O delegado territorial da Xunta en Ourense, Gabriel Alén, reuniuse con Ramiro Bello, presidente da Plataforma pola Defensa do Transporte Público do Carballiño e Comarca para trasladarlle a proposta da Consellería de Infraestruturas e Mobilidade de mudar os servizos de autobús do Carballiño a carón da estación de ferrocarril. Esta medida, xa lle foi proposta pola conselleira Ethel Vázquez ao alcalde, Francisco José Fumega, nunha xuntanza por videoconferencia o pasado 8 de outubro co gallo de facilitar a intermodalidade e mellorar a calidade do servizo.

O delegado territorial salientou o compromiso do Goberno galego coa mellora constante dos servizos do transporte público no concello do Carballiño e a súa contorna, e lembroulle ao presidente da plataforma que as novas concesións de autobuses previstas no Plan de Transporte Público de Galicia incorporaron as solicitudes trasladadas polos municipios da comarca, ampliando a cobertura xeográfica do trasporte público e mellorando as conexións, tanto con Santiago, como con Ourense.

Alén Castro, tamén lle ampliou información sobre a medida que implantou o Goberno de Galicia o pasado mes de xuño, pola que todos os xoves menores de 21 anos do Carballiño poden viaxar gratis pola provincia nos autobuses dependentes da Xunta.

Así mesmo, o delegado territorial amosoulle a preocupación da Xunta pola situación dos servizos ferroviarios na provincia, xa que a frecuencias anuladas con motivo da declaración do estado de alarma aínda non foron recuperadas nin Renfe ofrece previsións sobre a súa restitución.

O concello do Carballiño recibiu hoxe un galardón consistente en dúas Flores de Honra concedidas pola inciativa Vilas en Flor Galicia.
O premio foi comunicado no transcurso dun acto que se celebrou desde Santiago por videoconferencia con vintesete concellos, e no que participou a conselleira de Medio Ambiente, Ángeles Vázquez, ademais dos promotores desta iniciativa. O concello estivo representado pola concelleira de Medio Ambiente, Rita Soto.

É o segundo ano que o concello do Carballiño participa nesta experiencia, e por iso a concelleira agradeceu a concesión do galardón, que supón, según dixo, “un aliciente máis para seguir mellorando este recurso e contribuir a que os espazos naturais do Carballiño sexan cada vez mellores. Realmente, no Carballiño temos arredor de 500.000 metros cadrados de zonas verdes, plenamente integradas no casco urbano, e cuxo mantemento require un gran esforzo económico, así como en medios técnicos e persoal. É un recurso ao que destinamos anualmente unha parte importante do noso presuposto municipal, pero que damos por ben empregado, xa que representa un dos principais reclamos turísticos do Carballiño”.

Vilas en Flor Galicia é un programa anual que recoñece en forma de galardóns, chamados Flores de Honra, a traxectoria e as accións levadas a cabo polos municipios galegos na mellora e potenciación dos espazos verdes urbanos, a súa xestión sustentable, a educación ambiental e a concienciación cidadá no coidado da contorna.

Vilas en Flor é unha iniciativa de ASVINOR (Asociación de Viveristas do Noroeste), AGAEXAR (Asociación de empresas de xardinería de Galicia) e da Fundación Juana de Vega cuxos obxectivos son promover a protección, mellora e posta en valor dos espazos verdes nos municipios de Galicia e contribuír con iso a mellorar a calidade de vida dos seus habitantes e a súa cohesión social; mellorar a imaxe dos municipios e os seus encantos para visitantes e turistas; xerar espazos de formación, reflexión e debate ao redor da xestión sustentable dos pobos e cidades; promover os espazos verdes como punto de encontro de relacións sociais interxeracionais; e mellorar a conciencia social cara ás políticas de sustentabilidade ambiental e potenciación dos espazos verdes urbanos.

O Presidente da Xunta de Galicia dixo esta mañá que vai aplicar o que chamou "modelo O Carballiño" ao resto de Galicia, ás sete grades cidades e a outros 53 municipios no que a situación da pandemia é máis desfavorable. En principio, e no ámbito das comarcas do Ribeiro e O Carballiño, todos os concellos quedarían fora destas restricións, excepto no Carballiño nas que vain seguir vixentes as actuais medidas tanto de mobilidade restrinxida ao propio territorio municipal ou as relativas a todas as actividades consideradas non esencias, que continuran prohibidas no municipio carballiñés, tal como están na actualidade.

Alberto Núñez Feijoo anunciou este mércores que establecerá a partir do venres ás 15:00 horas e durante un mes o peche de actividades non esenciais, incluída a hostalería, e o peche perimetral para o 60 por cento da poboación galega.Nunha comparecencia para informar sobre as medidas acordadas polo comité clínico reunido de novo este mércores, explicou que estas medidas afectarán a un total de 60 municipios, que inclúen as sete cidades e as súas zonas de influencia, así como 14 localidades máis pequenas que presentan altos índices de contagios.

Os municipios afectados polas restricións son A Coruña, Arteixo, Culleredo, Cambre, Oleiros, Lugo, Santiago, Ames, Boqueixón, Oroso, O Pino, Teo, Trazo, Val do Dubra, Vedra, Ferrol, Ares, Fene, Neda, Narón, Mugardos, Ourense, Barbadás, Amoeiro, Coles, Pereiro de Aguiar, San Cibrao das Viñas e Toén Pontevedra, Vilaboa, Pontecaldelas, Poio, Marín, Barro, Campolameiro, Cerdedo-Cotobade e Soutomaior, Vigo, Mos, Nigrán, Gondomar, Porriño, Redondela, Vimianzo, Monforte, Burela, Viveiro, O Carballiño, Verín, Xinzo, Cangas, A Estrada, Lalín, Silleda, Ponteareas, Tui, Cambados, O Grove, Vilanova de Arousa e Vilagarcía.

