A Policía Local do Carballiño inicia unha campaña de concienciación entre a veciñanza para dar a coñecer a normativa sobre Vehículos Personais Lixeiros (VPL) -patinetes eléctricos, bicicletas con asistencia, segways e similares-, que entrará en vigor o 1 de xaneiro de 2026.

Os axentes reforzarán nas próximas semanas os controis sobre este tipo de vehículos co obxectivo de garantir a seguridade viaria e mellorar a convivencia de peóns e conductores nas rúas do Carballiño. Nese sentido, cabe destacar que a Policía Local xa denunciou e retirou varios patinetes nos últimos meses por non cumplir coa actual normativa.

O uso de VPL é cada vez maior entre a poboación, o que está a causar certas dificultades de convivencia en estradas, beirarrúas e zonas peoniles. A campaña da Policía Local permitirá achegar a conductores e peóns información sobre as obrigas dos VPL a partir de xaneiro, tales como circular unicamente pola calzada, contar cun seguro de responsabilidade civil, respetar as sinais de tráfico e os semáforos, utilizar chalecos reflectantes en condicións de pouca visibilidade ou non circular baixo os efectos do alcohol ou de substancias estupefacientes.

Os axentes tamén revisarán que os VPL conten co correspondente certificado de uso, o que asegura que cumpre as normas de homologación e que pode circular polas vías públicas. Ata o de agora xa se detectaron varios vehículos comprados como patinetes eléctricos pero que polas súas características eran ciclomotores, o que obriga a contar dun permiso de condución AM para poder utilizalos.

O Festival Internacional de Curtametraxes Xociviga pecha con éxito de participación de público a segunda edición desde o cambio do formato impulsado en 2024. De mércores a sábado, o Auditorio Manuel María do Carballiño acolleu a proxección de 32 curtametraxes de 22 nacionalidades que foron valoradas polo xurado e polos espectadores. A organización do festival recolleu ao longo das 9 sesións máis de 500 papeletas do voto do público, o que dá conta da boa resposta por parte da poboación.

Os directores artísticos, os irmáns Mario e Daniel Fernández Filloy, valoran moi en positivo os datos de participación acadados nesta segunda edición, tanto nas proxeccións coma nas actividades paralelas. “Xa estamos pensando na edición do ano que vén, que promete seguir amosando as mellores curtas internacionais e sumando asistentes nun certame que recuperou o seu lugar como evento cultural de relevancia no Carballiño e na rede de festivais de cinema galegos”, apuntan.

Pola súa parte, o concelleiro de Cultura, Diego Fernández, pon en valor o traballo realizado polos directores e dá conta da importancia deste tipo de festivais para o concello. “É un orgullo que O Carballiño acolla obras inéditas a nivel estatal e galego, incluso estreas mundiais como ‘As maos da pulpeira’, que levará o nome do Carballiño por festivais de todo o mundo”, explica.

As proxeccións incluíron a estrea de 18 curtas internacionais en Galicia e 4 en España. O edil tamén destaca o papel do festival para os novos creadores e creadoras, que o valoraron “moi en positivo” como plataforma para dar a coñecer o seu traballo.

Curtametraxes premiadas

Mellor videoclip: “Equilibrar” (Hugo Guezeta e Guadi Galego) dirixido por Adrián Diaño.

Mellor dirección de fotografía xove patrocinada por Rc Service: Aaron Vilariño por “Romance de la Luna Luna” de Jimena Herrero

Mellor curta Xénese patrocinada por Gadis: “Furia” de Fran Moreno e Santi Pujol Amat. Mención de Honra: El príncipe Nigeriano de Marcel Sespulgues.

Mellor curta galega patrocinada por Rc Service: ·Algo novo que contar· de Paula Pereira.

Premio do público: ·Les dernières neiges” de Sarah Henochsberg (cun 8'68).
Mellor curta internacional Xentes: “Nothing Happens After That” de Ibrahim Omar.

Mencións de honra para de Marta Reis Andrade e "The Man Who Could Not Remain Silent" de Nebojša Slijepčević.

O palmarés desta segunda edición conta con seis filmes premiados. “Equilibrar” (Hugo Guezeta e Guadi Galego), dirixido por Adrián Diaño, resultou vencedor na categoría de mellor videoclip con 204 votos a través de redes sociais.

Aaron Vilariño levouse o galardón a mellor dirección de fotografía xove por “Romance de la luna luna” de Jimena Herrero.

“Furia”, de Fran Moreno e Santi Pujol levouse o premio a mellor curta Xénese, na que tivo mención de honra “El príncipe Nigeriano” de Marcel Sespulgues.

