A concellería de Medio Rural, que dirixe Rosa Fuentes, rematou o acondicionamento e limpeza do Camiño Miñoto ao seu paso polo termo municipal do Carballiño, que é prácticamente coincidente co Camiño dos Arrieiros. Por este motivo, o concello ten previsto programar, en colaboración co Centro de Estudios Chamoso Lamas, unha ruta guiada, que se anunciará próximamente. O obxectivo é a posta en valor deste percorrido que ten un gran interese cultural, natural e histórico, e sobre todo de cara ao próximo ano Xacobeo 2021, no que se espera que o Camiño Miñoto sexa declarado de interese cultural, como paso previo para a consecución da súa inclusión como Camiño Xacobeo. Asimesmo, esta concellería procederá á reposición e nova sinalización do camiño, para o cal xa están encargados aos paneis correspondentes. Este roteiro forma parte dun dos numerosos trazados empregados dende a Idade Media polos peregrinos portugueses, especialmente do norte dese país, que acudían a Compostela.

Polo que atinxe ó Concello do Carballiño, esta vía penetraba polo Ribeiro para chegar ata San Clodio, punto importante de relixiosidade, e seguir polos lugares da Esperela e Cubilledo, seguindo ata preto da igrexa parroquial de Gomariz, edificación do século XII e da granxa de Gomariz, a máis importante adega medieval de Galicia que conta con decoración románica e que xa aparece mencionada na documentación do século XII. A partir de aquí, entrados no Carballiño, o camiño diríxese ata a aldea de Fonte Antiga, onde atopamos un lugar denominado O Mesón, punto este que faría referencia a unha edificación destinada a parada para acougo de arrieiros do viño. Este tramo coincide coa actual Ruta dos Arrieiros. Seguindo dende a aldea de Fonte Antiga, cruzamos un pontillón de formigón feito hai anos onde había outro de pedra que se derrubou por causa dunha chea do regato do Barón, seguimos polo camiño entre vellos socalcos das viñas chegando ata á aldea hoxe abandonada do Barón Pequeno, onde localizamos unha adega histórica que segundo a documentación pertencía ó mosteiro de Acibeiro e que na porta de entrada ten esculpida unha cuncha de vieira – asociada ós camiños xacobeos-, posiblemente do século XV. Ascende o camiño entre máis socalcos de viñas hoxe en desuso, chegamos ata o cruceiro de Viñoa, e dende alí seguimos por outro que decorre moi preto da igrexa parroquial de Santa Baia de Banga, exemplar que acolle no seu interior as imaxes en pedra que representan a figura de tres Santiago Peregrino, un deles coroando o arco de acceso á capela na que se atopa enterrado un membro da familia dos Sarmiento.

O roteiro prosegue por un fermoso camiño de terra ata chegar á aldea de Cima de Vila, cunha adega histórica en perfecto estado, que ten á súa beira un novo camiño descendente que vai entre muros e, en parte, enlousado ata chegar á aldea e praza de Quintela, lugar onde se localizan varias adegas históricas pertencentes a varios mosteiros e á Orde do Santo Sepulcro –a máis espectacular-, ademais de tres antigas construcións con vieiras nas portas de acceso e nas fachadas no lugar de Belvís e Cabo de Vila, moi semellantes á que atopamos no Barón Pequeno. O camiño, segue en descenso, deixando a parroquia entre fermosos e monumentais muros empedrado que decorre entre socalcos de viñas hoxe abandonadas, para chegar ata á Ponte do Santo Sepulcro, xa en Pazos de Arenteiro, de orixe medieval. Esta ponte ten esculpida na clave do arco central a figura dun camiñante, que ben podería ser a figura dun cabaleiro da Orde do Santo Sepulcro, que nos conduce ó enclave de Pazos de Arenteiro, xa en Boborás, a onde chegamos por camiño empedrado.

