O Carballiño volve acoller unha nova edición do Festival de Teatro Galego, organizado pola asociación FETEGA, que lidera a actriz carballiñesa Josi Lage.

O Festival conta coa colaboración económica de AGADIC, Deputación e Concello do Carballiño, e está este ano dedicado á memoria do actor galego Celso Parada, falececido recentemente, e durante moitos anos un fixo no programa do certame teatral carballiñés. 

As obras de teatro que se representarán no Auditorio Municipal do Carballiño, ás 22.00 horas, comezarán o luns 2 de setembro coa obra "Anatomía dunha serea", da Compañía Iria Pinheiro -A Berbechería-Chévere; o martes 3 de setembro, será a quenda para a obra "Compañeira de piso", da compañía Contraproducións; o mércores 4 de setembro subirá ao escenario a companía Chévere coa obra "Curva España"; e ao día seguinte, o 5 de setembro, actuará a compañía Redrum Teatro coa obra "Idiota". O venres 6 de setembro, pecharán a programación do Festival a compañía Enconarte Producciones, coa obra "Monstruación". Será tamén nesa mesma xornada a Gala e entrega dos premios FETEGA "Dorotea Bárcena", conducida e presentada por Marían Bañobre.

O Anfiteatro será outro dos escenarios das actividades programadas para esta XXX edición do Festival, que darán comezo o luns 2 de setembro coa actuación "Catro 4'' segundos" (Novo Circo da Compañía ÍO; o 3 de setembro será a Compañía Dani García a que protagonice "Don Gelati" (Maxia Clown); o 4 de setembro tocaralle á compañía Excéntricas con "Cartoóns" (Comedia Clown); o 5 de setembro será a quenda para a compañía Asacocirco co espectáculo "Lume" (Circo Performático); e o venres 6 de setembro pechará as actuacións no Anfiteatro a compañía Sue Moreno co espectáculo "Sue Moreno 4.0" (Circo acrobático). Os espectáculos serán todos ás 19.00 horas.

Como actividades paralelas, haberá animación de rúa, un coloquio de creadoras baixo o título "Arte con nome de muller", obradoiros, monólogos cómicos e actividades infantís.

O prezo das entradas para as funcións no Auditorio é de 5 euros, e para os monólogos é de 3 euros, mentres que o resto das actividades serán de balde.

O presidente da Deputación de Ourense, Manuel Baltar, presidiu no Pazo Provincial, a sesión constitutiva da Rede Provincial de Concellos Termais, "cumprindo anticipadamente co contemplado no Plan de mandato "Ourense 7273", poñemos en marcha hoxe este órgano co obxectivo de manter un diálogo fluído e participativo cos municipios que forman parte desta provincia e que teñen singularidade termal, algúns deles inscritos na Sección de Vilas Termais da FEMP, sendo a provincia de España con maior número de concellos recoñecidos como vilas termais", explicou Manuel Baltar.

Na reunión constitutiva participaron os alcaldes dos 15 municipios que integran a Rede (Arnoia, Bande, Boborás, Baños de Molgas, Cortegada, Cenlle, Castrelo de Miño, Carballiño, Leiro, Lobios, Monterrei, Muíños, Ourense, Ribadavia e Verín), a deputada provincial de Termalismo, Ana Villarino; o redactor do Plan Termal Provincial, Mario Crecente; e o conselleiro de Economía, Emprego e Industria, Francisco Conde, quen expuxo as liñas básicas do Proxecto de Lei de Usos Lúdicos das Augas Termais.

Na xuntanza "falamos de cuestións que atinxen á xestión municipal, á promoción e á proxección da imaxe termal da provincia, como pode ser a celebración, os días 19 e 20 de setembro, de Termatalia. Ademais, hoxe, tivemos a oportunidade de escoitar ao conselleiro de Economía, Emprego e Industria que nos falou do contido do Proxecto de Lei de Usos Lúdicos das Espazos Termais, que é o punto primeiro do Plan "Ourense a provincia termal" que vimos a desenvolver coa Xunta de Galicia", dixo o presidente do goberno provincial.