“Algo novo que contar”, de Paula Pereira, resultou gañadora na categoría de mellor curta galega. “Les dernières neiges”, de Sarah Henochsberg levouse o premio do público, que lle otorgou un 8,68.

Por último, “Nothing Happens After That” de Ibrahim Omar gañou o premio a mellor curta internacional Xentes. “Cao Sozinho” de Marta Reis Andrade e "The Man Who Could Not Remain Silent" de Nebojša Slijepčević.

A Deputación de Ourense pon en marcha a campaña “En soidade, non esperes máis”, unha iniciativa destinada a visibilizar e concienciar á cidadanía sobre a realidade diaria das persoas que padecen soidade non desexada, así como sobre o impacto que esta situación ten na saúde e no benestar.

A campaña enmárcase na recente advertencia realizada pola Organización Mundial da Saúde (OMS), cuxa Comisión de Conexión Social alerta sobre os profundos efectos do illamento social durante todo o proceso de envellecemento. A OMS lembra que a saúde social é un piar fundamental —e moitas veces ignorado— do benestar integral, tan esencial como a saúde física e mental.

Segundo o organismo internacional, a conexión social reduce o risco de enfermidades, prolonga a esperanza de vida e reforza o tecido das comunidades, dotando ás persoas de significado vital e dun profundo sentido de pertenza. Pola contra, a soidade non desexada constitúe un grave problema de saúde pública global, cunha prevalencia e unhas consecuencias severas que están sendo subestimadas.

TERnadal: termalismo para conectar e acompañar no Nadal

Para dar resposta a esta realidade, a Deputación de Ourense impulsa a iniciativa piloto TERnadal, un programa que permitirá que un milleiro de persoas participen en estancias termais durante o mes de decembro co obxectivo de combater a soidade non desexada.

O programa está dirixido a persoas que se atopen en situación de vulnerabilidade emocional ou que vivan soas, con independencia do seu lugar de residencia, e que desexen compartir as festas en compañía.

As estancias, de seis ou quince días de duración, desenvolveranse en distintos hoteis-balneario da provincia e incluirán aloxamento en pensión completa; acceso a piscinas de auga mineromedicinal; dúas técnicas termais diarias; actividades específicas para favorecer a socialización e consulta médica opcional.

Ademais, programáronse quendas especiais en días sinalados —Nadal, Fin de Ano e Reis— para garantir que ningunha persoa teña que vivir estas datas en soidade.

Toda a información e o proceso de solicitude están dispoñibles na web oficial: https://www.termalismourense.com/ternadal

Un compromiso da Deputación coa saúde social

Co lanzamento desta campaña e da iniciativa TERnadal, a Deputación de Ourense reafirma o seu compromiso cos coidados, o benestar e a atención ás persoas máis vulnerables. A institución provincial destaca que a loita contra a soidade non desexada require respostas innovadoras, humanas e coordinadas, nas que o termalismo, un dos recursos identitarios da provincia, se converte tamén nun espazo de encontro, acompañamento e esperanza.

O Concello do Carballiño conmemora o 25N, Día Internacional da Eliminación da Violencia de Xénero, cunha programación que aposta pola música e o teatro para concienciar á poboación.

No acto de presentación, Diego Fernández, concelleiro de Cultura, recordou o compromiso do goberno local coa erradicación da violencia machista e puxo en valor o papel das profesionais do Centro de Información á Muller (CIM): “O traballo do CIM durante todo o ano é fundamental para protexer e asesorar ás mulleres”. O edil tamén animou á veciñanza a denunciar todo tipo de violencia de xénero e lamentou o aumento do acoso a través das redes sociais, para o que pediu “tolerancia cero”.

A programación céntrase na propia xornada do 25N, o próximo martes, que arrancará ás 12,00 horas no salón de plenos coa lectura do manifesto institucional por parte da concelleira de Igualdade, Silvia Baranda. O acto, presentado por Chus Otero, contará coa presencia dos centros educativos do Carballiño, así como de colectivos como Aspadisi, Cruz Vermella, Asdifica ou asociacións de mulleres. “Contaremos co grupo As Riscadeiras, composto por mulleres, e coa actuación musical de Marta Bravo, veciña de Seoane, xunto con Sérgio Tannus”, destacou Fernández.

O venres 28 de novembro, a programación continuará co espectáculo teatral “Corazón” da actriz Iria Sobrado, nada no Carballiño. A performance terá lugar na Praza de Abastos ás 12,00 horas. A mesa de coordinación para a mellora de atención ás vítimas de violencia de xénero, o día 12 de decembro, completa a programación. A reunión permitirá analizar a realidade actual do Carballiño en materia de violencia machista, así como os retos pendentes.

