Os Bombeiros do Carballiño liberaron ao condutor falecido, que quedou atrapado no interior do vehículo. Trátase de A.C., de 67 anos de idade, veciño do concello do Irixo, unha persoa moi coñecida na comarca pola súa actividade como empresario da construcción.

O 112 Galicia tivo constancia do accidente sobre as 03:30 horas desta madrugada. Ocorreu na OU-902, á altura de Dadín, no concello do Irixo. Foi a esa hora cando o persoal dun concesionario de vehículos informaba ao 112 de que lles saltara o aviso de alarma de accidente dun turismo. Ao mesmo tempo, unha persoa particular tamén contactaba cos xestores de emerxencias para pedir axuda, aseguraba que era precisa a intervención dos Bombeiros.

Con estes datos, desde o 112 Galicia informouse ao Servizo de Urxencias Sanitarias de Galicia-061, aos Bombeiros do Carballiño e á Garda Civil de Tráfico que, todos eles, acudiron de inmediato ao punto. Unha vez no lugar, os servizos sanitarios confirmaron o falecemento dun dos implicados e o traslado doutra persoa ao Complexo Hospitalario Universitario de Ourense.

Así mesmo, os profesionais de excarceración indicaron que se tratou dunha colisión frontal e que, tras o impacto, un dos vehículos precipitouse por un desnivel, resultando ferido o seu condutor. Sen embargo, nada se puido facer por salvarlle a vida ao condutor e único ocupante do outro turismo que tiveran que liberar ao quedar atrapado no seu interior.

A Ínsua dos Poetas acolle este sábado dia 3 de Xullo unha nova edición da Festa da Palabra, con varias propostas durante a xornada, que se iniciará ás 12 do mediodia co acto literario dedicado este ano aos seis poemas galegos de Federeico García Lorca e no que está programada unha actuación de Teo Cardalda, do dúo Cómplices. 

Ás 13:30 horas será a inauguración da escultura de Soledad Penalta, que pasa a formar parte do patrimonio cultural e artístico da Ínsua, actuará o Orfeón do Carballiño, e dende as 14 horas na "Romaría das Letras" amenizará a xornada o grupo de música tradicional "Os Serandeiros".

A programación complétase ás 19:30 horas co concerto de "A Banda da Loba".

Ás 23 horas, no auditorio, e dentro do verán cultural do concello do Carballiño a compañía teatral SARABELA representará "Crónicas do Paraíso".

En Cea, son varias as actividades que se desenvolverán nesta xornada de sábado dia 3 de Xullo, a máis madrugadora será a partir das 11 da mañá no campo da Saleta con motivo do Certame Celtibérico de Bandas de Gaitas, que reunirá a máis de 300 gaiteiros e gaiteiras de Galicia, Asturias e Portugal.

A partir de media tarde está convocada unha nova edición da Ruta dos Fornos, un percorrido gastrómico por algúns dos fornos históricos da vila, que contará coa animación de varios grupos de música tradicional.

Completará a xornada sabatina deste sábado en Cea a actuación de Javier Ojeda e a súa banda, o que fora vocalista de Danza Invisible, a partir das 22 horas na Praza Maior da localidade ceense.

Despóis de permanecer moitas semanas coa incidencia de covid máis baixa de toda Galicia, coa maioría dos concellos libres de virus, a tendencia torceuse nas últimas horas coa aparición de novos positivos dignosticados en varios concellos, que volven estar afectados.

Asi, O Carballiño que rexistraba 2 casos activos incrementou nas últimas 24 horas o número de persoas enfermas de covid, que son agora 5 según a última actualización de datos feita nesta mañá de venres polo Sergas.

O concello de PIñor volver notificar un caso activo. Mentres, no Ribeiro está asistindo nas últimas horas a un goteo de novos contaxios que afecta xa a varios concellos: Avión (2) Ribadavia (7)) A Arnoia (1) Cenlle (1)  Melón (1) e Carballeda de Avia (1)

A concellería de Cultura e Xuventude do concello do Carballiño ten elaborado para este verán un intenso programa de eventos culturais, que se desenvolverán na súa meirande parte ao aire libre e respectando as medidas preventivas e aforos permitidos na normativa da covid-19.

