O PSdeG-PSOE de Punxín denuncia que a actitude do grupo de goberno municipal, conformado polo Partido Popular e un concelleiro non adscrito, “é intolerable”, xa que tal e como relatan “están impedindo” que a veciñanza de Vilela conte cun local social. As socialistas relatan, que no pleno municipal celebrado na casa consistorial, o grupo de goberno “opúxose e votou en contra” da cesión “totalmente gratuíta” da Casa Reitoral de Vilela o que consideran un “atentado” contra a veciñanza e o patrimonio.

Dende o Grupo Municipal Socialista de Punxín apuntan a que o pleno municipal “foi tenso” e explican a súa “sorpresa” coa actitude do grupo de goberno, que decidiu “ir en contra da vontade da veciñanza” e non renovar o convenio que mantén o Concello coa Diocese de Ourense para a cesión da Casa Reitoral de Vilela ao consistorio. As concelleiras socialistas resaltan que “se trata do único local social que dispón a veciñanza desta parroquia e que de golpe e porrazo o alcalde decide deixar aos veciños e veciñas sen un lugar de reunión e no que realizan actividades”.

A voceira do PSdeG-PSOE en Punxín, Lorena Peleteiro Vázquez, destaca que esta é unha situación “incomprensible” e apunta a que “non entendemos que un goberno municipal se opoña a un convenio de cesión dunha propiedade de xeito totalmente gratuíto para uso e desfrute da veciñanza”. A edil socialista tamén afirma que as alegacións que fai o alcalde “cando afirma que non está de acordo coas condicións, non son entendibles, e máis cando non ten ningunha predisposición de negocialas”.

Peleteiro Vázquez afirma que no pleno celebrado o mércores en Punxín “quedou claro que o goberno municipal non ten ningunha intención de renovar este convenio, nin con estas condicións, nin con outras, xa que non aclararon a súa postura para tomar esta decisión en ningún momento”. A voceira socialistas esíxelle ao alcalde e o seu grupo que “se despracen ata Vilela e lle expliquen á veciñanza porque os privan dun local social no que viñan desenvolvendo diferentes actividades e que servía de punto de encontro”.

Así mesmo, as concelleiras socialistas consideran que a situación “é surrealista”, xa que tal e como argumentan “discriminan a poboación de Vilela, a que non só privan dun local, senón tamén dos seus dereitos”. Neste senso, as concelleiras socialistas pregúntanse se “estaremos ante un caso no que o alcalde pretende eliminar servizos nunha aldea da que cabe recordar é natural a voceira socialista”.
Dende o PSdeG-PSOE de Punxín lembran que a Reitoral de Vilela “é a única do Concello que se conserva en bo estado, e na que se realizaron investimentos de grandes cantidades por parte da administración pública e dos gobernos municipais de todas as cores políticas, e agora que o custe de mantemento é mínimo, o goberno municipal decide outorgarlla a diocese, sen saber o motivo”. As concelleiras socialistas lembran tamén que o actual alcalde, Manuel Vázquez, “leva 10 anos ao fronte do Concello sen gastar nin un só euro nesta casa reitoral, polo que alegar que o mantemento é moi caro, non é máis que unha escusa sen credibilidade algunha”.

Dende o PSOE de Punxín piden o grupo de goberno que “rectifique” nesta decisión, e que no caso de ser necesario, “negocie unhas novas condicións”. As socialistas tamén lle piden ao PP que “poña fin ao desmantelamento de servizos públicos en Punxín e remate cos intereses espurios que parece que son os que están a decidir o presente e futuro do noso municipio”.

A que era avoa da comarca do Carballiño e a muller máis lonxeva que recordamos por estas terras, como no resto da provincia e Galicia, Gumersinda García Fernández, faleceu ao 107 anos de idade no pobo de Bustelo, na parrroquia de Santa María de Covas, concello de San Cristovo de Cea.

A señora Gumersinda gozou dunha vida na que ata os seus últimos dias conservou en bo estado a súa mobilidade e facultades mentais, algo absolutamente extraordinario para a súa avanzada idade. 

Este venres dia 1 de abril, familiares, veciños e amigos, despedirána na igrexa parroquial de Santa María de Covas.

O grupo municipal de Espazo Común recorda que "pasaron máis de dúas semanas dende que a Consellería de Sanidade da Xunta de Galicia, anunciou a decisión de construir o futuro Centro de Saúde na parcela que ocupa a actual Estación de Autobuses".

Aseguran que "a día de hoxe ninguén no Carballiño sabe porque se escolleu esta ubicación, se xa é definitiva, os prazos que conleva, cantas propostas se remitiron a Santiago, e o alcalde, quen manifestou meses atrás a súa oposición a que esta fose a ubicación aínda non dixo nada ao respecto máis ca vaguedades sen sentido".

Espazo Común considera xustificado que "ante o absurdo silencio do alcalde" se celebre un pleno extraordinario no que se trate este asunto "a infraestructura máis importes que se vai construir no Carballiño nos próximos anos polo que o método Fumega de menteir e enganar pode acarrexar un importante perxuízo presente e futuro".

