Argirmiro Marnotes comunicou esta mañá nunha comparecencia ante os medios informativos a súa renuncia como concelleiro da corporación municipal do Carballiño, da que formou parte nos últimos 18 anos, catro deles como alcalde e oito como portavoz do grupo municipal popular, cargo do que foi relevado por Ricardo Perea tralas eleccións municipais de 2019.

Marnotes decide renunciar a súa acta de concelleiro para ter maior dedicación como presidente de Club Deportivo Arenteiro tras consumarse o ascenso do primeiro equipo da entidade á Segunda Federación do fútbol español.

"Quería darvos as grazas a todos, pois sei que vos alegrastes do ascenso do Arentiro, do que son presidente dende fai 10 meses, este ascenso ten unhas consecuencias inmediatas pois ser presidente dun club asi en nova categoria con máximas esixencias  necesita tempo e dedicación", subliñou,

Desta maneira, Argimiro Marnotes deixa atrás unha etapa certamente lonxeva como edíl  do concello carballiñés, sendo un dos concelleiros con máis anos de presenza na corporación municipal. Tivo sentidas palabras de agradecemento "para todos os que me soportaron durante este tempo, membros das distintas corporacións de todas as cores políticas, a todos os que foron concellais do PP conmigo, ao persoal do concello, deixo unha etapa marabillosa da miña vida, sempre actúei  coa intención de favorecer o interese xeral de toda a veciñanza e o progreso do pobo, e pido discupas polos fallos que poidera ter cometido", subliñou, poñendo en valor e facendo unha chamada á veciñanza carballiñesa para que se involucre no compromiso da política local "independientemente das siglas coas que se faga".

Agora, unha vez presentada a súa renuncia no rexistro do concello, a vacante que deixa no grupo municipal popular correspóndelle cubríla a Pilar Caride, que xa exerceu  tamén durante varios anos como concelleira, regresando á corporación carballiñesa asi en substitución de Marnotes.

O delegado territorial da Xunta en Ourense, Gabriel Alén, informou esta mañá no Carballiño da posta en marcha do programa Bonos Activa Comercio por parte da Vicepresidencia segunda e Consellería de Economía, Empresa e Innovación co obxectivo de favorecer e impulsar a reactivación do comercio local e de proximidade. Esta iniciativa despregará un total de 330.000 bonos, orientados a todas as galegas e galegos maiores de idade, cun orzamento total de 10 millóns de euros.

Acompañado do alcalde do Carballiño, Francisco Fumega, e de Julián Garriga, presidente do Centro Comercial Aberto, o delegado territorial visitou o establecemento de venda de roupa “Kirschen”, onde detallou todas as cuestións desta medida, que se poden consultar na páxina web www.bonosactivacomercio.gal. Os comercios interesados en adherirse a esta campaña teñen aberto o prazo de inscrición ata o vindeiro 15 de maio.

Gabriel Alén subliñou que a Xunta é perfectamente consciente de que os efectos da pandemia durante o último ano, así como as necesarias medidas restritivas para protexer a saúde dos cidadáns, están a menoscabar o volume de negocio das tendas e dos comercios e por iso, dado o seu compromiso co sector e a mellora da situación pola chegada das vacinas fronte á covid-19, cremos que é o momento de incentivalo con esta importante inxección económica a través dos cidadáns, aos que lles pido que aposten polo comercio local”,

O representante do Goberno galego tamén indicou que en canto aos consumidores, deberán darse de alta no portal dos Bonos Activa Comercio en Internet facilitando os seus datos ou de xeito presencial nas sedes da Dirección Xeral de Comercio ou as xefaturas territoriais da Consellería. A partir da próxima semana, poderán descargar o bono de 30 euros, que ten formato dixital a través dun código QR que estará dispoñible para a súa utilización na aplicación móbil Wallet, e gozar de descontos nas súas compras -a pagar en efectivo ou con tarxeta bancaria- nos establecementos adheridos –a previsión é que os clientes poidan usar o bono a partir da primeira semana de maio–. As rebaixas serán de 5 euros para as operacións iguais ou superiores a 30 euros e de 10 no caso das compras iguais ou superiores a 50.

