O Partido Popular mostra a súa preocupación pola actitude do alcalde, ao entender que "na reunión mantida hoxe no Concello entre os distintos grupos políticos con representación no Concello, coa intención de concretar e facer propostas sobre cada unha das bases e convenios que fai falla ter aprobados para conseguir que os recursos cheguen con tempo e para que cada euro sexa efectivo no seu destino, detectouse claramente que o Goberno local non ten unha idea clara de como xestionar agora o reparto das axudas".

A impresión xeral que o portavoz do Partido Popular, Ricardo Perea, sacou desta xuntanza, é que o Alcalde Fumega "ten conceptos básicos confusos e equivocados de xestión, ten algunha idea que demostra que non está asesorado nin polo secretario nin polo interventor, e que as súas propostas, en síntese, son de moi difícil xestión por parte do persoal do Concello, o que pode provocar un gran retraso nas resolucións que son necesarias para poder facer os pagos aos solicitantes".

Entenden os Populares que "de seguir nesta postura por parte do alcalde conseguirá que a fin de ano non se de nin gastado esta primeira fase de axudas, ademais de bloquear o Concello administrativamente, polo que xa nos poderíamos ir esquecendo da comprometida segunda fase, xa que entendemos que se debe apostar por unhas bases áxiles, claras e de fácil xestión".

Aseveran que teñen a sensación de que o Alcalde "non ten nin moita urxencia nin moito interese por poñer a andar esta liña de axudas que aprobamos no pleno, para os veciños". E mesmo desconfian sobre as intencións do Grupo de Goberno en base ao "pasado pleno, no que se aprobaron axudas por 1.977.000€, se quede simplemente nun mero acto publicitario e propagandístico, e que a súa intención sexa que os cartos incorporados do remanente no orzamento sexan destinados para outros fins".

"Á reunión desta maña, o grupo Popular levaba propostas concretas para todas e cada unha das bases e convenios que se poderían poñer en aplicación inmediata, de forma que os afectados poderían acceder as axudas en menos de quince días. Pese a elo, hoxe, transcorrida xa unha semana desde a celebración do Pleno, parece que a chegada das axudas está cada día máis lonxe", subliñan os populares.

E conclúen manifestando que "o alcalde do Carballiño ten que demostrar de forma urxente que a postura do goberno local é a de que cheguen as axudas a autónomos, comerciantes, hostaleiros, familias e persoas vulnerables, e iso só se fai con traballo intenso e con ideas claras".

O conselleiro de Cultura e Turismo, Román Rodríguez, acompañado pola comisaria do Xacobeo 2021, Cecilia Pereira, participaron nunha videoconferencia conxunta cos conselleiros das comunidades polas que discorre a Vía da Prata. No encontro expuxéronse diversas iniciativas que permitan desenvolver medidas de promoción conxuntas vencelladas ao patrimonio e a gastronomía.

Andalucía, Castela e León, Estremadura e Galicia reforzan o seu compromiso para impulsar este Camiño con acreditado valor histórico e patrimonial como elemento dinamizador dos seus territorios, que poderá ter especial incidencia no rural e en zonas con baixa demografía.

A Vía da Prata, que ao seu paso pola comarca do Carballiño decorre a través dos municipios de San Cristovo de Cea e Piñor, é un importante itinerario xacobeo que vertebra España de norte a sur e conta cun gran potencial de crecemento grazas á súa riqueza patrimonial e natural.

A área de Cultura do Concello do Carballiño elabora un programa cultural para este verán respectando as medidas preventivas de separación e seguridade, requeridas polo Covid-19, e que se centrarán na celebración de eventos ao aire libre de pequeno e mediano formato con aforo limitado e uso de cadeiras.

Este programa está suxeito ás normas e protocolo que se establezan polas autoridades competentes unha vez que se acade a terceira fase da desescalada, prevista a partir de mediados do próximo mes de xuño.

Trátase de organizar, na medida do posible, eventos culturais de pequeno e mediano formato, cuxo obxectivo é ofrecer á poboación actividades culturais e de entretemento, ao tempo de contribuir á reactivación do sector da cultura, que está sendo moi afectado pola pademia que padecemos, así como á hostalería e ao comercio.

