Na víspera de Noiteboa, O Carballiño ofrecerá dúas actividades de gran interese neste Nadal Cultural. Trátase da obra teatral Eroski Paraíso, da compañía Chévere, coa actuación estelar do actor Miguel de Lira, e do concerto de música latina e electrónica que ofrecerán, entre outros, Dasoul e Danny Romero.

O concerto que terá lugar na discoteca Isis Pharia este venres, 23 de decembro, a partir das 22,30 h., traerá ata O Carballiño a centenares de persoas que xa adquiriron as súas entradas para asistir a este evento musical que se prolongará ata as 6,30 h. da mañá do sábado. Na súa maioría serán mozos e mozas da capital da provincia, pero tamén doutras vilas e incluso doutras provincias.

Para facilitar o traslado ata a discoteca, sen necesidade de usar vehículo propio, hai un servizo de autobús dende Ourense, Ribadavia e O Carballiño. Tamén se habilitará unha zona de aparcamento de vehículos na Avenida do Arenteiro, accedendo á discoteca a través dunha das pasarelas do río.
A organización espera encher a práctica totalidade do aforo, que é de 1.800 persoas.

Ademáis de Dasoul e Danny Romero, que son a atracción máis destacada, o espectáculo contará cos mellores DJ de Galicia, da provincia e do Carballiño, como son Groove Amigos, The Prieto Brothers e Stewe Gómez. De aí que o evento terá unha duración de sete horas.

MIGUEL DE LIRA
Tamén o venres, pero ás 9 da noite, a compañía de teatro Chévere representará no auditorio municipal a comedia Eroski Paraíso. No elenco figuran Miguel de Lira, Cristina Iglesias, Patricia de Lorenzo, Fidel Vázquez e Luís Martínez.

HINCHABLES PARA OS NENOS
O Centro Comercial Aberto ten previstas actividades de animación para este venres dia 23 de Decembro, instalaránse hinchables na rúa Curros Enríquez e na rúa do Paseo.

PAPÁ NOEL
A súa visita a O Carballiño será na tarde do 24 de Decembro, Papá Noel estará dende as seis da tarde na Praza Maior do Carballiño.

MONÓLOGO DE TOURIÑÁN
Por outra parte, o monólogo do humorista galego Touriñán, que terá lugar o sábado 14 de xaneiro, ás 21,00 h., colgou o cartel de “esgotadas as entradas”. A compañía promotora “Moitamerda Producións” xestiona neste intre un segundo pase para as 7 da tarde dese mesmo día. Esta posibilidade será anunciada nestes próximos días.

A segunda tempada do ciclo de monólogos “Carballiño Comedy2” está a suscitar un gran éxito. Así, no primeiro monólogo de Enrique San Fracisco, o 10 de decembro, esgotáronse as entradas e ainda quedou xente fóra do auditorio. E para este segundo monólogo, tamén se esgotaron as entradas.
Ambos eventos forman parte da programación do Nadal Cultural, coa oferta de concertos, monólogos, cine e teatro infantil, teatro e outras actividades dirixidas aos nenos, á mocidade e aos maiores para entreter e animar este tempo de Nadal.

O concello edita un novo plano-guía do Carballiño e comarca, que contén unha ampla información turística e de servizos da vila e dos arredores.

Trátase dun folleto desplegable, que permite gardalo nun bolsiño pero que aberto ofrece uns planos e mapas o suficientemente grandes como para que se vexa ben a información que ofrecen.

Este plano-guía foi presentado a mediodía polos concelleiros de Turismo e Cultura, Xosé Manuel Dacal e Diego Fernández, respectivamente. Dacal dixo que se trataba dunha verdadeira necesidade, xa que o anterior era vello e contiña erros, e este está totalmente actualizado cos nomes das rúas novas, así como o resto dos lugares de interese.

O novo plano-guía leva por una cara o plano do casco urbano do Carballiño, destacando a zona centro e o barrio histórico de Flores, e o conxunto que conforman o parque, a piscifactoría, a fábrica do papel, os muíños e o camping.

E pola outra cara, un mapa da comarca con toda a sinalización histórica, monumental, termal, paisaxística e de interese natural. A portada e a contraportada, co plano plegado, as ocupan as imaxes do templo da Veracruz e da Festa do Pulpo, “os dous referentes turísticos do Carballiño”, según dixo Manuel Dacal.