“Presentamos unha medida novidosa e excepcional, pero cremos que a situación o require para animar o consumo e empuxar ao comercio local, que é garantía de calidade e o que dá vida ás nosas vilas e aos nosos barrios”, sinalou o delegado territorial, que detallou que, se a campaña culmina con éxito e se emprega o 100% da contía dos bonos, “inxectaranse, só con esta iniciativa, ao redor de 55 millóns de euros nos establecementos de proximidade, o cal consideramos un punto de partida máis que interesante para a reactivación do sector”.

O delegado territorial da Xunta en Ourense, Gabriel Alén, destacou na súa visita ao concello de Boborás que por primeira vez a Xunta convoca unha orde de axudas para emendar e corrixir máis de 300 impactos paisaxísticos nos concellos galegos, á que destina 1 millón de euros.

Acompañado da alcaldesa, Patricia Torres, o delegado territorial animou aos veciños a solicitar esta orde de axudas para que os cidadáns leven a cabo pequenas intervencións nas vivendas e inmobles da súa propiedade, co obxectivo de mellorar visualmente a edificación e evitar un punto de impacto na contorna na que se asentan. Gabriel Alén recalcou que “ata o 31 de maio, os particulares ou comunidades que desexen acollerse a esta liña de axudas poden presentar a súa solicitude, que cubrirá o 70% do importe global da proxecto de mellora paisaxística, que poderá incluír unha ou varias actuacións, e que, en todo caso, non superará os 3.000 euros por solicitude”. Aos interesados só se lles poñerá unha condición: a actuación deberá adaptarse aos criterios que fixan a Guía de cores e materiais de Galicia e a Guía de boas prácticas de caracterización e integración paisaxística. Así, aquelas persoas que desexen cambiar un tellado ou mellorar o aspecto da medianeira do seu edificio poden pedir axuda para o tratamento da mesma; no caso de que unha persoa teña a fachada da súa vivenda con ladrillo á vista tamén pode solicitar unha subvención para revistar e pintar a fachada, así como para cambiar a tonalidade da pintura e renovar o exterior, seguindo a solución que a Guía de cor propón para a súa contorna.

Esta nova orde busca o esforzo e a implicación de todos para incrementar o valor patrimonial dos inmobles e da paisaxe de Galicia. Nese sentido, Gabriel Alén animou aos veciños de Boborás e de toda a provincia a levar a cabo este tipo de intervencións, axudándolles a asumir o custo que implica, e para o que deberá seguir unha tramitación fácil e simple, posto que só deberán presentar unha pequena memoria explicativa da actuación, unha reportaxe fotográfica, a factura da actuación e a xustificación do pago. Así mesmo, o representante do Goberno autonómico tamén incidiu na importancia da colaboración dos concellos, a administración máis próxima aos cidadáns, axilizando as xestións e trámites que son da súa competencia, como as autorizacións de carácter municipal que sexan necesarias para o desenvolvemento deste tipo de actuacións. Ademais, recalcou a necesidade do seu apoio para divulgar a información relativa a esta convocatoria de axudas entre os posibles beneficiarios.

Os datos de diversos estudos que se están realizando evidencian o impacto do confinamento e, por suposto, da crise económica que terá consecuencias sociais e de saúde para as que temos ir preparándonos. A Organización Mundial da Saúde (OMS) advertiu xa a mediados do ano pasado das consecuencias para a saúde mental que está a ter a COVID-19 no mundo e as que vai ter no futuro, cun posible aumento de suicidios e de trastornos, e instou aos distintos gobernos a non deixar de lado a atención psicolóxica.

