O Voceiro do Grupo Municipal Socialista do Concello do Irixo, Iago Fariñas Valiña, presentou as pasadas semanas unha moción para ser debatida no pleno instando ao Concello Á ADQUISICIÓN PARA A SÚA CONSERVACIÓN E POSTA EN VALOR DAS CASAS REITORAIS ABANDONADAS NO CONCELLO DO IRIXO.

O concello do Irixo, do que forman parte doce parroquias, ten a meirande parte das súas casas reitorais en auténtica ruína como a de San Cosme ou a de Reádegos , Froufe ou Espiñeira; ou en semi-ruína, como a de Dadín, Cangues ou Corneda, esta última dun gran valor artístico e arquitectónico e en continua espoliación. Xa no ano 2002 o concello anunciou publicamente a adquisición da casa reitoral de San Cosme para turismo Rural e así fora reflectido nos medios de comunicación, pero pasados, máis, de 14 anos nada se sabe da compra de ningunha destas casas reitorais que forman parte do noso rico patrimonio, aínda que non sexan propiedade deste Concello.

O Grupo Municipal Socialista, indica que estas accións se poden realizar sen prexuízo de incluír outras casas reitorais, edificacións ou terreos que puideran quedar en desuso como a do Campo, ou en estado de abandono progresivo, pero actualmente de forma mais urxente centrándose claramente na Parroquia de Cangues (Santo Estevo), Parroquia de A Cidá (Santa Mariña), Parroquia de Corneda (Santiago), Parroquia de Dadín (San Pedro), Parroquia de Espiñeira (San Pedro), Parroquia de Froufe (San Xoan), Parroquia de Reádegos (Santa Baia) e Parroquia de San Cosmede de Cusanca (San Cosmede) As casas reitorais do Concello do Irixo, conforman, en gran parte, un conxunto artístico e arquitectónico que merece, sen lugar a dúbidas, a pena ser conservado e posto en valor e uso con múltiples posibilidades.

Debido ao estado destas propiedades, e a que a Igrexa hai xa uns anos que decidiu vender algunhas propiedades en desuso e especialmente as que están en estado ruinoso ou practicamente, como é o caso das anteriores sinaladas, sería moi asumible negociar coas autoridades eclesiásticas para que o Concello do Irixo adquirise a titularidade de todas estas antigas casas reitorais para recuperalas e poñelas en valor. Todas estas casas, algunhas situadas estratexicamente e outras con enormes posibilidades segundo o caso, poderían, despois dun laborioso proceso de restauración, non so albergar espléndidas vivendas de turismo rural ou albergues, que darían un pulo importante ó concello no ámbito laboral e turístico; senón tamén poderían ser convertidas en centros culturais, dotacionais ou municipais que darían servizo social para todos os veciños e veciñas do Irixo.

Xa que logo, poderían ser puntos de ocio e reunión dos veciños de cada unha das parroquias. É, ademais, unha obriga moral non deixar que se perda o patrimonio deste concello, senón arranxalo, conservalo e destinalo para uso e desfrute dos veciños ou dotar, nesas instalacións, outros servizos a este concello, porque non esquezamos que o patrimonio do concello é dos veciños e veciñas de todas as parroquias. Debido ao seu estado de deterioro á inversión inicial non debería ser moi elevada e perfectamente asumible por este concello, sempre e cando se axuste o seu presuposto, dotando unha partida orzamentaria, ou chegado o caso, unha modificación de crédito para acometer a compra despois dunha negociación coas autoridades eclesiásticas.

A rehabilitación de todas estas propiedades, que se iría prolongando no tempo, podería contar con diversas subvencións de distintas administracións e mesmo poderían dar lugar á creación dun obradoiro de emprego, xerado polo propio concello ou en colaboración con outros concellos veciños, o que xeraría traballo e riqueza no concello.

