Cada dia 14.000 oíntes entretéñense e infórmanse do que acontece na comarca sintonizando o 91.9 da FM, asi o acredita a primeira onda de 2021 do  "Estudio General de Medios" que ven de publicarse. Unha nova entrega do EGM realizada no primeiro trimestre do ano e que consolida a COPE O Carballiño como a terceira emisora de radio de toda Galicia, incluidas as que emiten nas capitais de provincia, con máis audiencia diaria no horario de mediodia, cando esta emisora de radio emite a súa programación comarcal. 

Os datos publicados este martes dia 13 de Abril polo EGM poñen de manifesto que cando ás 12:30 horas comeza o seu programa local, COPE O Carballiño convértese na emisora de radio máis escoitada na provincia de Ourense, incluindo as da capital. COPE O Carballiño tamén continúa sendo líder provincial de audiencia aínda no tramo final do programa local, a partir das 14:00 horas. 

Asi pois, dende COPE O Carballiño so podemos dicir grazas por estar con nós cada dia, grazas por formar parte desta gran familia, grazas por conseguir que unha radio do Carballiño sexa referencia na radiodifusión local en Galicia.

O Carballiño (12 casos) e O Irixo (4 casos) son os dous únicos concellos da comarca que manteñen contaxios activos de coronavirus, na última actualización de datos feita por Sanidade correspondente ao martes 13 de Abril.

Para ambos municipios trouxo novidades a reunión do comité clinico. Para O Carballiño, que está en nivel medio de restricións pasará ao nivel máis baixo, o cámbio afecta á hostelaría que amplia aforos, pasando do 30% en interiores e 50% en terraza a unha ocupación autorizada de ata o 50% en interior e o 75% en terraza, a partir das 00:00 horas deste próximo venres dia 16.

Polo que respecta ao concello do Irixo, aínda en nivel alto, pasará a nivel medio, polo que a hostalaría poderá volver atender no interior dos locais, cunha ocupación do 30% e do 50% en exteriores.

Sen novidades para o resto de concellos, que permanecerán todos  no nivel máis baixo de restricións. 

O presidente da Deputación de Ourense, Manuel Baltar, mantivo hoxe no Pazo Provincial unha reunión co presidente da Asociación de Pulpeiros do Carballiño, Roberto Pereira, e cos membros da directiva desta entidade Suso Pereira e María Lage, recentemente elixidos para asumir as responsabilidades de xestión da asociación, unha xuntanza na que o presidente do goberno provincial comprometeuse a apoiar desde a Deputación iniciativas "para potenciar o polbo, unha "marca" da provincia de Ourense", destacou Baltar.

Entre os temas que abordaron figuran aspectos como a imaxe corporativa deste produto gastronómico que representa a Asociación de Pulpeiros do Carballiño, para incluíla en carpas vestimenta e material promocional, pois "o produto e o xeito de cociñalo e preparalo por parte dos polbeiros son un sinal de identidade do noso pobo; de aí que a Deputación de Ourense se amose favorable a coñecer o plan de acción da asociación e a cooperar no desenvolvemento das actividades que o integran", salientou Baltar, quen os felicitou pola súa recente elección e desexoulles moitos éxitos na súa xestión.

Tras a remisión ao Concello do Carballiño da proposta da Comisión de Heráldica, adscrita á Consellería de Presidencia da Xunta de Galicia, sobre o novo escudo e bandeira oficiais do Carballiño, o grupo de goberno municipal levará esta proposta ao próximo pleno para a súa aprobación.

Trátase do primeiro requisito para cumprimentar os trámites previstos no artigo 16 a) do Decreto 19/2010, do 11 de febreiro, polo que se aproba o regulamento de símbolos das entidades locais de Galicia. Unha vez aprobada a proposta polo pleno, e para o que se require maioría absoluta, procederase ao trámite de información pública polo prazo dun mes, mediante anuncio no DOG, e no taboleiro de edictos. A continuación, resolución polo pleno das alegacións que se poidan formular, e para rematar, remisión do expediente completo.

A Comisión de Heráldica na súa reunión do 18 de decembro de 2020 acordou propoñer como válida as seguintes descricións de escudo e bandeira:
Escudo: De ouro (amarelo) e sobre ondas de azur (azul) e prata (branco), un carballo arrincado de sinople (verde) cos dous osos ao natural empinados ao seu tronco. Ao timbre, a coroa real pechada.

