A área sanitaria de Ourense, da que dependen as comarcas do Carballiño e O Ribeiro,  comeza a facer os tets rápidos do coronavirus, sen baixarse do coche, para todas aquelas persoas que presenten os sintomas, en todo caso con cita previa que debe pedirse con antelación.

QUE FACER SE SE SOSPEITA DE TER CORONAVIRUS? Permanecer no domicilio, chamar ao teléfono 900400116 e esperar ao diagnóstico telefónico dos sanitarios de Medicina Preventiva, que decidirán se é conveniente someterse á proba. Se por autonomía e proximidade ao hospital pode desprazarse en coche, daráselle cita. En caso contrario, avaliando a súa situación persoal, irá un equipo ao seu domicilio,

QUEN PODE FACERSE As PROBAS? Só as persoas que teñan cita concertada polo CHUO, que avisará por SMS da hora da cita e o punto exacto ao que se debe acudir. Débense padecer síntomas leves. Nunca se pode acudir sen cita, de maneira unilateral. Ademais, en caso de ser parado polas autoridades, o SMS enviado polo CHUO servirá de xustificación do desprazamento.

CANTO TEMPO FUNCIONA? Todos os días da semana, en horario de mañá e tarde. Incluído fins de semana e festivos.

ONDE SE ACODE? A xerencia da área sanitaria habilitou un circuíto de entrada e saída perfectamente sinalizado, na traseira do edificio Santa María Nai. Alí, haberá un punto de estacionamento, cun profesional de enfermería e un técnixo auxiliar. Só baixando a ventanillla tomarase a mostra. Pode facerse un test cada cinco minutos.

QUE FACER Ao CHEGAR? Parar o vehículo no punto sinalado, non baixar en ningún momento do coche, baixar o portelo e esperar as indicacións dos sanitarios. Ao acabar, abandonar o lugar e regresar ao domicilio para esperar os resultados.

O concello de Cea puxo en marcha un operativo de desinfección de edificios públicos, espazos e mobililiario público, trátase dunha das medidas acordadas polo goberno municipal que preside o alcalde José Luis Valladares e que inclúe tamén un servizo municipal para atender durante a crise do coronavirus a aquelas persoas que viven soas ou presentan factores de risco. 

No concello de San Cristovo de Cea algunhas aldeas están a 16 kilómetros de distancia da capitalidade municipal, polo que este servizo cobra aínda máis importancia nesta situación de estado de alerta. Para solicitar este servizo tan so é preciso chamar ao teléfono 988 282 000.

Tamén o concello de Piñor ten operativo un servizo de idénticas características e finalidade, que pode solicitarse no teléfono 629 828 194.

No concello de San Amaro tamén se atenderá especialmente ás persoas que se encontran nos grupos de risco, levándolle alimentos, medicantos e outros productos de primeira necesidade ao seu domicilio, o teléfóno do concello para solicitálo é o 988 288050.

O concello de Avión habilita o teléfono 679 661 538 para aquelas persoas do municipio  que teñan algunha necisidade  de carácter imprencindible e non poidan desplazarse, tamén o concello de Avión conta con algunhas localidades que están ata 15 kilómetros de distancia da capitalidade municipal.

A casa do concello do Carballiño volveu acoller una reunión da comisión municipal de seguimento pola crise do coronavirus, na mema informouse do traballo de desinfección que se efectúa nos accesos aos supermercados, praza de abastos, centro de saúde, farmacias, Xulgado, Facenda, Cáritas, Cruz Vermella, estancos, tanatorios, Grumir e outros espazos públicos.

Tamén se analizou o Servizo de axuda ás persoas maiores que viven soas para mercar alimentos ou solicitar medicinas.

Ainda que desde que se puxo en marcha este servizo só o solicitou unha persoa, lémbrase que seguirá operativo mentres dure a cuarentena.

Calquera persoa que o necesite pode chamar en horario de 09,00 a 14,00 h., aos seguintes teléfonos: 988 530007 (Concello) 988 531076 (Servizos Sociais)

A Garda Civil, e o resto das forzas de seguridade, lembran á cidadanía a obrigación de cumprir o establecido no Real Decreto 463/2020, modificado polo RD 465/2020, polo que se declara o Estado de Alarma para a xestión da crise sanitaria.

En Galicia, este xoves día 19 de marzo é festivo. As forzas de seguridade lembran aos cidadáns a responsabilidade que ten coa sociedade para formar parte nesta loita contra o COVID-19 e a obrigación de permanecer nos seus domicilios.

Non vaias á túa segunda residencia

De acordo ás medidas recollidas no Real Decreto, durante a vixencia do estado de alarma as persoas unicamente poderán circular polas vías ou espazos de uso público para a realización dunha serie de actividades moi concretas, entre as que non se atopan os traslados a unha segunda residencia. Por tanto, lémbrase a obrigatoriedade de permanecer na residencia habitual.

As Forzas e Corpos de Seguridade velarán na rúa para que este tipo de desprazamentos non leven a cabo.