Tamén figura o código QR que vai permitir acceder á páxina web do concello dende calquera teléfono móbil para ampliar a información sobre O Carballiño. Unha novidade importante con respecto á anterior guía é a inclusión das dúas rutas de sendeirismo do Carballiño: o Camiño do Arenteiro, que vai dende os muíños ata Pazos de Arenteiro, e o Camiño dos Arrieiros.  Esta referencia inclúe os planos das rutas coas distancias, cotas, e outros datos.

O concelleiro de Cultura apuntou que este novo plano-guía era un elemento máis para promover o turismo e facer máis atractivo O Carballiño, e que ía a ser un bo instrumento de información para os milleiros de visitantes que acuden cada ano á vila e que neste ano que remata foi especialmente de gran afluencia.

O concello editará 10.000 planos-guía, que se distribuirán na Oficina de Turismo da Alameda e no concello.

Os portavoces municipais confían en que o novo plan de transporte da Xunta dea resposta ás necesidades do Carballiño e da comarca nesta materia. Así o manifestaron hoxe o alcalde, Francisco Fumega; o portavoz do PP, Argimiro Marnotes; o portavoz do BNG, Francisco Ferreiro, e o portavoz de Alternativa Veciñal, Bernardo García, durante unha rolda de prensa ofrecida no concello para dar conta do resultado da reunión que mantiveron a semana pasada coa conselleira de Infraestruturas e Vivenda, Ethel Vázquez, para analizar a situación do transporte público comarcal.

Francisco Fumega agradeceu a dispoñibilidade dos grupos municipais e as súas aportacións para a reunión, e aclarou que o obxectivo era integrar a comarca coa capitalidade, e esta con Ourense e, a ser posible, con Santiago. “Temos por diante unha serie de deberes que facer para o momento en que rematen as actuais concesións do transporte en Galicia, previtas para o próximo verán, e poder integrar ao Carballiño no novo plan; por iso imos a colaborar estreitamente coa consellería de Infraestruturas e Vivenda”, dixo o alcalde.

Argimiro Marnotes, pola súa parte, resaltou a satisfacción xeralizada polo resultado da reunión, en canto que a Xunta xa coñece a problemática do Carballiño en materia de transporte público. O portavoz do PP resaltou non só o interese sobre o transporte por estrada, senón tamén por incluir a ADIF, coa posibilidade dun uso intermodal da estación do ferrocarril. Tamén se referiu ao plan de transporte da comarca co Carballiño e do Carballiño con Ourense e incluso con Pontevedra e Santiago. “É o momento de que O Carballiño despegue”, dixo, “e para isto ábrese a posibilidade de poder elixir as paradas en Ourense (estación, Campus Universitario e residencia sanitaria).

Fracisco Ferreiro destacou o feito de que os portavoces participasen nesta iniciativa, que é o camiño a seguir, o mesmo que a colaboración institucional. Pese ás discrepancias lexítimas que poida haber por parte de cada grupo, o portavoz do BNG agradeceu a boa receptividade da conselleira e a posibilidade de que se poidan realizar obras de infraestrutura. “Se temos unhas boas comunicacións será moi positivo para a comarca, sobre todo, para os servizos”, dixo. Bernardo García comezou amosando a súa esperanza de que no 2017 poida producirse un cambio neste sentido e que as promesas da conselleira poidan cumplirse, co obxectivo de que os veciños e veciñas teñan os medios de transporte que necesitan.

Finalmente, o portavoz de Alternativa Veciñal destacou a posibilidade de poder liberar algúns edificios públicos para outros cometidos.

Nesta reunión coa conselleira, tampouco nesta comparecencia dos portavoces municipais, participou o concelleiro non adscripto Marco Antonio Reboredo. En manifestacións nesta emisora de radio, Reboredo mostrouse escéptico cos posibles resultados desta reunión coa conselleira e avanzou que presentará ao pleno da corporación unha proposta con varias iniciativas para mellorar as prestacións do transporte público no Carballiño.

Entre esas propostas do concelleiro non adscripto están a creación dunha asociación de usuarios do transporte público ou reactivar a plataforma cidadán para demandar do ADIF novos servizos ferroviarios na estación do Carballiño.

A concellería de Medio Ambiente pon en marcha unha campaña de sensibilización cidadá para mellorar o uso do punto limpo. Trátase de promover unha boa práctica na utilización desta instalación municipal na que se deben depositar os residuos especiais e voluminosos que non poden botarse nos contenedores da rúa.

Esta campaña, que se desenvolve co lema "O Carballiño, vila limpa e sostible, depende de ti", é a continuación doutra levada a cabo na primavera pasada sobre o uso correcto dos contenedores.

