O Real Automóvil Club de España -que analiza nun estudio máis de 25.000 kilómetros da rede viaria estatal- e que ten como finalidade identificar os tramos con maior risco de accidente grave ou mortal, considera que este tramo da estrada N-541 ao seu paso pola nosa comarca entre os puntos kilométricos 23,5 ao 33,6 entre Dacón e A  Almuzara, é o segundo tramo máis perigoso de toda España.

Aínda así, os investimentos para mellorar a seguridade por parte do Estado son practicamente nulas nos últimos anos, e a pesar de rexistrar o segundo número máis alto de accidentes de tráfico, tendo zonas moi perigososas, como a curva do Cornubal, que mesmo podería entrar no libro guines dos record, con ata 4 accidentes de tráfico en menos de 24 horas, como fai unhos dias refirmaba nunha entrevista en COPE O Carballiño o xefe da Policia Local do Carballiño, Francisco Valeiras.  Nesta mesma zona, o cruce de interseción coa estrada autonómica O Carballiño-Lalín carece de iluminación nocturna e non existe paso de peóns.

Asemade, tamén nesta mesma zona,  o paso peonil do viaduto sobre o río Arenteiro non permite que poidan cruzarse dúas persoas, e tampo é apto para persoas con mobilidade reducida, xa que non permite o paso de cadeiras de rodas, tendo que facélo a través da calzada, con gran perigo que esto conleva, e nunha zona na temos hoxe dúas residencias de maiores, e tamén nas súas inmediacións o pavillón de deportes Paco Chao e as piscinas municipais. Ningún destes equipamentos existían, igual que as numerosas vivendas hoxe habitadas na contorna, cando fai 50 anos contruíuse esta estrada, que daquéla non tiña o carácter urbano que ten hoxe.

Outro punto conflictivo para o tráfico  é o da Fontela, a altura aínda do concello de Maside, asi como o percorrido urbano pola vila do Carballiño, entre outros. O informe do RACE tamén recolle outros aspectos de risco potencial como o paso diario de transporte pesado neste tramo, fundamentalmente de torres eólicas. 

O certo é que malia que a pesar das numerosas deficiencias que en materia de seguridade ten este tramo, o Ministerio de Tranportes, Mobilidade e Axenda Urbana, como antes o Ministerio de Fomento, apenas realizaron investimentos na mellora da seguridade.  A finais do século pasado o Goberno e o concello do Carballiño anunciaran o proxecto de construcción da variante desta N-541 ao seu paso polo Carballiño, un proxecto que permanece no máis completo esquecemento.

O inicio hoxe das obras de substitución das xuntas de dilatación do viaduto do Barbantiño, na autovía Dozón-Ourense (AG-53), obrigarán a efectuar cortes de carril a partir de hoxe.

A actuación implicará cortes de 24 horas para impedir a circulación sobre as xuntas durante o tempo necesario para que os morteiros fragüen e consigan a resistencia necesaria. Deste xeito, cada carril quedará cortado aproximadamente desde as 8:00 horas dun día ata as 19:00 horas do seguinte, manténdose a circulación no outro coa debida sinalización.

A intervención consistirá na renovación de todas as xuntas, cambiando a tipoloxía naquelas nas que sexa posible, de modo que pasen de ser dobres a xunta única, causando menos incidencias no tránsito de vehículos. Isto é viable porque pasaron xa varios anos desde a posta en servizo do viaduto e os movementos da estrutura de formigón son xa moi pequenos con respecto aos primeiros momentos desde a súa construción.

O obxectivo dos traballos é lograr unha maior comodidade na condución e mellorar a sensación de seguridade dos usuarios.

Esta actuación forma parte do programa pioneiro de inspección de estruturas e obras de paso polo que a Consellería de Infraestruturas e Mobilidade realiza inspeccións periódicas nas pontes, viadutos e outras obras de paso para coñecer as necesidades de intervención, garantir a seguridade viaria e actuar de modo preventivo fronte a posibles problemas futuros.

Neste caso, as inspeccións realizadas sobre o viaduto do Barbantiño ofreceron como resultado que a maioría das xuntas non tiñan ningún problema relevante e que as irregularidades non eran especialmente acusadas, pero estase a proceder á súa renovación como medida de conservación preventiva.

