A Deputación e cinco balnearios ourensáns lanzan a campaña “1.000 sesións balnearias a 1 euro”. “Con esta iniciativa innovadora e sen precedentes queremos promocionar a saúde a través da cultura termal”, explicou esta mañá Manuel Baltar no lanzamento da iniciativa en As Burgas, nun encontro mantido cos responsables dos establecementos participantes, todos os da provincia con piscinas de auga mineromedicinal de usos lúdico-terapéuticos: Laias, Cortegada, Lobios, Partovia e Arnoia.

“A promoción posibilitará o goce dos balnearios a prezos moi alcanzables coa intención de que moitos das persoas residentes na nosa provincia que aínda non coñecen os nosos balnearios poidan facelo”, resalta o presidente da Deputación, que encaixa esta presentación no Día da Cooperación Europea (EC Day), “unha forma de resaltar a riqueza termal da provincia e a localización da maioría dos nosos balnearios en territorios considerandos pola UE como transfronteirizos, así como para visibilizar a contribución dos programas de cooperación europea ao termalismo provincial”.

Entre Laias, Cortegada, Lobios, Partovia e Arnoia achegarán unha cifra inicial de 1.000 sesións balnearias que se distribuirán entre os meses de outubro e novembro, de luns a domingo, en diferentes franxas horarias e cunha duración entre 1,5 e 2 horas, en función do balneario.

A reserva das sesións balnearias poderá realizarse a partir do 29 de setembro a prezo especial único de 15 euros, importe sobre o que haberá códigos de desconto de 14 euros, quedando o prezo final en 1 euro. O acceso ás 1.000 prazas será por orde de solicitude e reserva, podendo tramitarse a través de internet.

Os códigos de desconto poñeranse ao dispor dos interesados de diferentes maneiras, a través de eventos ou redes sociais. Os códigos de desconto poderán utilizarse ata completar as prazas ofertadas na promoción, serán individuais e cada persoa poderá utilizar un código.

Toda a información sobre a promoción estará dispoñible en: raiatermalou.com/promocion

Ábrese o rexistro para a promoción, a entrega dos primeiros códigos desconto a próxima semana en Termatalia.

Para acceder á promoción “Sesións en Balnearios a 1 euro” será necesario unha inscrición previa a través de internet, que se poderá facer a partir de hoxe na dirección: www.raiatermalou.com/promocion

Os 250 primeiros códigos de desconto entregaranse o 29 de setembro en Termatalia. As persoas que visiten a caseta da Deputación de Ourense na Feira Internacional de Termalismo en Expourense e teñan interese na campaña de promoción recibirán o seu código de desconto ata esgotarse os códigos dispoñibles.

A Deputación de Ourense a través da área de Benestar habilita o teléfono 999317760 para responder a calquera consulta ou dúbida sobre a promoción termal.

Espazo Común comeza a súa exposición de motivos desta moción que trasladará ao pleno da corporación municipal suliñando como "O Carballiño é, históricamente, unha vila cunha gran tradición deportiva".

E continúa remarcando que "folga falar da importancia da educación e os valores que aporta a práctica de calquer deporte, sobre todo nos anos de formación dos nosos nenos e nenas e, polo tanto, do importante que resulta dar tódalas facilidades posibles para o seu desenvolvemento.
Sen embargo, coma en outros moitos ámbitos, O Carballiño leva anos quedando atrás con respectoa a outras vilas semellantes de Galicia pola falla de iniciativa e renovación das diferentes instalacións para a súa práctica".

Repróchanlle ao goberno do alcalde Fumega que "non semella que chegara ao goberno local a nova de que hai xa moitos anos que numerosos deportes aparte do fútbol contan con grande número de seguidores e de novos adeptos. Podemos destacar o inmenso número de veciños que exercen como atletas, patinadores ou ciclistas, só por nomear uns poucos".

Poñen desde Espazo Común coma exemplo do afirmado "o feito de que incluso un deporte con tanta tradición coma o baloncesto despareceu do Carballiño por falla de espazos para os seus equipos e agora a xente que desexa xogar ten que desprazarse a Maside".

