O Carballiño recupera a súa condición de espazo de referencia para o turismo no interior de Galicia e o seu cámping municipal rexistra unha demanda e unha actividade que se sitúa nos parámetros do verán anterior á pandemia do coronavirus.

O Cámping Municipal Arenteiro está integrado por un espazo para turistas composto por seis pallozas e unha zona destinada a acoller a autocaravanas que conta con 32 parcelas para este tipo de vehículos. A zona turística situada ao pé do río Arenteiro reúne unha parte importante dos recursos deste sector na vila e xunto ao cámping atópanse os restaurantes A Maquía e o Muíño das Lousas –que logo de anos sen actividade ben de ser posto de novo en funcionamento baixo a xerencia do restaurante O Barazal-, o conxunto etnográfico dos muíños do Anxo, a Pena dos Namorados e a antiga fábrica de papel da Lavandeira, que pasará a ser o Museo do Papel de Galicia nun futuro próximo.

Ademais, dende o cámping os visitantes poden facer a ruta circular que percorre as beiras do río Arenteiro –no propio espazo hai un panel informativo sobre o trazado e os lugares senlleiros a coñecer- e gozar de enclaves como a piscifactoria –e a súa zona de baño- ou o parque municipal do Carballiño. Neste verán do 2021 rexístrase unha importante presenza de visitantes de Cataluña e Euskadi, entre outros lugares de procedencia.

A boa valoración dos servizos dos que dispoñen no recinto, a gastronomía ou o entorno natural son aspectos destacados polos usuarios das instalacións do cámping e da área de autocaravanas, segundo sinala o concelleiro de Turismo Manuel Dacal. A vila carballiñesa recupera pouco a pouco a súa actividade como espazo de lecer e destino turístico nun verán, o do 2021, no que se reabriu o Gran Balneario do Carballiño e se normalizou a oferta termal cos dous grandes referentes da vila neste sector: os balnearios de As Caldas de Partovia e do Carballiño.

Un amplo programa para o verán cultural –con actuacións ou concertos que foron dende o de Pablo Milanés á sesión de Touriñán, e nestes días co Festival de Títeres-, a celebración dunha Festa do Pulpo adaptada á actual situación sanitaria ou a recuperación do Rali do Lacón, logo de anos sen celebrarse, son algúns dos sinais de identidade do verán carballiñés deste 2021.

Volve a música en directo no Carballiño cun ciclo no que estarán presentes diferentes estilos como o rock, o pop, o Ska, o indie, o soul ou o folk. Entre as novidades desta edición destaca a presenza do gran guitarrista de "Los Suaves" Fernando Calvo.

O ciclo de música arrancará o sábado ás 19:30h na pista roxa do Carballiño da mnn do grupo local Bahía Azul, ás 20:30h continuará a Banda da Garda coa presenza da veciña de Seoane Marta Bravo. Ás 21:30 será o gran estreo do dúo do carballiñés Alberto Estévez e a vocalista polaca Martyna Baran, SM, que mestura o pop e o rock con sonidos electrónicos e blues. Ás 22:30 soará o grupo de rock convidado Distance Sister que está composto íntegramente por mulleres e contará coa estelar colaboración de Fernando Calvo (Los Suaves). Finalmente, pechará a xornada o coñecido grupo de pop carballiñés Sueños de Ítaca.

Unha novidade con respeto da anterior edición será a presenza, durante os cambios dos grupos, doutros artistas e, nesta xornada, será o mago carballiñés Martín e o trío de música tradicional Grupo Cuba, que recibe o nome da rúa Cuba do Carballiño, pois naceu alí durante o confinamento. A xornada do domingo terá como protagonista nos cambios de grupos ao popular Ce Orquesta e comezará ás 19:30 co grupo Skadelos que dará paso aos xa vetereranos Sussie Q's ás 20:30. Ás 21:30 comezará o concerto da formación convidada de punk-rock Derroche, que ven de lanzar o seu novo disco, e precederá ao grupo Carballiñés The Impossiblues que pechará ás 22:30h a segunda edición deste festival "Feito no Carballiño".