Diego Fernández tamén fixo fincapé na importancia de traballar coas novas xeracións. Nese sentido, recordou o proxecto “Conectade@s” da Asociación Aliad Ultreia, realizada o pasado 10 de novembro co alumnado do IES Chamoso Lamas. “É moi necesario seguir traballando coas novas xeracións, porque así traballamos para lograr un futuro mellor”, apuntou.

Fátima Gómez, Sebas Lamazares, José Antonio Barge e Manuel Nogueira comentan a actualidade da semana no noso ámbito comarcal.

Presenta e modera, Xan Pinal:

A Casa da Cultura do Carballiño acolleu este xoves a xornada "Polbo con Orixe: do produto á experiencia", un encontro que reuniu a representantes institucionais, expertos en turismo e profesionais do sector enogastronómico para debater sobre o futuro do turismo gastronómico e o papel dos clubs de produto como ferramentas de dinamización territorial.

O evento serviu como presentación oficial do Club de Produto “Polbo con Orixe”, unha iniciativa impulsada ao abeiro do Plan de Sostibilidade Turística en Destino "O Carballiño e a gastronomía do polbo", financiado pola Unión Europea - NextGeneration EU.

O alcalde do Carballiño, Francisco Fumega; o xefe de área provincial de Turismo Galicia en Ourense, Cecilio Santalices, e o deputado de Representación Institucional da Deputación de Ourense, Rosendo Fernández, participaron na apertura da xornada. O rexedor municipal puxo en valor o polbo como símbolo do Carballiño, así como o traballo realizado para lograr a internacionalización da Festa do Pulpo. “Tamén conseguimos que a Festa do Pulpo non fose só un día de celebración, senon varias semanas de citas no Carballiño como a elaboración da tapa máis grande do mundo”, apuntou.

A xornada desenvolveuse a través de varias conferencias e mesas redondas que abordaron a enogastronomía como elemento central da experiencia turística. Carlos Martins, experto en enogastronomía e turismo, estableceu as bases conceptuais sobre a importancia de construír unha oferta turística ao redor dos produtos gastronómicos locais e a súa conexión co territorio.

As mesas redondas "Os clubs de produto como elemento de vertebración do turismo gastronómico" e "O papel dos concellos como impulsores da gastronomía local" abordaron a importancia destas iniciativas para incrementar a competitividade das empresas locais e a necesidade da colaboración público-privada para implicar ao tecido económico nunha estratexia a longo prazo.

O Club de Produto Polbo con Orixe busca consolidar O Carballiño como un destino turístico de referencia no eido enogastronómico, situando ao polbo como eixe principal dunha actuación que tamén fortalece a conexión con outros produtos da contorna.

Máis información sobre o Club de Produto Polbo con Orixe:

●Na web pulpoconorigen.com
●No enderezo electrónico clubdeproducto@carballino.gal

A área de Educación do Concello do Carballiño pon a disposición da veciñanza os libros retirados do fondo da Biblioteca Municipal durante a primeira fase do expurgo que se leva a cabo desde o mes de outubro.

Este proceso, necesario para o bo funcionamento da Biblioteca e para garantir a calidade dos préstamos, inclúe o inventario e pre-catalogación básica de materiais a revisar, o rexistro documentado de baixas, a consulta institucional á Xunta se fora preciso pola Lei de Patrimonio Documental de Galicia e o tratamento final do material.

Trala realización da primeira fase do expurgo, a área de Educación convida á cidadanía a achegarse este venres e sábado á Biblioteca e ver se hai libros do seu interese entre aqueles volumes que se retiran do catálogo. “Pode vir quen queira, desde particulares a asociacións de veciños, centros educativos, de estudos, agrupacións culturais, sociais… Está aberto para toda a poboación”, detalla Lorena Castro, concelleira de Educación.

Entre os materiais destacan enciclopedias, libros especializados en diversas áreas do coñecemento ou mesmo novelas. “A retirada do catálogo destes volumes responde a criterios técnicos e de espazo, precisamos máis espazo na Biblioteca para facer oco ás novidades que imos adquirindo”, recorda Castro.

A cidadanía interesada pode achegarse á Biblioteca este venres, en horario de 17,00 a 20,00 horas, e este sábado, en horario de 10,00 a 13,00 horas. Cabe destacar que aqueles volumes que sexan retirados non poderán ser devoltos con posterioridade. “Este é o primeiro expurgo, nas próximas semanas levarase a cabo o segundo e volveremos poñer libros a disposición da veciñanza”, avanza a edila de Educación.

