O PSdeG-PSOE de Leiro acusa á Xunta de Galicia e ao concello de ocultar de xeito “deliberado” información da realidade do investimento e a xestión do hotel do Mosteiro de San Clodio e do Spa de vinoterapia. Os e as socialistas sinalan que tras seis peticións de información solicitadas entre o 2017 e 2023 no Parlamento de Galicia, a única resposta foi o “silencio sepulcral e a ausencia de explicacións ao respecto”.

Dende o grupo municipal socialista reclaman coñecer os “motivos” polo que o investimento inicial previsto entre 1999 e o 2000, cun importe de 2.650.602 euros e financiado inicialmente por dúas consellerías e a Secretaría Xeral de Turismo da Xunta, acabou por converterse ao final do proxecto nun investimento de máis de 11.200.000 euros. Neste senso lembran que a explotación foille outorgada, mediante a sinatura dun convenio por parte da Xunta de Galicia, a orde relixiosa de Samos e o concello de Leiro, ao grupo Hotusa para a súa explotación por un período de 25 anos.

O voceiro do PSdeG-PSOE en Leiro, Manuel Rodríguez Vázquez, destaca que o convenio asinado en 1999 supón “unha carga exaxerada para as arcas municipais”. Cabe destacar que o concello corre a cargo dos gastos de aluguer (9.000 euros anuais), ao que se suma o IPC e o mantemento e conservación das fincas a carón do mosteiro. “A decembro de 2022, o concello de Leiro xa desembolsara máis de 210.000 euros, que saíron das arcas municipais, polo que queremos que o alcalde nos explique que contrapartidas e beneficios tivo este convenio para a veciñanza”, sinala o edil socialista.

Rodríguez Vázquez destaca que o PP “vendeu a bombo e platillo dende a Xunta e o concello que este proxecto sería un motor económico e de dinamización social para Leiro e a comarca, xerando novos postos de traballo”. Tal e como destaca o concelleiro socialista “a realidade é que nestes 23 anos, Leiro perdeu 565 habitantes e non se xerou posto de traballo algún, polo que queremos que o alcalde nos aclare cales foron os beneficios reais para o noso municipio”.

O PSdeG-PSOE de Leiro considera “imprescindible” acceder ás cláusulas que regulan a concesión e a xestión do hotel e spa, xa que tal e como apuntan “hai requirimentos que a empresa Hotusa non está cumprindo e que nin a Xunta, nin o concello, teñen intención de facerlles cumplir”. Os e as socialistas afirman que o PP “antepón os intereses da empresa por riba dos dereitos, dos intereses e do benestar da veciñanza de Leiro”.

O concello do Carballiño xa encargou a un equipo de arquitectos a elaboración dun anteproxecto do que sería o futuro estadio de fútbol, e como punto de partida para poder contar tanto co proxecto técnico da obra como dunha avaliación económica e asi xestionar coas disntintas administracións o orzamento necesario para a súa contrucción, que según o alcalde Fumega estaría entre os oito e os dez millóns de euros.

O rexedor municipal tamén avanzou que xa iniciou negociacións coa Deputación para que a entidade provincial ceda a parcela coa que conta na zona próxima ao actúal campo de fútbol da Uceira, que xunto a outros terreos públicos nesta mesma contorna, suman os 14.000 m2 que se precisan para albergar este proxecto.

Fumega tamén dixo que o aforo do futuro estadio estará pensado para acoller a máis de catro mil espectadores sentados e con graderío perimetral todo cuberto. De feito, o Club Deportivo Arenteiro, ao que desde o concello lle pediron as necesidades e requisitos da entidade federativa para acoller partidos de fútbol na categoria na que na actualidade milita o club, trasladou ao concello a recomendacion de estadios como o "Toralín" de Ponferrada (na foto) , como exemplo das condicións que debe reunir o futuro estadio carballiñés.

No audio adxunto podes escoitar a intervención do alcalde Fumega en COPE O Carballiño, referindose a este proxecto e tamén contestando a outras preguntas, queixas e suxerencias dos e das ointes desta emisora de radio.

O rexedor municipal agarda poder asinar o convenio de colaboración entre concello de San Amaro e a Consellería do Medio Rural nos próximos dias, unha achega económica que fará posible a construcción dun picadeiro no antigo campo de fútbol do Foxo, agora reconvertido en escola de equitación e equinoterapia de San Amaro.