“O BNG mostra a súa total colaboración co Goberno local para afrontar a crise do coronavirus e ponse á súa disposición para todo aquilo que se xulgue necesario”, afirmou a portavoz municipal Sofía García, ademais de agradecer o labor do persoal sanitario e de profesionais que garanten os servizos e produtos básicos en O Carballiño nesta situación de alerta.

Haberá tempo de avaliar se as medidas tomadas foron “as máis eficaces e se actuou con celeridade”, mais este “é o tempo da lealdade institucional e da unión de todas as forzas políticas e sociais nun momento en que está en risco a saúde de milleiros de persoas”, explicou. “Desde o BNG apostamos por reducir ao mínimo o traballo do persoal das empresas concesionarias, sempre ligado a cubrir necesidades básicas da poboación, engadiu Sofía García.

Para alén das medidas sanitarias e de contención que se desenvolven seguindo as instrucións das autoridades pertinentes e os criterios técnicos e científicos, desde o BNG entenden que cómpre reforzar as medidas de protección social e axuda aos colectivos máis desfavorecidos ou en risco como maiores, dependentes, familias monoparentais, persoas en risco de exclusión social e habitantes do rural, entre outras.

Reclama tamén reforzar a información e asesoramento á poboación “nunha situación de alarma social nunca antes vivida e que provoca moitas incertezas e inseguranzas”. Neste sentido, referiuse a que é preciso traballar en medidas de axuda aos sectores máis afectados desde o punto de vista económico como comercio de proximidade, traballador@s, autónom@s e sector turístico.

Aproveitou tamén para facer un chamamento á colaboración cidadá e para manifestar “o sentimento de orgullo da resposta da poboación de O Carballiño, sempre comprometida e solidaria”.

A portavoz municipal do BNG quixo agradecer “o esforzo do persoal sanitario, verdadeir@s heroes e heroínas na loita contra o virus, así como a todas as persoas da nosa vila e comarca que teñen que traballar para garantir os servizos básicos e a subministración de produtos de primeira necesidade”.

A Policia Local do Carballiño leva dende o inicio do estado de alerta facendo un control diario da mobilidade da poboación, fundamentalmente dentro do casco urbano do Carballiño, ata o momento non abríu ningún expediente sancionador por desobedecer  a restricción de quedarse na casa sen xustificación, centrándose sobre todo en funcións informativas.

Pois ben, a partir deste mércores dia 18 de Marzo comezará a pedir que se xustifique  a mobilidade dentro do municipio do Carballiño, tanto a peóns como a conductores de vehículos, según advirten dende a Xefatura da Policia Local carballiñesa, que dende a entrada en vigor do estado de alerta está baixo o mando único do Ministerio do Interior.

As multas por saltarse sen xustificación o confinamento domiciliario van dos 601 aos 30.000 euros, e prisión de tres meses a un ano se a resistencia á autoridade é grave.

Este  mesmo control de mobilidade das persoas durante o tempo que dure o estado de alarma tamén pode exercélo tanto a Garda Civil como a Policia Autonómica.

A Consellería de Sanidade vén de publicar, a través da páxina web https://coronavirus.sergas.gal, que o Servizo Galego de Saúde dedica de xeito exclusivo ao coronavirus, un autotest para que a cidadanía poda consultar síntomas e resolver dúbidas relacionadas con esta enfermidade.

Coa posta en marcha deste test interactivo, elaborado por persoal sanitario, proporciónase á poboación un sistema áxil e inmediato no que atopar información actualizada sobre cuestións relacionadas co coronavirus. Ademais o feito de que o test personalice as respostas, a través de preguntas concretas, permite ofrecer recomendacións adaptadas á situación particular de cada persoa.

Esta nova ferramenta de información e consulta, súmase a outras iniciativas relacionadas coa atención a esta enfermidade, xa postas en marcha desde Consellería de Sanidade, como o teléfono gratuíto 900 400 116 que nestes días incrementou a súa demanda asistencial ata nun 60%.

O test, que está dispoñible en galego e castelán, presenta catro entradas que formulan as diferentes situacións que poden estar a vivir as persoas que o realizan, así como información sobre as dúbidas máis frecuentes acerca de temas relacionados co coronavirus. No primeiro lugar está a opción para as persoas que teñan síntomas e que estean preocupadas porque cren que poda deberse ao coronavirus. Neste caso a través do recoñecemento dos síntomas que presenta a persoa (tose, dificultade para respirar, febre maior de 38º ou sen síntomas) e a través dun sinxelo interrogatorio danse recomendacións ou se indica como acceder ao sistema sanitario para que sexa atendido por profesionais sanitarios.

A segunda entrada é para aqueles que se atopan illados ou confinados na casa. Neste caso, danse unha serie de indicacións sobre o que deben facer mentres permanezan na súa vivenda. Tamén se indica o que deben facer no caso de que estean pendentes de que se lle tomen as mostras para saber se están contaxiados, no caso de que estean á espera dos resultados das mesmas ou se empeorou a súa clínica desde o confinamento.

