As lembranzas do colexio “Isabel La Católica” e dos seus fundadores, don Juan Corral e dona Matile Pérez, sucedéronse estem domingo durante o acto de descubrimento dunha placa na súa memoria.

Numerosos carballiñeses, ex alumnos do centro educativo “O Corral”, veciños e veciñasacudiron a este acto no que interviñeron o alcalde, Francisco Fumega; o exalumno e director do Instituto nº 1, Manuel Amil; o exalcalde e portavoz do PP, Argimiro Marnotes; o portavoz do BNG, Francisco Ferreiro; o exalcalde Pachi Vázquez; o párroco José Benito Sieiro e o fillo dos homenaxeados, Juan Corral Pérez.

O Orfeón do Carballiño e a Coral Polifónica do Casino interpretaron dous temas aocomezo e ao final do acto, que culminou coa interpretación do himno galego a cargo do Grupo da Escola de Gaitas e ambas corais.

O monumento, promovido por Avelino Corral coa súa familia, está ubicado nun extremo da praza da rúa Juan Corral Pajariño.

Unha placa de bronce coas imaxes gravadas de don Juan e dona Matilde, recorda a importancia deste centro educativo na segunda metade do século XX no que se formaron cinco xeracións de carballiñeses.

Unha numerosa representación da vida social, deportiva e cultural das comarcas do Ribeiro e O Carballiño, arredor de 200 persoas, déronse cita no Aparthotel Arenteiro no acto de entrega dos premios da Arenteira creados por este establecemento hoteleiro para recoñecer a traxectoria de persoas ou entidades nos ámbitos do deporte, a cultura e a ciencia.

Un gaiteiro e un pianista solemnizaron coa súa música en directo un acto que abríu e cerrou, no nome de Aparthotel Arenteiro e o Grupo Cer&Ber, Uriel Bernárdez agradecendo o traballo desenvolvido polo xurado, asi como centros educativos e asociacións culturais, veciñais e deportivas pola súa implicación na organización dos galardóns.

Xosé Prada foi o encargado de realizar a lectura da acta do xurado, e o seu presidente Xosé Luis Sobrado, fixo memoria e salientou a relevancia dos tres persoeiros galdardonados este ano. Depois chegou o momento da entrega dos premios, unha peza artística da autoría de Xesús Carballido.

O primeiro en recibir a Arenteira foi o ex-futbolísta Pepe Carballeda, que dedicou o premio "a todos os meus compañeiros que están aquí e moi especialmente a aqueles compañeiros do ano 1964 cos que conseguimos o primeiro ascenso histórico do Arenteiro á 3ª división".

Pablo Rodríguez Oitabén, o naturalista máximo impulsor do proxecto medio ambiental de Ridimoas, quixo compartir o momento e o premio "con todos aqueles que traballan en preservar o medio ambiente, e estando no Carballiño, co Grupo de Acción Ecoloxísta Outeiro".

Finalmente, recibíu a Arenteira a título póstumo o pai do termalismo galego moderno, o doctor Luís Rodríguez Míguez. A súa viuva, Mariluz Villar, nunha emotiva intervención, agradeceu "a bondade de todas as persoas con Luis, para él O Carballiño sempre foi a súa segunda casa, él sigue aquí, entre nós",unhas palabras que foron moi aplaudidas por todo o público posto en pé.

O cántico do himno galego puxo o broche solemne á entrega desta quinta edición dos galardóns da Arenteira.

Na foto, Carballeda, Oitabén e Mariluz Villar, cos responsables de Aparthotel Arenteiro e o Grupo Cer&Ber, Uriel e José Manuel Bernárdez, e o presidente do xurado, Xosé Luis Sobrado.

A Consellería de Medio Ambiente e Ordenación do Territorio prevé rematar as obras do sendeiro ecolóxico de Piñor a finais deste mesmo ano. Así llo trasladou a titular deste departamento autonómico, Beatriz Mato, ao alcalde de Piñor, José Luís González, durante a supervisión dos traballos que se están a executar e nas que o seu departamento inviste 55.000 euros.

O sendeiro discorre pola marxe dereita do río Arenteiro, comezando o seu percorrido na antiga fábrica de papel, e ten unha lonxitude de 400 metros. As actuacións consisten no desbroce e mellora do sendeiro; no acondicionamento da senda con pedra de mampostería e recolocación de pedras xa existentes; na colocación de preto de 300 metros de varandas de madeira e 62 metros de pasarela, tamén de madeira; e na instalación de seis bancos e dúas mesas, así como varios paneis informativos.

Mato destacou que o Arenteiro é un río moi importante dentro da provincia de Ourense, que conta con numerosas rutas a pé para gozar do seu contorno, unha gran tradición de pesca deportiva, e un notable patrimonio cultural como, por exemplo, os seus muíños de auga.

Por último, destacou o compromiso do Goberno galego co concello de Piñor, xa que só a Consellería de Medio Ambiente destinou desde 2009 un investimento de preto dun millón de euros. Engadiu que unha parte importante (case tres cuartas partes) se dedicou á dotación de servizos de abastecemento de auga, un dos grandes obxectivos do departamento que dirixe Beatriz Mato.