Asimesmo, engaden que "temos que dende o ano 2009 no que se instalou o céspede artificial no campo de fútbol da Uceira cunha subvención da Xunta de Galicia na que estaba Pachi Vázquez, apenas se fixeron inversións de ningún tipo. Tampouco se adaptaron ás necesidades dos usuarios as poucas instalacións existentes. Por exemplo, contamos cun Pavillón que, a pesares de quedarse moi escaso para as necesidades existentes, pecha as fins de semana e gran parte do verán. A Piscina Municipal é un cúmulo de despropósitos que acumula gastos que superan con creces o millón de euros nos últimos anos e só provoca o disgusto e as queixas dos que a frecuentan. O antedito campo de fútbol da Uceira precisa con moita urxencia unha renovación pois son moitos os equipos (sobre todo da base) que fan uso del, sendo calamitoso o seu estado actual. Os usuarios habituais da pista de pádel queixanse das dificultades con que se atopan para facer uso da mesma. É unha anomalía que unha vila coma a nosa non conte cunha Piscina Climatizada Municipal. A adaptación das instalacións de Pena Cobertoira para a práctica do atletismo e do ciclismo ou a construción dun novo Pavillón deben ser proxectos esenciais no plan de futuro desta vila".

Espazo Común tamen considera que a posta en marcha de pequenas pistas deportivas nos distintios barrios do Carballiño é unha necesidade básica para fomentar o uso do deporte.

Tras esta exposición de motivos, a moción demanda da corporación un acordo para "a elaboración dun Plan Municipal de Renovación e Creación de Instalacións Deportivas que cubra tódalas necesidades actuais e futuras da poboación do Carballiño neste eido".

O PSdeG-PSOE de Punxín estuda a posibilidade de emprender accións xudiciais e pór en coñecemento da xustiza a actuación do alcalde do municipio, Manuel Vázquez Fernández, en materia urbanística. As e os socialistas denuncian que o “silencio” e a “inacción” do rexedor poderían estar incorrendo no incumprimento dos deberes esixidos pola normativa urbanística e o procedemento administrativo co único obxectivo de beneficiar a persoas afíns ao Partido Popular.

As concelleiras do Grupo Municipal Socialista de Punxín subliñan que esta decisión chega tras os “numerosos incumprimentos” do alcalde en materia urbanística e apuntan a que se “poden estar vulnerando os deberes esixidos pola normativa urbanística para beneficiar a persoas afíns as súas cores políticas”. Neste senso, as edís socialistas tamén explican que “parece que en Punxín hai veciños de primeira e de segunda e parecen que os de primeira teñen máis dereitos que o resto da veciñanza do municipio, só por pertencer a unhas cores políticas”.

A voceira do PSdeG-PSOE de Punxín, Lorena Peleteiro Vázquez, afirma que “fai pouco tempo, observamos como o propio alcalde incumpría a normativa urbanística cunha reforma nunha das súas propiedades, sen asumir responsabilidade algunha por elo”. A edil socialista tamén destaca que “agora tivemos constancia que afíns ao Partido Popular están seguindo o mesmo modus operandi do alcalde, aproveitando o seu silencio cómplice e o incumprimento dos seus deberes en materia urbanística, namentres este mira para outro lado para evitar tomar medidas ao respecto”.

Peleteiro Vázquez pon o foco en que esta forma de actuar “é impropia dun goberno democrático e vén a demostrar que coas eleccións municipais no horizonte, o alcalde trata de beneficiar os seus acólitos co único obxectivo de tratar de manterse na cadeira de mando e rascar uns votiños para apuntalar o seu poder”.

Dende o PSdeG-PSOE de Punxín explican que ante esta situación, os e as socialistas “non podemos seguir mirando cara outro lado, cando dende o equipo de goberno municipal se trata de forma diferente aos veciños e veciñas votantes e militantes do Partido Popular, que ao resto da veciñanza”. Tamén manifestan que “é inconcibible que o alcalde se salte a normativa e as obrigas do seu cargo para favorecer a certos veciños e veciñas en detrimento do resto”.

O Carballiño volve a converterse na referencia da fotografía non so en Galicia "senón a nivel estatatal", manifestou ao concelleiro de cultura Diego Fernández, no que foi o acto de presentación deste evento xunto ao presidente de O Potiños, Manolo Blanco.

O Arenteiro Fotográfico, durante os meses de outubro e novembro, ofertará once exposicións colectivas e individuais, complementadas con charlas, cursos e coloquios. As exposicións quedarán instaladas dende principios de outubro, e a inauguración será o dia 9 de outrubro ao mediodia na casa da cultura do Carballiño, na xornada anterior -o dia 8-  Vari Caramés impartirá unha master class, tamén na casa da cultura. Este mesmo fotográfo será homenaxeado e distinguido co premio desta edición "pola súa destacada traxectoria no mundo da fotografía".