A través de charlas, folletos e diverso material de difusión, esta concellería que coordena Érika Paz, pretende informar e concienciar á poboación sobre as posibiidades deste servizo municipal, que é gratuito, e que está acondicionado para albergar obxectos domésticos inservibles como mobles, colchóns, electrodomésticos e similares, e residuos perigosos do fogar como aerosoles, fluorescentes, disolventes, pinturas, etc.

O punto limpo, que se atopa na estrada do Carballiño a Cea, fronte ao matadoiro, está operativo de luns a venres, en horario de 10,00 a 14,00 h., pero tamén permite que ese tipo de obxectos se depositen á beira dos contenedores da rúa calquera xoves non festivo, chamando previamente ao teléfono 662199635 para dar aviso.

A elección destas datas de Nadal para levar a cabo esta iniciativa ven condicionada pola cantidade de obxectos inservibles que se producen neste tempo, como xoguetes vellos, árbores e adornos navideños, renovación de mobles e electromésticos, ou outros obxectos de pequenas reformas nos domicilios, e que deben ser depositados no punto limpo.
O obxectivo da campaña é conseguir que toda a veciñanza coñeza este servizo e faga un bo uso do mesmo, contribuindo desta maneira a que O Carballiño sexa unha vila limpa e sostible.

De feito, o punto limpo non só é lugar adecuado para albergar este tipo de obxectos inservibles, senón que é a única posibilidade de que estes resdiduos reciban un tratamento posterior para a súa reciclaxe e valorización, co que se consigue realmente a sostibilidade medioambiental.

É unha campaña, polo tanto, dirixida a implicar á cidadanía nas boas prácticas para a recollida selectiva do lixo, que depende en gran medida do uso que faga cada quen deste servizo. E o punto limpo municipal é, xunto cos contenedores habituais para depositar o lixo común, o vidrio, o papel e o cartón, e os envases de plástico, latas e break, un eslabón moi importante para manter limpas as rúas e coidar o medio ambiente.

O Portavoz socialista na Deputación, Francisco José Fraga Civeira acompañado polos Portavoces da comarca e o Alcalde do Carballiño, Paco Fumega, compareceu para dar conta da reunión mantida e do traballo realizado na comarca do Carballiño.

Tal como el indicou, "tratouse dunha reunión máis, dentro da rolda de contactos que vén realizando o Grupo Provincial Socialista por toda a provincia, para coñecer de primeira man as necesidades dos veciños e veciñas en cada Concello de Ourense".

Neste caso, Fraga Civeira, mantivo unha reunión cos Portavoces da Comarca do Carballiño e co Alcalde da localidade para iniciar a análise pormenorizada do estado das redes e vías de titularidade provincial,e dar traslado das necesidades á Deputación.

Trátase, como el mesmo aclarou, "dun traballo iniciado coa denuncia iniciada polos compañeiros de Boborás sobre a estrada que une este Concello co de Beariz, á que se lle deu traslado á Deputación e na que se realizou unha recollida de sinaturas moi exitosa que reflectía o descontento da xente cunhas obras que non parecen rematar nunca", subliñou.

Do mesmo xeito, os socialistas trasladáronse á ponte de Toscaña para comprobar o estado desta estrada, tamén provincial, que vai ata Astureses.

A este respecto, o Alcalde do Carballiño, Paco Fumega, declarou que "é imprescindible que se atenda o primeiro tramo desta vía, con urxencia, na zona na que hai edificacións e se trate de dotala de beirarrúas axeitadas, posto que é moi transitada por veciños e veciñas, xente que vai facer deporte ou paseantes que están a por en risco a súa seguridade persoal".

Neste senso, Fumega, cualificou de positiva a análise das necesidades de cada Concello "e que se lle poida dar traslado ó Grupo Provincial Socialista para que fagan as demandas oportunas na propia Deputación, responsable polo estado das súas estradas".

Para os socialistas é prioritario asegurar o mínimo risco para os usuarios e usuarias nunhas vías que, moitas veces, están nun estado deplorable.

Por outra banda, o Portavoz socialista, Fraga Civeira, preguntado pola situación interna do partido, indicou que no Grupo Provincial están completamente centrados en cuestións de traballo e non orgánicas: “ A nosa única preocupación é a mellora das condicións de vida da xente. agradezo especialmente o gran ambiente de traballo que temos na comarca do Carballiño, estivemos, escoitando ós portavoces e contamos coa colaboración do propio alcalde que nos brinda a oportunidade de comezar a análise destas infraestruturas, tendo como obxectivo visitar sobre o terreo todas e cada unha delas”.