A conselleira de Política Social, Fabiola Garcia, sinalou que máis de 800 persoas gozaron este verán dunhas vacacións en familia nas residencias públicas do Carballiño e de Panxón. Aproveitou a súa visita á residencia de tempo libre do Carballiño para conversar e coñecer as experiencias dalgunha das familias participantes.

Este programa emblemático tivo que ser suspendido o ano pasado por mor da covid-19. Neste 2021 retomouse con todas as precaucións e con máis facilidades ca nunca para as familias que máis o necesitan: as numerosas, as monoparentais, as de acollida e as vítimas de violencia de xénero. Como novidade todas elas tiveron prioridade en todas as quendas ofertadas.

Así mesmo, Fabiola García fixo fincapé en que os participantes contaron con todas as garantías e medidas de seguridade. Para iso, foi necesario facer reducións de aforo, ofertar a metade de prazas que durante un ano normal, realizar test aos usuarios á súa entrada á residencia e reforzar as medidas hixiénico-sanitarias.

A edición 2021 do Festival de Teatro Galego terá dous escenarios, o auditorio municipal, onde se presentarán as obras de teatro sempre a partir das 22.00 horas, e a Casa da Cultura, onde desde ás 19.00 horas o público poderá gozar dos monólogos. Así, o domingo 5 de setembro no auditorio está programada a estrea da obra do CDG Serva me, servabo te; o luns, día 6, será a quenda para a compañía Traspediante coa obra Bailar agora; e na última xornada, día 7, La Quintana Teatro estreará O Premio.

Polo que respecta aos monólogos, o día 5 na Casa da Cultura Patty Diphusa-Malala Ricoy presenta o seu traballo Sexo seguro, seguro? Seguro! A compañía O Chuso de Catoira interpretará o día 6 Un vikingo no Fetega; e no último día do festival, o martes 7, Marta Doviro falará das súas Memorias dunha rapasa na costa.

Como actividades paralelas haberá teatro de rúa con Barafunda, que ao longo do festival presentará os espectáculos titulados A rede social, Carballiño me gusta e O Mundo interactúa no Fetega. Na sala de exposicións do auditorio están programadas dúas mesas redondas que abordarán A violencia de xénero escondida na arte, e O amor versus a sexualidade: ferramentas de subxugación ao rol feminino.

O festival, reducido este ano a tres dias de programación, pecharase o martes día 7 coa entrega do citado premio de honra, así como dos galardóns á mellor actriz e actor, ao mellor espectáculo e monólogo cómico. As xornadas teatrais están organizadas pola asociación FETEGA,coa colaboración económica do concello carballiñés, Xunta e Deputación.

O concello de San Cristovo de Cea sitúase á cabeza no proceso de inmunización na comarca do Carballiño, rondando o 90% da súa poboación maior de 12 anos xa coa pauta completa da vacinación.

Moi preto, superando lixeiramente o 87% de inmunización na súa poboación están os concellos de Piñor e O Irixo. Entre o 82% e o 84% de inmunidade ante a covid  entre a súa veciñanza están os concellos de Leiro, San Amaro e Punxín, mentres Maside sitúase no entorno do 80%.

No Carballiño, o 75% das persoas mairoes de 12 anos xa completaron a pauta de vacinación, o que representa unha poboación de 9.684 veciños e veciñas do Carballiño que xa están inmunizados, mentres que outras 3.229 persoas aínda están pendientes de acadar a inmunidade, ás que hai que sumar 1.176 menores de 12 anos de idade, o que fai un total de 4.405 persoas que aínda non contan con protección ante a covid.

Por detrás está Boborás, co 72,80% de persoas que xa contan con inmunidade. Xa finalmente, á cola do proceso de vacinación están os concellos de Beariz co 65% da súa poboación diana, e Avión, co 65% da súa poboacion, que son ademáis os dous concellos de toda Galicia máis atrasados según os datos de Sanidade. Unha situación que tería a súa explicación para o alcalde de Avión "temos moitos emigrantes que contan coa súa tarxeta do Sergas, pero que xa viñeron vacinados dos seus países de residencia, por eso non figuran nos datos do Sergas como vacinados, cando a maioría sí o están", aclarou nesta emisora de radio o rexedor municipal de Avión, Antonio Montero.

