Aqui podes escoitar o PODCAST de COPE O Carballiño deste 11 de agosto dedicado á 63 edición da Festa do Pulpo.

O conselleiro de Emprego, Comercio e Emigración, José González, acompañado polo delegado territorial da Xunta en Ourense, Manuel Pardo, participou hoxe na 63ª edición da Festa do Pulpo do Carballiño, onde puxo en valor a relevancia deste produto para a vila e para o conxunto da comarca, tanto no ámbito cultural como económico.

Durante a súa intervención, o conselleiro subliñou que o polbo forma parte esencial da identidade galega e que celebracións como a do Carballiño contribúen a manter viva esa tradición, ao tempo que impulsan a economía local e a xeración de emprego e emprendemento ligado ao territorio. Destacou ademais que o impacto desta festividade abrangue sectores como a hostalaría, o turismo e o pequeno comercio, exemplificando un modelo de desenvolvemento sostible baseado en recursos propios. Por último, reiterou o compromiso da Xunta con todas aquelas iniciativas que apoian a promoción do territorio, a dinamización económica e a preservación dos nosos sinais de identidade.

O Concurso de Camisetas da Festa do Pulpo congregou hoxe a máis de 2.000 persoas na Praza Maior, que amosaron a súa creatividade a través de coloridos e orixinais deseños. Preto dun centenar de peñas pasaron polo photocall para posar co Pulpo Octavio, e para presumir das súas creacións.

Por primeira vez, produciuse un empate entre as tres camisetas máis votadas, polo que foi necesario acudir ás bases do concurso e desempatar polo número de integrantes.

Así, a gañadora foi a peña 333 FM, de 45 integrantes, que recibiu os 300 euros do primeiro galardón. Os Tentaculazos de Cenlle, de 24 integrantes, levouse o segundo premio (200 euros), e os Pulpitos Fiufiu, de 21 participantes, gañou o terceiro premio (100 euros).

Ademais, todos os deseños que cumpran os requisitos recollidos nas bases recibirán unha compensación de 60 euros ata esgotar o crédito dispoñible. No caso de superarse o orzamento, terase en conta a orde de inscrición.

O Concello do Carballiño pon en valor a creatividade da veciñanza, á que agradece a súa participación nesta tradición que une a maiores e pequenos.

O concello do Carballiño inaugurou a placa conmemorativa dedicada á localidade italiana de Noventa Padovana, coa que O Carballiño está irmandada, e á que ademáis tamén dedica esta 63 edición da Festa do Polbo.

Por tal motivo, unha delegación oficial encóntrase estes dias no Carballiño, encabezada polo alcalde deste municipio italiano, que participará no acto institucional do concello carballliñés este domingo ás 13:00 horas na explanada de entrada do parque municipal, asi como no resto das actividades previstas e no xantar no recinto do concello.

Na foto, Manuel Dacal, concelleiro de Turismo; Davide Iafelice, concelleiro de Turismo de Novena Padovana; Marcello Bano, alcalde de Noventa Padovana, e José Castro, alcalde en funcións do Carballiño.

O alcalde Francisco Fumega saudou hoxe á audiencia de COPE O Carballiño no transcurso dunha intervención radiófónica, que podes escoitar aquí:

O Concello do Carballiño acendeu na noite deste mércores 6 de agosto a nova iluminación do templo e da praza da Veracruz nunha noite moi especial, dentro da semana grande da 63ª Festa do Pulpo e antes do concerto do Cuarteto Alfonso Medela “On cue”.

Os asistentes puideron gozar en vivo e directo do acendido dos 47 novos proxectores e 11 luminarias ambientais, ubicados arredor do templo. A intervención supón un salto de calidade respecto á iluminación antiga, coa sustitución dos antiguos proxectores por novos puntos de luz e a recuperación do deseño lumínico orixinal ideado polo arquitecto Antonio Palacios.

Coa iluminación de hoxe, o Concello do Carballiño ponlle o broche aos actos organizados con motivo do 150 aniversario do arquitecto Antonio Palacios, aínda que seguirá a difundir a súa obra e o seu legado, que na vila ten unha das súas obras máis importante e a principal no ámbito relixioso. Nesa liña, este sábado o templo acolle o concerto de Emocións Sonoras da Xove Orquestra Ourensanía, unha cita para escoitar música á luz das candeas.

O proxecto de iluminación, financiado con fondos europeos, foi redactado e dirixido por Audites e adxudicado á empresa Acelec Instalaciones Eléctricas, cun investimento de 87.846,00 euros. A solución técnica foi consensuada coa oficina técnica de Patrimonio Cultural, garantindo o respecto ao valor patrimonial do conxunto.

A actuación incluíu a retirada da iluminación que discorría polo perímetro e cuberta do templo, eliminando tamén todo o cableado e substituíndo os 78 proxectores e as 11 luminarias existentes por 47 novos proxectores e 11 luminarias ambientais, todos eles con tecnoloxía LED de alto rendemento fabricados por Moonoff.

A maior parte deste novos elementos instaláronse en 4 columnas de 6 e 10 metros de altura, situadas fóra do perímetro do templo e aliñadas cos seus eixes principais. Tamén se instalaron proxectores, dirixidos cara ao templo, na casa parroquial. As novas lentes e potencias están adaptadas a cada elemento a iluminar, garantindo unha correcta direccionalidade que diminuirá a contaminación lumínica.

Os únicos proxectores que quedaron colocados sobre o templo son os do interior da torre.

“Esta intervención non só dignifica un espazo emblemático para a veciñanza e un dos lugares máis visitados polos miles de turistas que chegan cada ano á vila, senón que tamén serve como homenaxe á figura de Antonio Palacios, apenas un ano despois de celebrarse os 150 anos do seu nacemento no Porriño (Pontevedra)”, destaca o goberno local.

Ademais da substitución do cadro eléctrico, canalizacións e conexións, o proxecto contemplou o reforzo das luces do anfiteatro e a posta en valor dos volumes arquitectónicos da Veracruz, recuperando o xogo de luces concibido por Palacios e un tono de luz especial no interior do templo, que marcará “un antes e un despois”, segundo explica o inxeñeiro, Enrique Pardo, responsable da empresa adxudicataria do proxecto.

A nova iluminación mellorou tamén a seguridade da contorna, actualmente con varias zonas escuras, e supón un aforro enerxético superior ao 60%, contribuíndo así á sostibilidade e ao equilibrio orzamentario municipal.