A Rede é un órgano que permitirá que desde a Deputación de Ourense se manteña "un contacto directo cos concellos termais, no que se falarán de propostas nese ámbito, que servirá tamén de apoio aos concellos para temas como infraestruturas termais, difusión do turismo termal e, todo elo, con vistas ao 2020 no que se producirá a entrada da Alta Velocidade en Ourense", salientou Baltar.

Este órgano, que hoxe constituímos, será tamén "o foro axeitado para escoitar o que pensan facer outras administracións en relación co termalismo como hoxe coa participación do conselleiro de Economía, Emprego e Industria, quen nos falou desa regulación, pioneira en España e en Europa, e que responde a unha das demandas do termalismo ourensán, pois forma parte do Plan "Ourense a provincia termal", afirmou o presidente da Deputación de Ourense, quen sinalou que esa condición de pioneira en Europa "pódese dicir sen problema, tendo en conta a miña condición de presidente da Asociación Europea de Cidades Históricas Termais, e pode marcar un camiño a seguir por outros territorios termais de Europa onde Ourense leva o liderado".

Pola súa parte, o conselleiro de Economía, Emprego e Industria agradeceu á institución provincial a súa iniciativa para constituír esta Rede que permite "a colaboración institucional entre a Xunta de Galicia, a Deputación e os propios concellos termais de Ourense, e afianzar esa alianza para seguir traballando en defensa do termalismo e situar a Galicia e a Ourense como destino único, potenciando o turismo e as actividades lúdicas e terapéuticas que se desenvolven vinculadas ao termalismo".

"Trátase, polo tanto, dunha oportunidade máis para continuar a crecer, para seguir xerando riqueza, fixando poboación no rural e promovendo o desenvolvemento económico e social de tódolos concellos que en Galicia e na provincia de Ourense desenvolven esta actividade termal", dixo Francisco Conde.

A lei presentada hoxe na reunión constitutiva desta Rede vai a permitir que se regule non só o uso terapéutico senón tamén o uso lúdico das augas termais.

Este marco normativo permitirá que os cidadáns "teñan esa garantía de seguridade, de hixiene no emprego de tódolos servizos que se ofertan a través dos espazos termais e, polo tanto, estamos a reforzar a política termal, o termalismo, os balnearios e esta oferta de servizos que nos están a permitir que hoxe, en Galicia, nos visiten máis de 150.000 usuarios nos diferentes centros termais, e que haxa unha facturación de 60 millóns de euros ó ano", engadiu Francisco Conde.

A posta en marcha desta Rede foi "saudada positivamente por tódolos membros porque permitirá: ter un contacto directo cos alcaldes e alcaldesas, coñecer a problemática termal e ser conscientes de que Ourense e o seu territorio teñen unha singularidade termal", engadiu o presidente do goberno provincial.

Pachi Vázquez cualificou hoxe de “engano” o cobro da taxa de lixo ós veciños de Arcos e salienta que “estanse tomando unha serie de decisións con afán de enganar”.

O líder de Espazo Común e concelleiro en O Carballiño precisa que “existe un acordo entre os veciños de Arcos e o Concello dende fai 40 anos polo que se cedía o monte comunal de Arcos a cambio dunha exención fiscal”.

Pachi Vázquez afirma que sempre se respectou esa exención fiscal e que, agora, o alcalde decidiu anulala “sen realizar ningún expediente e culpando ó interventor municipal”.

Manifesta que “Espazo Común vai defender dúas opcións: que se manteña a exención da taxa ou que se lle devolva o monte comunal ós veciños de Arcos”, e engade que “o que non vale é enganar á xente coa mentira de que todos os montes comunais son do Concello”.