A actualización de datos correspondente a este mércores dia 4 de Novembro continúa a mesma tendencia dende fai 13 dias no Carballiño, onde continúa baixando o número de persoas enfermas de Covid-19, hoxe son 84, asi que 12 menos que onte.

Tamén descenden os contaxios activos en Boborás (-3) e quédase hoxe con 15 casos, e tamén desconta 2 enfermos en relación a onte o concello de San Cristovo de Cea, que ten 13. Mantéñense os datos no resto dos concellos: Piñor (7) Beariz (3) O Irixo (2) Maside (3) Punxín (3) e San Amaro (2)

O concello do Carballiño ven de otorgar o suministro eléctrico do termo municipal para o próximo exercicio 2021 á empresa ENDESA ENERXÍA SAU, que presentou a mellor oferta no procedemento de adxudicación deste servizo. A adxudicación faise por un exercicio pero coa posiblidade de prorrogalo outro máis. En concreto, o aforro anual por este concepto é de 699.909,42€, o que supón un 64% menos que o gasto realizado durante este ano 2020. Así, a licitación do servizo para este período anual era de 1.093.830,17€, mentres que a oferta presentada por Endesa foi de 393.920,75€.

A Xunta inicia as obras de mellora de firme na estrada OU-212, no concello de Avión, cun investimento de 190.000 euros. Este proxecto contará cun prazo de execución estimado de cinco días, supeditado ás condicións meteorolóxicas.

A actuación consistirá na rehabilitación da capa de rodadura en dous treitos, un entre os puntos quilométricos 23+180 e 23+380 e outro entre os puntos 24+900 e 27+150. O obxectivo da intervención é mellorar as características superficiais do firme en dous treitos de curvas con pendente elevada mediante a extensión dunha capa de rodadura de 5 cm de espesor. Os traballos completaranse co pintado de marcas viarias e a adecuación da sinalización vertical.

Os contaxios activos nos centros educativos da comarca do Carballiño continúan a tendencia á baixa, despóis de rexistrarse ata 37 positivos en Covid-19 o pasado dia 23 de Outubro, os datos da última actualización da Consellería de Eduación correspondentes a este martes dia 3 de Novembro reducen a cifra ata o 14 casos.

Sae da lista de centros afectados o Punto de Atención á Infancia -PAI- do concello de Boborás. Na relación de centros e casos que se contabilizan en cada un deles é a seguinte: Sagrado Corazón (4) Calvo Sotelo (3) Vila do Arenteiro (2) IES nº 1 (2) IES Chamoso Lamas (2) e Colexio de Cea (1)

Continúa a desescalada do coronavirus no concello do Carballiño, onde o descenso está a punto de alcanzar o 50% do pico da pandemia durante o mes de Outubro, son 96 os contaxios activos no municipio carballiñés tras a actualización de datos deste martes dia 3 de Novembro, 13 menos ca onte. 

Nos concellos da comarca, a única variación hoxe está no concello de Piñor, que continúa á alza e acumula un caso máis ca onte, sumando 7. E sen cámbeos no resto dos municipios, que manteñen os mesmos contaxios activos ca onte: Boborás (18) Cea (15) Beariz (3) Maside (3) Punxín (3) San Amaro (2) e O Irixo (2).

O deputado provincial do BNG Bernardo Varela e a concelleira carballiñesa desta mesma formación política, Sofia García, mostraron a súa disconformide coa tramitación deste proxecto mineiro, polas "irregularidades manifestas que se veñen detectando na tramitación, como a omisión do procedemento de avaliación de impacto ambiental". Un trámite que os promotores do proxecto evitarían porque "o proxecto está fragmentado de maneira fraudulenta, tal como no seu dia xa denunciou o Sindicato Labrego Galego".

A empresa promotora da explotación mineira pretende poñer en marcha un proxecto que podería albergar unha das maiores reservas de coltán e litio de toda Europa. Trátase de minerais considerados claves para a industria tecnolóxia e do sector do autómobil eléctrico. 

A zona na que se ubica abrangue a varias parroquias do concellos de Avión, Beariz, Forcarei, Cerdedo-Cotobade e A Lama, e a superficie afectada podería rebasar as 1.600 hectáreas. Nas alegacións presentadas por diversas asociacións, ás que fixeron referencia dende o BNG, ademáis de non contar coa avaliación de impacto ambiental ordinaria, apuntan que o proxecto pon en perigo a vida da poboación local e a riqueza forestal, gandeira e natural da zona afectada, entre as serras do Candán e O Suido.

O BNG anuncia que presentará mocións sobre este asunto nos concellos directamente afectados e nos do Carballiño e Ribadavia, na súa condición de cabeceira de comarca, nas que se pide o apoio institucional para esixir os informes precepticos para garantir o cumprimento da lexislación sectorial, e mesmo "a apertura dun proceso de diálogo cos colectivos que se opoñen á explotación mineira, en base aos riscos ambientais e para a saúde derivados deste tipo de actividade extractivas".