Nacho Campo encabezará a lista do PPdeOU en Maside nas vindeiras eleccións municipais. O presidente provincial, Manuel Baltar, reuniuse co novo cabeza de lista para perfilar os detalles da candidatura, definindo a Campo como “a persoa perfecta para liderar o futuro de Maside”.

Nacho Campo (1997) estudou o grao de Dereito na Universidade de Vigo e é na actualidade o presidente provincial de Novas Xeracións. “É unha persoa nova, formada e comprometida co proxecto do Partido Popular de Ourense”, valora Manuel Baltar. “E sobre todo Campo é unha persoa moi vencellada a Maside, o seu pobo, cun sobresaínte coñecemento do territorio e con capacidade e ilusión dabondo para tecer novos proxectos transformadores”.

Manuel Baltar resume a candidatura de Nacho Campo como “unha excelente nova para o PPdeOU e unha excelente nova para os veciños de Maside”.

Pola súa banda, Nacho Campo destaca que “o Partido Popular de Ourense demostra unha vez máis, con feitos, a súa aposta pola xuventude”. O candidato popular tamén avanza que “asumo esta responsabilidade dende a humildade, pero creo que coñecendo as necesidades demandadas polos veciños e veciñas do noso concello. Maside necesita un cambio e eu intentarei ser a persoa que o impulse xunto ao meu equipo”.

O PSdeG-PSOE de Punxín esixe unha solución “urxente” ante a falta de facultativas no centro de saúde do municipio que se está a producir nos últimos meses. As e os socialistas acusan ao goberno municipal do Partido Popular de optar pola “desidia” e de amosar “total desinterese” ante unha situación que cualifican de “moi grave”, xa que esta causando prexuízos á veciñanza.

Dende o Grupo Municipal Socialista subliñan que a situación que se está vivindo no centro de saúde do municipio “é unha auténtica tomadura de pelo”, xa que tal e como apuntan “aínda que os veciños e veciñas acudan con cita previa, non saben si serán atendidos, xa que en ocasións non hai persoal para poder dar cobertura sanitaria”.

A voceira do PSdeG-PSOE de Punxín, Lorena Peleteiro Vázquez, explica que “aínda que segundo o Sergas, o centro de saúde de Punxín conta con dúas médicas, a realidade é moi distinta” e sinala que “os e as pacientes, que chegan con cita previa ao centro de saúde, atópanse con que non hai persoal no centro”, algo que tal e como apunta “pasou no día de onte, sen ir máis lonxe”.

As concelleiras socialistas lembran que en xullo do 2022, os 3 concelleiros do Partido Popular, co alcalde á cabeza, e o concelleiro non adscrito votaron en contra dunha moción socialista na que pedían que se cubrise a praza de médica vacante nas condicións que estaba anteriormente. “O goberno municipal opta por apoiar e aplaudir os recortes sanitarios levados a cabo no centro de saúde de Punxín e amosan a súa falta total de interese por manter un servizo tan esencial para a veciñanza como é o sanitario”.

Ante esta situación, a voceira socialista, Lorena Peleteiro, amosa a súa “fonda preocupación ante os recortes, o desmantelamento e a precarización da sanidade en Punxín” e manifesta que “non descartamos tomar algunha medida de mobilización coa veciñanza para loitar por un servizo que consideramos indispensable para o noso municipio”.

Para o PSdeG-PSOE este é un “novo episodio” do capítulo de “desleixo” e “abandono” co que o Partido Popular de Galicia e Alfonso Rueda tratan á provincia de Ourense, co “beneplácito e complicidade” do goberno municipal de Punxín. Os e as socialistas esixen “solucións inmediatas” a esta problemática, xa que segundo apuntan “están rematando coa sanidade do rural e obrigando á veciñanza a marchar a outros municipios para poder ter uns servizos dignos”. Neste senso, tamén destacan que “de pouco vale traer un autobús polos municipios prestando servizos sanitarios se a veciñanza non dispón dunha atención sanitaria digna no seu día a día”.

A Consellería de Infraestruturas e Mobilidade vén de comezar as obras para a execución dunha parada de autobús intermodal na estación de ferrocarril do Carballiño, cun investimento de preto de 170.000 euros.

O obxectivo é executar unha parada exclusiva para as liñas interurbanas de autobús de uso regular na parcela situada na explanada frontal da estación de ferrocarril, localizada na avenida O Vinte e Cinco de Xullo, co fin de favorecer a intemodalidade entre os dous medios de transporte.

As obras, cun prazo de execución de 5 meses, consisten na instalación dunha parada de autobuses, configurada como illa, entre a citada avenida, a dársena de aparcamento da estación ferroviaria e os accesos á mesma.

Na intervención inclúese a incorporación dunha zona axardinada, mobiliario urbano e unha marquesiña a ambos os lados, xerando así dúas zonas de parada: a primeira en dirección de acceso á vila sobre a propia avenida; e a segunda, na marxe oposta do núcleo da parada para os autobuses que saen do municipio.

Ademais, o refuxio protexerá os usuarios do transporte público das inclemencias meteorolóxicas.

Esta actuación reforzará a comunicación entre a estación ferroviaria e o transporte interurbano por autobús no concello do Carballiño.

A intervención enmárcase nun convenio de colaboración polo que a Xunta achegará o financiamento e executará as obras, mentres o Concello do Carballiño pon á disposición os terreos necesarios e asume o mantemento da infraestrutura ao seu remate.

A actuación é financiada no marco do Eixe REACT-UE do programa operativo FEDER Galicia 2014-2020 como parte da resposta da Unión Europea á pandemia de covid-19.

