O presidente da Deputación de Ourense, Manuel Baltar, mantivo unha reunión no Pazo Provincial co alcalde do Irixo e presidente da Mancomunidade de Municipios da Comarca do Carballiño, Manuel Cerdeira, para analizar as liñas de colaboración abertas entre as tres entidades, ademais de concretar novas iniciativas de cooperación. Neste sentido, o presidente provincial comprometeu a axuda da Deputación para o desenvolvemento dun proxecto no que están a traballar no concello para o autoabastecemento de cereal dos gandeiros, colaboración que se concretará na adquisición de semente para este cultivo.

Tamén no ámbito do Concello, Manuel Baltar e Manuel Cerdeira pecharon outros acordos para o arranxo de vías municipais, a promoción da marca Irixo e un programa de actividades culturais. Manuel Baltar resalta o compromiso da Deputación con estes novos proxectos: “Como o proxecto piloto de produción de cereais ou seguir apostando pola marca Irixo, de produtos propios, que en varios meses de entrada no mercado ten amosada a súa viabilidade de apostar polo local”.

Apoio á Mancomunidade do Carballiño

O presidente do goberno provincial avanzou a Manuel Cerdeira, xa coma presidente da Mancomunidade da comarca do Carballiño -integrada polo Irixo, Boborás, Beariz e San Amaro-, a colaboración da Deputación no cofinanciamento das actividades desta entidade. Manuel Baltar encaixa os acordos dentro da liña de cooperación da Deputación coas entidades municipais e intermunicipais: “Está no ADN desta institución provincial”.

Pola súa banda, Manuel Cerdeira afirmou que a liña de traballo e diálogo que mantén a Deputación de Ourense co Concello do Irixo e a Mancomunidade do Carballiño “é totalmente satisfactoria, sempre obtendo resposta ás necesidades da veciñanza que formulamos, o que fala ben ás claras da receptividade que ten Manuel Baltar ás nosas propostas”.

Despois de dous anos de parón motivado pola pandemia, a hostelería carballiñesa recupera este venres dia 1 de abril, e terá continuidade o venres da semana que ven, a "ruta das tapas" unha actividade promocionada dende a concellería de turismo do Carballiño e á que se suman desta vez un total de 16 locais da hostalaría local.

Será unha edición dedicada aos arroces e legumes, que ofertan un total de 16 locais a partir das 20:00 horas en adiante a un prezo de 2 euros a tapa.

Os participantes entrarán en sorteos mensuais e para unha información detallada desta ruta gastronómica terán a súa disposición a app "Quedamos de Tapas".

Trátase dun servizo itinerante da Xunta de Galicia que ofrece servizos gratuítos de especialidades médicas, fundamentalmente pensado para as persoas maiores dos concellos do rural, e que se estrea no concello de San Amaro.

Esta unidade móbil estacionaráse no aparcadoiro do campo de fútbol de Salamonde e ofrecerá servizos de audioloxía, podoloxía, e de prevención do alzhéimer e outras demencias neurodexenativas.

Calquera persoa veciña do concello de San Amaro pode acudir a este servizo, podendo solicitar cita previa no teléfono 622 748 283

O presidente da Xunta, Alberto Núñez Feijóo, referiuse ao novo albergue de peregrinos do Mosteiro de Santa María a Real de Oseira como exemplo da aposta polo patrimonio e o Camiño de Santiago, cunha Rede pública de albergues que remará este 2022 con 78 centros.

Tras un investimento dun millón de euros, Feijóo subliñou que esta nova obra ofertará 42 prazas, que se suman ao obxectivo de poñer a disposición dos peregrinos da Vía da Prata, antes de Semana Santa, un total de 74. Deste xeito, coa incorporación deste albergue, máis o de Piñor e Riós, serán 16 edificios os que integren esta ruta, chegando ás case 520 prazas públicas.

Nesta mesma liña, resaltou que os fondos europeos de recuperación, ademais de axudar a trazar a Galicia do futuro no eido da industria e a innovación, axudarán a impulsar o turismo, cun Plan Xacobeo Next Generation dotado con máis de 39 millóns de euros. “E dentro deste plan, Ourense xogará un papel importante, co fin de converter o Camiño Mozárabe-Vía da Prata en destino cicloturista e familiar”, precisou, referíndose tamén á recuperación da Fortaleza de Monterrei, Ben de Interese Cultural ao que se destinarán de 14 millóns.