O departamento que dirixe Ethel Vázquez continúa traballando na conservación e no mantemento da rede viaria autonómica coa fin de proporcionarlles unhas estradas máis seguras e cómodas aos usuarios.

O grupo de teatro do IES Chamoso Lamas do Carballiño participou na última edición do festival Olloboi de cine escolar cunha curtametraxe sobre a historia da Pepa Loba. A 11ª edición do festival que se celebra todos os fins de curso en Boiro seleccionou a peza rodada polos alumnos do centro, que quedou finalista na súa categoría.

O festival, no que participan centros de toda Galicia (este curso houbo case 50 centros e máis de 140 obras a concurso) consolidouse xa como a grande cita do audiovisual feito nos centros de ensino de galegos, onde rapaces de diferentes idades xúntanse con profesionais do mundo do cine (produtores, directores, guionistas, técnicos...) e traballan con eles ao longo do día para realizar in situ unha pequena peza audiovisual, que despois se proxecta na Casa da Cultura de Boiro. A xornada remata cunha gala de entrega de premios nas diferentes categorías do festival.

A xuventude de Pepa loba foi a peza presentada a concurso polo IES Chamoso Lamas, obra feita polo grupo de teatro do centro e unha equipa de audiovisuais integrada por un pequeno grupo de rapaces de 1º de ESO. A curtametraxe, que está interpretada polos propios alumnos, estrearase no festival de fin de curso do Chamoso Lamas o día 22 de xuño.

"O Carballiño Centro Comercial Aberto" celebra o venres 17 e sábado 18 os "Dias Tolos" con grandes descontos en 35 establecementos comercias do Carballiño, unha iniciativa na que tamén colaboran 12 establecementos da hostalaría local, que ofrecerán tapas para os clientes que compren nos comercios participantes, que tamén repartirán invitacións para as actividades infantís. Un espectáculo de zancudos e música de charangas animarán as rúas carballñesas.

Máis musica con motivo da 3ª Foli Richada de Maside, este sábado 18 de xuño coas actuacións dende as 6 da tarde do grupo de acordeóns, baile e gaitas Amálgama, a Coral A Torre, Os Cotovías, Tokaide e a actuación estelar -ás 10 da noite- da agrupación "Faíscas da Pontraga". Por 10 euros poderá degustarse a exquisita carne richada de Maside, dende as 9 da noitiña en adiante,

O Rally de Ourense córrese tamén polas estradas da comarca, este venres 17 no tramo O Irixo-Boborás, con dúas pasadas ás 18:05 e 21;20 horas.

O pavillón de deportes Paco Chao acolle este sábado 18 dende as 17:30 horas o Campionato Galego de Patinaxe Artística SWOW, un evento que reunirá a 333 patinadoras e patinadores e achegará ata O Carballiño a unhas 1400 persoas, según as previsións dos organizadores, o Club de Patinaxe AEHDE do Carballiño.

No Novocine de Leiro, cine de estrea coa película de animación "Lightyear", en sesións de 16:00, 18:15 e 20:30 horas.

Continúa o "Circuíto de Teatro Amador" que organiza Tiruleque Teatro, e que presenta este domingo 19 ás 6 da tarde no auditorio a Paso de Valverde co espectáculo de teatro infantil "Ultrasónica", con entrada de balde.

O delegado do Goberno en Galicia, José Miñones, reivindicou esta mañá no Carballiño o liderado das empresas galegas no “impulso decisivo” do Goberno ás enerxías renovables con 16.000 millóns de euros mobilizados a través do Plan de Recuperación. José Miñones fixo estas declaracións no Carballiño, durante a súa visita á fábrica de torres eólicas GRI Towers Galicia.

“Co PERTE de Renovables, o Goberno está a alentar de forma decisiva unha transición enerxética deseñada e fabricada en España, unha transición que implica a fábricas e a persoais galegos como esta de GRI Towers”, valorou o delegado. Nesta visita á planta do grupo GRI Renewable Industries participou tamén o subdelegado do Goberno en Ourense, Emilio González, e o alcalde do Carballiño Francisco Fumega.