Neste programa, que inclúe máis de trinta eventos durante xullo, agosto e setembro, destacan o concerto de Pablo Milanés, o monólogo de Touriñán, o concerto da Orquestra Clásica de Vigo e o recital dedicado a Emilia Pardo Bazán ao redor das cartas de amor a Benito Pérez Galdós, que interpreta a actriz María Galiana, e que leva o título de “Mi Miquiño del Alma”. Con esta representación ponse o colofón aos actos desenvolvidos no Carballiño con motivo do centenario da morte da autora de “El Cisne de Vilamorta”, novela ambientada no Carballiño e Banga.

XULLO
Día 3
XIII FESTA DA PALABRA (Fundación Insua dos Poetas)
CONCERTO DE A BANDA DA LOBA (Fundación Insua dos Poetas)
SARABELA TEATRO – “CRÓNICAS DO PARAÍSO” (reaOU)

Días 6, 7 e 8
FLORES DE CINE (Cine club Carballiño)
- Día 6: EL MAQUINISTA DE LA GENERAL
- Día 7: LA PEQUEÑA TIENDA DE LOS HORRORES
- Día 8: UN, DOS, TRES

Día 10
OPERA CONCERT - “MI MIQUIÑO DEL ALMA”, con María Galiana e Luis Santana.

Día 17
PRESENTACIÓN da NOVELA “ALBANIA, NA ENCRUCILLADA DA OPERACIÓN FERREIRO” coa actuación do grupo GUEZO

Día 18
ODAIKO – “ODAIKO FAMILIAR” (RGTA)

Día 19
CARAMUXO TEATRO – “ZAPATOS” (Ler conta moito)

Día 22
LA VIDA ES ROCANROL DE “EL SEVILLA” (RGTA)

Día 24
O CAMIÑO DE NÓS (Fundación Insua dos Poetas)
Recreación da viaxe a pe dende Ourense a Compostela do Grupo NÓS en xullo de 1926

Do 26 ao 29
XOCIVIGA 2021 (consultar programa)

Día 31
FESTIVAL DE HABANERAS

AGOSTO
Día 1
XORNADA INFANTIL – PRESENTACIÓN DE “OCTAVIO” A MASCOTA DA FESTA DO PULPO

Día 2
MIGALLAS TEATRO – “CANTA CON NÓS!” (RGTA)

Día 3
ORQUESTRA CLÁSICA DE VIGO

Día 4
CONCERTO DA BANDA BROKEN PEACH

Día 6
CONCERTO DE PABLO MILANÉS (RGTA)

Día 8
ACTUACIÓN MÚSICA E DANZA – CANTIGAS E AGARIMOS

Día 13
MAGO TETO – “A MAXIA DOS CONTOS” (Ler conta moito)

Día 14
AQUÍ TOU – MONÓLOGO DE TOURIÑÁN (RGTA)

Día 15
CAXOTO – “LEVÁNTATE XAN!” (contos para bebés) (RGTA)

Do 16 ao 20
13º FESTIVAL DE TÍTERES
- Día 16: “CIRCO GALAICO” de Títeres Alakrán
- Día 17: “COUSAS DE CASA” + OBRADOIRO DE TÍTERES de Micromina Títeres
- Día 18: “OS NOVOS MÚSICOS DE BREMEN de Animar-T
- Día 19: “ONDE VAI O VENTO” de Animar-T
- Día 20: OBRADOIRO DE TÍTERES + “NOVOS LOBOS” de Fantoches Baj

Días 21 e 22
2º CICLO DE MÚSICA “FEITO NO CARBALLIÑO”

Día 27
YOLANDA CASTAÑO – “CONTACONTOS EN VERSO PARA NENOS E NENAS” (Ler conta moito)

Días 28 e 29
OURENROCK (dúo acústico M-Clan e Lau, e Iván Ferreiro e Indomable)