O concello do Carballiño renderalle unha homenaxe ao párroco recentemente xubilado, José Benito Sieiro González, este xoves, 17 de setembro, festividade de San Cibrao, ao termo da celebración da misa na honra do patrono do Carballiño. Estes actos terán lugar en principio ao aire libre, na praza da Veracruz, se o tempo o permite, e en caso contrario celebraranse no interior do templo. En ambas alternativas o aforo será limitado e gardando todas as medidas preventivas e de seguridade establecidas polo coronavirus. Será obligatorio o uso de máscara e lavado de mans con xel hidroalcólico. O aforo no exterior será superior ao do interior, pois colocaranse 400 sillas, separadas a 1,5 m., para garantir a distancia de seguridade. No acto de homenaxe o alcalde faralle entrega ao párroco xubilado dunha placa así como dunha reproducción en miniatura do templo da Veracruz.

CONCERTO DE LUAR NA LUBRE NA INSUA DOS POETAS

Debido á pandemia non haberá actos festivos durante estes días pero, dependendo das condicións metereorolóxicas, está previsto que se celebre na Insua dos Poetas o mércores 16 o concerto de Luar na Lubre. Este evento está organizado pola Fundación Insua dos Poetas e conta o patrocinio da Xunta de Galicia, así como a colaboración da Deputación Provincial de Ourense e do Concello do Carballiño. Terá lugar ás 19,00 h., con entrada libre ata completar o aforo. Será obligatorio o uso de máscara e o lavado de mans con xel hidroalcólico. A apertura das portas terá lugar ás 18,00 h. Luar na Lubre ofrecerá un concerto no que interpretará os temas do seu último dobre CD VIEIRAS E VIEIROS. HISTORIAS DE PEREGRINOS. Trátase do 19º disco da banda, no que exploran os escritos, as lendas, as sonoridades e as pegadas que os peregrinos deixaron a través dos múltiples carreiros que conforman o Camiño de Santiago ao seu paso polo territorio galego. O factor humano da vía xacobea é o fío que tece un relato plural que abarca diversas épocas, voces e contextos.

GRUPO FOLCLÓRICO CANTIGAS E AGARIMOS

Asimesmo, está previsto que se celebre o venres, 18 de setembro, a actuación do grupo folclórico Cantigas e Agarimos no auditorio da praza da Veracruz. Este evento, sen enmbargo, podería anularse se cambia a previsión meteorolóxica, que en principio é favorable, para a tarde do 18. A Agrupación Folclórica “Cantigas e Agarimos” de Santiago de Compostela fundouse nesta cidade no ano 1921 por iniciativa de Bernardo del Río Parada, Salvador Cabeza de León, Enrique Sánchez Guerra e Camilo Díaz Baliño, sendo unha das agrupacións máis antigas adicadas ó folclore galego.

Por outra parte,  anuncian dende o concello do Carballiño que "debido á chuvia, suprímense outros actos culturais previstos para estes días, como a actuación de grupos locais, entre outros".

A pesar de que é un problema que ven de vello, nos últimos tempos viuse agravado "pola irresponsable actuación levada a cabo por este Concello nas rúas Cuba, Venezula, Uruguay e Brasil que conectan a Avenida Julio Rodríguez Soto coa devandita Avenida do Balneario", aseguran dende Espazo Común.
A Avenida do Balneario -afirman- sofre decotío importantes encharcamentos e inundacións que provocan escorrentías baixo o asfalto e polo tanto un notable desafianzamento do pavimento e posterior afundimentos do mesmo. Non son -remarcan- simples fochancas, se non, en moitas ocasións, de socavóns do tamaño dun coche.

Dende Espazo Común inciden no problema e apuntan ás obras acometidas recentemente polo concello carballiñés afirmando que "nas disparatadas obras acometidas durante os pasados meses cun custo de 223.000 € das arcas municipais, o alcalde decidiu non acometer a correcta canalizacións das augas pluviais e a súa separación das residuais, como ditamina a norma e o sentido común", polo que concluén que a probematica aumentou considerablemente.