Bandeira: “Partida ao centro. Ao asta, o pano amarelo co carballo arrincado de verde e os dous osos na súa cor natural empinados ao tronco. Ao batiente, de azul con catro ondas de branco”.

A proposta sintetiza á simboloxía histórica do Carballiño: dous osos erguidos como símbolo da pertenza ás Terras de Oseira; un carballo con dezaséis follas en representación das parroquias que conforman o municipio, e as ondas alusivas á riqueza fluvial e termal que caracterizan ao Carballiño.

Un operario foi trasladado en helicóptero medicalizado ata o Hospital de Ourense despois de caerlle enriba unha peza metálica de grandes dimensións mentres traballaba no Polígono Industrial A Uceira, no concello ourensán do Carballiño.

O 112 Galicia tivo constancia dos feitos ao recibir a chamada de alerta dunha persoa particular ás 09:00 horas desta mañá. Durante a comunicación, o alertante solicitaba asistencia médica urxente para un traballador que resultou ferido ao ser golpeado nunha das súas extremidades por unha peza metálica circular duns dous metros de diámetro.

De inmediato, os xestores do 112 puxeron a situación en coñecemento dos profesionais de Urxencias Sanitarias de Galicia-061 que, nada máis recibir o aviso, informaron da mobilización da aeronave medicalizada con base en Ourense.

Ademais, desde o 112 solicitouse igualmente a intervención dos Bombeiros do Carballiño ante a posibilidade do traballador atoparse atrapado debaixo da peza.

Finalmente, os efectivos do Servizo de Prevención Extinción de Incendios e Salvamento confirmaron que o operario estaba liberado pero, aínda así, tiveron que intervir para axudar ao ferido. Así, o traballador foi evacuado na aeronave ata o centro hospitalario.

Para prestar apoio aos servizos de emerxencia, avisouse tamén aos axentes da Garda Civil, da Policía Local e á Protección Civil da localidade.

Unha festividade que ten a súa singularidade, varia cada ano no calendario xa que se celebra coincidindo coa Octava de Pascua, esto é, o seguinte lúns ao de Pascua. O dia de San Wintila é festivo de carácter local no concello de Punxín.

A celebración volve estar este ano condicionada pola pandemia, a maiores da festa no ámbito familiar, a única actividade programada para este dia en Punxín é a misa solemne ás 12:30 do mediodia na igrexa parroquial, onde os devotos do Santo Wiintila poderán ver o carro de vacas que foi restaurado e que se utilizaba tradicionalmente para a procesión da festividade.

O concello do Carballiño continúa recurrindo á contratación temporal de auxiliares para paliar o deficit de axentes na Policia Local, que son 12 na actualidade, aínda que a plantilla leva meses soportando dúas baixas, unha delas de longa duración. 

O ano pasado foron 12 os auxiliares que contratados polos concello carballiñés para axudar a cubrir as necesidades do servizo, e para este ano 2021 serán 9, deles 5 xa están prestando servizo por un periodo de seis meses, e agora a Academia Galega de Seguridade ven de convocar o procedemento selectivo para cubrir prazas na categoria de auxiliares nos concellos galegos, en concreto para o O Carballiño serán 4 prazas de auxiliares que se incorporarán á Policia Local carballiñesa no segundo semestre do ano. O concello do Carballiño está adherido ao decreto autonómico que permite aos concellos delegar na Xunta os procesos selectivos, o que permite axilizar trámites e recursos para a contratación  de auxiliares e axentes con destino á Policia Local.

Precisamente, tamén no transcurso do segundo semestre deste ano, está previsto que se incorpen en periodo de prácticas os 3 novos axentes que serán destinados na Policia Local do Carballiño, e que permitirá ampliar a plantilla de efectivos a partir do próximo ano 2022.

A actualización de datos correspondente a este sábado dia 10 de Abril mantén a O Carballiño cunha incidencia acumulada de 92 casos por 100.000 habitantes, xa que dos 15 contaxios activos 13 deles son novos positivos diagnosticados nos últimos 14 dias. 

O Irixo resta un contaxio activo e baixa a 8. Boborás volve rexistrar un caso de coronavirus, mentres que Maside queda libre de virus, tras recibir a alta médica a única persoa que aínda estaba pasando pola enfermidade neste municipio.

O resto dos concellos do noso ámbito non rexisran casos de coronavirus nesta última actualización feita por Sanidade.