Do 3 de decembro ao 27 de xaneiro, desenvolveranse no Carballiño máis de trinta eventos e actividades culturais, organizados polas concellerías de Cultura e Deportes, en colaboración con diversas entidades locais e organismos autonómicos, como a Praza de Abastos, o Cine Club, o Casino, as Corais do Orfeón e do Casino, a Escola de Gaitas, Agadic, Secretaría Xeral de Política Lingüística, a Deputación Provincial, MoitaMerda Promocións, R e outras. Monólogos, teatro infantil e de adultos, cine, eventos deportivos, concertos, un gran musical e distintos obradoiros sucederanse nestes dous meses.

O programa foi presentado esta mañá polo concelleiro de Cultura, Diego Fernández, que anunciou o encendido da iluminación artística do Nadal na tarde do martes, 5 de decembro, e explicou que se primaban as actividades infantís e familiares, pero tamén as de adultos e maiores, conformando un abano de posibilidades de lecer moi suxestivo.

Entre os eventos máis destacados figuran os monólogos de Miguel Lago (sábado, 3 de decembro, ás 20,00 h.) e El Sevilla (sábado, 13 de xaneiro, ás 20,00 h.); o musical La Bella y La Bestia (sábado, 28 de decembro, ás 17,00 h,); os espectáculos infantís O conto da Azuzaina, pola compañía Limiar Teatro (domingo, 17 de decembro, ás 12,00 h.), A Nena que quería navegar, pola Compañía Redrum Producións (sábado, 23 de decembro, ás 12,00 h.), Rockenstein, pola Compañía Malasombra Teatro (sábado, 27 de xaneiro, ás 18,00 h.), e os espectáculos infantís gratuitos: Paxaro amigo: Músicas para a paz, concerto de Mamá Cabra, patrocinado por “R” (sábado, 30 de decembro, ás 19,00 h.) e Compañía Os Bolechas con “Un conto de Nadal” (sábado, 6 de xaneiro, ás 18,30 h.).

No teatro para adultos destacan as obras: Raclete, pola Compañía Ibuprofeno Teatro (sábado, 9 de decembro, ás 21,00 h.), e El Amaor de don Perlimplin con Belisa en su jardín, de García Lorca, a cargo da Compañía Teatro del Norte (sábado, 16 de decembro, ás 20,30 h.).

En cine proxectaranse as películas El espíritu de la Colmena (luns, 4 de decembro, ás 20,00 h.), El otro lado de la esperanza (venres, 1 de decembro, ás 20,00 e 22,30 h.), Sieranevada (venres, 8 de decembro, ás 20,00 e 22,30 h.) e La tortuga roja (venres, 15 de decembro, ás 20,00 e 22,30 h.).

Os concertos máis destacados son: Concerto de Nadal, pola Coral Polifónica Casino do Carballiño e a Banda de Vilatuxe (Templo da Vera Cruz, sábado 16 de decembro ás 19,30 h.); Concerto de Nadal, polo Orfeón do Carballiño (Templo da Vera Cruz, 25 de decembro, ás 18,00 h.); Concerto Fin de Ano, pola Coral do Casino (Casino, venres, 29 de decembro, ás 20,30 h.); Concerto de Reis, pola Coral do Casino (Templo da Vera Cruz, sábado, 6 de xaneiro, ás 18,30 h.). Asemade, na Praza de Abastos haberá os seguintes concertos de música tradicional: Grupo Fetiche de Pau (sábado, 16 de decembro, ás 11,00 h.); e o Grupo Anda Soa (sábado, 3 de decembro, ás 12,00 h.).

A visita de Papé Noel será o sábado, 23 de decembro, ás 18,00 h., na Praza do Emigrante, con carroza e chocolatada gratuita por Aspadisi. E a Cabalgata de Reis será o venres, 5 de xaneiro, ás 18,00 h., con música en directo e sorpresas.

Os eventos deportivos máis destacados son: 9ª Carreira Solidaria do Arenteiro (domingo, 10 de decembro, ás 11,00 h.) e Gala de Nadal das Escolas Municipais de Patinaxe Artístico, organizada polo Club Ahede (xoves, 21 de decembro, ás 20,00 h., no pavillón Paco Chao).