E poñen como exemplo concreto o acontecido recentemente "nos seis meses precedentes, os veciños da zona, puideron observar con preocupación como ata tres enormes buratos se abrían engulindo o piso, ocasionando que xa tivera que intervir o Concello para o seu arranxo, polo menos, en cinco ocasións. En días pasados, informáronnos doutro novo burato".

Para Espazo Común "é evidente que as ocurrencias do alcalde conlevan un gran prexuizo para moitos veciños e un sobrecusto en reparacións para as arcas municipais en reparacións que se poderían ter evitado de facer ben as cousas no seu día".

A solución pasaría, xa que logo, polas actuacións que propón Espazo Común e trasladará ao pleno da corporación municipal do Carballiño:

1.Que se acometa dende este Concello, un proxecto integral para a Avenida do Balneario que resolva os problemas actuais de conducción de augas e as súas consecuencias. Por suposto, que se contemple no mesmo a debida separación das augas residuais e das pluviais das rúas que afectan a este problema, dandolle a correspondente saida a cada unha segundo corresponda
2.Que unha vez elaborado se reúna ós veciños de dita rúa para informarlles pormenorizadamente das actuacións previstas.

Fin de semana chea de cine cunha variada oferta para todos os públicos, que inclúe desta vez unha proxección ao aire libre organizada polo concello de Avión e que se suma á programacíón habitual do NOVOCINE de Leiro e a inauguración da tempada do Cine-Club Carballliño.

Na Praza do Concello de Avión, o venres 11 ás 22 horas, cinema de verán ao aire libre coa proxección da película documental de Aitor Rei "A Última Viaxe do Afiador".

No auditorio do Carballiño temos unha fin de semana chea de cine, que se abre o venres 11 co inicio da tempada do Cine-Club, proxectando a película de Benito Zambrano "Intempérie", co actor galego Luis Tosar no reparto, en dous pases ás 20 e 22,30 horas. Ademáis, sábado e domingo, ambos dias ás 19 horas, proxectaránse todas a curtametraxes que se presentan a concurso na sección oficial do Festival de Cans.

Mentres, na carteleira do NOVOCINE de Leiro dúas peliculas para toda a fin de semana: cine infantil con "Trasto de la mansión a la calle" (Venres ás 18:15, sábado e domingo ás 16 horas), e a película americana "After en mil pedazos" (Venres ás 20:30 horas, sábado e domingo ás 18:15 e 20:30 horas.

O Templo da Veracruz acolle este sábado dia 12 e dende as 20:30 horas o Festival "Outros países, Outras músicas" coa actuación da Coral de Campo Lameiro, o coro Ludus Tonalis da Coruña e o Coro de Cámara de Müsica Viva do Carballiño.

Tamén o sábado 12 ás 21:30 horas o concello de Maside programa na rúa principal da localidade unha sesión de música e contacontos a cargo de Lorena Pinheiro, historias e contos que a artísta acompaña con algunhas intervencións musicais.

E finalmente, tamén o sábado 12 ás 21 horas cine ao aire libre na Carballeira de Moldes, onde poderá verse "Parásitos" unha das películas máis premiadas do último ano, unha sesión organizada polo concello de Boborás.

A Coral Polifónica Campo Lameiro, de Pontevedra; o Coro de Cámara Ludus Tonalis, da Coruña, e o Coro de Cámara Música Viva do Carballiño, conforman o cartel do 5º Festival Outros Países, Outras Músicas, que promove o coro Música Viva, en colaboración co Concello do Carballiño, a Deputación Provincial de Ourense e a Federación de Corais de Galicia.