Como gran novidade este ano, a maioría das exposicións poderán verse nun céntrico local, no baixo do número 6 da rúa Rosalía de Castro. O presidente de Potiños agradeceu "á familia Varela esta colaboración, ao ceder amablemente  este local para a celebración do Arenteiro Fotográfico".  Tamén tivo palabras de recoñecemento "para todos os fotógra@s que participan connosco no Arenteiro Fotográfico 2022 e que coa súa colaboración contribúen a darlle ese salto tan importante de calidade o noso evento",

O Carballiño acollerá en outubro e novembro a XV edición da Mostra de Teatro Amador Terras de Orcellón, organizada polo grupo de teatro Tiruleque co patrocinio da Deputación de Ourense e o Concello do Carballiño. “Esta é unha mostra de referencia do teatro amador e que resalta os fortes vínculos existentes entre Carballiño e o teatro”, destacou o vicepresidente segundo da Deputación, César Fernández, nunha presentación na que estivo acompañado polo alcalde do Carballiño, Francisco Fumega, a directiva de Tiruleque Lidya Giselle Almonte e a actriz Mari Fernández.

Na súa intervención, César Fernández enmarcou o apoio da Deputación a esta cita dentro do papel que “deben asumir as administracións públicas de impulso á cultura” e aplaudiu o traballo de Tiruleque levando a cabo unha mostra que ten “unha vertente social, pois co seu carácter amador permite implicar a persoas alleas ao teatro profesional”.

O alcalde do Carballiño, Francisco Fumega, agradeceu o apoio da Deputación e recoñeceu a labor de Tiruleque “coa súa función social e, dende logo, desenrolando esta ambiciosa programación teatral para os meses de novembro e outubro na nosa vila”.

Dende a organización, Lidya Giselle Almonte destacou a “gran cantidade de compañías de teatro amador que amosaron o seu interese por participar nunha mostra coa que aportamos o noso gran de area á programación cultural do Carballiño”. Almonte agradeceu o apoio da Deputación e o Concello á Mostra de Teatro Amador Terras do Orcellón e reivindicou a importancia de “investir na cultura”.

Programación

A XV Mostra de Teatro Amador Terras de Orcellón programará sete obras de compañías galegas entre outubro e novembro: todas celebraranse no Auditorio Manuel María do Carballiño a partir das 20,00 horas. A primeira cita será “Olimpo’s”, de Farandoleiras Cabaré -1 de outubro-. A partir de aí, “O enredo”, de A Tequerreté -12 de outubro-; “Un desastre de función” de Gargallada Teatro -15 de outubro-; “Siempre nos quedará Venecia” de La Caja de Pandora -22 de outubro-; “O documento” do Grupo de Teatro Ollomao -29 de outubro-; “Nadal na casa dos Lamelo”, de Achádego Teatro -30 de outubro-; e “Microtirulos”, de Tiruleque Teatro, composta por “Raios, tronos”, “Milhomes”, “Morreu a tía María” e “Reencarnación”, programada para o 5 e 6 de novembro.

O conselleiro de Sanidade, Julio García Comesaña, e o alcalde de San Amaro, Fernando Rodríguez Redondo, acompañados polo Delegado Territorial de Ourense, Gabriel Alén, veñen de asinar un convenio no que se establecen as bases para o financiamento de varias melloras no centro de saúde da localidade, entre as que destacar a reparación da cuberta, do falso teito e a remodelación dos aseos.

Abordarase a reparación da cuberta, que nestes momentos é de tella cerámica sobre placas de cemento ou correas deste mesmo material e na que unha alta porcentaxe das tellas presentan un estado de deterioro que aconsella a substitución global da mesma, non sendo posible a súa reparación parcial con substitucións puntuais. Tamén levarase a cabo o arranxo do falso teito do espazo central ademais da rehabilitación e a modificación dos actuais aseos para poder ofrecer un servizo adecuado ás necesidades dos pacientes facéndoos mais accesible e confortables.

O conselleiro de Sanidade agradeceu a boa disposición do alcalde para poder asinar este convenio, con tempo suficiente para que se poida licitar a obra e executarse en prazo. Deste modo, o persoal e os pacientes do centro de saúde de San Amaro contarán cun centro de saúde mellor e máis confortable.