O concelleiro de Cultura do Carballiño, Diego Fernández, organizador do evento, destacou a importanza deste festival para os grupos locais pero tamén o estímulo que supón para os músicos que están en formación na Escola de Música e no Conservatorio Municipal. Ademais, recordou que no evento, como está a ser habitual na intensa programación cultural deste verán no Carballiño, os usuarios e usuarias deberán facilitar os datos no acceso, facer uso da "mascarilla", permanecer sentados nas cadeiras habilitadas e manter a distacia de seguridade co resto do público.

O coronavirus continúa desacelerando nesta quinta onda da pandemia na totalidade dos nosos concellos, no do Carballiño quedan 37 contaxios activos según a última actualización de datos que se corresponde con este martes dia 17 de Agosto.

O segundo municipio máis afectado continúa sendo o de Avión, que notifica 12 casos activos. Maside rexistra 5 casos, e Beariz e San Amaro teñen 4 contaxios activos, respectivamente.  Con un único caso figura San Cristovo de Cea, e xa sen ningún contaxio activo están os concellos de Boborás, Leiro, O Irixo, Punxín e Piñor.

O PSdeG-PSOE de Punxín reclama o “inmediato arranxo” do alumeado público de Vilela, tras “dúas semanas coa veciñanza sumida na escuridade absoluta”, por culpa da total desidia e o completo abandono do goberno local. A voceira do grupo municipal socialista, Lorena Peleteiro, critica que a veciñanza “está a sufrir importantes trastornos” sen que o executivo municipal deste municipio ourensán “faga absolutamente nada para devolver a situación á normalidade”.

As concelleiras do PSOE explican que, desde que se procedeu ao cambio das vellas bombillas por novas luminarias tipo led, a veciñanza está sen ningún tipo de alumeado público noite tras noite. Apunta Peleteiro que “desde o noso grupo entendemos que poidan existir problemas puntuais no momento da instalación”, pero “o que non entendemos baixo ningunha escusa é que a veciñanza de Vilela leve dúas semanas ás escuras, polo que esiximos que se resolva o problema sen máis demora”.

As socialistas denuncian que “o rexedor ignora por completo as reivindicacións e necesidades reais dos veciños e veciñas” porque “é incomprensible que, tras máis de dúas semanas sen alumeado público, aínda non se dea por enterado”. “Estar sen ningún tipo de luz pública en plena noite durante tanto tempo pode incrementar o risco de vandalismo e prexudicar a seguridade”, salientan.

“A falta de iluminación debido a que unhas luminarias completamente novas e recentemente instaladas estean abandonadas é esperpéntica”, resaltan as edís socialistas antes de aseverar que “a situación que están padecendo as persoas de Vilela por culpa do alcalde e os seus concelleiros é vergoñenta e impropia”. Desde o PSdeG-PSOE conclúen sinalando, unha vez máis, que este goberno municipal “amosa a súa total incapacidade para traballar activa e eficientemente por Punxín”.

Coa posta en escea de Circo Galaico, por Títeres Alakrán, comenza esta tarde unha nova edicion deste festival, que organiza a concellería de Cultura coa colaboración da Deputación Provincial de Ourense, e que se desenvolverá esta semana na explanada do Parque Municipal.

Todas as representación comezarán ás 19,00 horas

Programa

Luns, 16: Circo Galaico, por Títeres Alakrán.

Martes, 17: Cousas de Casa, mais Obradoiro de Títeres, por Micromina Títeres.

Mércores, 18: Os Novos músicos de Bremen, por Animar Títeres.

Xoves, 19: Onde vai o vento, por Animar Títeres.

Venres, 20: Obradoiro de Títeres, mais Novos lobos, por Fantoches Baj.