Os obradoiros e charlas son: “Toponimízate. Falámosche dos nomes da túa terra”, a cargo do filólogo Vicente Feijoo (martes, 5 de decembro, ás 20,00 h., no salón de plenos do concello); charla Emprende Xuventude (2 e 23 de decembro, de 10,30 a 13,00 h., no salón de plenos); Obradoiros de Minecraf Nadal, orgnizado por 123/AD (ICC Kids Ourense), que se desenvolverán os días 26, 27, 28 e 29 de decembro, e 2, 3, 4 e 5 de xaneiro, na aula Cemit do concello.

Finalmente, a Exposición de Pintura Comarcas O Carballiño-O Ribeiro, organizada polo Centro de Estudios Chamoso Lamas, desenvolverase do 15 de decembro ao 15 de xaneiro, en horario de 18,00 a 21,00 h., na sala de exposicións do auditorio.

A concellería de Cultura editará uns trípticos coa programación completa de Nadal, que será distribuída polos locais comerciais e hostaleiros e á veciñanza.

O alumnado de todos os centros educativos do Carballiño, así como representantes de institucións e asociacións, participarán este venres, 24 de novembro, no acto institucional contra a violencia de xénero que se desenvolverá no salón de sesións do concello ás 12 do mediodía.

Neste acto participarán os centros educativos públicos e concertados, a Escola Infantil Trastes, Bo Día Familia, Cruz Vermella, Aspadisi, Asdifica e asociacións de mulleres. Así mesmo, haberá unha actuación musical a cargo do dúo Canela Cafuné, formado por Marta Bravo e Eric Dopazo.

O acto foi presentado pola concelleira de Benestar Social, Sanidade e Igualdade, Marina Ortega, que diu a coñecer tamén o programa organizado polo seu departamento municipal, en colaboración coa Secretaría Xeral da Igualdade da Xunta e a Unión Europea, para conmemorar esta efeméride que se celebra o 25 de novembro pero que para facilitar a participación dos centros educativos adiántase ao 24 de novembro.

Ademáis deste acto institucional, o luns, 27 de novembro desenvolveranse diversos obradoiros nos institutos Chamoso Lamas e nº 1, e nos colexios Sagrado Corazón e Vila do Arenteiro. Están promovidos pola Secretaría Xeral da Igualdade e a Fegamp, e levan por título “A violencia de xénero o novo contexto dixital”, a cargo de Pantallas Amigas, destinados ao alumnado de secundaria exposto a situacións de violencia de xénero e centrado no coñecemento e prevención das novas formas de violencia de xénero que xurden no contexto dixital.

O martes, 28 de novembro, ás 8 da tarde, no salón de plenos do concello, terá lugar unha charla-coloquio co título “O empoderamento da muller e análise dos efectos da violencia nos menores”, e contará coas ponencias de Francisca Fariñas Rivera, catedrática de Psicología Básica e Psicología Xurídica do Menor da Universidade de Vigo, e Alicia Peralejo Abeleira, Psicóloga e presidenta da Asociación Ceavigal.

Finalmente, o 15 de decembro, ás 13,00 h., reunirase no concello a Mesa de Coordinación para a Mellora da Atención ás Vítimas de Violencia de Xénero.

O conselleiro de Política Social, José Manuel Rey Varela, mantivo no seu despacho de San Caetano unha reunión de traballo co alcalde do Carballiño, Francisco José Fumega Piñeiro, co obxectivo de abordar a situación e as necesidades existentes neste municipio en materia social.

Así, o titular autonómico fixo un repaso dos principais servizos prestados pola Xunta nesta localidade, o que inclúe a escola infantil Calvo Sotelo, pertencente á rede de escolas infantís Galiña Azul e que oferta 61 prazas a través de catro unidades. A administración autonómica investiu o pasado ano preto de 6500 euros en obras de mellora nestas instalacións.

No que respecta á área de maiores, levouse a cabo a construción dun novo centro de titularidade autonómica con 25 prazas residenciais para persoas dependentes para as que a Xunta inviste máis de 323.000 euros. Estas novas prazas súmanse ás 24 prazas residencias para persoas autónomas xa existentes na localidade.

Así mesmo, o Servizo de Axuda no Fogar incrementouse nun 38,16% nos últimos dous anos, o que supón a posta a disposición dos veciños e veciñas que o precisen de 33.672 horas, chegando así a unha ratio de atención de case o 98%. O obxectivo é ofrecer servizos de calidade que respondan ás necesidades dos nosos maiores, tal e como trasladou o conselleiro ao rexedor.

