O sergas ven de comunicar a organización dun cribado selectivo coa finalidade de detectar asintomáticos ao que van ser citadas 1000 persoas veciñas do concello de Maside, no rango de idade entre os 18 e os 74 anos.

Serán convocadas mediante mensaxe SMS ao teléfono móbil, no que se lle comunicará a hora á que deben acudir este xoves dia 18 de Marzo dende as 3 da tarde en adiante, ao pavillón de deportes de Maside, onde se practicarán as mostras nasais para as probas PCR. Dende o Sergas, e tamén dende o concello de Maside, piden a colaboración de toda a veciñanza que sexa convocada para que participe neste cribado selectivo. Maside ten, según os datos de hoxe, 11 contaxios activos. 

No resto dos concellos, en Boborás os contaxios activos baixan a 8, dous menos que onte. Tamén resta un caso O Carballiño, que ten hoxe 6 contaxios activos. Cea continúa con 1, e con cero contaxios permanecen os demáis concellos da comarca.

A Xunta, na súa aposta polo desenvolvemento sostible, solicitará á Secretaría de Estado de Turismo que teña en conta o Plan de Sustentabilidade Turística para o proxecto Ourense Termal na convocatoria dos Plans de Sostenibilidade Turística en Destino do presente ano. A Xunta incluirá na nova convocatoria o proxecto promovido pola Deputación de Ourense.

Nunha visita do vicepresidente primeiro á Deputación de Ourense, onde mantivo unha xuntanza co presidente do organismo provincial, Manuel Baltar, Alfonso Rueda -que asistiu acompañado por Nava Castro, directora da Axencia Turismo de Galicia- recordou que tanto o plan Ourense Termal como o da Mariña lucense foron, entre os seleccionados polo Ministerio de Turismo na convocatoria do ano pasado, os que obtiveron maior puntuación da Xunta. Tendo en conta a súa importancia para os ourensáns e que a propia Secretaría de Estado de Turismo manifestou o seu interese en apoialos, a Xunta é partidaria de presentalos de novo. De aprobarse, sumaríanse aos de Santiago de Compostela e da Ribeira Sacra, seleccionados no 2020.

O turismo termal en Galicia é un dos recursos con máis potencialidade para a recuperación do sector logo dun ano marcado pola crise da pandemia. Galicia é a comunidade líder no conxunto do Estado en canto á oferta mineiro-medicinal, con máis dun 20% dos establecementos balnearios, e tamén a comunidade con maior número de distintivos de calidade nos establecementos termais.

Ourense conta cun importante número de concellos ricos en recursos termais, pero que precisan dun plan e de axudas para poder explotalos economicamente e como fonte de riqueza no turismo de saúde e benestar. O proxecto desenvolvido pola Deputación provincial é, ademais, unha oportunidade para xerar emprego na provincia, fixar poboación e frear a emigración. De aí que a Xunta aposte por presentalo de novo á convocatoria deste ano e que comprometa unha inversión de 1,3 millóns de euros, o 45% do orzamento total, para o seu desenvolvemento nos vindeiros tres anos.

A Asociación de Persoas con Discapacidade Física e Orgánica do Carballiño e comarca (ASDIFICA) leva xa varios anos de constante crecemento, acadando gran relevancia dentro do seu eido. Entre as súas encomiables funcións está, nin máis nin menos ca a de prestar apoio e facilitar a vida diaria e a integración social e laboral dos seus asociados, destacan dende Espazo Común.

Segundo cifras facilitadas por eles mesmos, son máis de 100 persoas ás que atenden de xeito regular. Espazo Comun pon en valor o seu traballo "Con moi escasos recursos, son quen de ofrecerlles servizos coma o de fisioterapia, o de rehabilitación, o de asistencia psicolóxica, cursos ou mesmo o de orientación laboral.Incluso durante os confinamentos, estiveron a levar a termo un seguimento constante da situación de todos e cada un dos asociados, un colectivo especialmente castigado pola pandemia".

Subliñan que para acometer todas estas accións absolutamente imprescindibles nunha sociedade que pretenda ser xusta e inclusiva, sempre teñen que enfrontar un obstáculo de moita envergadura: a carencia absoluta de infraestruturas propias "levan xa case un ano nun pequeno local do concello cedido por Espazo Común, a onde chegaron por non poder seguir empregando un aínda máis cativo que tiñan prestado no Centro Sociocomunitario. Vense na obriga de alugar ou pedir prestados emprazamentos para poder seguir traballando. A todas luces, isto dificulta enormemente o día a día da asociación".