José Miñones sitúo GRI Towers Galicia como “exemplo do vigor do sector industrial de Ourense, do emprego de calidade, da colaboración público-privada e do impulso ás enerxías renovables” e celebrou que a comunidade galega teña “a capacidade de ter unha industria de renovables a nivel internacional”. Con todo, asegurou que é necesario “ser máis ambiciosos e apostar desde todas as administracións”. Nese sentido, censurou a contradición da Xunta respecto ao despregamento eólico: “Non se pode estar pola mañá falando da necesidade de actuar contra o cambio climático e pola tarde votando en contra de axilizar os trámites para a instalación de parques eólicos”, lamentou, e animou a impulsar o mapa eólico da comunidade.

O delegado tamén puxo en valor a contribución de GRI Towers ao sistema educativo público, como lugar de aprendizaxe de mozas que cursan FP Dual no Carballiño. “Esta é unha mostra do ensino de calidade, integrada e moderna que está a impulsar este Goberno”, afirmou o delegado, que remarcou a importancia da nova Lei de FP e dos 114 millóns de euros que o Goberno transferiu a Galicia no último ano para mellorar a formación profesional.

“Estamos convencidos de que non hai un proxecto máis transformador do tecido produtivo e da economía do noso país que a Formación Profesional, porque son estes profesionais os que construirán o futuro de Galicia”, defendeu o delegado. Nese sentido, engadiu que “o Goberno está a poñer as bases de futuro co Plan de Recuperación, para ser máis sostibles e máis verdes”. Ademais, celebrou poder comprobar “que Galicia conta con capacidades tecnolóxicas e industriais para avanzar neste camiño da man coas empresas implantadas na comunidade”. O impulso ás enerxías renovables terá un impacto especialmente positivo nos territorios afectados polo reto demográfico, como é o caso de Galicia e da provincia de Ourense.

O presidente da Deputación, Manuel Baltar, mantivo unha reunión de traballo no Pazo Provincial co alcalde de San Cristovo de Cea, José Luis Valladares, para analizar as liñas de colaboración abertas entre ambas administracións e perfilar novas iniciativas de cooperación nos próximos meses.

O presidente do goberno provincial comprometeu a axuda da Deputación para mellorar a depuradora municipal de San Cristovo de Cea. “Unha actuación imprescindible porque temos varios elementos da EDAR con certo deterioro, que é necesario arranxar”, sinalou o rexedor.

Manuel Baltar e José Luis Valladares tamén avanzaron o compromiso do goberno provincial para o acondicionamento e humanización de varias rúas do lugar de Fondo de Cea, ademais de avanzar a colaboración en diversas iniciativas culturais que organizará o Concello nos próximos meses. “Coma sempre, é perfecta a dispoñibilidade da Deputación e, persoalmente, o compromiso do seu presidente, Manuel Baltar. Coa colaboración do goberno provincial poderemos levar a cabo estas actuacións, que mellorarán a calidade de vida dos nosos veciños”, resaltou José Luis Valladares ao término da reunión no Pazo Provincial.

A Xunta e o Concello do Carballiño asinaron o convenio para a execución dunha parada de autobús para intercambio intermodal nas instalacións da estación de ferrocarril do municipio, que suporá un investimento autonómico de preto de 190.000 euros.

A conselleira de Infraestruturas e Mobilidade, Ethel Vázquez, selou este acordo de cooperación co alcalde do Carballiño, José Fumega, vía telemática.

Trátase de impulsar as obras para a instalación dunha parada de autobús exclusiva para as liñas interurbanas de uso regular, na parcela situada na explanada frontal da estación de ferrocarril, localizada na avenida O Vinte e Cinco de Xullo, co obxecto de favorecer a intemodalidade entre os dous medios de transporte.

Mediante este convenio, a Xunta asume integramente a financiación, a redacción do proxecto, así como a licitación e execución das obras. Pola súa banda, o Concello do Carballiño comprométese á posta a disposición da Xunta os terreos necesarios para a súa execución e a asumir, ao remate dos traballos, o mantemento e conservación da infraestrutura.

Deste xeito, o departamento que dirixe Ethel Vázquez dá resposta á solicitude do Concello para o acondicionamento dunha parada de autobús intermodal na parcela da estación ferroviaria do Carballiño, logo de asinar a entidade local o arrendamento da mesma co Administrador de Infraestruturas Ferroviarias (ADIF).

O proxecto redactado pola Xunta para a execución dunha parada de autobús para intercambio intermodal nas instalacións da estación de ferrocarril do Carballiño comprende as actuacións necesarias para a posta en marcha da parada: a urbanización da zona, a reposición dos servizos afectados e o subministro e instalación do refuxio.