Os eventos desenvolveranse en tres escenarios: Praza Maior, auditorio da Veracruz e explanada do Parque Municipal, según as necesidades e características de cada evento.

Entre as actividades que se están programando figuran eventos vencellados coa fotografía, o cine, a música, a danza, o teatro, os monicreques e outros espectáculos de rúa.

Como non é posible levar a cabo as actividades que se programaban habitualmente, algunhas cambiarán de data e outras adaptaranse á actual situación. Así, non será posible celebrar as Xociviga 2020 no auditorio municipal, que serán substituidas por sesións de cine de calidade para todos os públicos ao aire libre.

Asemade, o Festival de Habaneras, que ía a ter lugar o primeiro sábado de agosto, aprázase en principio para o outono, e o Festival Outros Países, Outras Músicas desenvolverase probablente no mes de setembro.

A programación completa darase a coñecer no mes de xuño, unha vez que se publiquen os requisitos para manter todas as medidas de separación e seguridade, que garantan, antes que nada, a prevención en materia sanitaria das persoas asistentes aos eventos.

Recordan que o pleno da corporación muncipal da pasada semana aprobou un paquete de axudas por case 2.000.000 de € para os colectivos máis afectados pola crise derivada do COVID-19.

E taménn que todos os grupos politicos na corporación estiveron de acordo na necesidade de dar unha especial protección ao empresariado local, comercio, hostalaría, e pequenos autónomos.

Espazo Común advirte que non obstante a realidade que se deriva da contabilidade do Concello “é moi diferente e resalta polo escaso apoio á economía local”.

Aseguran que o alcalde tivo a posibilidade de convidar a 54 empresas para que presentaran ofertas para a execución de obras durante o exercizo 2019 e, incriblemente, nin un tercio das que foron demandadas para concorrer eran empresas da construción local.
Só en 17 ocasións, constructoras locais recibiron o chamamento do alcalde, que sí chegou a 37 de fóra do noso concello, según o balance que fai público Espazo Común.

“Convidar a 10 empresas de Ourense, 8 de Maside, 3 de Coles, 2 de Amoeiro, 2 do Porriño, e solicitude de propostas a O Rosal, Santiago, A Coruña ou A Peroxa por citar algúns exemplos, está lonxe de ser o mellor xeito de apoiar á economía e á creación de emprego a nivel local”, manifestan.

E engaden que “o mesmo acontece co comercio onde pleno tras pleno, descubrimos incomprensibles compras feitas en negocios de fóra do Carballiño, tendo constancia de que nin tan sequera se demanda presuposto ás tendas do pobo”.

Esixen que o alcalde Fumega e o seu equipo muden de actitude e prediquen co exemplo.

“Non é de recibo que lle demandemos á veciñanza que merque no comercio local, que se gasten cartos públicos en campañas promocionais e que despois os propios concelleiros do goberno vaian mercar redes parabalóns a Lalín por 810 €”, conclúen nas súas críticas.

As obras da rúa Saleta consisten nun novo asfaltado, reposición da rede de abastecemento e saneamento, beirarrúas e iluminación led.

Estas obras, xunto coas que se realizan nas rúas Madanela, Solana e San Benito, suporán unha mellora significativa dos viais deste barrio, cuxo estado era moi deficiente.

Trátase da primera fase dun plan de mellora de infraestruturas viarias do casco urbano e do rural do Carballiño, que afecta a máis de vinte rúas e que financia o concello con cargo ao superávit do ano 2018, por un importe global de 600.00 euros.

Ademais desta primeira fase do plan, está revisto reformar as rúas Baleares, Rioxa, País Vasco, Navarra, Aragón, Extremadura, Madrid e Cataluña, así como as rúas Beariz, Boborás, Leiro, Maside, Punxín e San Amaro; e tamén as rúas Eusebio Lorenzo e Blanco Amor; así como a iluminación con led entre O Torrón a As Caldas de Partovia.

Precisamente, hai unhas semanas rematouse o asfaltado da estrada entre As Caldas e O Torrón, que se financiou mediante unha colaboración do concello coa Deputación Provincial de Ourense.

Finalmente, contémplase a renovación do saneamento da Baixada a Flores e a rúa Azucena, así como a ampliación da rotonda de Flores, en Aquilino Sánchez.