É obvio -engaden- que ASDIFICA precisa con urxencia dun lugar de seu. Habilitado, amplo e sen problemas de accesibilidade "a estas alturas, xa dispoñen incluso de convenios que lles permitirían financiar as obras que fosen necesarias para o seu acondicionamento".

Remarca ESCO que "tódolos que formamos parte deste Concello, temos a obriga moral de prestarlles todo o apoio posible e de darlle prioridade absoluta á cesión dun local, despois de diferentes conversas con eles, consideran que a mellor opción dentro das posibles, sería parte dos baixos da Estación de Autobuses".

A proposta que a través dunha mocion ante o pleno da corporación municipal vai presentar Espazo Común pasa, en primeiro lugar, porque o Concello do Carballiño tente chegar a un rápido acordo coa Xunta para que esta realice unha cesión directa dese espazo a ASDIFICA, garantíndolle un número de anos suficiente para que poidan acometer con tranqulidade as inversións necesarias para a súa adaptación.

No caso de non ser isto posible a curto prazo, demandarán que se elabore unha listaxe formal das opcións que o Concello pode ofrecerlles.

Maside continúa rebasando os 250 casos por 100.000 habitantes na incidencia acumulada a 7 dias, e mantense no rango entre 250 e 500 casos por 100.000 habitantes, a dous dias para que o comité clínico revise a situación epidemiolóxica do municipio masidao, que está baixo seguimento especial. Maside alcanza hoxe os 10 contaxios activos, os mesmos que ten o concello de Boborás.

O Carballiño sigue con 7 contaxios activos, e San Cristovo de Cea con 1. O resto dos concellos da comarca permanecen sen casos activos de coronavirus outro dia maís.

A Consellería de Infraestruturas e Mobilidade vén de adxudicar a redacción do proxecto de iluminación da ponte Esperela sobre o río Avia, situada no punto quilométrico 3+280 da estrada de titularidade autonómica OU-209, no concello de Leiro.

Esta actuación de posta en valor da coñecida como ponte Esperela foi adxudicada á consultora E I C Duran S.L., por algo máis de 18.000 euros. A adxudicataria conta cun prazo de seis meses para redactar este proxecto.

Esta infraestrutura ten 180 metros de lonxitude, un ancho de 6 metros nos estribos e 4,8 metros nos arcos. A ponte está construída enteiramente con perpiaños de granito, consta de cinco arcos rebaixados e catro tallamares. A calzada ten unha rasante plana e os peitorís son de cantería maciza. As luces dos arcos son de 15 metros e as pilas teñen 2 metros de ancho.

De acordo co contrato, redactarase un proxecto construtivo que analice e valore a situación actual da ponte, o seu valor como elemento no entorno para propoñer distintas actuacións de iluminación.

Para isto, consideraranse diferentes alternativas de iluminación (taboleiro, petril, dovelas e laterais, intradós ou pilas), tendo en conta en todo momento a integración paisaxística da ponte na contorna.

Con esta nova intervención do departamento que dirixe Ethel Vázquez, darase continuidade aos traballos de acondicionamento realizados recentemente pola Xunta na ponte, encamiñados a favorecer a súa conservación e á mellora da súa imaxe. Esta actuación supuxo un investimento autonómico de preto de 30.000 euros.

Os datos notificados por Sanidade neste sábado dia 13 de Marzo son malos para o concello de Maside, xa que sigue a tendencia á alza coa aparición de novos casos positivos neste municipio, que hoxe rebasa os 250 casos por 100.000 habitantes na incidencia aculumada a 7 dias. Un dato preocupante que de persistir nos próximos dias levaría a Maside a aumentar nivel de restricións. En canto a contaxios activos, Maside rexistra 8, polo tanto 1 máis que onte.

Mentres, boas noticias tanto para Boborás como para Leiro. Por vez primeira nas últimas semanas Boborás baixa no nivel de IA a 14 dias por debaixo dos 500 casos por 100.000 habitantes, e por debaixo dos 75 casos por 100.000 habitantes na IA a 7 dias. En canto contaxios activos notifica hoxe 10 casos, que son 3 menos que onte. De confirmarse esta mesma tendencia, a semana que ven Boborás sairá do máximo nivel de restricións no que permanece.