A derradeira fin de semana do mes de agosto chega con tempo caluroso e tamén con moitas actividades para o ocio, a cultura e o lecer.

Cine

O Novocine de Leiro proxecta durante toda a fin de semana e ata o xoves da semana entrante 3 películas: Bebé Jefazo 2, A todo tren destino Asturias, e Free Guy. O concello de Boborás proxecta cine de comedia "Hasta que la boda nos separe", sábado 28 ás 22:30 horas na carballeira de Moldes.

Maxia de verán no Irixo

A praia fluvial do Irixo será o escenario de "Maxia de verán" a cargo da compañía de espectáculos culturais "Hípica Celta", o venres 27 ás 21 horas.

"A Lira" en Leiro

A Banda de Música "A Lira" ofrece un concerto ás 20 horas deste venres na Praza do Cruceiro de Leiro, único acto programado polo concello de Leiro neste ano de NON Festa da Vendima.

San Vitorio en Maside

Sen verbenas este ano, aínda que cun variado programa de actividades, entre as que temos -venres e sábado- a animación musical da Banda A Lira e a Banda de Boborás. Tarde de folc e troula -o venres 27- dende as 20:00 horas co grupo "Tanto nos ten" e a charanga CLK. O sábado, de 19 a 22 horas animación coa charanga Castro Bello, e dende as 22:30 horas, noite de concerto cos grupos "le Blank", "The impossiblues" e "Malditos pendejos".

O actor Avelino González en Pazos de Arenteiro

Con moito humor no seu monólogo"Contos de contrabando" dende as 19:30 horas do domingo 29 no adro da Igrexa de San Salvador de Pazos de Arenteiro, dentro da programación de verán do concello de Boborás que aínda terá continuidade no mes de Setembro.

"Ourenrock" na Insua dos Poetas

Do venres 27 ao domingo 29 este festival ofrece ata seis actuacións musicais. O programa, ao detalle, podes encontrálo nesta mesma páxina WEB.

A Insua dos Poetas, no Carballiño, tomará do 27 ao 29 de agosto o relevo como escenario do festival “OurenRock Sound 2021”, cuxa presentación tivo lugar hoxe no espazo de natureza e cultura da Esgueva (Madarnás) coa presenza do presidente da Deputación de Ourense, Manuel Baltar, que comprometeu o apoio da institución provincial, como patrocinador principal, “para que ano tras ano este evento siga a coller músculo e se convirta en todo un referente musical non só en Ourense, senón no resto de Galicia, no noroeste de España e de Portugal”.

“Sen dúbida –dixo Baltar- é o que merecen os promotores deste festival, que foron quen de xuntar un cartel con artistas de diferentes estilos musicais que, acostumados a tocar en espazos de características moi semellantes, van facer unha parada nun lugar único onde se xuntan a natureza e a poesía”. Ademais de felicitar aos organizadores, o presidente provincial tamén tivo palabras de agradecemento a Luis González Tosar por acoller o festival na Insua dos Poetas, así como ao traballo realizado pola área de Cultura que dirixe Aurelio Gómez Villar, “porque este tipo de eventos aportan cultura e lecer, pero ademais singularizan e visibilizan un espazo como este”.

No acto de presentación tamén participaron o delegado da Xunta en Ourense, Gabriel Alén; o alcalde do Carballiño, Francisco Fumega; o presidente da Fundación Insua dos Poetas, Luis González Tosar; e o promotor do festival, Rubén Álvarez.

O “OurenseRock Sound 2021. XS Edición Limitada” alcanza a súa segunda edición nun formato diferente aos anteriores eventos, cun aforo de 600 prazas adaptado aos protocolos sanitarios contra a Covid-19. Na primeira xornada, o venres 27, actuarán no auditorio da Insua do Poetas o grupo galego Dakidarría, que fusiona diferentes estilos e ritmos urbanos e que tras quince anos de traxectoria xa ten editados oito discos. O segundo concerto correrá a cargo da banda TanDuB, onde se mesturan música galega e de Marrocos.