SETEMBRO
Do 6 ao 10 de setembro
32ª EDICIÓN DO FESTIVAL DO TEATRO GALEGO "CELSO PARADA" DO CARBALLIÑO (FETEGA)

Día 11
CONCERTO “OUTROS PAÍSES, OUTRAS MÚSICAS” – CORO DE CÁMARA MÚSICA VIVA

Día 14
BIG BAND

EXPOSICIÓNS

Asociación cultural “O Potiños” – xullo e agosto 2021
Caso do Concello ....Miradas de Emilia Pardo Bazán – Casa do Concello
Edificio Ramon na Rua Principal : 100 Fotos “Pon unha foto na rúa” – Edificio Ramón (R/ Principal)
Expo de Yeray – Casino do Carballiño
Inspiración da A.F. O Potiños – Café Peñasco
Inspiración 2 – Café Plaza
Foto Forum de Santiago – Hotel Arenteiro
“New York” de Luis Baños - Asador da Veracruz
Pazo da Almuzara .... POTI EXPO 2020 – Pazo da Almuzara
Doctor Cafe ...........Potiños 19 – Doctor Café
Galicia Baleirada – Cosaga (Ourense)

XVIII EXPOSICIÓN - Obradoiro de Debuxo e Pintura de M.ª Carmen González - Do 16 ao 31 de agosto

A campaña de recollida de sinaturas en contra da suba do recibo da luz iniciada hai algunhas semanas polo BNG chegou hoxe ata O Carballiño, onde os nacionalistas contaron cunha ampla aceptación e participación por parte da veciñanza.

Para a concelleira Sofía García, "non podemos quedarnos cos brazos cruzados diante desta estafa permanente onde vemos incrementado constantemente o prezo da electricidade". García avanzou que rexistrarán unha moción para ser debatida no vindeiro pleno municipal e na que solicitarán eliminar o imposto especial á electricidade, a rebaixa do IVE do 21% ao 4% e a creación dunha tarifa eléctrica galega.

Na mesa tamén estivo presente a deputada por Ourense no Parlamento galego Noa Presas, quen destacou unha vez máis "o clamor das galegas e galegos ante a estafa continua do incremento do recibo da luz".

Segundo Presas, "no día de onte a electricidade bateu un récord histórico no que a incremento se refire nun mes de xuño", ao tempo que engadía que esta situación "é insoportable e non se pode admitir nun contexto económico marcado pola pandemia da COVID-19 que fai que as Pemes e as familias estean nunha situación crítica".

Noa Presas lembrou ademais a situación de Galiza, "país produtor excedentario de enerxía eléctrica que pese a ter na actualidade dúas centrais térmicas pechadas exportou ao redor dun 29% de enerxía".

Desde o BNG reclámase xustiza social, que haxa un IVE rebaixado ao 4% xa que "a rebaixa so ata decembro ao 10% non é suficiente" así como a creación dunha tarifa eléctrica galega que teña en conta as particularidades de Galiza como país produtor.

Por último, Presas lamentou que o goberno central de PSOE e Unidas Podemos estea practicando a mesma política enerxética que o PP "defendendo os intereses das grandes eléctricas e en contra dos intereses da cidadanía".

O conselleiro de Cultura, Educación e Universidade, Román Rodríguez, visitou a capela de San Pedro, en Leiro, onde a Xunta de Galicia vén de completar obras de restauración cun investimento de preto de 150.000€. Trátase dunha actuación centrada na estrutura e cubertas deste ben que se enmarca no compromiso da Xunta de Galicia co patrimonio cultural e artístico da provincia de Ourense.

Na visita ao concello ourensán, na que estivo acompañado polo delegado territorial da Xunta en Ourense, Gabriel Alén, e polo alcalde, Francisco José Rodríguez, Román Rodríguez destacou o traballo que está facendo a Xunta de Galicia para garantir o futuro dos elementos máis senlleiros do patrimonio da provincia investindo 3,8M€ en actuacións de conservación e rehabilitación como a rematada en Leiro.

