O Concello do Carballiño aprobou hoxe en pleno a habilitación de preto de 1 millón de euros para destinar no que resta de ano á redacción e financiamento de novos proxectos, actuacións en todos os ámbitos de competencia municipal e actividades varias, especialmente culturais, educativas, deportivas, lúdicas e festivas, así como axudas sociais ou ao tecido empresarial.

As partidas máis importantes irán destinadas a proxectos e obras (450.000 euros), Medio Ambiente, en particular a actuacións no Parque Municipal (133.000 euros), inversións no rural (70.000 euros), deportes (70.000 euros) e Cultura (57.000 euros).

En total, serán 970.213 euros, que saen do remanente das arcas municipais, que era de 1,6 millóns de euros antes da aprobación desta modificación e do que agora aínda quedan 600.00 euros.

Alegacións á liña de alta tensión

O pleno da corporación municipal aprobou tamén unha declaración institucional, apoiada polo tanto por todos os grupos políticos, na que manifesta a súa “total oposición ao proxecto das infraestruturas de evacuación de alta tensión ao seu paso polo concello do Carballiño”.

Arguméntao en que “a veciñanza rexeita frontalmente o anteproxecto presentado por consideralo nocivo no ámbito da saúde, do patrimonio natural e arqueolóxico” ou en que ten “un impacto visual enorme” e anuncia que “o Concello do Carballiño presentará alegacións” e “asesorará á veciñanza para que defenda os seus intereses”.

Este manifesto será remitido agora á empresa promotora, á Deputación Provincial de Ourense, á Xunta de Galicia e á Subdelegación do Goberno.

A Concellería de Deportes do Carballiño impulsa unha nova edición do Verán Deportivo, que busca fomentar os hábitos de vida saudables entre a veciñanza.

“Estamos encantados de organizar esta actividade e animar a xente a facer deporte e desfrute dun momento divertido”, explica José Castro, tenente alcalde e concelleiro de Deportes.

A programación inclúe pilates, ioga, aquagim, baloncesto, fútbol e balonmán, e está dirixida a poboación de todas as idades. “Como sempre, as actividades son gratuítas”, apunta o edil. Como novidade, as clases de pilates e ioga levaranse a cabo no entorno verde do Gran Balneario. “Queremos darlle pulo a este espazo, pensamos que é un lugar excepcional para facer estes deportes”, asegura Castro, que anima á participación.

“Non é preciso ter unha gran mobilidade, é chegar alí e botarlle ganas, dar un paseo, confraternizar con outras persoas…”, sinala.

A Concellería prevé unha boa participación, na liña do pasado ano, en torno ás 40 persoas en cada cita. O aquagim, pola súa parte, realizarase na piscina municipal, como é habitual.

As actividades de baloncesto, fútbol e balonmán tamén volven á Pista Vermella. “É un momento de lecer, non é competitivo, o obxectivo é facer deporte ao aire libre”, resume o concelleiro de Deportes. O ano pasado, estas propostas chegaron a congregar a máis de 500 rapaces no entorno da Pista Vermella, o que da conta da boa resposta da veciñanza. “Estamos encantados coa alta participación, o ambiente que se crea é moi bo”, asegura Castro.

Rebeca Amil, de Korpore Gym, entidade colaboradora no Verán Deportivo, resalta a ampla experiencia e coñecemento dos monitores encargados de guiar as actividades de ioga, pilates e aquagim. “Queremos continuar este verán coa boa resposta da xente, intentando sempre dar o mellor posible para a poboación do Carballiño e dos arredores”, sinala.

As actividades arrancaron esta mesma semana e finalizarán o 14 de setembro.

A programación semanal inclúe:
-Luns: pilates, ás 20,30 horas no céspede do Gran Balneario.
-Martes e xoves: ioga, ás 20,30 horas no céspede do Gran Balneario.
-Venres: aquagym ás 12,00 horas na piscina municipal.