Recordou que Medio Ambiente tamén asumirá o acondicionamento da Aira de Freás, no marco do Plan Hurbe, dotado con máis de 100.000 euros; así como a axuda para a redacción do novo Plan xeral de ordenación municipal do concello.

O Concello de San Cristovo de Cea súmase aos actos conmemorativos do 25-N coa convocatoria dunha concentración na Praza Maior de Cea á unha da tarde baixo o lema "Unamos as nosas mans para dicir NON á violencia de xénero".

Doutra parte, o centro social da Albarona acollerá o acto conmemorativo no concello de Piñor, que incluirá a presentación do calendario do ano 2017 editado polo concello piñorense contra a violencia de xénero, que logo será distribuído entre a veciñanza do municipio. Ademáis, celebraráse un taller sobre a influencia dos medios na problemática da violencia de xénero.

Xa no concello do Carballiño, o Centro de Información da Muller, adscrito á concellería de Benestar, Igualdade e Saúde, organiza para este venres, 25 de novembro, un acto solidario e reivindicativo polo Día Internacional contra a violencia de xénero.

Neste acto, que foi presentado pola concelleira Marina Ortega, e que desenvolverá no salón de sesións do concello ás 12, participará o alumnado dos centros educativos do Carballiño, a Escola Infantil Trastes, Bo Día Familia, Cruz Vermella, ASPADISI, ASDIFICA, Conservatorio e Asociacións de Mulleres. Asemade, actuará a cantautora carballiñesa Inés Vázquez. Marina Ortega fixo unha invitación a toda a veciñanza para que asista a este acto como mostra de solidariedade coas persoas que sufren calquera tipo de violencia de xénero.

Asemade, presentou o resto da programación prevista para conmemorar esta efeméride mundial. Así, o 29 de novembro terá lugar un coloquio, co tema “A orixe da violencia de xénero: adolescencia”, coa intervención dos ponentes Patricia Gómez Salgado, investigadora e docente na facultade de Psicología da USC, e Albino Ferreira Rivera, avogado. O coloquio celebrarase no salón de plenos ás 8 da tarde.

Dentro deste mesmo programa o 30 de novembro terán lugar unhas charlas informativas a cargo do persoal do Centro de recuperación integral para vítimas de violencia de xénero sobre as consecuencias desta violencia nas mulleres, nos nenos e nas nenas e pautas para a súa abordaxe. Terán lugar no IES Chamoso Lamas. Finalmente, o 16 de decembro reunirase a Mesa de coordinación para a mellora da atención ás vítimas de violencia de xénero.

Na foto, Marina Ortega, concelleira de Benestar, Igualdade e Saúde.

Un novo certame de canto coral pasará a incrementar a oferta cultural do Carballiño.

Trátase do I Festival “Outros países, outras músicas”, que organiza o Coro de Cámara Música Viva, en colaboración co concello do Carballiño. O evento, que se celebrará este sábado, 26 de novembro, ás 19,30 h., con entrada gratuita, foi presentado hoxe polo concelleiro de Cultura, Diego Fernández, e o presidente do Coro de Cámara Música Viva, Antonio Rey.

O Festival reunirá á Coral Polifónica de Berres (A Estrada), a Coral Polifónica Santa Susana (Santiago) e ao Coro de Cámara Música Viva, do Carballiño. Antonio Rey resaltou como elemento diferencial dos demáis festivais de corais, o feito de que a maioría das cancións que se van a interpretar non forma parte habitual do repertorio destas entidades musicais.

Así, ofreceranse cancións e versións adaptadas de temas de moitos países, entre eles, Arxentina, México, Portugal, Reino Unido, EEUU, Venezuela e Canadá, entre outros, ademáis de temas en eusquera e galego. Esta é a principal novidade deste festival, no que se quere ofrecer algo completamente diferente, según dixo o responsable do Coro Música Viva. E por iso realizou unha invitación a todo o público para que acuda este sábado ao auditorio.

No mesmo sentido pronunciouse o concelleiro de Cultura, que agradeceu o traballo do Coro Música de Cámara a prol da cultura no Carballiño e o enriquecemento da programación cun festival tan novidoso dentro dos cánones da música coral.

Na foto: Diego Fernández, concelleiro de cultura, e Antonio Rey, presidente do Coro de Cámara Música Viva.

O alcalde carballiñés avanzou, no transcurso dunha intervención nesta emisora de radio, varios proxectos nos que na actualidade traballa a institución municipal.

Fumega anunciou a intención do goberno municipal de executar un proxecto integral de mellora da iluminación pública a través da implementación nas rúas carballiñesas da tecnoloxía LED, un proxecto que superará o millón de euros de investimento e para o que o rexedor municipal agarda unha axuda europea.

Ademáis, e neste caso con fondos propios, o concello carballiñés iniciará nas vindeiras semanas unha reforma do alumado público na rúa Martinez Avellanosa, onde se instalarán 24 novos puntos de luz que sustituirán aos actuais.

O Alcalde do Carballiño tamén se referíu a outras actuacións e obras municipais no transcurso desta entrevista radiofónica, que pode escoitarse nesta mesma páxina WEB, no apartado de programas, no arquivo correspondente ao lúns dia 21 de Novembro.