O PSdeG-PSOE de Punxín denuncia un novo capítulo de “obstrución” e de “bloqueo” o desenvolvemento do municipio, despois da sesión plenaria celebrada no día de hoxe e na que o goberno municipal, composto polo PP e un concelleiro non adscrito, votase en contra de dúas mocións coa que as socialistas pretendían mellorar, canto antes as condicións salariais das auxiliares do servizo de axuda no fogar (SAF) e que o Concello cumprise co compromiso adoptado coa veciñanza de Ourantes para a realización dos trámites precisos para a construción dun aparcadoiro público e gratuíto para dar servizo aos usuarios da igrexa parroquial de San Xoán.

Dende o Grupo Municipal Socialista consideran que coa decisión do equipo de goberno “estáselle a dar as costas tanto a veciñanza como as traballadoras do SAF”. Para as socialistas esta situación “non fai máis que demostrar o que vimos denunciando dende fai tempo, que é que a este goberno non lle interesan para nada os problemas da veciñanza e que as súas políticas son as do bloqueo o desenvolvemento do noso municipio”.

No relativo a moción na que se solicitaba unha mellora das condicións salariais das auxiliares do servizo de axuda no fogar, as concelleiras socialistas esgrimiron que co incremento do financiamento anunciado pola Xunta, o Concello reducirá o gasto previsto para este servizo en 10.500 euros. Dende o PSdeG-PSOE de Punxín reclamaban que “este aforro se reinvista inmediatamente no propio servizo, para mellorar as retribucións que perciben as traballadoras”. “O alcalde alegou que non era momento de subir os salarios, polo que lle lembramos que sempre é un bo momento para mellorar as condicións das traballadoras”, explica Lorena Peleteiro, voceira do PSdeG no municipio.

Con respecto a moción para a construción do aparcadoiro público gratuíto na igrexa parroquial de San Xoán, moción que tamén foi rexeitada polo equipo de goberno, as socialistas apuntan a que o Concello “está a incumprir” o acordo coa diocese de Ourense para a cesión temporal desta parcela e co acordado no pleno do 9 de marzo de 2020, “onde se deu conta de que parcela se cedía co fin de que fose utilizada como aparcadoiro público”. As concelleiras socialistas relatan que o alcalde “dálle unha vez máis as costas á veciñanza co voto en contra” e relatan que lle pediron ao rexedor que solicitara a colaboración da Deputación, ao que este respondeu que “non vou molestar a Deputación por isto”. “Este modus operandi deixa claro que o alcalde non busca o beneficio da veciñanza, e non prima os seus intereses”, afirman as edís do principal grupo da oposición.

“O alcalde de Punxín decide incumprir este convenio, así como o acordo do Concello coa veciñanza de Ourantes, e en concreto, coa Comunidade de Montes Veciñais en Man Común, e darlle de novo as costas a estes veciños e veciñas, a pesares de que en beneficio desta parroquia, os propios comuneiros se comprometeran co Concello a abonar os gastos do material preciso para os traballos de acondicionamento do terreo para aparcamento”, relata a voceira socialista, Lorena Peleteiro.

Si foi aprobada unha moción do PSdeG-PSOE de Punxín, na que instaban ao goberno municipal a ratificar o compromiso firme do Concello cos dereitos das mulleres, a erradicación de calquera tipo de violencia machista e combater calquera discurso negacionista, ou posicionamento político que negue a violencia de xénero ou rexeite as políticas públicas enfocadas a súa total erradicación. As concelleiras socialistas aproveitaron o debate para lembrarlle ao rexedor e o seu equipo que “Punxín é o único concello sen actos nin programación con motivo do 25 N, Día Internacional para a Eliminación da Violencia contra as Mulleres.

Os concellos da comarca comnemoraron hoxe o Dia Internacional Contra a Violencia de Xénero, coa celebración de diversos actos, que nalgúnhos casos terán aínda continuidade con outras actividades no transcurso dos próximos dias.