O sábado 28 o público poderá gozar dun dos referentes actuais da música indie en España, Iván Ferreiro, que xa espertou un enorme interese do público quedando tan só 90 entradas para o seu concerto. Nesta xornada tamén actuará Indomable, artista galego con música en formato acústico y en solitario.

O festival pechará a presente edición o domingo 29 con Carlos Tarque e Ricardo Ruipérez, os supervivintes de MClan, cun formato acústico auténtico e que xa levan vendido máis do 70 % das entradas. Lau, cantante coruñesa de ascendencia brasileira, será a segunda invitada nesta xornada.

A Consellería de Medio Ambiente, Territorio e Vivenda avanza na tramitación da modificación do Plan sectorial de ordenación de áreas empresariais de Galicia ( PSOAEG) que permitirá a ampliación do parque empresarial do Carballiño en máis de 1,2 millóns de metros cadrados. Así llo trasladou hoxe o director xeral do Instituto Galego da Vivenda e Solo (IGVS), Heriberto García, aos alcaldes do Carballiño, Francisco José Fumega, e Maside, José Manuel Iglesias, cos que mantivo unha reunión para abordar os últimos pasos dados pola Xunta con relación á revisión do PSOAEG, actualmente sometido a avaliación ambiental.

Nesta reuníón de traballo no concello carballiñés, tamén participiou  Argimiro Marnotes, na súa condición de Coordenador da Unidade Sur de XESTUR. Unha vez superado este trámite, está previsto que a aprobación inicial da modificación prodúzase no mes de novembro e a definitiva, en 2022. O novo documento contempla o crecemento do polígono  coa urbanización de dúas novas zonas, unha das cales estará en terreos do concello do Carballiño e a outra no de Maside.

En total, a ampliación do parque ocupará unha superficie de 1,2 millóns de metros cadrados, estando previsto no propio Plan sectorial que a urbanización sexa realizada pola Xunta, a través do Instituto Galego da Vivenda e Solo ou da empresa pública Xestur. Unha vez incluído o novo ámbito industrial no PSOAEG, tamén será o IGVS o encargado da tramitación do proxecto sectorial do parque empresarial. Coa ampliación do parque xa existente para dar servizo aos municipios limítrofes do Carballiño e Maside, a Xunta de Galicia facilitará a implantación de novas empresas na zona, dotando de chan empresarial aos dous concellos.

Actualmente fai falta lembrar que o IGVS dispón de tres parcelas dispoñibles no parque carballinés, cunha superficie total de 9.117 metros cadrados e unha bonificación do 50% no prezo de venda das mesmas.

A ONG Cáritas Parroquial, adscrita á parroquia de San Cibrán do Carballiño, leva atendidas a un total de 540 persoas de 15 nacionalidades distintas no que vai deste ano 2021, según acredita o balance trimestral correspondente aos dous primeiros trimestres do ano, e o que vai transcurrido deste terceiro trimestre.

Asi o relatou en COPE O Carballiño Juan Estévez, un dos voluntarios que traballa en Cáritas Parroquial, unhas axudas que representaron un gasto neste periodo de tempo un total de 27.350,92 euros. Cáritas Parroquial atende cada semana os venres de 9:30 a 13:00 horas na súa sede do baixo da casa rectoral da parroquia, sita na rúa Evaristo Vaamonde do Carballiño.

O capítulo máis elevado de axudas é o que se corresponde co de alimentos, que suma 16.364,28 euros, seguido do relativo a axudas para aluguer de pisos, que representa un gasto de 7.460,00, o resto dos capítulos de gasto son os destinados a alimentos da infancia, viaxes, medicamentos, facturas gas, auga e eléctrica, comidas a transeuntes, e outros gastos loxísticos de funcionamento.

Juan Estévez explicou que os recursos obtéñense a través dos donativos que se reciben tanto a través de Cáritas Parroquial como da Sociedade San Vicente de Paul, asi como as aportacións públicas do concello do Carballiño e Deputación Provincial.