O evento celebrarase no templo da Veracruz este sábado, 12 de setembro, ás 20,30 h., e contará con todas as medidas de separación e seguridade polo coronavirus.
Ao respecto, o presidente do Coro Música Viva, Antonio Rey Cornide, asegurou que se establece un protocolo estricto, como é gardar a distancia entre coralistas de 1,5 m, e entre os coros e o público de 3 m, así como o uso de xel hidroalcólico para o lavado de mans do público, uso de máscara e separación.
O evento foi presentado esta mañá polo concelleiro de Cultura, Diego Fernández, e Antonio Rey Cornide.

Diego Fernández destacou a consolidación deste festival no calendario cultural do Carballiño, así como o feito de que se poidan escoitar músicas de todo o mundo nun marco inigualable como é o Templo da Veracruz. Agradeceu e felicitou ao Coro Música Viva polo labor que desenvolve e, sobre todo, polo esforzo que supón organizar este festival en tempo de pandemia. Ao respecto destacou o protocolo minucioso de prevención establecido pola organización.
Antonio Rey amosou o seu orgullo de que O Carballiño poida presumir de festival, que cada ano eleva a calidade dos coros participantes. Neste senso destacou ao coro Campo Lameiro, dirixido por Sofía Bouzada Pérez, cun bagaxe importante dentro e fóra de Galicia, a ao Coro de Cámara Ludus Tonalis da Coruña, dirixido por Ruper Twine, ademais do coro Música Viva, que dirixe Miguel Sáez Sotelo.

Son formacións de cámara de arredor de 12 ou 13 membros, o que facilita a separación entre cantores para poder gardar a distancia establecida no protocolo de prevención e seguridade ante o covid 19. Os tres coros interpretarán seis temas cada un, que serán moi variados, contribuindo a que o festival sexa ameno.

Os alcaldes e concelleiros do Partido Popular das comarcas do Carballiño e O Ribeiro, o mesmo que o resto da provincia de Ourense deixaron constancia da súa negativa á expropiación dos remanentes dos seus concellos que pretende levar a cabo o Goberno de Sánchez, apropiándose así do diñeiro de toda a veciñanza e rachando co principio de autonomía local para investir estes cartos nas necesidades máis importantes de cada concello. Os representantes municipais populares escenificaron a súa protesta con concentracións diante das casas consistoriais, amosando un cartel co lema “O meu concello non se expropia”, iniciativa que tamén levaron ás redes sociais.

Unha acción que se produce a escasas horas doutra concentración, desta volta en Madrid, na que ademais dos representantes do PP nas entidades locais tamén participarán cargos municipais de toda España pertencentes a outras dez formacións políticas. O acto terá lugar diante do Congreso dos Deputados, onde tamén mañá se someterá á convalidación da cámara baixa o real decreto lei de cesión dos remanentes. Os alcaldes, portavoces e concelleiros populares ourensán quixeron trasladar aos seus veciños e veciñas a enorme inxustiza que supón este decreto, pois lles impide facer o seu traballo que non é outro que ofrecer servizos dignos e de calidade e atender as necesidades dos habitantes dos seus concellos.

Con esta acción conxunta tamén quixeron poñer de manifesto a delicada posición na que se sitúa o PSOE e o Goberno de Sánchez, que están absolutamente sós logo de arremeter contra as administracións máis próximas ao cidadán. Os socialistas, que racharon coa unanimidade que sempre presidiu a FEMP, están dando a elixir entre o benestar da veciñanza e a política partidista, e fronte a elo o PP sempre estará coas persoas, pois os remanentes os precisan todos os veciños sin distinción de cores políticos. Nas fotografías, vemos as protestas nos concellos de Boborás, Leiro e O Irixo.

Sanidade confirma a aparición dun novo brote de Covid-19 no Carballiño, fai o cuarto da serie dende que se declarara o primeiro a principios do pasado mes de agosto.

Desta vez, as persoas afectadas inicialmente son tres, da mesma familia, dous homes de 57 e 33 anos e unha muller de 20 anos.