En varios concellos procedeuse a lectura dun manifesto institucional e de recordo para as vitimas de violencia machista, comos os que se levaron a cabo en Avión, Cea, O Carballiño ou Leiro, a éste último corresponde a fotografía co acto celebrado ete mediodia na Praza do Cruceiro desta localidade ribeirán.

A sexta onda da pandemia continúa acelerando no Carballiño, que suma hoxe 36 contaxios activos, 11 máis que onte según os datos facilitados esta mañá polo Sergas. Trátase da maior incidencia no Carballiño dende mediados do mes de Agosto pasado.

No resto de municipios a situación é máis tranquila, e aos concellos sen casos activos de covid súmase hoxe Boborás. Rexitran contaxios activos Maside (7) Cea (2) San Amaro (1) O Irixo (1) e Avión (1).

Continúa empeorando a situación epidemiolóxica no concello do Carbaliño, que alcanza hoxe os 25 contaxios activos, son 5 casos máis en relación a onte.

No concello do Irixo, despóis de varios meses libre de covid, volve notificarse hoxe un primeiro contaxio activo. Non hai variacións no resto dos municipios, onde os datos permanecen inalterables según esta última actualización feita por Sanidade neste mércores 24 de Novembro.

Os novos emprendedores das comarcas do Carballiño e O Ribeiro contarán en breve cun novo espazo coworking que se ubicará no Carballiño, favorecendo as iniciativas empresariais dos novos emprendedores. Asi o anunciou hoxe o conselleiro de Economia, Empresa e Innovación da Xunta de Galicia, Francisco Conde, no transcurso dunha visita ao programa a parada en camiño da Innovación en Ribadavia.

A rede de espazos coworking promovida pola Xunta a través do Igape e a EOI forma parte da plataforma StartIN Galicia, que agrupa a todas as aceleradoras que apoia a Administración autonómica e que permitiu nos últimos cinco anos impulsar máis de 1000 proxectos emprendedores en todo o territorio. Dentro desta plataforma de apoio integral desenvólvense as business factories e outras aceleradoras como Agrobiotech, ViaGalicia, Galicia Open Future e Connecting For Good Galicia.

A última actualización do marcador comarcal do coronavirus, correspondente a este lúns dia 22 de Novembro, deixanos un siñificativo incremento de contaxios activos no concello do Carballiño, son 7 máis que o pasado venres, pasando de 12 casos dese dia aos 19 contaxios activos que suma hoxe o municipio carballiñés.

Tamén se incrimentan os casos en Maside (+1) (6) Cea (+1) (2) e volve entrar o coronavirus en San Amaro, que rexistra hoxe un primeiro caso nesta onda da pandemia.  Boborás continúa cun único contaxio entre a súa veciñanza, mentres que o resto dos municipios continúan se incidencia Covid.

A Xunta de Galicia licita por 450.000 euros as obras de construción do novo edificio de usos múltiples de Arenteiro, no concello de Piñor. A Consellería de Medio Ambiente, Territorio e Vivenda publicou esta semana a licitación na Plataforma de contratos públicos, cun prazo de presentación de ofertas aberto ata o martes 7 de decembro.

A actuación, cuxo prazo de execución é de 11 meses. trátase dun edificio, cunha superficie construída de 372 m2, destinado a usos múltiples para realizar tarefas sociais e deportivas. Habilitaranse dous andares, cunha planta baixa e unha planta primeira. Tal e como se recolle no proxecto, o andar baixo está pensado para albergar unha das salas do edificio, os aseos, o cuarto de instalacións e o almacén; mentres que no primeiro andar, habilitarase unha sala de maiores dimensións con gradas retráctiles, almacén e unha solaina.

A conexión vertical entre ambos andares resolverase coa instalación de ascensor e a construción dunha escaleira. As carpinterías exteriores serán de aluminio con rotura de ponte térmico e dobre vidro con control solar, e a cuberta terá un armazón de madeira laminada, acabado de tella cerámica plana vermella. En canto ás carpinterías interiores, disporanse portas cegas dunha folla. 