Os socialistas, queren destacar que a negociación para a adquisición destas casas reitorais coas autoridades eclesiásticas, debería incluír espazos ou metros de terreos da Igrexa que sexan necesarios para mellorar as comunicacións ou as infraestruturas do concello. Sirva como exemplo, que coa cesión duns dous ou tres metros na fachada do destro da parroquia do Campo se podería acometer o ancheamento e a urbanización do entorno con beirarrúas, que mellorarían considerablemente o entorno e garantirían a seguridade dos peóns que actualmente circulan pola estrada para desprazarse á igrexa; ao non dispoñer, no entorno da parroquia, de accesos axeitados.

O Grupo Municipal Socialista do Concello do Irixo, presentou, hai semanas, para a súa consideración e dada a importancia da conservación e posta en valor deste patrimonio existente no concello, que ademais serviría conxuntamente con outras accións para dinamizar o turismo e a economía do concello, unha moción instado ó Pleno municipal á adopción do seguinte ACORDO: “Que o Concello do Irixo negocie coas autoridades eclesiásticas, sexa o Bispado ou quen ostente a representatividade deste para tales cuestións, a adquisición na fórmula máis vantaxosa, preferiblemente a compra, das casas reitorais existentes no Concello, deshabitadas e en estado de abandono para rehabilitalas coa solicitude das axudas das distintas administracións autonómicas, estatais ou europeas, aproveitando a rehabilitación das mesmas para a creación dun Obradoiro que xere emprego e dinamice a economía do municipio e finalmente destinalas a vivendas de turismo rural, albergues, centros culturais, dotacionais ou municipais, etc. para todos os veciños e veciñas de O Irixo.”

O PSdeG-PSOE de Punxín esixe a dimisión “inmediata” do tenente de alcalde do municipio, Eladio Fernández, tras un pleno celebrado onte e marcado polas continuas faltas de respecto e ameazas pola súa parte.

Os socialistas consideran que a actitude e o comportamento do líder de CxG en Punxín, que cogoberna co PP, “son totalmente inadmisibles para un cargo público”. Dende o grupo municipal socialista poñen de manifesto que no pleno municipal celebrado no día de onte quedou patente a “total ruptura do actual grupo de goberno en Punxín, conformado polo Partido Popular e CxG”. As e os socialistas subliñan que a sesión plenaria “foi un auténtico despropósito e un exemplo do comportamento incívico do tenente de alcalde, que non pode seguir un minuto máis formando parte do goberno municipal”.

Durante a sesión plenaria, Eladio Fernández dirixiuse en varias ocasións ao alcalde con expresións ameazantes e con faltas de respecto continuadas. Tal e como explican dende o PSOE de Punxín, proferiu frases tales como “isto vaille traer consecuencias”, “non te xogues o tema” ou “non te columpies”. As e os socialistas consideran que estas frases “foron pronunciadas nun claro ton intimidatorio, algo que consideramos impropio do cargo que ostenta e son contrarias aos principios democráticos que deben rexerse nas institucións públicas”.

A voceira do PSdeG-PSOE en Punxín, Lorena Peleteiro Vázquez, sinala que o corrido no pleno “é un feito de extrema gravidade” e apunta a que “non se pode normalizar a violencia verbal, nin as ameazas dentro dun órgano democrático”. Ante esta situación a edil socialista esixe “responsabilidade e respecto institucional” e subliña que “non seremos nós quen defendamos a actuación do alcalde ou do grupo de goberno á fronte do concello, pero xamais se pode permitir esta linguaxe e comportamento, xa que o respecto ten que estar por riba de todo”.

“Dende o PSdeG-PSOE de Punxín consideramos que este comportamento invalida a continuidade do tenente de alcalde no goberno municipal”, afirma Peleteiro Vázquez, que tamén lle reclama ao Partido Popular e ao rexedor que “actúen con firmeza, adoptando as medidas necesarias para preservar a dignidade das institucións locais”.

O grupo municipal socialista tamén estudia a adopción de medidas adicionais, incluída a posibilidade de elevar unha denuncia formal, senón se produce unha resposta contundente por parte do equipo de goberno, ante as actividades levadas a cabo por parte do actual tenente de alcalde en nome do concello e sen ningún tipo de autorización, nin acordo.

