O concello do Carballiño contempla a apertura dun novo vial á localidade de Vilar, na parroquia de Veiga, que solucione os problemas de accesibilidade que ten este lugar para o acceso de vehículos de tamaño grande, e mesmo vehículos de emerxencia, como bombeiros, ou doutro tipo.

O alcalde Francisco Fumega está aberto a estudar a execución deste proxecto que se acometería aproveitando un camiño de carro xa existente que comunica Vilar coa zona de Pedrouzo, nas inmediacións de Toscaña de Arriba.

O rexedor municipal confirmou que se trata dunha proposta presentada por veciños "xa fixemos un estudo previo para ver todos os propietarios que terían que ceder terreo para facilitar o ensanche do camiño, despois o concello acometeria o proxecto de apertura do novo vial".

O concello do Irixo financiará este proxecto cunha aportación da Xunta de 60.000 euros, un proxecto novidoso no ámbito comarcal e que consistirá na creación dunha área recreativa e medioambiental infantil.

Os nenos e nenas do Irixo poderán iniciarse neste espazo nos cultivos ecolóxicos, e tomando conciencia dos coidados do medioambiente, e sen deixar de lado o aspécto lúdico, propio da idade infantil.

A ubicación desta nova infraestructura será nun espazo anexo ao centro escolar do Irixo, para que desta maneira poida utilizarse por parte do alumnado do propio centro. A instalación, según recolle o convenio asinado polo concello do Irixo coa Xunta, deberá estar rematada antes do próximo mes de Outubro, según avanzou nesta emisora de radio o alcalde da localidade, Manuel Cerdeira.

O BNG esixe ao presidente da Entidade Local Menor "que defenda os intereses de Berán inste a unha modificación do percorrido, que se recolla o seu pola pola parroquia desde Caldelas ata Caldas".

A reclamación do grupo nacionalista chega despois de saberse da proposta da Asociación Camiño Miñoto-Ribeiro, da que forman parte varios concellos das comarcas do Ribeiro e O Carballiño, sobre o trazado desta ruta xacobea, que aínda está sen oficializar como tal.

O BNG denuncia "o escurantismo desta asociación, que non tivo en conta o traballo que se leva feito por diferentes colectivos de Berán e fora de Berán".

Poñen de manifesto que "o paso do camiño pola parroquia de Berán é un engadido para a divulgación do noso balneario e un valor turístico para Berán, sendo unha reivindicación de diferentes asociacións e veciños de Berán dende que se ven reclamando dende fai ano".

O Partido Popular considera que o "concello do Carballiño, segue a dar bandazos na súa liña de soltar ideas ao aire sen ter feito un mínimo traballo que garanta as propostas que fai".

Refírese ao anuncio feito este pasado sábado sobre a celebración da festa do pulpo para este ano, según o PP, "facendo un dano importante á Festa do Pulpo e por conseguinte ao pobo do Carballiño pois é dunha irresponsabilidade total, falar da Festa do Pulpo na edición do 2020, cando non existe un plan de actividades posibles que contemplen un primeiro informe sanitario, de seguridade e que incluso fale de posibles variables".

Non entenden no Partido Popular que se se avance a celebración da festa e a súa dedicatoria ao personal sanitario precisamente "os criterio sanitarios e de seguridade depende dos mesmos concelleir@s que estiveron repartindo mascarillas porta a porta poñendo en risco a veciñanza ou depende de quen a estas alturas non dan posto en orden as dependencias municipais que garantan un traballo seguro aos empregados, ou daqueles que seguen sen ser capaces de garantir unha convivencia ordenada entre terrazas e viandantes".

E engaden nas súas consideracións que "o Concello do Carballiño, está a dar largas a moitas iniciativas que se lle están propoñendo dende diversas asociacións culturáis para uso de instalacións como o auditorio, porque según lles din, simplemente non poden garantir unha limpeza exhaustiva tal como é obrigatorio, e sen embargo nos avanzan que a Festa do Pulpo se porá facer".

Os populares manifestan a súa incredulidade co anuncio do concello sobre a festa do pulpo para o mes de agosto cando antes "deberíase de concretar que se vai a facer con actividades que se viñan facendo no mes de Xullo, como pode ser o carnaval de verán, a Festa da Liorta, plantexar unha apertura segura e inmediata das piscinas, ou fixar un protocolo claro de utilización das pallozas e do cámping con persoas procedentes de calquera lugar e tamén fixar un criterio para calquera tipo de actividade que se lle propoña. Incluso, debería de ter un criterio concreto para o caso de que se decidise por parte da Xunta a organización da Festa do Maiores ou por parte de Special Olimpics a súa celebración anual".

Recoñecendo que non sempre é doado acertar, ao mesmo tempo engaden que "a improvisación nun momento como o que estamos a vivir é a peor ferramenta".

Finalmente, dende o Grupo Popular,trasladan ao Grupo de Goberno municipal, "que non se esconda na súa maioría absoluta, e neste senso, seguimos reclamando e así o faremos cada vez que se solten propostas ao aire sen traballo previo, que se constituía a comisión municipal do COVID19 para que con expertos designados xunto cos partidos con representación no concello, se poida ter un mellor acerto na toma de decisións e non facelo por impulsos".

A Consellería do Medio Rural continúa avanzando no desenvolvemento dos proxectos de aldeas modelo en diferentes puntos de Galicia. Estas iniciativas teñen por obxectivo principal xerar actividade agrogandeira arredor dos núcleos rurais, co fin de recuperar e poñer en valor a terra agraria e, ao tempo, anticiparse aos incendios forestais, creando unha devasa natural fronte a eles.

Así se está a facer, por exemplo, nas aldeas modelo de Penedo de Xuvencos, en Boborás, e de Trabazón, no Irixo.

Precisamente os alcaldes de ambos concellos da comarca do Carballiño, Patricia Torres e Manuel Cerdeira, respectivamente, mantiveron un encontro de traballo con técnicos da Consellería e con promotores de proxectos produtivos para ambos núcleos, co obxectivo de impulsar estes proxectos.

No caso do Penedo de Xuvencos(Boborás), vaise desenvolver actividade gandeira de porcino autóctono ecolóxico. Aproveitaranse as terras para a cría en extensivo destes animais, así como para cultivos ecolóxicos que servirán para alimentalos.

En Trabazón (O Irixo) farase algo semellante, pero con produción aviar, de galiña piñeira, tanto para ovos como para carne. Tamén neste caso aproveitarase o terreo para a súa cría ao aire libre e para plantacións en ecolóxico que servirán para alimentar as aves. Co fin de acondicionar as superficies obxecto de actuación, o seguinte paso será redactar, de acordo cos promotores, os correspondentes proxectos de obras. Serán actuacións tales como a construción de peches para o gando, a instalación de comedeiros e bebedeiros ou a mellora de infraestruturas de acceso, entre outras.

A aldea modelo de Penedo, en Boborás, conta cun total de 675 parcelas correspondentes a 132 propietarios, cunha superficie de 23,5 hectáreas. A de Trabazón, no Irixo, consta de 220 parcelas de 30 propietarios, cunha superficie de 6 hectáreas. Estes núcleos forman parte das 11 aldeas modelo xa declaradas en Galicia.