Máis en detalle, estas obras permitirán dotar o municipio desta parada de autobús na contorna da actual estación de ferrocarril co fin de acadar unhas condicións óptimas de seguridade para a subida e baixada de viaxeiros. Tamén incluirá a habilitación do refuxio necesario para protexer aos usuarios do transporte público da Xunta das inclemencias meteorolóxicas.

Esta actuación é susceptible de obter financiamento no marco do Eixe REACT-UE do programa operativo FEDER Galicia 2014-2020 como parte da resposta da Unión Europea á pandemia de covid-19.

O presidente da Deputación de Ourense, Manuel Baltar, recibiu no Pazo Provincial ao presidente do Club Deportivo Arenteiro, Argimiro Marnotes, ao que confirmou a renovación do patrocinio do equipo carballiñés a través do programa Ourense, provincia termal, “pois ninguén mellor que este club para promocionar o termalismo da provincia e, de modo singular, da vila termal por excelencia”, afirmou Baltar. Un apoio que se estende á renovación integral do céspede que xa se está a executar no estadio de Espiñedo.

O presidente do goberno provincial felicitou a Argimiro Marnotes “pola fenomenal tempada dun club cuxo futuro se escribe con maiúsculas”, recoñecemento que trasladou tamén a unha afección “que mostrou durante todos estes meses unha gran ilusión, converténdose nos seguidores do club máis representativo da provincia”.

O presidente do CD Arenteiro expresou en nome do club o agradecemento ao presidente provincial e á Deputacion pola renovación do patrocinio, destacando o impacto que tivo no partido da Copa do Rei ante o Valencia en decembro pasado: “O lema Ourense, provincia termal foi visto por máis de 700.000 espectadores e por máis de 2 millóns de internautas que accederon ata o momento ás imaxes do partido a través da redes”.

Tamén se referiu Marnotes á renovación integral do céspede de Espiñedo, “que permitirá contar ao equipo cunhas renovadas instalacións deportivas nun dos aspectos clave para un equipo de fútbol como é o propio campo, que agora será o axeitado para un club da Segunda Federación”.

Considera Espazo Común que trátase "dun dos mellores exemplos da errática xestión do autonomeado rei do asfalto, que segue sen concretar cal vai ser o fin exacto das instalacións", e mesmo reprochan ao alcalde do Carballiño que "chapuzas como o edificio de recepción que afea notoriamente o proxecto de Gallego Jorreto definen como se xestiona o diñeiro público", o da antiga fábrica de papel da Lavandeira, onde o concello carballiñés proxeca a creación do museo de papel.

A formación política liderada por Pachi Vázquez considera que "é un exemplo moi esclarecedor do tempo e cartos perdidos para O Carballiño, dende o ano 2015 van alá 1 millón de euros sen que a dia de hoxe haxa data para a súa apertura nin tan xiquera unha idea clara de a que se van dedicar as instalacións", polo que demandarán que se dea conta da inversión realizada e tamén, que se fixe unha data para a súa apertura.

Espazo Común manifesta que "despois dos cartos investidos e o tempo sen abrirse, podemos falar do Gaiás do Carballiño, ironizan.

Desta maneira, repítese esta dedicatoria ao Camiño Xacobeo, que xa fixera o concello carballliñés no ano 1993, tal como se aprecia no cartaz daquel ano, obra do cartelista histórico da "Festa do Pulpo", Felipe Luis López.

Agora, 29 anos despóis o concello do Carballiño decide que a festa deste ano 2022, que se celebrará como é tradicional o segundo domingo de agosto,  sexa dedicaca ao Xacobeo. Os responsables municipais ultiman estes dias a programación de actividades, que recuperá practicamente o seu formato tradicional prepandemia, 

Pola comarca do Carballiño percorre o Camiño Mozárabe, tamén coñecido como a Vía da Prata, a través dos concellos de San Cristovo de Cea e Piñor. Ademáis, o concello do Carballiño forma parte da Asociación do Camiño Miñoto-Ribeiro, que ten como finalidade o recoñecemento oficial desta ruta xacobea que partindo do norte de Portugal percorre polas comarcas do Ribeiro e O Carballiño, mesmo cun tramo dentro do termo municipal do Carballiño.