Na sanidade pública galega hai menos de catro psicólogos clínicos por cada 100.000 habitantes, o que provoca a demora na atención e unha maior periodicidade entre consultas. Estas deficiencias no sistema público non deixan outras alternativas aos pacientes cá medicación, ou a sanidade privada, á que a gran maioría da cidadanía non pode acceder.

“Ante esta situación, dende o Círculo de Podemos de O Carballiño propoñemos apostar polo reforzo da Saúde Mental na liña que marca o Plan de Saúde Mental de Galicia PostCOVID19 do SERGAS, que toma como referencia o Plan de Acción sobre Saúde Mental 2013-2020 da OMS” comenta o portavoz local, Manuel Nogueira. “E para iso suxerimos tres liñas de actuación que se resumen nos acordos que vimos de expoñer na nosa proposta e que estamos a presentar en outros concellos de toda Galicia” apunta Nogueira.

Os acordos que formulan dende a agrupación morada serían:

1. Que o Pleno do Concello de O Carballiño inste ao SERGAS e ao Goberno da Xunta de Galicia á ampliación da área de psicoloxía do centro médico de O Carballiño.
2. Solicitar por parte do Concello ao Goberno da Xunta de Galicia e ao SERGAS a creación do ETAC (Equipo de Tratamento Asertivo Comunitario) no CHUO co obxectivo de garantir o servizo de saúde mental a domicilio de pacientes e usuarias no noso hospital comarcal de Ourense.
3. Instar á Xunta de Galicia a realizar unha diagnose sobre o impacto da COVID19 na saúde mental da poboación galega que reflicta a realidade do noso Concello.
4. Deseñar un plan de saúde mental municipal co fin de dotar ao Concello de O Carballiño dunha estratexia para abordar as políticas de mellora neste ámbito que inclúa:
◦ A Creación dun Gabinete Psicolóxico Municipal para complementar e coordinarse co servizo que teña que prestar o ETAC ás distintas pacientes e usuarias do concello de O Carballiño.
◦ Un programa de asesoramento e apoio en saúde mental a entidades sociais e profesionais que facilite a detección precoz de problemas psicolóxicos durante as súas actividades.
◦ Apoio ás entidades que traballan na inserción sociolaboral e psicosocial das persoas con problemas de saúde mental, para reforzar os servizos e programas de acompañamento e orientación no ámbito laboral ás persoas afectadas, baixo supervisión pública e cláusulas sociais.
◦ Desenvolvemento das competencias municipais en materia de saúde e sanidade. Reivindicación do papel dos concellos en materia de promoción da saúde, hábitos de consumo e saúde ambiental.
◦ Reactivación de tódolos órganos de participación do noso concello para a elaboración de plans de saúde mental coa participación de profesionais da rede de saúde mental pública, persoas relevantes do campo da saúde mental no noso concello e persoal con experiencia propia.
◦ Integración do noso Concello nos órganos de participación que dende o SERGAS e as distintas administracións van a desenvolver e avaliar as distintas liñas do Plan de Saúde Mental de Galicia PostCOVID-19 20202024 do SERGAS.
◦ A realización de campañas de sensibilización e contra a estigmatización das persoas con problemas de saúde mental.

O presidente da Deputación de Ourense, Manuel Baltar, recibiu no Pazo Provincial ao gran triunfador dos XIX Premios "Mestre Mateo", o director Alfonso Zarauza -quen conseguiu este ano 9 dos 12 galardóns aos que aspiraba coa película Ons-, xuntanza na que lle confirmou o apoio da institución provincial á que será a vindeira película do guionista e director galego, Malencolía, filme que se rodará na comarca do Carballiño, concretamente nos distintos escenarios dos concellos do Irixo e O Carballiño.