A terceira entrada informa a aqueles que deran positivo nesta enfermidade e ofrece as recomendacións a seguir mestres estean confinados ou no caso de que a súa clínica empeorase desde que permanecen no domicilio. Por último, a cuarta entrada ofrece información sobre as dúbidas máis frecuentes acerca de temas relacionados co coronavirus.

Cómpre recordar que o novo coronavirus transmítese principalmente por vía respiratoria e polo contacto directo con secrecións respiratorias e que na maioría dos casos a infección por esta enfermidade é similar a un arrefriado común.

A Consellería de Sanidade solicita, unha vez máis, que se empregue o número 061 só para emerxencias ou casos graves e aconsella chamar os seus centros de saúde ou utilizar o número gratuíto 900 400 116, que vén de ser reforzado con máis persoal, para facilitar información xeral sobre o coronavirus. Neste número, pódense resolver as dúbidas dos cidadáns ao respecto e tamén consultar sintomatoloxía leve.

Para acceder ao autotest sigue a ligazón: https://coronavirus.sergas.gal

Afirman dende o grupo municipal do Partido Popular que "estes días son moitas as persoas que nos están a trasladar a súa preocupación por que non saben onde e a quen dirixirse, ben para solucionar os inconvenientes que o estado de alarma prodúcelles, ben porque queren axudar como voluntarios a solucionar os problemas dos máis. E o Concello do Carballiño non está a ser todo o operativo e eficaz que é de desexar nun momento de crise como o actual".

Entenden que se perdeu toda a fin de semana e que "a estas alturas, a piques de finalizar o luns 16, cando o Decreto de Estado de Alarma en España anunciouse o venres 13, decretouse o sábado 14 e aplicouse o Domingo 15, non teña nin sequera un bando claro, máis aló de sinalar os espazos municipais que se pechan e recomendacións básicas para combater o Coronavirus, bando feito o día 13 de marzo".

Tamén critican que a dia de hoxe non exista un "NÚMERO DE TELÉFONO ÚNICO" de uso exclusivo para atender calquera situación de emerxencia que poida ocorrer, para necesidades urxentes, para, principalmente, subliñan, persoas que vivan soas, preferentemente de avanzada idade, para necesidades de abastecemento de medicamentos ou mesmo de alimentos, co fin de que estas persoas non teñan que saír á rúa innecesariamente.

O Partido Popular manifesta, ademáis, que a crise do coronavirus está deixando ao descuberto que o censo de persoas que viven soas é unha falacia "desde hai varios meses que o Concello conta cunha listaxe de persoas que viven soas e que se está a contactar con elas, pois ben, estamos en condicións de asegurar que o único que ten o Concello é unha listaxe de persoas que aparecen empadroadas soas, pero que non se axusta á realidade, porque non se pescudou se en realidade as persoas desa listaxe viven en realidade no Carballiño, se contan con familiares que viven preto, ou os que en realidade viven sós, aínda que figuren outras persoas empadroadas no seu domicilio. Non se verificaron os datos coa teleasistencia da Deputación, ou coa Cruz Vermella, ou mesmo cos datos de axuda no fogar, polo que, para todos os efectos, a listaxe que manexan non é efectivo para o que se precisa neste momento. Por iso cremos que sería conveniente que, desde o Concello, verificásen os datos o máis pronto posible, e que tamén se solicitase a colaboración cidadá para determinar con precisión que persoas poden necesitar esa axuda especial", manifestan os populares.

E reprochanche a Fumega que "o Alcalde diga que vai reforzar o servizo de teleasistencia cando este non é un servizo municipal, a non ser que a estas alturas aínda non se decatase disto".

O Partido Popular recórdalle ao rexedor municipal que "O servizo de teleasistencia, que é propio da Deputación e que dá servizo tamén no Carballiño a un total de 131 persoas, sendo o municipio que máis usuarios ten na provincia, xa está a ser reforzado pola Deputación Provincial, polo que dese tema non ten que preocuparse, porque o reforzo está a facerse, mesmo sen que o concello do Carballiño pedíseo á Deputación".

E repróchanlle que "tiña que reunir durante toda a fin de semana ao operativo necesario para poñerse a funcionar. Nunha situación como esta non existen domingos, só existen días de risco continuo, e o alcalde non foi capaz de organizar un operativo con tempo, nin tampouco foi quen de informar os traballadores municipais para que cada un soubese, antes de chegar ao Concello, cal era a situación. Tampouco nos parecen adecuadas as condicións de traballo que se lles deron aos traballadores dos servizos municipais, pois se podería facer moito máis teletraballo que o que se prevé, simplemente dando máis acceso á administración electrónica do Concello".

Finalmente, o Grupo Popular, pónse "ao dispor do equipo de goberno para colaborar en todo o que precisen, e damos as grazas e ánimo a todo o persoal que está traballando para os veciños de O Carballiño".