O alcalde avanzou que conta co compromiso do conselleiro Xosé González para facer realidade unha demanda que vai supoñer un antes e un despois nunhas instalacións que acollen as actividades de equitación e e as sesións de equinoterapia, das que se benefician nenos e rapaces con necesidades especiais.

No audio adxunto podes escoitar o anuncio do alcalde Fernando Redondo en COPE O Carballiño.

A Plataforma que ven demandando a reposición das dúas prazas de pediatría no centro de saúde do Carballiño móstrase decepcionada polas explicacións do conselleiro na reunión mantida o pasado venres á que acudiron representantes deste colectivo, xunto a alcaldes e alcaldesas da comarca carballiñesa.

Rocio Valiñas, integrante desta Plataforma en Defensa da Sanidade Pública do Carballiño dixo nesta emisora de radio que "estamos como estabamos, é un pequeno paso, pero moi insuficiente", e asegurou que non van parar ata que se cubran as necesidades dunha comarca con 2.300 nenos e nenas en idade pediátrica.

Podes escoitar as manifestacións de Rocio Valiñas no audio adxunto:

O Concello de Piñor informa de que se vai a continuar coa actividade MENTE ACTIVA, debido á gran acollida que tivo por parte da poboación. Consiste en talleres de estimulación cognitiva. Como entidade dentro da rede de Concellos Saudables, o obxectivo é atender ás necesidades da poboación en todo o que ateña á súa saúde, promovendo o benestar da veciñanza.

“Mente activa” consiste na realización semanal de actividades de estimulación cognitiva impartidas por un profesional da materia, destinadas a persoas de 60 anos en adiante. Chegada unha idade, é moi importante manter a mente en forma, non soamente o corpo. A estimulación cognitiva é un conxunto de técnicas que procuran a mellora de capacidades cognitivas como a memoria, a atención, a linguaxe… e que ademais pode traer beneficios coma os seguintes:

-Reforzar a autonomía funcional das persoas maiores para realizar tarefas da vida cotiá de forma autónoma.
-Ralentizar o proceso de deterioro cognitivo.
-Reforzar e aumentar a autoestima da persoa.
-Fomentar a interacción social e evitar que as persoas queden illadas.
-Evitar episodios de estrés e ansiedade provocados polo deterioro cognitivo.
-Mellorar a calidade de vida da persoa e a súa sensación de benestar emocional e psicolóxico e de saúde xeral.

A actividade levarase a cabo os xoves de 10h a 11h no Centro Social de Albarona, dende o 1 de febreiro ó 20 de xuño de 2024.

Toda persoa interesada en participar pode solicitar máis información e inscribirse nos Servizos Sociais.

O conselleiro de Sanidade, Julio García Comesaña, mantivo este venres unha reunión cos alcaldes e alcaldesas da comarca do Carballiño e unha representación da Plataforma Cidadán Pola Defensa da Sanidade Pública do Carballiño, un encontro no que se comprometeu a manter as dúas prazas de Pediatría coas que conta na actualidade o centro de saúde do Carballiño, según recolle a Consellería de Sanidade nun comunicado feito público posterior a esta reunión celebrada en Ourense.

A reunión chega tras a celebración o pasado domingo dunha manifestación polas rúas do Carballiño convocada pola Plataforma e a que asistiron unhas 1.500 persoas, anteriormente este colectivo remitíu ao conselleiro 8.541 sinaturas nas que se pedía a reposición do servizo coas dúas prazas de pediatras, que son as que ten asignadas o centro sanitario carballiñés, que atende tanto a poboación infantil do Carballiño como do resto dos concellos da comarca, unhos 2.300 nenos e nenas.

Segundo explicou o conselleiro aos rexedores e aos representantes da Plataforma pola defensa da Sanidade do Carballiño, unha destas prazas será cuberta de xeito inmediato, dado que tras ser ofertada no concurso de méritos -sen exame- convocado pola Xunta, esta xa dispón de candidato e “en cuestións de semanas estará cuberta cunha praza en propiedade”. A segunda das prazas ofertadas polo Servizo Galego de Saúde está polo de agora vacante á espera de ser asignada. É, por tanto, salientou o conselleiro, “unha praza que seguirá sendo ofertada a calquera médico especialista en Pediatría que queira ocupala”. No entanto, abundou o conselleiro, a atención pediátrica queda garantida no centro de saúde do Carballiño, ao contar con médicos de familia especializados en atención puericultura, e que agora xa se atopan traballando no centro.

