O concelleiro de cultura do concello carballiñés Diego Fernández e o presidente da asociación fotográfica Potiños, Manolo Blanco, presentaron hoxe dúas novas iniciativas para este mes de Maio, organizadas pola asociación fotográfica carballiñesa e coa colaboración da concellería de cultura. Fernández recoñeceu a labor dos colectivos culturais "que como no caso de Potiños manteñen viva a cultura nestes tempos tan complicados", agradecendo o traballo que desenvolven.

Coincidindo coa conmemoración neste 2021 como o ano de Emilia Pardo Bazán, o concello do Carballiño programou unha serie de actividades que se desenvolverán nos próximos meses, poñendo en valor a relación da escritora co Carballiño. Precisamente, esta exposición fotográfica  preparada por Potiños recollerá algúns dos lugares da vila e comarca de finais do século 19 nos que a escritora ambientou a novela "O Cisne de Vilamorta". Esta exposición ubicaráse na casa do concello e poderémos vela a partir do martes da semana que ven.

Doutra parte, Poiños celebra o próximo dia 23 deste mes de Maio -domingo- a xornada mundial "Pon unha foto na rúa", unha actividade na que os fotografos e fotógrafas de Potiños veñen realizando unha media preto das 300 fotografias, a todas as persoas que se suman a esta invitación na Praza Maior do Carballiño, este ano avanzou o presidente de Potiños que serán fotos "con máscara, que nos recordarán cando pasen anos este tempo de pandemia no que vivimos".

A comarca do Carballiño entra no mes de Maio na mellor situacion epidemiolóxica dende practicamente os inicios da pandemia. O concello do Carballiño, que mantén 5 contaxios activos, é o único que notifica casos de coronavirus, xa que o resto de municipios están todos eles limpos de virus, en condicións de nova normalidade.

Ademáis, no caso do concello do Carballiño non se diagnosticou ningún novo positivo dende fai máis dunha semana, asi o reflicte a incidencia acumulada, sen ningún caso nos últimos 7 dias.

O concello de Maside acaba de estrear un novo servizo de punto limpo móbil financiado grazas a unha subvención de preto de 60.000 euros concedida pola Xunta de Galicia.

A directora xeral de Calidade Ambiental, Sostibilidade e Cambio Climático, Sagrario Pérez, asistiu esta mañá ao acto de presentación desta nova infraestrutura municipal, un camión pequeno dotado con caixa e chasis con varios compartimentos para clasificar os diferentes tipos de residuos que lle permitirá ao concello achegar este servizo a todas as súas parroquias e núcleos de poboación do municipio

Tras lembrar que a Consellería de Medio Ambiente, Territorio e Vivenda convocou o ano pasado unha orde de axudas para proxectos municipais destinados a implementar novas medidas de xestión dos residuos, Sagrario Pérez explicou que, en total, o seu departamento destinará preto de tres millóns de euros a financiar 69 actuacións e iniciativas neste eido entre as anualidades 2020 e 2021.

De feito, o punto limpo móbil de Maside foi un dos proxectos seleccionados ao abeiro da devandita orde. Así, o Goberno local recibiu unha axuda da Xunta de 57.670 euros para adquirir un camión e unha grúa pequena para cargar grandes electrodomésticos e residuos voluminosos. O orzamento total do proxecto presentado polo concello ascendía a 73.000 euros, incluíndo tamén unha campaña de comunicación e sensibilización para promocionar o servizo, polo que o Goberno local achegou os 15.330 euros restantes.

Neste sentido, Sagrario Pérez felicitou ao alcalde pola iniciativa, que permitirá ofrecer á súa veciñanza, por primeira vez, un servizo gratuíto de recollida a domicilio de mobles vellos, restos de madeira, electrodomésticos, chatarra ou metais, entre outros.

Así, entre as vantaxes derivadas da implantación dun punto limpo móbil, subliñou que se mellorarán as ratios de recollida de residuos, evitaranse os puntos de vertido incontrolado e darase un novo servizo á cidadanía, tanto no rural como na zona urbana, establecendo unha ruta regular por varios puntos previamente seleccionados para que poidan ter acceso a un sistema cómodo e itinerante para o depósito de voluminosos e residuos perigosos.

Despois da entrada en vigor do Real Decreto que limita o uso das bolsas de plástico, os hábitos están cambiando e mesmo obrigando á industria a dar un xiro nas súas liñas de negocio.

Asi o entendeu o grupo Valtalia, que utilizará as instalacións da antiga Laminor no parque empresarial do Carballiño, unhas instalacións que adquiríu fai unhos anos atrás, para iniciar un novo proxecto industrial que centrará a súa actividade na fabricación de envases e bolsas de papel. Cando estea a plena producción, creará 50 postos de traballo.