Neste senso as e os socialistas fan fincapé en que Eladio Fernández “elabora notas de prensa que saca en nome do concello, sen dar conta aos seus compañeiros de goberno, ademais de abrir unhas redes sociais do concello de Punxín, sen ningún tipo de autorización e facelas pasar como oficiais para confundir á veciñanza”.

Por terceiro ano consecutivo, o Festival Internacional Pórtico do Paraiso ten entre os seus escenarios o mosteiro de Santa María A Real de Oseira.

Será este próximo domingo dia 18 de maio, coa actuación do grupo valenciano "Spanish Brass", con 35 anos de traxectoria musical, sendo un dos grupos de cámara máis consolidados do panorama musical internacional.

Para a compra anticipada de entradas (15 euros)e máis información do festival, preme na seguinte ligazón: https://www.porticodoparaiso.com/

Aquí podes escoitar a entrevista a Juan Enríque Miguéns (Director) e Conchi Dasilva (Coordenadora de xestión)do festival.

O presidente provincial, Luis Menor, lembrou no Carballiño que a de Ourense é a única Deputación galega con xestión directa na recollida de lixo, “un servizo no que temos implicación máxima para mellorar o medio ambiente”, e lembrou que o esforzo da ciudadanía á hora de xestionar os biorresiduos “ten recompensa, neste caso fiscal”, lembrando as bonificacións implantadas na ordenanza provincial que regula o servizo.

A conselleira de Medio Ambiente, Ángeles Vázquez, agradeceu á Deputación de Ourense o seu compromiso co axeitado tratamento dos refugallos e a aposta por estender a compostaxe polos concellos da provincia, contribuíndo á implantación dun sistema sostible de xestión de residuos, “un exemplo a exportar”, recalcou

O alcalde do Carballiño, Francisco Fumega, manifestou o seu agradecemento á Deputación e á Consellería “a súa implicación nesta aposta como proxecto piloto que será un elemento substancial no noso servizo de recollida de lixo".

A Deputación de Ourense é beneficiaria dunha axuda económica de 540.550,93 € a través da Xunta de Galicia, cofinanciada polo Mecanismo de Recuperación e Resiliencia da Unión Europea – Next Generation EU, para a posta en marcha de diversos proxectos destinados á implantación e mellora da recollida separada e o tratamento de biorresiduos na provincia. Precisamente, un dos lugares onde se implantará este sistema mediante é a urbanización da Uceira, no Carballiño, ao que hoxe acudiron os responsables das tres administracións implicadas: Luis Menor, presidente da Deputación; a conselleira de Medio Ambiente, Ángeles Vázquez; e o alcalde do Carballiño, Francisco Fumega.

O presidente provincial, Luis Menor, lembrou que a de Ourense é a única deputación de Galicia beneficiaria destas axudas, xa que é a única das catro institucións provinciais con xestión directa no servizo de recollida de lixo. Un servizo, recalcou, “co que temos implicación máxima, non só na súa mellora operativa, senón tamén para mellorar o medio ambiente”. Ademáis, puxo en valor que o esforzo da cidadanía á hora de xestionar os biorresiduos que xeren “ten recompensa, neste caso fiscal”, lembrando as bonificacións implantadas na ordenanza fiscal que regula o servizo e que pretende avanzar cara un modelo de xestión de residuos máis sostible e eficiente.

A conselleira de Medio Ambiente, Ángeles Vázquez, agradeceu á Deputación de Ourense o seu compromiso co axeitado tratamento dos refugallos e a aposta por estender a compostaxe polos concellos da provincia, contribuíndo á implantación dun sistema sostible de xestión de residuos, “un exemplo a exportar”, recalcou.

Pola súa banda, o alcalde do Carballiño, Francisco Fumega, manifestou o seu agradecemento á Deputación e á Consellería “a súa implicación nesta aposta como proxecto piloto que será un elemento substancial no noso servizo de recollida de lixo”.