Ademais, haberá intensivos de diversos deportes, todos na pista vermella:
-Baloncesto: do 7 ao 11 de xullo
-Fútbol: do 14 ao 19 de xullo
-Balonmán: do 21 ao 25 de xullo

Para participar nos intensivos é preciso inscribirse (o prazo estará aberto ata o día anterior ao inicio da actividade). Pódese facer no Concello, tanto presencialmente como por teléfono.

O Concello do Carballiño, a través da área de Benestar Social, renovará un total de 18 zonas verdes da vila coa colocación de 1400 plantas, céspede e adoquín de pedra.

A intervención, que inclúe a Alameda, a praza do Emigrante e a da Veracruz, busca mellorar e embelecer os espazos naturais da localidade que se atopaban en malas condicións ata o de agora, e favorecer así o desfrute da poboación do entorno natural do Carballiño.

A actuación, adxudicada a Extraco por case 20.000 euros, tamén inclúe a colocación dunha varanda de vidro laminar entre o parque infantil e a entrada ao párking da Alameda. A estructura mellorará a seguridade do espazo de xogo, unha demanda reiterada entre as familias usuarias.

A concelleira de Benestar Social, Rosa Fuentes, destaca a importancia desta actuación, que evitará o risco de caída de nenos e nenas. O prazo de execución é de dous meses, nos que se renovarán por completo as plantas, pero tamén a rede de rego das zonas verdes.

O novo sistema permitirá o mantemento adecuado durante todo ano dos preto de 1.400 exemplares, escollidos tendo en conta a climatoloxía do Carballiño. Entre as especies elixidas hai pequenas árbores e arbustos de folla perenne como azaleas ou gardenias.

Os Concertos do Xacobeo da Xunta de Galicia impulsan a colaboración territorial supramunicipal dos concellos de Castrelo de Miño, Cenlle e Arnoia que se unen na organización do festiva Espírito Ribeiro ao redor da música, a gastronomía, a artesanía e a cultura do viño da Denominación de Orixe do ribeiro. Así o presentou está mañá en rolda de prensa o director de Turismo de Galicia, Xosé Merelles, e o delegado territorial da Xunta en Ourense, Manuel Pardo.

Durante a presentación, Xosé Merelles salientou que “Espírito Ribeiro é un festival de sabores, música, mercado e produto de proximidade”, que se celebrará este sábado 28 e o domingo 29 de xuño en Castrelo de Miño (Ourense). O evento está organizado polos concellos de Castrelo de Miño, Cenlle e Arnoia, co apoio da Axencia Turismo de Galicia a través do programa Concertos do Xacobeo da Xunta de Galicia.

No eido musical haberá concertos de balde con figuras tan singulares do panorama musical estatal e galego como: Julián Maeso, Jaime Urrutia, Gisele Jackson, Top Secret e Roi Casal. Ademais, nesta edición, Espírito Ribeiro estreará un novo formato, rotando a actividade cada ano nun municipio. Así, Castrelo de Miño acollerá a edición deste 2025, mentres que Cenlle será o anfitrión no 2026 e Arnoia en 2027.

“Música, artesanía, cultura e viño danse cita neste evento singular no berce do Ribeiro, en Ourense, nun evento comprometido co desenvolvemento sostible, a paisaxe e a cultura do viño”, subliñou o director de Turismo, ao tempo que engadiu que “Espírito Ribeiro é, tamén, unha aposta pola promoción do patrimonio vitivinícola e a cultura”.

O director de Turismo de Galicia quixo destacar tamén “a colaboración territorial entre os tres municipios e a Xunta de Galicia, poñendo en valor este festival como marca cultural que impulsar a Denominación de Orixe Ribeiro, e como ferramenta de dinamización do rural”.

Neste 2025, ademais da música, ao cartel de Espírito Ribeiro incorpórase, como novidade, o concurso “A Foto do Espírito”, para recuperar fotografías antigas do Ribeiro. Así, as mellores imaxes formarán parte dunha exposición itinerante. O certame premiará con 300 euros a mellor fotografía.