Ambos mandatarios acordaron que continuarán estudando posibles novas vías de colaboración entre as dúas administracións, co fin de mellorar os servizos e equipamentos de atención aos cidadáns no Carballiño, e conseguir así unhas mellores e máis eficaces políticas sociais.

A situación de precariedade na Policia Local do Carballiño volveu a poñerse de manifesto esta mañá, cando a falta de efectivos motivou a supresión da patrulla policial.

Non é a primeira vez que se plantexa esta mesma problemática derivada, dunha parte da escasez da plantilla da Policia Local e doutra, consecuencia das baixas, vacacións e permisos, que deixa o servizo baixo mínimos.

Un único axente atendía as necesidades do servizo tanto nas rúas carballiñesas como para outras nas que foi requerido, nunha poboación con máis de 14.000 habitantes, e cunha importante carga de traballo para un servizo que é moi demandado pola veciñanza.

O concelleiro de seguridade, Adolfo Nogueira, asegurou a esta emisora de radio que a situación desta mañá "é excepcional, absolutamente puntual, ao concederselle permiso a un Policia para asistir a un curso", tamén aclarou que "non houbo ningún problema e contabamos con 2 persoas para atender o servizo nas oficinas".

Seis destacados humoristas de ámbito nacional e un galego conforman o cartel da terceira tempada do ciclo de monólogos “Carballiño Comedy”, que se desenvolverá no auditorio municipal do Carballiño dende o 3 de decembro ao 12 de maio. Trátase de Miguel Lago, El Sevilla, Pablo Carbonell, Antípolez, José Corbacho e Carlos Blanco.

O evento foi presentado polo concelleiro de Cultura, Diego Fernández, e os representantes da productora MoitaMerda Promocións, Juan Quintela e Lito Caballero. Miguel Lago abrirá o ciclo o domingo, 3 de decembro, ás 20,00 h. O seu espectáculo “Que no salga de aquí” é estrea en Galicia.

Así o asegurou Juan Quintela, que agradeceu ao concello e á concellaría de Cultura a colaboración que manteñen dende hai dous anos e que sitúa ao Carballiño entre as localidades preferentes dos espectáculos que promove a súa compañía en Galicia.

O sábado, 13 de xaneiro, ás 21,00 h., actuará El Sevilla, e Pablo Carbonell o fará o sábado, 3 de febreiro, ás 21,00 h. Trae un monólogo baseado na súa vida, e que tamén será estrea en Galicia. O 25 de marzo, sábado, ás 20,00 h., será a quenda de Antílopez, que foi cualificado como a gran sorpresa do humor a nivel nacional. José Corbacho estará no auditorio o sábado, 21 de abril, ás 21,00 h., e finalmente, Carlos Blanco pechará o ciclo o sábado, 21 de maio, ás 21,00 h.

Diego Fernández expresou a súa satisfacción pola aposta que fai MoitaMerda Promocións polo Carballiño, traendo espectáculos que só se poden ver nas grandes cidades, e asegurou que o cartel desta terceira tempada é excepcional, esperando que acade tanta expectación como a anterior, que foi seguida por máis de 3.000 persoas.

O concelleiro tamén adiantou dúas novidades importantes que atinxen a esta productora de espectáculos, como é a superproducción musical “La Bella y la Bestia”, que chegará ao auditorio do Carballiño o 28 de decembro, e o mago Joel, gañador da última edición de Got Talent de Maxia, que estará no Carballiño o 3 de marzo.

As entradas para os monólogos xa están á venda anticipada nos restaurantes A Fuchela e Comonacasa, ao prezo de 10 euros, ou a través de Internet, na páxina www.woutick.es, ao prezo de 10 euros máis gastos, en total 11 euros. E na taquilla o mesmo día dos espectáculos, a 13 euros.

O concelleiro e portavoz de Veciños de Piñor presentou un escrito no rexistro municipal do concello de Piñor no que comunica ao alcalde a súa renuncia como concelleiro-delegado de servizos socias e socio-sanitarios.

Uxío Rodríguez viña exercendo como tal dende o inicio do actúal mandato municipal, no que a súa formación -Veciños de Piñor- alcalzou un acordo de goberno co Partido Popular.

Non obstante, a falla de sintonía entre o grupo do alcalde José Luis González e o portavoz de Veciños de Piñor foi indo a máis no transcurso dos últimos meses, de tal maneira que esta próxima fin de semana Veciños de Piñor analizará a situación, e de non reconducirse a situación, todo indica que o acordo de cogoberno está a un paso da ruptura.