“En Galicia temos a sorte de contar cunha gran riqueza patrimonial que nos identifica e define como pobo para guiarnos na construción do noso futuro”, afirmou o conselleiro antes de engadir que a provincia de Ourense xoga un papel determinante na conservación deste legado con algúns dos bens patrimoniais “máis importantes do país”. “No concello de Leiro atopamos unha boa representación coa Capela de San Pedro e o Mosteiro de San Clodio, onde vimos de actuar, ou a igrexa de Serantes, onde actualmente estamos intervindo sobre o retablo”, afirmou.

Consolidación estrutural
Cun investimento de preto de 150.000€, a intervención na igrexa capela de San Pedro tivo como obxectivo resolver as patoloxías que presentaba, especialmente no referido ás fendas existentes nas bóvedas e filtracións, así como os elementos discordantes como a espadana ou a estrutura de madeira que ocupaba o primeiro tramo da nave.
Para iso, consolidouse e estabilizouse estruturalmente o arco toral do presbiterio mediante a colocación dun tirante metálico que recolle os seus esforzos horizontais. No referido ás filtracións, renovouse tanto a estrutura de madeira como o sistema de tellado da cuberta. Así mesmo, melloráronse as condicións de estanqueidade da cantería das fachadas do templo a través de traballos de limpeza e rexuntado con morteiro de cal.
Para recuperar a imaxe exterior orixinal da igrexa desmontouse a espadana existente –construída no 1956 e colocada inicialmente na fachada lateral–, cuxo deseño e dimensión contrastaba coa portada do templo, e devolveuse á súa ubicación orixinal. No referido ao aspecto interior, desmontouse a devandita estrutura de madeira, que impedía visualizar as bóvedas de aresta da capela.
A actuación en San Pedro de Leiro incluíu, así mesmo, a renovación da instalación eléctrica e o alumeado, o revestimento con morteiro de cal hidráulica e pintado dos paramento interiores e a recuperación e renovación da carpintería de madeira existente.
A igrexa de San Pedro de Leiro data de finais do século XVI e é un inmoble protexido polo seu valor cultural, pertencente ao Catálogo do Patrimonio Cultural de Galicia e recollido no inventario do patrimonio histórico-artístico do Concello de Leiro. Trátase dun edificio de pequenas dimensións, de planta rectangular, cunha única nave de dous tramos e cabeceira cadrada. A cuberta descansa sobre tres bóvedas de cruzaría cuxas claves están decoradas con motivos abstractos e agnus dei, entre outros elementos. Toda a capela está construída con canteira de granito pseudo-isódomo co grao típico da zona do Ribeiro.

O campo de Saleta en San Cristovo de Cea reunirá o próximo sábado dia 3 de xullo, a 300 gaiteiros de 19 agrupacións chegados de todas as provincias galegas, Asturias e Portugal no XII Certame Celtibérico de Bandas de Gaitas, presentado no Pazo Provincial coa asistencia do vicepresidente da Deputación Rosendo Fernández; o alcalde de Cea, José Luis Valladares; o presidente da asociación Queixumes dos Pinos, José Antonio Viñas; e o director da Escola Provincial de Gaitas e da Real Banda, Xosé Lois Foxo.

"Unha cita inescusable na axenda de todos os amantes da música tradicional e da beleza artística asociada aos certames de bandas de gaitas, nun concello que é e segue sendo terra de gaiteiros", destacou Rosendo Fernández na súa intervención, sinalando que "non hai máis progresismo que dinamizar e colaborar co tradicional, máxime cando se trata do instrumento máis senlleiro que temos e onde a Escola Provincial de Gaitas representa a esencia da promoción dunha tradición que milleiros de alumnas e alumnas levan por todo o mundo".

O director da Escola Provincial de Gaitas, organizadora do evento, Xosé Lois Foxo, explicou que con este certame "quixemos abrir unha porta ao mundo da gaita que tanto sufriu as consecuencias da pandemia, por iso é unha alegría a magnífica aceptación que tivo este evento". Foxo tamén subliñou que a presente edición estará dedicada a Xosé María Alfonso García Castro "Muíño", ao que cualificou como "o segredo das gaitas e un home que fixo un enorme servizo pola promoción das bandas".