Neste sentido, Espazo Común pedirá un pleno extraordinario para “poñer un pouco de orde neste desorde”, así como un informe xurídico sobre a titularidade de tódolos montes comunais do concello de O Carballiño porque, segundo afirma Pachi Vázquez, “da mesma forma que hoxe se quere expropiar este dereito ós veciños de Arcos, mañá poderase aplicar o mesmo criterio a outros montes comunais da rexión”.

Pachi Vázquez afirma que “trátase do inicio de lexislatura máis desorganizado da historia de O Carballiño”, cunha “xestión caótica” na que “os bandazos do sistema de ingresos resultan moi preocupantes de cara á aprobación dos orzamentos”.

Pachi Vázquez precisa, ademais, que “estamos ante o goberno máis caro e con maior número de persoas liberadas con diñeiro público da historia de O Carballiño” e apunta que, dende Espazo Común, “só lle pedimos unha cousa ó Concello: orde e traballo” porque “estamos nunha situación na que parece que ninguén sabe nada, e que ninguén ten a culpa de nada”.

Unha variada selección de food trucks, música ao vivo con tres concertos e animación infantil, serán as principais propostas da terceira edición do “Carballiño Street Food”, que se celebrará do 30 de agosto ao 1 de setembro no praza da Veracruz.

O evento contará con sete food trucks representantivas dunha variada gastronomía de Galicia, España e incluso de países como Venezuela e México, con hamburguesas premium, bocadillos de autor, ensaladas orixinais e tapas diferentes, así como comida vegana o usen gluten.

Os horarios de apertura serán de 12,00 a 16,00 h., e de 19,00 a 00,30 h., o venres 30, sábado 31 e domingo 1. .

Así mesmo, haberá sesión vermú o sábado e o domingo a partir das 12,00 h., por cortesía de Nordesía. As actividades e a música ao vivo terá lugar en dous escenarios, un para o público infantil e outro para os concertos. Os concertos, que son completamente gratuitos, comezarán ás 22,30 h., e terán como protagonistas a BLACKSHEEP, formado por Thais Rudiño, finalista de La Voz e Miguel Araujo (Venres, 30), GIN TONIS (sábado, 31) e EN MALA HORA (domingo, 1).

Son actuacións aptas para todos os públicos e gustos musicais. O concelleiro de Cultura, Diego Fernández, asegura que se trata dun evento moi atractivo que vai supoñer un aliciente nesta fin de semana e unha oportunidade para que os carballiñeses e a xente da comarca poida degustar un tipo de cociña e produtos de moita calidade que non se ofertan na gastronomía local.

Asemade, o reponsble da empresa que organiza o evento agradece a colaboración do concello, así como dos patrocinadores, e fai fincapé no éxito deste tipo de iniciativas gastronómicas e culturáis en Galicia.

A noite de música folc e de música tradicional convertaráse na previa festiva do dia grande do San Vitorio, este martes 27 de Agosto, que ademáis será festivo de carácter local no municipio de Maside.

A programación ábrese ás 10 horas con bombas de palenque e pasarrúas da Banda de Música A lira de Ribadavia, logo ás 12 do mediodia celebraráse a misa solemne na igrexa parroquial de Santo Tomé de Maside, cantada pola coral A Torre.

Á unha da tarde a Banda de Müsica A Lira ofrecerá un concerto na Praza Maior de Maside.

Pola tarde haberá pasarrúas coa Escola de Música Tradiconal de Maside, e as 18:00 horas inaugúrase a Mostra-Feira de artesanía infantil na Alameda.

A verbena estará amenizada polas orquestras Tango e Gran Parada, é á medianoite está programada unha sesión de fogos artificiais.

Para o mércores 28, os pasarrúas matinais estarán a cargo da Banda de Música do Carballiño, que ofrecerá un concerto ás 13 horas..

Pola tarde continuará a Mostra-Feira de Artesanía na Alameda, e pola noite a verbena que despedirá estas festas de San Vitorio, coas orquestras Marbella e Combo Dominicano.

Finalmente, para o próximo domingo dia 1 de Setembro, quedarán a celebración da Carreira Popular e a Andanina Concello de Maside.