O 15 de Novembro comenzaron os traballos arqueolóxicos no Conxunto arqueolóxico de Santa Mariña de Maside. Os traballos enmárcanse dentro do “Proxecto de Revitalización e Posta en Valor do patrimonio arqueolóxico das terras do concello de Maside”.

O conxunto arqueolóxico de Santa Mariña de Maside era ben coñecido pola veciñanza da localidades de A Casanova, Outeiro e San Miguel, xa que atópase en terreos do monte comunal de ditas poblacións. As últimas actividades realizadas no mesmo datan de mediados do século pasado, momento no cal se realizaban labores de extracción de pedra pois o granito da Santa Mariña era moi apreciado para a fabricación de lousas para lápidas. Ademais, a veciñanza comuneira utilizaba o espazo para a saca de “estrume”. Da súa boca chegannos as lendas sobre a Santa Mariña. Estas lendas, comúns por outra parte a outros lugares de Galicia e vinculadas sempre a cultos e rituais acuáticos, viñan a dar explicación a existencia de numerosas pías escavadas nas rochas do outeiro. Así, falába do “baño da santa” o o “forno da santa”, para dar explicación a unha destas pías situadas sobre o cumio do monte.

O conxunto arqueolóxico foi catalogado nun proxecto vinculado a creación do PXOUM e eran coñecida ademais da multitude de pías e petróglifos a base de cazoletas, unha necrópole medieval formada por un sartego de pedra e unha tumba antropomorfa escavada na rocha. Os materiais cerámicos e os diferentes elementos catalogados atestiguan unha primeira ocupación do conxunto arqueolóxico durante momentos finais da Idade de Ferro. Por outra banda a necrópole ten paralelos noutros espazos arqueolóxicos próximos datados na Alta Idade Media.

Durante Decembro de 2020, o colectivo Arqueolladas realizou, a petición do Concello de Maside, unha campa de prospección e desbroces no Conxunto arqueolóxico. Froito de esta primeira campaña de intervención delimitouse a área de ocupación do conxunto, se identificaron varios sectores da muralla do Conxunto, numerosos encaixes e labores de acondicionamento do espazo (soleiras, canalizacións, rebaixes para a colocación de muros...) típicos doutros castros da contorna.

Froito desta primeira fase, xerouse un proxecto de escavación e posta en valor que finalmente foi aceptado pola consellería de turismo e incorporada ao programa de subvencións da Axencia de Turismo de Galicia. O proxecto inclúe, ademais da campa de escavación arqueolóxica, a realización dun sistema de carteleira para a implantación dun roteiro cultural que vincule o conxunto arqueolóxico ao Camiño Natural do Río Barbantiño, a elaboración dunha páxina web que difunda os resultados das escavacións e a realización dunha serie de actividades culturais e de difusión arqueolóxica (O Luns 22 se fará uha visita guiada para alumnado 1º da ESO do IES Chamoso Lamas, o día 6 de Decembro inauguraráse o Roteiro a traveso do Conxunto arqueolóxico, estánse organizando talleres e actividades co Colexio Público de Maside)

Os traballos arqueolóxicos pretenden datar e comprender a función dunha destas estruturas, un posible lagar escavado nun bloque granítico nunha das ladeiras do xacemento. Ademais, se realizará unha limpeza profunda do espazo coñecido como a Pía da Santa, un plataforma granítica que alberga un complexo sistema de pías escavadas na rocha así como unha necrópole altomedieval.

En canto aos resultados preliminares, identificouse e documentou completamente a tumba antropomorfa, coñecida só parcialmente. Nesta zona abríuse unha cata de 3x4 m e sacouse á luz unha tumba completa escavada sobre a rocha así como unha preforma de outra tumba que debeu ser desestimada pola rotura da mesma durante as labores de escultura. Identificouse numeroso material cerámico de época medieval así como elementos de cristal de rocha, material que non existe na xeoloxía local e que proban o seu transporte voluntario.