Pola súa parte, José Antonio Viñas, en representación de Queixumes do Pinos como entidade colaboradora, subliñou a importancia da colaboración institucional "para desenvolver proxectos que poñan de relevo, dinamicen e dignifiquen a nosa música e folclore, xerando ilusión e paixón en torno á nosa cultura popular".

Pechou as intervencións o alcalde de San Cristovo de Cea, José Luis Valladares, que agradeceu a elección de Xosé Lois Foxo para organizar o certame no seu concello, coincidindo coas datas nas que se celebraría a Festa do Pan de Cea, "un momento moi importante para nós pero que polas circunstancias actuais non podemos celebrar". O alcalde, que lembrou a gran tradición gaiteira da súa terra, expresou o seu desexo de que os visitantes "poidan gozar da música tradicional, pero tamén dun concello situado na Vía da Prata e onde o pan é arte".

O XII Certame Celtibérico de Bandas de Gaitas, Memorial "Muíño", na súa primeira fase, reunirá a 300 gaiteiros de 19 bandas -catorce da provincia de Ourense, outras tres da Coruña, Lugo e Pontevedra, unha de Asturias e outra máis de Portugal- que comezarán as súas interpretacións ás 11.00 horas no campo da Saleta. O programa de actividades inclúe a presentación do libro Temperando la gaita gallega y su mundo de Fernando Molpeceres, así como a exposición de 16 cornamusas primitivas que desde mañá, 1 de xullo, e ata o 15 de agosto poderá verse no Multiusos de Cea.

O bonoloto correspondente a este lúns dia 28 de Xuño de 2021  deixou un premio de segunda categoria (5 acertos+complementario) no Carballiño, validado na terminal de lotarias do Bar Estatequieto.

Correspóndelle un premio de 81.473,86 euros. A combinación premiada foi a a dos números: 4-12-24-32-35-42, e complementario o 30.

Logo dos traballos de acondicionamento das instalacións e de demorarse a previsión inicial debido á espera polos resultados das analíticas sobre o estado da auga, o Concello do Carballiño procederá mañá martes, día 29, á apertura das piscinas municipais. As previsións pasan por manter a temporada como nos anos anteriores, ata os primeiros días de setembro, e o horario de funcionamento das instalacións municipais carballiñesa será de 11.30 a 20.30 horas.

Como xa se vén facendo dende hai anos o Concello do Carballiño pon a disposición dos cidadáns a posibilidade de mercar as entradas para facer uso da piscina municipal na propia billeteira do recinto deportivo ou a través de internet. Tamén, como xa é costume, se poderá optar por mercar entradas soltas ou decantarse pola alternativa dos bonos. Para as persoas que o desexen, o Concello do Carballiño pón a disposición dos usuarios unha app de reservas. Quen opte por esta alternativa pode mercar as entradas ou os bonos, en función dos casos, en app.saudeter.com

O delegado territorial da Xunta en Ourense, Gabriel Alén, acompañado da alcaldesa, Patricia Torres, visitou o CEIP Nosa Señora de Xuvencos no concello de Boborás para anunciar a inminente licitación da cuberta do patio do centro escolar por un importe aproximado de 125.000 euros e un prazo de execución de tres meses.

Trátase dunha infraestrutura de 270 metros cadrados necesaria para que os alumnos poidan desenvolver diferentes actividades sen estar suxeitos ás inclemencias do tempo.

Así mesmo, o delegado territorial explicoulle á directora do centro o contido dunha partida da Consellería de Cultura, Educación e Universidade de 64.500 euros, prevista dentro dos investimentos con cargo a gastos de funcionamento, para o arranxo dos baños; construirase un aseo en cada aula de Educación Infantil e a reforma integral dos baños da planta baixa, tanto de alumnos como de profesores.