O Superior da Comunidade Cisterciense de Oseira, Enrique Trigueros, valorou a importancia desta nova dotación para atender aos peregrinos na mesma liña que o alcalde de Cea, José Luis Valladares, que tamén lembrou o convenio asinado en febreiro coa Deputación de Ourense e a familia Liste para a reapertura do museo etnográfico Olimpio Liste.

O Programa complementario de educación e apoio familiar do Concello de Piñor pon en marcha unha nova actividade para os nenos e nenas, trátase da “SEMANA DOS SUPERPODERES”.

O Programa de Educación Familiar, que se leva ofrecendo dende o Concello de Piñor dende o ano 2006, é servizo que ademais de trallar de forma individualizada coas familias diferentes problemáticas (menores en situación de risco ou desamparo, conflitividade familiar, dificultades educativas, drogodependencias, etc) tamén leva a cabo actividades comunitarias que permitan traballar aspectos preventivos que favorezan o desenvolvemento axeitado da familia e infancia. Dende devandito programa, financiado pola Consellería de Política Social e polo programa operativo FSE Galicia 2014-2020 como parte da resposta da Unión á pandemia da COVID-19, levarase a cabo a actividade SEMANA DOS SUPERPODERES, unha maneira orixinal, lúdica e chamativa de traballar cos nenos e nenas as habilidades precisas para afrontar as diferentes dificultades que podan atopar ó longo da súa vida.

A educación en valores como o respecto é esencial para crear adultos que, no día de mañá, configuren unha sociedade mellor. Por outra banda, preténdese dotar ós participantes de “superpoderes” como a autoestima, a empatía... e competencias emocionais que fomenten o seu desenvolvemento persoal e faciliten a resolución de conflitos. Terá lugar os días 11, 12, 13 e 18 de abril en horario de 10h a 14h, no Centro Social. A inscrición é gratuita e deberá formalizarse en Servizos Sociais ata o 6 de abril. Manteranse tódalas medidas actuais de prevención contra o COVID19.

Dende o concello de Piñor á poboación a inscribir ós seus fillos e fillas nesta actividade, que ademais de mellorar a conciliación da vida familiar e laboral, permitirá que os nenos e nenas desfruten aprendendo

A conselleira de Infraestruturas e Mobilidade, Ethel Vázquez, salientou hoxe o investimento da Xunta de 445.000 € para dotar de acceso o parque empresarial de Beariz desde a estrada autonómica OU-212, reforzando a competitividade e as potencialidades empresariais do municipio.

Vázquez Mourelle presentou en Beariz as obras e informou da publicación hoxe na Plataforma de Contratos Públicos de Galicia da licitación da execución deste acceso ao futuro parque empresarial de Lebozán, conectando o viario interior coa OU-212, que comunica Beariz con Avión e tamén coa estrada N-541, que une Pontevedra e Ourense, dándolle maior operatividade ao polígono.

Apuntou o obxectivo da Xunta de iniciar estes traballos en setembro, polo que que a comezos de 2023 poderán estar rematados, xa que contan cun prazo de execución de 4 meses.

O prazo para a presentación de ofertas por parte das empresas interesadas rematará o 20 de abril. Segundo dixo a conselleira, no período de valoración e adxudicación das obras avanzarase en paralelo nas expropiación das 6 fincas necesarias para que o futuro parque empresarial dispoña dun acceso cómodo e seguro desde a OU-212.

A titular de Infraestruturas subliñou que esta actuación é o resultado dun minucioso estudo previo, onde se analizaron seis alternativas, tendo en conta a xeometría da estrada, a funcionalidade e a seguridade viaria. Así, a solución concreta a proposta recollida no Plan Especial de Creación de Solo Industrial do Concello de Beariz, desenvolvéndoa segundo o previsto no informe de sustentabilidade ambiental dese plan especial.

Explicou que con estas obras actuarase na estrada OU-212 ao longo duns 250 metros, pola marxe esquerda da vía, executando unha intersección que permitirá todos os movementos, en especial dos vehículos pesados que se acheguen ata o polígono.

A conselleira concretou que a intervención inclúe a habilitación de cuñas de aceleración e desaceleración de 30 metros de lonxitude para facilitar a incorporación á estrada e tamén a saída cara ao polígono en condicións de seguridade, ademais de carril central de espera para favorecer os xiros desde esta estrada autonómica cara a área empresarial, pensando en ofrecer maiores facilidades aos camións.