Tamén mellora Leiro, o outro concello que está sendo obxeto dun seguimento especial por parte de Sanidade, sen novos casos positivos diagnosticados no municipio durante a última semana.

O Carballiño rexistra hoxe 7 contaxios activos, 2 máis dos que tiña o pasado xoves. Cea notifica 1 contaxio activo, e o resto de municipios -Piñor, O Irixo, Punxín, San Amaro, Beariz e Avión- non teñen casos de coronavirus a dia de hoxe.

A serra do Suído forma parte do sur da Dorsal Galega, un sistema montañoso que se estende de norte a sur de Galiza e que na provincia de Pontevedra está conformado polas serras do Candán, O Cando, O Testeiro, O Faro de Avión e O Suido. O Suído esténdese por polos concellos de A Lama, Avión, Beariz, Covelo, Fornelos e Mondariz ao longo de 492 km2, configurando un espazo con identidade propia, con unha historia común e con unha grande riqueza natural e cultural. A ubicación próxima á costa e as altitudes de máis de 1.000 metros fan que esteamos ante unha das serras de maior pluviosidade de toda a península ibérica, con máis de 2.400 mm de precipitación media anual. Os ríos que nacen na serra, o Tea, o Avia e o Verdugo-Oitavén son dos mellor conservados da demarcación Galiza-Costa, tanto pola calidade das augas, pola boa conservación das ribeiras e pola variedade de flora e fauna.

A orografía, o clima, a paisaxe, a historia fan da serra do Suído un espazo de extraordinarios valores ambientais, culturais e sociais que é necesario preservar e dinamizar no seu conxunto, prevendo impactos que alteren os equilibrios e fomentando actividades sustentábeis e creadoras de valor engadido. Todo este rico patrimonio cultural e natural viuse mermado e sometido a múltiples agresións, que se poden agravar de maneira irreparábel debido a proliferación de proxectos mineiros e de parques eólicos.

Nos últimos meses, a Xunta de Galiza está a tramitar 16 parques eólicos na Serra do Suído, no Alto Tea e no Faro de Avión. O proceso de tramitación destes parques estase desenvolvendo "con falta de transparencia e con graves limitacións ao dereito de información e participación pública, debido ás restriccións derivadas da pandemia. Por outra banda, o proceso adoece de irregularidades en relación coa avaliación de impacto ambiental, xa que non se están considerando os impactos conxuntos de todas as infraestruturas e na práctica estase consumando unha fraude de lei ao fragmentar parques que comparten infraestruturas en unidades máis pequenas, un procedemento fraudulento que xa foi obxecto de sentenzas condenatorias polos tribunais de xustiza", manifestan dende a formación nacionalista.

Desde o BNG advirten que xa no ano 2008 e atendendo a moitas destas razóns, paralizáronse proxectos de construción de parques eólicos como é o caso do PE Bidueiros, un antecedente que se debe ter en conta na tramitación dos actuais parques. Precisamente un dos que se están a tramitar na actualidade é o que foi denegado en 2008. Para a formación nacionalista aínda estamos a tempo de frear esta xigantesca desfeita, que responde a intereses alleos e non ás necesidades dos concellos e da súa veciñanza.

Calquera planificación do desenvolvemento de enerxías renovábeis debe facerse -subliña o BNG-  contando coa participación dos concellos e a veciñanza, debe respectar os valores ambientais e culturais do territorio, debería ter como contrapartida o abaratamento do prezo da enerxía eléctrica e debería ter como principais beneficiarias as comunidades locais.

Co obxecto de levar a cabo un modelo económico e social que responda aos intereses colectivos, co fin de preservar os valores ambientais, culturais, sociais e de garantir o desenvolvemento sustentábel do territorio e da veciñanza do Suído e Alto Tea, o BNG a través dos diferentes Grupos Municipais nos concellos afectados, presentará unha serie de iniciativas nas que se lle demanda á Xunta de Galiza:

1. A paralización cautelar de todos os parques éolicos en proxecto ou en tramitación, co obxecto de evitar os graves impactos negativos na contorna e o risco de destrución irreversíbel de hábitas de interese prioritario da serra do Suído e do Alto Tea.

