O PSdeG-PSOE de San Cristovo de Cea vén de rexistrar un escrito esixíndolle ao goberno do PP que faga pública a autorización pola cal deixou colocar un transformador de enerxía eléctrica ao pé da estrada que vai a Fondo de Cea, co perigo considerable que supón para os usuarios.

Afirman que "as imaxes do transformador e da plataforma correspondente non deixan lugar a dúbidas do incomprensible da decisión adoptada polo goberno municipal ao permitir ubicar esta estrutura case a cabalo da vía municipal".

"Os veciños alertados por esta decisión expresáronlle aos socialistas numerosas queixas polo agravio comparativo que supón esta decisión en comparanza coas esixencias que se aplican coa cidadanía en xeral. Sábese que o transformador se colocou para subministrar enerxía eléctrica ao polígono industrial do concello pero non se coñecen as razóns de permitir que fose nese emprazamento en concreto", manifestan.

A este respecto, Guillermo F. Dopazo, portavoz socialista no Concello de Cea, sinala que: “Ao común dos mortais non lle deixan facer obra ou colocación de ningún tipo sen o debido retranqueo que respecte unha mínima distancia de seguridade por iso non sorprende que dende o concello se permita a construción dun transformador case enriba da estrada que vai a Fondo de Cea. Debido a que a vía é municipal, o permiso tamén ten que selo polo que lle esiximos ao alcalde que nos ensine as autorizacións e os informes para saber en base a que se permite isto”.

Dende o PSOE agardan que pronto lle dean acceso ao expediente de autorización para coñecer de primeira man os criterios que levaron ao goberno do PP a autorizar esta instalación, co perigo que supón para as persoas que empregan esa estrada a diario.

A devandita estrada é estreita e une a nacional co núcleo de Fondo de Cea polo que para os socialistas é preocupante que se coloque un transformador eléctrico a carón dunha vía por onde xa pasan dous vehículos con dificultade. A plataforma está tan pegada á estrada que pode ocasionar máis dunha situación de risco para os usuarios e máxime se temos en conta que se trata dunha instalación eléctrica. Preocupados pola situación de perigosidade, dende o PSOE esixen que se dean as explicacións axeitadas a respecto desta decisión difícil de comprender dende o senso común. Asemade agardan que esta obra conte con todos os permisos requiridos como sempre se lle esixe ao resto dos veciños á hora de obrar nos seus terreos ao pé das estradas.

A LV Festa do Pulpo será presentada o próximo sábado en Nuremberg (Alemaña) como unha das manifestacións gastronómicas e culturais máis multitudinarias e populares de Galicia. O acto desenvolvrase no Centro Galego desta cidade que, á súa vez, tamén celebra o 25 aniversario da súa propia Festa do Pulpo.
Precisamente por isto, así como para reforzar a declaración da Fsta do Pulpo do Carballiño como Festa de Interese Turístico Internacional, é polo que este ano se tomou a iniciativa de dedicalle a festa ao Centro Galego de Nurember.

Para isto, desprazaranse ata esa cidade, situada na rexión de Franconia, no estado de Baviera, unha delegación da corporación carballiñesa, encabezada polo alcalde, Francisco Fumega, e formada polo concelleiro de Turismo, José Manuel Dacal; o portavoz do PP, Argimiro Marnotes e o portavoz de AV-Son, Bernardo García. Tamén irán dous pulpeiros. Asemade, confirmou a asistencia a este acto o secretario xeral de Emigración da Xunta, Antonio Rodríguez Miranda.

O acto celebrarase o sábado pola tarde, ao comezo dunha festa que organiza o Centro Galego e que reunirá a miles de persoas nunha céntrica rúa que se pechará ao tráfico para o efecto. O protagonismo será para o pulpo á feira, pero tamén haberá outras actividades, como un concerto de Cristina Pato, que foi contratada polo Centro Galego.

Tanto a dedicación da Festa do Pulpo ao Centro Galego de Nuremberg como a procura da internacionalidade, foron os motivos que máis impulsaron ao concello para seleccionar un cartel que fose representativo do evento e ao mesmo tempo que fose un bo reclamo publicitario. De aí que, ao final, optouse por un cartel que contén os dous emblemas do Carballiño e Nuremberg, como son o Templo da Veracruz e o Castelo Imperial, e, por suposto, un gran pulpo rodeando con dous rabos estes monumentos. É un traballo laborioso de debuxo e deseño, pois o pulpo ten infinidade de debuxos con aceiteiras, pementeiras, saleiros e pulpiños máis pequenos, entre outros; e os monumentos tamén foron debuxados a man con moito detalle.