O Concello do Carballiño prepárase xa para festexar o Nadal nos meses de decembro e xaneiro. O concelleiro de Cultura, Diego Fernández, acompañado do alcalde, Francisco Fumega, presentou esta mañá a programación cultural e de ocio que inclúe unha trintena de actividades para público de todas as idades. A veciñanza poderá desfrutar dunha variada oferta teatral, cine, concertos, maxia ou mesmo monólogos de humor, ademais de citas tradicionais como a visita de Papá Noel ou a cabalgata de reis. “Temos novidades como as prebadaladas na tarde do día 31 de decembro, que esperemos que teñan moito éxito”, avanzou o edil de Cultura.

A programación comeza o día 1 de decembro co acendido da iluminación festiva polas rúas da vila, que volverá incluír fío musical por petición dos comerciantes. “Este ano temos iluminación en máis espazos públicos para dar un ambiente máis máxico á vila e estimular o comercio local”, explicou. Así, a Praza Maior, a Praza de Abastos, a Uceira, o Balneario ou a Praza de San Ramón contarán cunha maior decoración.

Entre outras actividades, o concelleiro destacou o concerto das Guerreras K-Pop do día 4 de decembro no Auditorio Municipal, para o que xa quedan poucas entradas; o concerto do grupo de música Bombai, o día 5 de decembro; a obra “Bichitos” da compañía salmantina Spasmo Teatro o día 8 de decembro; o espectáculo “Retranca e maxia” de Luis Boyano o día 14 de decembro,ou o monólogo de Agustín Jiménez do 18 de xaneiro. Fixo unha mención especial á cabalgata de reis, unha cita na que O Carballiño recibe a veciñanza doutros puntos da provincia e mesmo da comunidade para desfrutar da máxica xornada. “Na cabalgata teremos moitas sorpresas, como é habitual”, destacou.

O edil tamén recordou que haberá actividades complementarias durante decembro e xaneiro, tales como a pista de xeo, que se colocará na pista vermella, ou as exposicións fotográficas de O Potiños en diversos puntos da vila.

Apoio ao comercio

O alcalde, Francisco Fumega, avanzou a campaña de bonos que o Concello lanzará nas próximas semanas para incentivar as compras no comercio local. “É un xeito de prolongar as vendas máis alá da época do Nadal”, explicou. No pasado pleno, a corporación local aprobou unha modificación de crédito de 30.000 euros para poñer en marcha a campaña, que en pasadas edicións xa contou cunha elevada participación por parte da veciñanza.

PROGRAMACIÓN NADAL 2025

●1 de decembro: acendido da iluminación nas rúas da vila.
●4 de decembro: concerto “Las guerreras K-Pop”.
●5 de decembro: concerto grupo Bombai.
●6 de decembro: teatro coa obra “Tres porquiños”, de EducaTeatro
●6 de decembro: concerto da Banda Vilatuxe coa Coral Polifónica do Casino.
●8 de decembro: obra teatral “Bichitos”, de Spasmo Teatro.
●12 de decembro: cine coa proxección da película “Sorda”, coa colaboración do Cine Clube.
●13 de decembro: teatro con “Amor y crímenes de Juan Pantera” de Teatro del Norte.
●14 de decembro: espectáculo “Retranca e maxia” de Luis Boyano.
●19 de decembro: proxección do filme “Un simple accidente”, coa colaboración do Cine Clube.
●20 de decembro: III Festival Nadal Coral, organizado por Coro infantil e xuvenil Enharmonía, Coro Cantiga e Orfeón do Carballiño.
●21 de decembro: espectáculo “Un mundo de fantasía” para público infantil.
●24 de decembro: visita de Papá Noel.
●25 de decembro: Concerto de Nadal da man do Orfeón do Carballiño.
●27 de decembro: concerto de Xoán Curiel e a súa banda.
●Teatro con “A toupiña que quería saber quen lle fixera aquilo na cabeza” de Xanela de Maxín.
●31 de decembro: prebadaladas na Praza Maior.
●1 de xaneiro: Concerto de Aninovo do Coro de Cámara Música Viva.
●5 de xaneiro: Gran Cabalgata de Rei.
●6 de xaneiro: Concerto de Reis da Coral Polifónica do Casino.
●18 de xaneiro: Monólogo de Agustín Jiménez.
●Festival Máxico San Juan Bosco.
●Exposicións fotográficas de O Potiños en distintos puntos da vila.
●Pista de patinaxe.
●Inchables para a cativada.