Baltar trasladoulle a Zarauza os parabéns polo éxito logrado nos Mestre Mateo, "o que supón un gran aval de calidade para o seu próximo proxecto, no que Ourense tamén será protagonista a través dos seus magníficos escenarios naturais, no marco da decidida aposta da Deputación polo ámbito audiovisual". No encontro no Pazo Provincial tamén participaron o produtor Martín Calviño e o asesor de Cultura da Deputación, Aurelio Gómez Villar.

Producida por Maruxiña Films, compañía fundada polos irmáns Alfonso e Rubén Zarauza e con numerosas distincións nacionais e internacionais, Malencolía está concibida como unha película de terror con temática tradicional galega, rodada integramente en galego e cun equipo técnico e artístico cen por cen do país.

Os datos facilitados por Sanidade neste domingo 25 de Abril reflicten a situación estacionaria das últimas semanas, a Comarca continúa mantendo a raia ao coronavirus.

O Carballiño, que ten 7 contaxios activos, e San Cristovo de Cea con 1 caso, son a dia de hoxe os dous únicos concellos da comarca afectados polo Covid, xa que o resto de municipios permanecen limpos de virus. Trátase da menor incidencia na comarca dende os inicios da pandemia.

Piñor, O Irixo, Boborás, Beariz, Punxín, San Amaro e Maside non teñen casos activos, tampouco os concellos de Leiro e Avión.

Natural da parroquia de A Corna, no concello de Piñor, Xosé Paz faleceu hoxe aos 76 anos de idade. 

Durante a súa traxectoria como profesor e pedagogo, na que estivo vinculado á Asociación Socio-Pedagóxica Galega, estudoso e investigador, desenvolveu unha gran actividade como animador cultural, tamén foi un dos precursores do cineclubismo na provincia. 

Non obstante, a súa gran paixón foi a figura do escritor Rabindranath Tagore, que o levou a viaxar de forma frecuente á India, e reunir a biblioteca máis importante que existe en España sobre este escritor, máis de 30.000 volumes. Precisamente, na última aparición pública que tivo fai unhas semanas co presidente da Deputación, Xosé Paz expresáralle a súa vontade de doar á entidade provincial  todas as publicacións de Tagore asi como o resto da súa biblioteca persoal e colección cinematrográfica, manifestando o seu desexo de que unha parte do material cedido vaia parar á súa localidade natal, en A Corna.

O Carballiño é, entre os concellos con maior poboación da Galicia Central e tamén na provincia de Ourense, o que mellor resiste a sangría demográfica no transcurso da última decada, según os datos oficiais dos padróns municipais publicados polo INE.

Asi, observamos que no periodo 2010-2020 O Carballiño perdeu 47 habitantes, pasando dos 14.136 que tiña no ano 2010 aos 14.089 que rexistra en 2020, un retroceso de apenas o 0,3% da súa poboación municipal, mentres que os outros concellos máis importantes da chamada Galicia Central presentan datos moito máis negativos.

Neste mesmo intervalo de tempo, o concello de Lalín perdeu o 5% da súa poboación, a capital do Deza ten dez anos despóis 1.009 habitantes menos. A Estrada, que en 10 anos experimentou un descenso de 1.477 habitantes, o que representa a perda do 6,5% da poboación que tiña este concello en 2010. Tamén é relevante o descenso da poboación de Monforte de Lemos, o 6%, ao perder 1291 veciños no padrón municipal . E aínda peor é o caso do concello de Chantada, cunha perda do 9% dos seus habitantes.

Se repasamos os datos dos principais concellos da provincia de Ourense, tamén vemos que todos eles tiveron un comportamento demográfico moi negativo. A capital provincial, o concello de Ourennse perdeu preto do 3% da súa poboación na última década, e os outros dous concellos máis poboados da provincia, despois do Carballiño, que son Verín e O Barco de Valdeorras perderon -respectivamente- o 5% e o 7% da súa poboación durante os útimos dous lustros. Unha sangría demográfica da que parece salvarse O Carballiño con esa perda de apenas o 0,3% na segunda década do século 21.