Realizouse outra cata nunha estrutura cuadrangular escavada na rocha, interpretada como un posible lagar. Documentouse a totalidade de dita pía así como un sistema de evacuación das aguas pluviais formado por varios rebaixes e canais.

Por último, estáse levando a cabo unha limpeza arqueolóxica na zona da Pía da Santa. Trátase dunha gran plataforma granítica que albergaba unha pía circular de 1,5 m de diámetro e 40 cm de profundidade. Durante esta labor de limpeza está saíndo á luz un complexo sistema de pías, canais e buratos para poste que nos indican a existencia posiblemente dun espazo de produción vinculado ao tratamento e transvase de augas da que aínda se descoñece a súa función. Logo de rematar os traballos de limpeza superficial neste sector realizaráse unha serie de fotografías aéreas para documentar a disposición e organización de todos estes elementos que parecen indicar a existencia de estruturas circulares e telladas, zonas de morteiros e “lavadoiros”.

Os traballos arqueolóxicos están coordinados por A. Rodriguez Sobrino e o equipo técnico está formado por membros do Colectivo Arqueolladas e a empresa Breogán Arqueoloxía. O proxecto é promovido polo Concello de Maside e financiado pola Axencia de Turismo de Galicia cunha contía de 24.623 euros.

A Conselleira de Infraestruturas e Mobilidade, a través de Augas de Galicia, licitou por preto de 93.000 euros as obras de renovación da rede de abastecemento de auga no lugar de Magros, no concello de Beariz. A Plataforma de Contratos Públicos de Galicia publica hoxe a contratación das obras. As empresas interesadas neste proxecto poderán presentar as súas ofertas desde hoxe e ata o vindeiro 20 de decembro.

Esta intervención enmárcase no convenio de colaboración asinado en xuño entre a Consellería de infraestruturas e Mobilidade e o Concello, no que se recolleron as actuacións necesarias para dotar dunha nova rede de abastecemento aos barrios de Aldea de Arriba e Aldea de Abaixo. Segundo o convenio asinado, a Xunta, a través de Augas de Galicia, cofinanciará a actuación nun 80%, ao tempo que asume a contratación da execución, dirección e xestión das obras, que contan cun prazo de execución de catro meses.

Pola súa banda, o Concello de Beariz contribuirá ao financiamento do 20% restante, ao tempo que asume a realización das xestións pertinentes para posibilitar a execución das obras, así como a recepción, mantemento e conservación das actuacións que se leven a cabo. As intervencións serán financiadas pola Unión Europea, no marco do Eixe REACT UE do Programa Operativo FEDER Galicia 2014-2020, como parte da resposta da Unión á pandemia da covid-19.

A actuación proxectada por Augas de Galicia ten como obxectivo a execución dunha nova rede de abastecemento nos barrios de Aldea de Arriba e Aldea de Abaixo para asegurar un caudal de auga mínimo de 200 l/habitante-día ás vivendas e un caudal nas bocas de rega e incendio. As obras incluirán a renovación da rede de abastecemento procedente do depósito de regulación, desde a súa entrada no núcleo de Magros pola Aldea de Arriba, ata que chega á Aldea de Abaixo, instalando tubaxe de 75 mm de diámetro. En ambos os extremos colocaranse válvulas redutoras de presión. Renovarase tamén toda a rede da Aldea de Abaixo con tubaxe. En conxunto, executarase un total de 456 metros de tubaxe, ademais de chaves de paso, bocas de rega, ventosas e desaugadoiros para o correcto funcionamento da rede.

Con esta actuación darase servizo a unha poboación de 431 habitantes. O departamento que dirixe Ethel Vázquez mantén o seu apoio técnico e financeiro aos municipios para que estes poidan prestar de xeito eficaz os servizos de saneamento e abastecemento, que son de competencia local.