A estradas provincias 0U-0417, que transcorre entre a N-541 e O Irixo, e faino no termo municipal de Boborás pola Saleta, Fondo de Vila, Xurenzás, Prado e Ventosa, asi como a 0U-0415 entre as localidades de Brués de Feás, serán obxeto desta actuación de mellora da seguridade vial que acometerá a Deputación de Ourense.

Consistirá na sinalización horizontal de ambas estradas, co pintado de ambos viais, e que permitirá circular  con maior seguridade, sobre todo cando as condicións meteorolóxicas son menos favorables e diminúe a visibilidade.

Esta actuación viña sendo demanda pola veciñanza, e o concello de Boborás ao tratarse de estradas que son de titularidade da Deputación, trasladou esta petición á entidade provincial, que agora ven de confirmar a súa execución.

O concello de Maside pon en valor este tipo de iniciativas solidarias "neste tempo de crise sanitaria" e por elo agradecen públicamente a Farmacia Paredes de Maside a doazón que ven de facer, un lote de mascarillas para cativos con problemas de saúde.

A farmacéutica de Maside colabora ante esta situación, onde os máis cativos con patoloxías previas son persoas de risco, dado que ó ter que acudir con maior asiduidade a centros hospitalarios ou consultas son potencialmente moito máis vulnerables.

O material será destinado única e exclusivamente a menores de idade, a partir dos tres anos, por non ser recomendado o seu uso antes desa idade, e catorce anos, con patoloxías previas: diabetes, patoloxías pulmonares crónicas, patoloxías cardiovasculares crónicas, ou pacientes oncolóxicos.

Serán os Servizos Sociais do Concello de Maside os que xestionen o reparto destas mascarillas, sempre a través de solicitude por parte dos pais/nais e aportando informe pediátrico. Para elo os interesados/as deberán poñerse en contacto coa oficina de Servizos Sociais, onde se lle proporcionará cita previa para a solicitude e recollida do material (988 40 11 08).

Co obxectivo de poñer en valor o patrimonio etnográfico do municipio do Carballiño, e por iniciativa do presidente da Asociación de Veciños de Madarnás, Adolfo Otero, o concello ven de instalar nos arredores da Insua dos Poetas, na Esgueva-Madarnás, xunto ao muíño próximo a este espazo cultural e natural, un panel informativo coa ruta dos muíños do río Pedriña.

O panel, que foi deseñado polo biólogo e integrante do Centro de Estudios Chamoso Lamas, Diego Reboredo, contén información histórica e etnográfica sobre esta ruta dos muíños do río Pedriña, que é un dos principais afluentes do río Arenteiro. Así, describe o conxunto de muíños deste río ao longo dun percorrido de 15 kilómetros, entre a Madalena e Godás do Río, pasando polos concellos do Irixo, Boborás e O Carballiño.

Trátase dunha iniciativa que se enmarca no programa de valorización do patrimonio etnográfico do Carballño, e que complementa outras melloras, como as xa feitas ou que se están realizando no Museo Etnográfico do Arenteiro e o seu entorno.

Coa finalidade de supervisar a súa instalación, desplazáronse ata o lugar os concelleiros de Medio Rural, Rosa Fuentes; de Obras, Rogelio Otero, e de Cultura, Diego Fernández, co acompañamento do presidente da Fundación Insua dos Poetas, Luis González Tosar.

O alcalde Maside, José Manuel Iglesias e o presidente da Confederación Hidrógráfica do Miño-Sil José Antonio Quiroga, veñen de asinar o convenio de colaboración que vai permitir acometer o proxecto de mellora da rede de pluviais e saneamento n vila de Maside.

Desta maneira, a Confederación Hidrográfica comprométese a financiar a obra de renovación das redes de pluviais e saneamento na capitalidade municipal, que quedaran moi danadas polos temporais que afectaran á nosa comarca no inverno de 2018.

Procederáse á intalación dun novo colector principal e renovación da rede integral, e posteriormente a reposición das beirarrúas e da calzada.

A obra terá un coste total de 470.000 euros, dos que a Confederación achegará 376.000 euros (o 80%) mentres que o 20% restante, que son 94.000 euros, serán aportados polo propio concello.