En declaracións a esta emisora de radio, Uxío Rodríguez manifestou que non tiña sentido continuar ao fronte dunha concellería que carece de competencias, ainda que o que máis lamentou "é que se nos ningunee, que non se valore o noso traballo, ou incluso que se nos poñan trabas, como ven sucedendo", asegurou.

Presentación da "Estratexia de Promoción da Saúde"

Foi, precisamente, unha das iniciativas promovidas por Uxío Rodríguez, na súa condición de responsable de servizos socias no concello piñorense.

O Concello de Piñor aprobou en pleno a adhesión á Estratexia de Promoción da Saúde e Prevención no Sistema Nacional de Saúde do Ministerio de Sanidade, Servizos Sociais e Igualdade e a Federación Española de Municipios e Provincias coa finalidade de promover a saúde e a prevención para mellorar a calidade de vida das persoas que residen no concello. Esta estratexia propón o desenvolvemento progresivo de intervencións dirixidas a gañar en saúde e a previr as enfermidades, as lesións e a discapacidade e o seu obxectivo final é fomentar a saúde e o benestar da poboación promovendo estilos de vida saudables e potenciando a seguridade fronte ás lesións.

O mércores día 15 de novembro terá lugar a presentación pública para dar a coñecer á poboación a adhesión do Concello de Piñor á Estratexia de Promoción da Saúde e Prevención ás 13:00 horas no Salón de Plenos do concello. Este mesmo día, con anterioridade a esta presentación terá lugar a creación dunha Mesa intersectorial no concello que será o instrumento para implementar esta estratexia e para planificar conxuntamente entre os diferentes sectores que a van compoñer o intercambio de información, a coordinación e avanzar cara a metas e resultados comúns.

Para posibilitar esta mellora da saúde e benestar da poboación é necesaria a implicación e coordinación de sectores que implementan políticas e actividades con impacto na saúde como educación, benestar social, medio ambiente, traballo e inmigración, urbanismo e planificación do territorio, transporte e mobilidade activa, ou economía e facenda. É necesario que dende o entorno local traballemos xuntos, articulando os mecanismos necesarios para participar na mellora do noso municipio xa que o ámbito local é un entorno esencial para mellorar a saúde e o benestar da poboación xa que dende o entorno local, podemos contribuír a mellorar la saúde da poboación mediante as políticas locais de saúde, educación, benestar social, transporte, medio ambiente, cultura, urbanismo, vivenda, deportes, seguridade, etc.

En definitiva, trátase de reorientar o sistema sanitario, os sistemas de información e a investigación cara a promoción da saúde e prevención da enfermidade e que as actividades doutros sectores teñan en conta á cidadanía. Preténdese implicar a toda a sociedade no desenvolvemento desta estratexia para que a poboación teña información e apoio relevante e de calidade para que poida modificar os seus estilos de vida e que sexan máis saudables.

A Xunta de Goberno do concello do Carballiño adxudicou con carácter definitivo á empresa Matadero de Carballiño S.L. o proxecto do novo matadoiro.

As obras poderían comezar en breve tras a aprobación das licencias de construcción pertinentes. A adxudicación tera unha vixencia de 20 anos, que pode ser prorrogada por outros 20 anos mais, en períodos de dous en dous anos. Con esta adxudicación remata un proceso laborioso iniciado a principios do actúal mandato municipal pola concellería de Promoción Económica que dirixe Adolfo Nogueira, para poñer en marcha esta instalación industrial municipal que permanecía pechada dende setembro do ano 2012, hai máis de cinco anos.

O proxecto supón un investimento de 1.100.000 euros e a creación duns quince postos de traballo. Tanto o orzamento como a creación de emprego previstos considéranse unha primeira fase do proxecto, xa que se o matadoiro cumnpre os obxectivos da empresa adxudicataria, podería levar a cabo unha ampliación a curto ou medio prazo.

O novo matodoiro prestará servizo aos carniceiros do Carballiño e da comarca, reducindo os costes de transporte creados por ter que matar as reses noutros matadoiros máis alonxados. Pero tamén se espera que sexa unha instalación moderna e de referencia, que acade a maior cuota de mercado posible, abarcando aos carniceiros doutras comarcas da provincia e de Galicia. Neste senso hai unha gran expectativa, e non só pola novedade da instalación senón tamén pola súa ubicación, a carón da autovía AG-53.