O resultado é un cartel moi chamativo e representativo, cecais un dos carteis da Festa do Pulpo máis elaborados. É obra do debuxante e deseñador Ovidio José Feijoo Oliveros, con quen traballou o concello para acadar un cartel de moita calidade. Este artista ten realizado múltiples exposicións; xa ten feito debuxos de camisetas para a Festa do Pulpo, e visita habitualmente O Carballiño, pois aquí reside parte da súa familia.

Este cartel, que é o que se distribuirá en Nuremberg, será presentado á volta no Carballiño, incorporando os logotipos de todas as firmas que patrocinan a Festa do Pulpo e que se distribuirá por toda Galicia e nos centros galegos de todo o mundo.

No libro "Polos camiños de Avión", o autor Xesús Antonio Gulías Lamas, fai unha viaxe cultural pola tradición e a historia deste municipio ourensán. A presentación desta publicación tivo lugar hoxe no Pazo Provincial, acto no que participou o deputado provincial de Cultura, Manuel Doval; o alcalde de Avión, Antonio Montero; e o autor.

Manuel Doval destacou que esta obra "permítenos coñecer o municipio, un territorio que está marcado pola pegada que deixan nel as súas xentes e que non finaliza nos camiños de Avión, senón que están espalladas por todo o mundo a través da historia de todos aquel que emigraron e que aínda atopan en Avión a súa sinal de identidade". O deputado provincial de Cultura lembrou que Xesús Antonio Gulías Lamas xa "conta con outros traballos referentes a concellos como Beariz, por exemplo".

O autor da publicación explicou que, ademais do "achego" que sinte por esta terra, o principal motivo que "me levou a facer esta viaxe por todos os lugares deste concello para poder escribir este libro foi a ansia de profundar máis na súa cultura, no seu patrimonio e nas súas tradicións. Tratei de que esta andaina polas terras de Avión fora esencialmente cultural" pero, Xesús Antonio Gulías Lamas, sinalou que a cultura "non está só nos libros e arquivos, senón tamén nas xentes do pobo que foi recompilando datos, historias e lendas a través do tempo, polo que son enciclopedias viventes ás que hai que acudir e consultar".

Nese mesmo senso, Antonio Montero fixo alusión a un fragmento do libro que reflexa, segundo el, o que nel se conta: "O do viaxeiro é un turismo pobre, pero que o enriquece a el culturalmente, porque vai descubrindo en cada lugar por onde pasa, os tesouros que se foron conservando a través dos anos, dos séculos, ás veces ata dos milenios, co que se vai facendo unha idea de como era a vida dos seres humanos de cada sitio".

O alcalde de Avión dixo sentirse "orgulloso de que se escriba un libro o noso municipio, facendo un repaso non só pola cultura e o patrimonio relixioso e arquitectónico, senón tamén polas vivencias dos que habitaron Avión, dos actuais veciños e dos que non están no municipio, porque co traballo e esforzo de moita xente dos seus pobos fixeron que cos anos se escribiran moitas historias".

O concelleiro Chema Ferreiro e a concelleira Sofía García entrevistabanse coa Valedora do Pobo, Milagros Otero, á que pedian a súa mediación para que as institucións tanto autonómica como locais aborden dunha vez por todas o proxecto de erradicación do chabolismo no lugar da Fontela.

O asentamento, no que viven numerosas familias xitanas, está ubicado dentro do municipio de Maside, aínda que pola súa localización encóntrase situado nunha das entradas principais á vila do Carballiño.

O BNG carballiñés lamenta que institucións teñan paralizado dende fai varios anos un proxecto "que é fundamental para solucionar un grave problema que mantén vivindo a varias famiias en condicións absolutamente insalubres e de infravivenda".

Chema Ferreiro tampouco esquece que "o impatco visual que causa  á entrada do Carballiño é un atranco para o desenvolvemento socio-económica para esta zona no límite entre O Carballiño e Maside".

O portavoz do BNG no concello do Carballiño mostrou o seu agradecemento á Valedora do Pobo "pola súa sensiblidade e receptividade ante este problema, estivo super atenta con nós", remarcou.