A Xunta concedeulle 42.000 euros ao Concello de Boborás para mellorar o seu Punto de Atención á Infancia e ampliar o seu parque infantil. A conselleira de Política Social e Xuventude, Fabiola García, acompañada do delegado territorial da Xunta en Ourense, Gabriel Alén, visitou hoxe as instalacións nas que se realizaron as obras de mellora.

A conselleira resaltou que esta actuación permitiu renovar as ventás e os accesos ao centro e tamén facer máis amplo o parque infantil anexo ás instalacións, que comparte co colexio de Boborás. O Punto de Atención á Infancia ten capacidade para 20 nenos e supón un importante recurso de conciliación para as familias desta localidade, que poden ir a traballar coa tranquilidade de que os seus pequenos de 0 a 3 anos estarán ben atendidos. Ademais, desde este curso os pais non tiveron que pagar nada pola atención educativa neste centro

O vicepresidente segundo e conselleiro de Presidencia, Xustiza e Deportes, Diego Calvo, participou hoxe na entrega de vehículos todoterreo a varios concellos galegos, entre eles o de Maside, que conta desta maneira cunha nova dotación para a Agrupación Local de Voluntarios de Protección Civil de Maside. A Xunta destinou 26.725 euros para a adquisición deste vehículo.

O alcalde de Maside, José Manuel Iglesias, foi o encargado de recepcionar este vehículo todoterreo nun acto levado a cabo no exterior da Dirección Xeral de Emerxencias, en Santiago de Compostela, e no que interviron o vicepresidente segundo da Xunta, asi como o director xeral de Emerxencias e Interior, Santiago Villanueva e o delegado territorial na provincia de Ourense, Gabriel Alén.

Este todoterreo cedido ao concello de Maside conta con caixa de primeiros auxilios equipada con soporte para vehículo, extintor de po, dúas lanternas led con cargador de vehículo, cono con autonomía mínima de catro horas, pinzas de acendido de emerxencia e ponte de luces con altofalante. Dispón ademais de preinstalación para equipos de telecomunicacións e de gancho para remolque.

O vicepresidente segundo, Diego Calvo, incidiu na importancia de que os servizos de emerxencia municipais conten co mellor equipamento para o desenvolvemento do seu labor a prol da prevención e da seguridade da cidadanía. Referiuse tamén á necesidade de facilitarlles a preparación precisa para desenvolvelo, para o que contan tamén co apoio da Xunta a través da Academia Galega de Seguridade Pública (AGASP), centro de referencia para a formación neste eido.

O conselleiro de Sanidade, Julio García Comesaña garantiu ao alcalde de Piñor, José Luis González, a continuidade da asistencia médica no centro de saúde desta localidade ourensá, nunha reunión mantida na xerencia do Complexo Hospitalario Universitario de Ourense, na que estiveron acompañados do delegado Territorial da Xunta en Ourense, Gabriel Alén, e do xerente da Área Sanitaria de Ourense, Felix Rubial.

O conselleiro confirmou ao alcalde que a próxima xubilación da médico titular do centro de saúde do seu concello non afectará á asistencia sanitaria que recibe a veciñanza e que o centro de saúde manterá a asistencia sanitaria nas mesmas condicións, dispoñendo dunha médico de familia de luns a venres como ata o de agora.

O conselleiro do Medio Rural, José González, visitou a aldea modelo de Penedo, no concello de Boborás, na que resalta xa a posta en produción de gando, concretamente de porco silleiro en extensivo. Esta aldea modelo conta cunha superficie de 23,41 hectáreas distribuídas en 665 parcelas de 131 propietarios.

O conselleiro, que estivo acompañado pola alcaldesa de Boborás, Patricia Torres, destacou a recuperación da raza do porco silleiro en extensivo, así como a produción prevista da alimentación necesaria nas terras de cultivo, mediante cereais e plantas autóctonas, poñendo en práctica a economía circular. Ademais, os terreos serán de produción ecolóxica.

Para levar a cabo o aproveitamento gandeiro e a recuperación das terras da aldea, dende a Axencia Galega de Desenvolvemento Rural executáronse as obras e instalacións precisas. Así, realizáronse os peches (tres tipos distintos perimetrais e interiores que permiten a xestión do gando nas parcelas), infraestruturas gandeiras (refuxio, cría e lazareto), instalacións de enerxía (pastor eléctrico) e sinalización precisa.

O orzamento total investido nestas obras e instalacións aproximouse aos 82.700 euros, sendo a partida máis importante a destinada aos peches e cerramentos, con arredor de seis quilómetros lineais. Así, realizáronse as instalacións de refuxio e cría executadas en madeira para a integración na contorna da aldea.

Un incendio calcinou por completo unha vivenda unifamiliar situada no quilómetro 16 da N-541, na localidade de Punxín.

As lapas comezaron pouco despois da medianoite deste pasado domingo. Os propietarios da casa, un matrimonio de septuaxenarios foron os que avisaron a Emerxencias do que pasaba e saíron ilesos polo seu propio pé.

A central de alarmas mobilizou os bombeiros do parque comarcal do Carballiño e a Garda Civil. Tamén se enviou unha ambulancia pero non foi precisa a súa intervención. Os servizos de extinción confirmaron que puideron controlar o incendio contra as 01:45 horas, aínda que traballaron para arrefriar os restos ata pasadas as 03:30 horas.

A vivenda quedou arrasada por completo e a estrutura do tellado tamén quedou afectada. Os donos da casa explicaron que o lume comezou no teito por riba da cociña na que había unha cheminea. As lapas estendéronse con rapidez. Sospeitan que o lume se iniciara no tiro dunha estufa empotrada na cheminea, porque escoitaron un estoupido, pero as causas do incendio aínda están en fase de investigación.