2. A apertura dun proceso de información e de participación que permita coñecer os proxectos de industrialización do monte que se están a tramitar e o seu impacto ambiental, social e urbanístico, así como a declaración da serra do Suído como Lugar de Interese Comunitario (LIC) e a integración na Rede Natura 2000, co obxecto de protexer e conservar especies e hábitats de interese comunitario e de interese prioritario, con especia atención a humidais e turbeiras.

3. A ampliación da Rede Natura 2000 Río Tea coa inclusión do Alto Tea (Val de Tielas). A declaración como Reservas naturais fluviais das nacentes e das bacías dos ríos Avia, Tea, Oitavén e Verdugo, coa finalidade de garantir as súas funcións de preservación da biodiversidade, de conectores ecolóxicos entre zonas xeográficas e de subministradores de auga potábel e o inventario e catalogación de todo o patrimonio material e inmaterial do Suído, Alto Tea, Faro de Avión, Costas do Alén e A Paradanta, e desenvolvemento dun plan para a súa protección, conservación e divulgación.

4. Iniciar un proceso de participación social para a elaboración dun Plan de dinamización e desenvolvemento sustentábel do Suído e Alto Tea, con unha previsión de investimentos plurianuais por parte das administracións local, provincial e autonómica.

O PSdeG-PSOE de Leiro vén de reclamar "por enésima vez no que levamos de lexislatura, que o alcalde dea explicacións aos grupos da oposición da súa xestión ao fronte do Concello". Os socialistas sinalan que a actual política do Partido Popular é a do “escurantismo, a falta de transparencia e a ineficacia na xestión” e esíxenlle ao rexedor popular, Francisco José Fernández "que cumpra democraticamente contestando en tempo e forma as preguntas, rogos e suxestións que os socialistas presentan tanto por rexistro, como nas sesións plenarias".

Dende o Grupo Municipal Socialista subliñan que as solicitudes de documentación sobre diferentes puntos da xestión municipal acumúlanse na casa consistorial, sen que o alcalde “se digne a dar resposta á oposición, tal e como ordena a lei”. Lamentan tamén que a o rexedor “opte por prácticas pouco democráticas co único fin de evitar que se fiscalice a súa labor e deste xeito tapar a súa neglixente xestión ao fronte do municipio”. Os socialistas lembran que nas últimas semanas presentaron varias solicitudes de información por escrito, pero atopáronse cun alcalde que “se nega en rotundo a aclarar as súas actuación á veciñanza”.

Para os socialistas de Leiro resulta “digno de estudo” que o rexedor se negue a dar resposta á oposición, namentres se dedica “a venderse diariamente” en medios de comunicación comarcais co único fin de “atraer a atención da veciñanza e manipular a realidade de Leiro, para que os veciños e veciñas vexan unha realidade paralela ao que realmente acontece que é o abandono e a parálise continua”.

O voceiro do PSdeG-PSOE en Leiro, Manuel Rodríguez Vázquez, subliña que o rexedor “vende fume a diario na prensa, co obxectivo de confundir á veciñanza e trasladarlles unha información claramente segada e que escapa da realidade, e na que non se informa aos veciños e veciñas das consecuencias negativas da súa xestión ao fronte do consistorio”.

Esta forma de actuar “antidemocrática” e “opaca” trasládase tamén a mancomunidade do Ribeiro, na que Francisco José Fernández é tamén presidente e na que os socialistas levan tempo denunciando que se lles nega o acceso á documentación das contas, “evitando a tan temida fiscalización que quere negarnos o PP”. Unha actuación que está xerando importantes dúbidas e desconfianza no PSdeG-PSOE e que segundo relatan “deixa en evidencia que se está ocultando a verdade á veciñanza do que acontece en ambos organismos”.

Manuel Rodríguez subliña que “non e posible entender o principio de transparencia, eficacia e eficiencia na xestión se tanto se preconiza dende as filas do Partido Popular” e apunta que “todo queda reducido por unha actitude opaca, soberbia e prepotente de un alcalde e presidente de mancomunidade que pretende escapar con gran temor dos órganos de control da oposición”.

Os socialistas xa manifestan que presentarán escritos diante do presidente da Deputación de Ourense e líder do PP provincial, José Manuel Baltar e do presidente da Xunta, Alberto Núñez Feijóo, para “dar conta da situación e por presidir institucións que con recursos públicos financian servizos municipais que prestan á veciñanza tanto a mancomunidade como o concello”.