A proposta da Deputación articúlase en dúas liñas de actuación principais:

A primeira liña está centrada na sensibilización e captación de grandes produtores de materia orgánica. Céntrase na consolidación e expansión da recollida selectiva de biorresiduos (contedor marrón) entre os grandes produtores de materia orgánica naqueles 14 concellos da provincia de Ourense con máis de 2.000 habitantes que teñen delegado o servizo nesta administración. O obxectivo é dobre: reforzar a concienciación e participación dos usuarios actuais e captar novos grandes xeradores de residuos orgánicos interesados en sumarse a esta práctica.

A segunda liña persigue o impulso da separación e reciclaxe na orixe mediante compostaxe doméstica e comunitaria. Engloba dous proxectos clave para fomentar a autoxestión de biorresiduos a nivel local. Así, o primeiro deles é a nova campaña de compostaxe doméstica: Prevese a entrega de 3.000 composteiros nos 59 concellos que teñen delegada a competencia da recollida de residuos, acompañada dun manual informativo e formación para os participantes. Esta acción duplica o número de composteiros distribuídos en campañas anteriores, dando unha maior cobertura á provincia.

Áreas de compostaxe comunitaria

O segundo proxecto da segunda liña céntrase na mellora da compostaxe comunitaria: A Deputación de Ourense xa conta con seis áreas de compostaxe comunitaria en urbanizacións de tres municipios de máis de 5.000 habitantes. Con esta axuda, realizaranse melloras para facilitar o uso aos veciños, como a instalación de sumidoiros nas billas para a limpeza dos caldeiros nos que se levan os biorresiduos e o establecemento de pechaduras nominativas nos módulos abertos á cidadanía. Este último punto permitirá rexistrar aos usuarios e aplicarlles de oficio a redución da taxa de lixo, tal como se recolle na ordenanza fiscal provincial (BOP Nº 249, venres, 27 de decembro de 2024).

En definitiva, estas iniciativas, que abarcan tanto a recollida selectiva do contedor marrón en grandes produtores a grande escala, como a compostaxe a nivel doméstico e comunitario, forman parte da Estratexia Provincial para a implantación dun sistema sostible de xestión dos biorresiduos, nun territorio coas particularidades da provincia de Ourense. E, máis aló do cumprimento da normativa e a redución do impacto ambiental, estas medidas buscan ofrecer aos cidadáns ferramentas efectivas para a xestión dos seus residuos orgánicos e a posibilidade de beneficiarse das reducións fiscais que inclúe a ordenanza fiscal provincial, como novidade.

Lilian Cerdeira (na foto  o dia do debate electoral de 2023 en COPE O Carballiño) presentou un escrito no rexistro do concello de Avión no que comunica ao pleno municipal que abandona VOX, a formación política pola que resultou elexida nas eleccións municipais de 2023, convertíndose no único cargo electo de VOX en Galicia.

No escrito, no que alude a motivos persoais para tomar esta decisión,  tamén comunica que seguirá formando parte da corporación municipal de Avión, polo que pasará a formar parte do grupo de non adscritos neste concello no que goberna o Partido Popular con maioria absoluta.

Cun espectacular final de liga na que as rapazas de Alba Rodríguez gañaron os seis últimos partidos desputados, as verdes ascenden xunto co San Roque Casablanca vigués á Primeira División Galega do fútbol feminino, e serán o máximo representante da provincia de Ourense no fútbol feminino para a próxima tempada.

O Arenteiro certificou o seu ascenso no derradeiro partido do campionato na Segunda División Galega, xogado este domingo no campo  vigués da Gándara, onde as carballiñesas impuxerónse ás locatarias do Valadares por 0-2, con goles de Maria Juan e Sara Fernández, ambos no úlitmo cuarto de hora do partido.

Ficha do partido:

https://www.futgal.es/pnfg/NPcd/NFG_CmpPartido?cod_primaria=1000120&CodA...