Agardan a convocatoria do pleno da corporacíon "con urxencia pois, no caso contrario, haberá que sospeitar unha vez máis que se esconden informacións fundamentais aos veciños".

Sobre esta cuestíon referíuse hoxe no transcurso da súa intervención en COPE O Carballiño o alcalde, que pedíu cautela e prudencia, Fumega recoñece que esta ubicación non era a súa favorita aínda que considera oportuno "coñecer o anteproxecto para poder opinar". O alcalde carballiñés espera que a elección sexa acertada e se execute un proxecto que suporá unha importante inversión de 10 millóns de euros.

No PODCAST de COPE O Carballiño do xoves 31 de marzo pódese escoitar a entrevista co alcalde do Carballiño sobre éste e outros asuntos da actualidade municipal no concello do Carballiño.
.

O equipo de goberno municipal do Carballiño , encabezado polo alcalde Francisco Fumega, e o Concelleiro de Industria, Manuel Dacal, reuniuse na Casa da Cultura, cos empresarios do parque empresarial do Carballiño, cita a que tamén acudiu a Xunta Directiva da Asociación da Área Industrial (AICA), encabezada polo seu presidente, Manuel Carballeda.

O obxecto fundamental deste encontro foi presentar as bases do que será a primeira comunidade enerxética de Galicia, mediante a instalación de paneis solares fotovoltaicos nas naves e instalacións industriais. A idea deste proxecto é que a comunidade xere, almacene e consuma a súa propia enerxía de orixe renovable a prezos mais competitivos, o que suporía un aforro importante na factura eléctrica.

Esta primeira toma de contacto tivo unha gran acollida polos representantes das empresas, que amosaron o seu interese mediante numerosas intervencións durante a exposición e a ronda final de dúbidas e preguntas.

O seguinte paso será a aportación, nas seguintes semanas, dos datos de consumo e a elaboración dun estudio previo e análise pormenorizado das facturas eléctricas, co obxectivo de ter unha idea inicial do que se pretende levar a cabo e así definir as necesidades enerxéticas de cada empresa.

Tras dous anos polo obrigado parón motivado pola pandemia, a Cofradía da Veracruz recupera este ano 2022 a programación de celebracións, aínda que será unha programación adaptada a situación sanitaria, sen as tradicionais procesións da Semana Santa carballiñesa e no seu lugar, con celebracións alternativas e algunhas novidades, como o Via Crucis Procesional na noite do venres santo que sustituirá á multitudinaria procesión do Santo Enterro.

Abrindo o arquivo adxunto podes consultar toda a programación de actividades e celebracións para esta Semana Santa carballiñesa 2022:

Empresarios do parque empresarial e industrial do Carballiño mostran, a través da Asociación da Área Industrial (AICA), a "gran preocupación pola situación actual". A subida dos prezos da electricidade e os carburantes e a invasión a Ucrania están a producir unha situación crítica que esta poñendo contra as cordas ao tecido empresarial da área industrial.

O primeiro punto no que coinciden é "tanto a suba dos prezos xeneralizados, con especial importancia os carburantes e a enerxía eléctrica, e a consecuente repercusión nos prezos aos seus clientes, viñan sendo situacións difíciles de sortear, pero que se viron agravadas sensiblemente polos acontecementos das últimas semanas. Indican que os incrementos de prezos na produción están obrigándoos a repercutir os sobre costes, que en moitas ocasións non son aceptados polos usuarios finais, coa consecuente perda de beneficios", manifestan.

Por outra banda, o conflito que afecta a Ucrania, país provedor de materias primas de máis dunha empresa do parque empresarial, está a producir efectos devastadores nos subministros. O aceiro, material co que traballan varias empresas dedicadas ao sector do metal, ven na súa maioría, de Mariupol. Tamén hai problemas con outro tipo de materias primas que proveñen directamente deste país, como o vidro e varios produtos do sector da alimentación, o que se ve traducido na perda de provedores e clientes.

Aos dous puntos anteriores, súmase a recente folga convocada polo sector do transporte, feito que produciu un gran desabastecemento de produtos e materias primas. Durante varias semanas deixaron de entrar e saír camións, coa consecuente paralización da actividade produtiva na maioría dos sectores. Aínda que parece que parte do transporte se foi reactivando estes días en Galicia e o paro suavizándose, a actividade no polígono dista de atoparse nunha situación normal. Isto débese a que moito do material que reciben as empresas da área industrial do Carballiño ven doutras zonas de España ou polígonos industriais de fora de Galicia, que aínda se atopan pechados pola folga.

Ante tal panorama, varias empresas están pensando en parar temporalmente a súa actividade, facendo uso das vacacións ou dos ERTE. Aínda que ven positivo o paquete de medidas adoptado polo Goberno, consideran que é insuficiente, e todos coinciden en que se necesitan medidas urxentes e efectivas para frear esta situación.