“Se hoxe alguén solicita unha cita de Pediatría neste centro de saúde, obterán unha cita para o mesmo día de hoxe”, subliñou Comesaña. Durante a xuntanza, na que o conselleiro estivo acompañado polo xerente da área sanitaria ourensá, Félix Rubial; o titular de Sanidade reiterou que a Xunta manterá a atención con especialistas habilitados para esta especialidade.

De feito, puntualizou Comesaña, neste intres o centro conta cunha profesional especializada en puericultura que traballar a tempo completo e que, en función da demanda, o Sergas dispón doutro profesional para dar resposta as necesidades asistencias. Neste senso, o máximo responsable da Sanidade galega trasladou o firme compromiso da Xunta, tanto a nivel de recursos humanos como de infraestruturas sanitarias, para a poboación da comarca do Carballiño

A Deputación de Ourense fai posible a reforma da cuberta e o acondicionamento das fachadas do edificio que alberga a Casa de Cultura de Maside. Así o salientou o presidente da Deputación, Luis Menor, durante o encontro de traballo que mantivo no Pazo Provincial co alcalde de Maside, José Manuel Iglesias, para repasar as actuacións levadas a cabo en colaboración coa institución provincial.

Durante a xuntanza, Luis Menor lembrou que o Concello de Maside percibirá máis de 800.000 euros ao longo do mandato 2023-2027 a través do Plan CooperOU. Tamén analizaron posibles liñas de cooperación para futuras actuacións en materia de infraestruturas deportivas e viarias do municipio.

O PSdeG-PSOE de Punxín alerta sobre o servizo “desastroso” que están a prestar os servizos sociais municipais, que lonxe de mellorar co novo goberno municipal “non fan máis que ir a peor”. Os e as socialistas advirten que hai veciños e veciñas que levan máis de dúas semanas agardando por unha consulta coa traballadora social, xa que esta non acude ao concello os días estipulados e nos que debería atoparse exercendo a súa labor.

Dende o grupo municipal socialista de Punxín sinalan que os servizos sociais atópanse nunha situación “calamitosa, penosa e desoladora”, por mor da “inacción” do goberno municipal e do “desleixo” que amosan cara un servizo “fundamental”, nun concello do rural e cunha poboación moi envellecida. “Punxín precisa duns servizos sociais que se vexan reforzados e que presten a atención necesaria á veciñanza, cousa que a día de hoxe non sucede”, critican os e as socialistas.

A voceira do PSdeG-PSOE en Punxín, Lorena Peleteiro Vázquez, alerta de “continuas queixas” por parte dos veciños e veciñas que teñen que acudir aos servizos sociais municipais, “algo que nunca soe acontecer por cuestións agradables”. A edil socialista afirma que nas últimas dúas semanas a veciñanza “leva agardando unicamente para ser atendidos pola traballadora social, xa que esta non está acudindo ás citas, nin tampouco se suple a súa ausencia nos poucos días que xa realiza esta atención no concello”.

O PSdeG-PSOE de Punxín esixe a “urxente” mellora deste servizo, así coma unha atención de “calidade” e lémbranlle ao goberno municipal bipartito do PP e CxG que “hai trámites que teñen uns prazos determinados e a veciñanza non pode estar agardando dúas semanas para que os atendan”.

Lorena Peleteiro denuncia un novo “deja vu” no “abandono” do bigoberno a veciñanza e fai fincapé en que “estamos ante unha mostra máis de que o acordo de goberno do PP e CxG asinouse, única e exclusivamente, para atender a intereses persoais e partidistas e non os interese de Punxín e da veciñanza”. A voceira socialista urxe ao equipo de goberno que “se poña a traballar xa por Punxín, ou que dimitan, dean un paso a un lado e deixen gobernar a aqueles que de verdade queren traballar e mellorar o noso municipio”.

Cabe destacar ademais que a traballadora social é empregada da Deputación Provincial de Ourense, motivo polo que os e as socialistas “urxen” ao ente provincial que tome as medidas “oportunas” para que o servizo se preste en condicións “dignas e cunha atención personalizada á veciñanza”.