión non so da servizo de emerxencias ao propio municipio, senón que tamén o fai cando é requirido a través do 112 para actúar noutros concellos das comarcas do Carballiño e O Ribeiro, e mesmo ten realizado actuacións en concellos próximos da provincia de Pontevedra.

O director do Igape, Fernando Guldrís, vén de manter un encontro con Nieves Olivera, directora xeral da Escuela de Organización Industrial (EOI), e outros representantes do organismo, na procura de avaliar o estado dos distintos proxectos conxuntos que se están a promover no contexto do acordo marco entre os dous organismos. Unha colaboración que, como explicou Guldrís, busca reforzar a aposta polo emprendemento na procura de consolidar o seu papel como “vía de recuperación económica tras a pandemia”.

“Temos unha Galicia emprendedora que sabe como innovar, e o que queremos e facilitarlles ese camiño que se traduce na mellora competitiva do noso tecido produtivo”, expuxo Guldrís. Un escenario no que destacou os espazos coworking, lugares de traballo destinados a emprendedores e que contemplan no seu conxunto distintas actividades e asesoramento.

Estes espazos, proxecto conxunto que veñen desenvolvendo a Vicepresidencia segunda e Consellería de Economía, Empresa e Innovación, a través do Igape, e a Escuela de Organización Industrial, buscan aumentar as probabilidades de éxito de proxectos innovadores en fases temperás de desenvolvemento, e teñen permitido ata o de agora impulsar 700 novos proxectos emprendedores en Galicia.

Para dar continuidade a este traballo, o novos taller que se pon en marcha na comarca do Carballiño, que terá a súa sede no concello do Irixo, facilitará, ata finais de 2022, a posta en marcha de novas iniciativas empresarias.

Este novo espazo coworking contempla no seu conxunto distintas actividades e asesoramento, ofrecen aos participantes un mentor individual para o seu proxecto, que os acompañará no deseño de modelo de negocio; formación específica, mediante talleres prácticos centrados en temas de interese; e distintos eventos, como xornadas de networking ou encontros con actores sociais e económicos relevantes.

O Carballiño ten hoxe 29 contaxios menos en relación á pasada fin de semana, quedandose con 333 activos. Tamén baixa a incidencia acumulada a 7 dias, que se queda hoxe nos 194 novos positivos diagnosticados no municipio carballiñés neste intervalo de tempo.

Unha incidencia acumulada a unha semana que sí se incrementa en Leiro, con 21 novos positivos, e Avión con 15. 

En canto contaxios activos, temos 46 en Maside, que volve poñerse por diante de Boborás, que baixa ata os 37.  Tamén baixan Cea, ata os 21 e Piñor, ata os 12. Sen cambios siñificativos no resto de concellos.

O conselleiro de Cultura, Educación e Universidade, Román Rodríguez, desprazouse ata a empresa Talleres Dizmar, para visitar os alumnos do instituto IES Manuel Chamoso Lamas que cursan o ciclo de FP Dula de Soldadura e calderairía nesta empresa, así como en Gri Towers Galicia S.L.

No transcurso da visita, na que o conselleiro estivo acompañado polo alcalde do Carballiño Francisco Fumega e o concelleiro de promoción económica Manolo Dacal, avanzou que o seu departamento está a ultimar a nova Estratexia Galega de FP para fortalecer o crecemento destas ensinanzas, que incrementaron a súa matrícula en máis do 70% desde o ano 2008. “Presentaremos esta nova folla de ruta nas próximas semanas e nela terá especial relevancia o impulso da FP Dual, que é a modalidade que queremos reforzar máis, dado que rexistra niveis de empregabilidade superiores ao 90%”, sinalou o conselleiro.

Así mesmo, lembrou que a nova estratexia impulsará a innovación e a dixitalización, cuestións nas que será de especial importancia o papel que desenvolva o Centro Galego de Innovación da FP en Ourense. “Estou seguro de que este novo espazo vai ser un piar fundamental para o desenvolvemento desta folla de ruta e para o impulso da Formación Profesional como unha das accións estratéxicas do Goberno galego”, dixo Román Rodríguez.

O titular do departamento educativo da Xunta de Galicia quixo destacar a implicación de do Chamoso Lamas no desenvolvemento de proxectos de FP Dual e, en especial, “o compromiso de empresas como Dizmar e Gri Towers Galicia S.L. que fan posible que esta modalidade de formación sexa cada vez máis demandada, debido a que é unha opción de futuro para os nosos mozos e mozas”. Este ano no instituto Chamoso Lamas teñen en marcha catro iniciativas destas características, dúas no ciclo de Automatización e robótica industrial, un no de Electromecánica de maquinaria e outro no de Soldadura e caldeirería, cun total de 35 alumnos”, explicou. “Isto significa –engadiu o conselleiro– que o equipo directivo e docente deste centro realiza un importante labor de colaboración e diálogo coas empresas da contorna, como é o caso da que visitamos hoxe, buscando oportunidades de formación e emprego para o seu alumado”. “En definitiva, demostra que o instituto Manuel Chamoso Lamas e as empresas da contorna xa camiñan pola senda do que vai ser a FP do futuro”, salientou.

O conselleiro de Educación aproveitou a súa visita ao Carballiño para anunciar a obra de ampliación que a Xunta de Galicia vai realizar neste instituto, que suporá un investimento de 1,2M€. O obxectivo desta intervención é dotar as súas instalación de novos talleres para o ciclo de Soldadura e Caldeiraría. Non en balde, este curso o instituto está a impartir este ciclo tamén na modalidade Dual, en colaboración coas empresas Gri Towers Galicia S.L. e Talleres Dizmar S.L. Ao non dispor de espazos no centro, os alumnos desprázanse á segunda das devanditas empresas para realizar boa parte da formación práctica. O novo edificio de talleres contará cunha superficie construída de 1.030 m² e cunha superficie total útil de 1.412 m². Contará con aula polivalente, laboratorio de ensaios e talleres de construcións metálicas e de mecanizado. Dada a topografía do terreo, cun importante desnivel, aproveitarase para semisoterrar os talleres.

Tal e como explicou o conselleiro, “o proxecto está en fase de redacción e contamos con que se nos entregue a finais deste mes”. Ao tratarse dunha obra de envergadura, o prazo de execución estimado é de nove meses, “polo que agardamos licitar a obra neste ano e que estea lista para o curso 2023/24”.

A titular do Xulgado nº 2 do Carballiño ven de decretar mediante un auto con data deste 19 de Xaneiro de 2022 o sobreseemento provisional das dilixencias previas abertas tras a denuncia presentada por un particular contra o alcalde Francisco Fumega por un delito de prevaricación, unha causa na que tamén estaban investigados os exalcaldes Carlos Montes e Argimiro Marnotes, asi como os exconcelleiros Bernardo García, Manuel Amil e Magín Daparte.

A denuncia centrábase na licenza de obra concedida para unha edificación con fachadas á rua do Paseo e a Alameda e a non execución dunha órde de derrubo dun ático ilegal na citada edificación, que finalmente levou a cabo o promotor no transcurso do pasado ano 2021, tras sucesivos requerimentos do concello do Carballiño dende que se ordenou a paralización da obra no ano 2009.

O auto da xuíza manifesta que "non aparece debidamente xustificada a perpetración do delito que motivou a formación da causa" e decreta o sobreseimento provisional das dilixencias abertas. A resolución xudicial é susceptible de ser impugnada, mediante reposición de recurso no prazo de 3 dias ou de apelación nun prazo de 5 dias.