Na zona onde se realizará a nova conexión o trazado está formado por unha recta duns 400 metros de lonxitude que, aproximadamente no seu punto medio, conta cunha estrutura de vigas prefabricadas que permite o paso sobre o regato existente. Así, tal e como indicou a conselleira, o deseño da nova conexión adáptase á contorna, aproveitando esas estruturas sobre o regato, e respectando todos os parámetros recollidos na normativa.

Adiantou que na intervención tamén se procederá á instalación de canalizacións de servizos baixo a berma que serve de protección contra os desprendementos de terras, en previsión da necesidade futura de darlle continuidade á iluminación do parque empresarial, de forma que só sexa necesario a instalación de báculos e de cableado.

A actuación complementarase coa mellora da sinalización, horizontal e vertical, a dotación de sistemas de contención de vehículos e axardinamento.

Ata cinco películas en pantalla grande podemos ver esta fin de semana, cunha actrativa carteleira con cine recomendable para todas as idades, ademáis o ciclo "Carballiño Comedy 6" presenta este sábado no auditorio do Carballiño ao actor galego Luis Zahera.

O Cine-Club Carballiño proxecta este venres, ás 20 horas en versión dobrado ao castelán e as 22:30 horas en versión orixinal subtitulada, a película noruega "La peor persona del mundo", a última de J. Trier, nominada a dous Oscar e á mellor película europea, e acumula xa varios premios. Mestura de de comedia, drama e romance, céntrase na vida de Julie e as súas relacións amorosas e preocupacións existenciais.

O domingo 26, o Cine-Club Carballiño ofrécenos ás 19 horas o documental español "Tierra de leche y miel", que conta as historias de persoas refuxiadas que escapan de distintos conflictos.

O Novocine de Leiro proxecta estes dias "Malancolía" a película rodada en varios escenarios do Carballiño e O Irixo, faino na sesión das 20:30 horas. Antes, tamén a diario, ás 16 e 18:15 horas continúa proxectando a película de animación "Los Tipos malos".

No centro multiusos de Cea proxéctase "O Gran Camiño" un documental de 82 minutos de duración , no que unha parella de mozos narran a súa aventura polas grandes rutas que podemos facer a pe no mundo, como é no caso europeo o camiño xacobeo. A proxección será este sábado 26 ás 19:30 horas.

E finalmente, unha boa sesión de humor, a que está programada para o sábado 25 ás 21 horas no auditorio do Carballiño, unha cita co humor no monólogo do actor galego Luis Zahera, dentro do ciclo "Carballiño Comedy".

O PSdeG-PSOE de Punxín insta ao goberno municipal a solicitar á subdelegación do Goberno, así como a calquera organismo competente, un incremento da presenza policial no municipio, co fin de rematar coa vaga de roubos que se están a producir nos últimos meses e darlle unha maior seguridade á veciñanza. As concelleiras socialistas levarán ao pleno da próxima semana unha moción neste senso para que se busquen solución a un problemática que “se disparou” nos últimos tempos.

Dende o Grupo Municipal Socialista apuntan a que nos últimos meses “produciuse un considerable aumento dos roubos no municipio, o que disparou os índices de delincuencia en Punxín”. As concelleiras socialistas apuntan a que “só nas últimas semanas entraron a roubar na igrexa de Vilela, así como na casa reitoral, e intentaron tamén acceder á igrexa de Ourantes”. Unha situación que ten “moi preocupados” os veciños e veciñas de Punxín e que “xera moita inseguridade, especialmente nas horas nocturnas”.

A voceira do PSdeG-PSOE de Punxín, Lorena Peleteiro Vázquez, destaca que esta situación “está causando moita inseguridade entra á veciñanza”, motivo polo que considera que “é imprescindible atallar esta situación, reforzando a presencia das forzas e corpos de seguridade do Estado no noso municipio”. A edil socialista tamén apunta a que “hai que buscar vías para tentar rematar coa vaga de roubos que se están a producir en Punxín, polo que consideramos que un incremento da presenza policial pode ser a solución idónea”. Peleteiro Vázquez afirma que esta moción vén motivada pola “inacción” do alcalde do Partido Popular, Manuel Vázquez, e o seu equipo de goberno.

A concelleira socialista considera que “chegou o momento de que o goberno municipal se poña a traballar por Punxín, escoite as reclamacións da veciñanza e dea un resposta clara e contundente contra os roubos”. A voceira do PSdeG-PSOE tamén remarca que “é urxente e necesario proporcionarlle seguridade aos nosos veciños e as nosas veciñas, que en moito caso teñen unha idade moi avanzada e aos que os roubos poñen moi nerviosos e réstanlle moita seguridade”.