O Grupo Valtalia mantén dende fai anos a súa presenza no parque empresarial do Carballiño, a través de "Sociedad Gallega de Polímeros" (SOGAPOL) outra das empresas que forman parte deste grupo empresarial galego.

Argirmiro Marnotes comunicou esta mañá nunha comparecencia ante os medios informativos a súa renuncia como concelleiro da corporación municipal do Carballiño, da que formou parte nos últimos 18 anos, catro deles como alcalde e oito como portavoz do grupo municipal popular, cargo do que foi relevado por Ricardo Perea tralas eleccións municipais de 2019.

Marnotes decide renunciar a súa acta de concelleiro para ter maior dedicación como presidente de Club Deportivo Arenteiro tras consumarse o ascenso do primeiro equipo da entidade á Segunda Federación do fútbol español.

"Quería darvos as grazas a todos, pois sei que vos alegrastes do ascenso do Arentiro, do que son presidente dende fai 10 meses, este ascenso ten unhas consecuencias inmediatas pois ser presidente dun club asi en nova categoria con máximas esixencias  necesita tempo e dedicación", subliñou,

Desta maneira, Argimiro Marnotes deixa atrás unha etapa certamente lonxeva como edíl  do concello carballiñés, sendo un dos concelleiros con máis anos de presenza na corporación municipal. Tivo sentidas palabras de agradecemento "para todos os que me soportaron durante este tempo, membros das distintas corporacións de todas as cores políticas, a todos os que foron concellais do PP conmigo, ao persoal do concello, deixo unha etapa marabillosa da miña vida, sempre actúei  coa intención de favorecer o interese xeral de toda a veciñanza e o progreso do pobo, e pido discupas polos fallos que poidera ter cometido", subliñou, poñendo en valor e facendo unha chamada á veciñanza carballiñesa para que se involucre no compromiso da política local "independientemente das siglas coas que se faga".

Agora, unha vez presentada a súa renuncia no rexistro do concello, a vacante que deixa no grupo municipal popular correspóndelle cubríla a Pilar Caride, que xa exerceu  tamén durante varios anos como concelleira, regresando á corporación carballiñesa asi en substitución de Marnotes.

O delegado territorial da Xunta en Ourense, Gabriel Alén, informou esta mañá no Carballiño da posta en marcha do programa Bonos Activa Comercio por parte da Vicepresidencia segunda e Consellería de Economía, Empresa e Innovación co obxectivo de favorecer e impulsar a reactivación do comercio local e de proximidade. Esta iniciativa despregará un total de 330.000 bonos, orientados a todas as galegas e galegos maiores de idade, cun orzamento total de 10 millóns de euros.

Acompañado do alcalde do Carballiño, Francisco Fumega, e de Julián Garriga, presidente do Centro Comercial Aberto, o delegado territorial visitou o establecemento de venda de roupa “Kirschen”, onde detallou todas as cuestións desta medida, que se poden consultar na páxina web www.bonosactivacomercio.gal. Os comercios interesados en adherirse a esta campaña teñen aberto o prazo de inscrición ata o vindeiro 15 de maio.

Gabriel Alén subliñou que a Xunta é perfectamente consciente de que os efectos da pandemia durante o último ano, así como as necesarias medidas restritivas para protexer a saúde dos cidadáns, están a menoscabar o volume de negocio das tendas e dos comercios e por iso, dado o seu compromiso co sector e a mellora da situación pola chegada das vacinas fronte á covid-19, cremos que é o momento de incentivalo con esta importante inxección económica a través dos cidadáns, aos que lles pido que aposten polo comercio local”,

O representante do Goberno galego tamén indicou que en canto aos consumidores, deberán darse de alta no portal dos Bonos Activa Comercio en Internet facilitando os seus datos ou de xeito presencial nas sedes da Dirección Xeral de Comercio ou as xefaturas territoriais da Consellería. A partir da próxima semana, poderán descargar o bono de 30 euros, que ten formato dixital a través dun código QR que estará dispoñible para a súa utilización na aplicación móbil Wallet, e gozar de descontos nas súas compras -a pagar en efectivo ou con tarxeta bancaria- nos establecementos adheridos –a previsión é que os clientes poidan usar o bono a partir da primeira semana de maio–. As rebaixas serán de 5 euros para as operacións iguais ou superiores a 30 euros e de 10 no caso das compras iguais ou superiores a 50.

“Presentamos unha medida novidosa e excepcional, pero cremos que a situación o require para animar o consumo e empuxar ao comercio local, que é garantía de calidade e o que dá vida ás nosas vilas e aos nosos barrios”, sinalou o delegado territorial, que detallou que, se a campaña culmina con éxito e se emprega o 100% da contía dos bonos, “inxectaranse, só con esta iniciativa, ao redor de 55 millóns de euros nos establecementos de proximidade, o cal consideramos un punto de partida máis que interesante para a reactivación do sector”.