O portavoz do Partido Popular do Irixo, Manuel Cerdeira, presentou unha denuncia no cuartel da Garda Civil do Carballiño polas ameazas recibidas contra a súa persoa e recollidas nunha carta anónima enviada ao seu domicilio particular.

O portavoz popular decidiu dar este paso logo de recibir constantes ameazas e mesmo acusacións sobre aspectos estritamente relacionados coa súa vida persoal, situación que comezou en agosto de 2023 logo da presentación da moción de censura contra o goberno popular, apenas 50 días despois de que tomara posesión como alcalde.

A vinculación destas ameazas coa crise política que se vive no Concello do Irixo “é a razón da denuncia presentada”, manifestou o propio Manuel Cerdeira, que lamenta que se chegue a este tipo de situacións cando “máis aló das diferencias entre partidos nunca houbo problemas persoais entre os membros da corporación, fosen da formación que fosen”.

Así, para Cerdeira “cando se deixa a un lado a defensa dunhas ideas e se traspasa o límite persoal, iso xa non é política”. Manuel Cerdeira e os populares do Irixo expresan o seu cansanzo por soportar desde o inicio do mandato estes ataques, “pero chegou o momento de dicir basta e esixir que no se volvan a repetir”.

O dato corresponde ao Padrón Continuo deste pasado dia 8 de abril, o concello do Carballiño rexistra 14.758 habitantes, o seu récord histórico de poboación.

Desta maneira, O Carballiño continúa incrementando a súa poboación, seguindo a tendencia dos últimos anos, e consolidándose como o segundo municipio máis poboado da provincia, tras a capital.

No último Padrón anual, que é o dato que fixa a poboación oficial e que se actualiza tan so unha vez ao ano, o dato da poboación carballiñesa foi de 14.089 habitantes, publicado no pasado mes de decembro pero con referencia ao 1 de xaneiro de 2024.

Tendo en conta agora o dato do Padrón Continuo con referencia ao dia 8 de abril de 2025, O Carballño incrementou a súa poboación nos últimos 15 meses en 669 persoas empadroadas,ata alcanzar os 14.758 habitantes.

O Consello de Turismo de Galicia reunido este martes 8 de abril aprobou a delaración de Festa Turística de Interese Galego para a Semana Santa do Carballiño, tras a documentación presentada e o informe favorable para esta designación.

O Concello do Carballño e a Cofradía da Veracruz foron os promotores deste recoñecemento, que se traducirá nun bo impulso promocional para esta celebración da Semana Santa do Carballiño.

Agora, a tramitación queda tan so pendiente da aprobación desta declaración por parte do Consello da Xunta de Galicia.

Dano Cerebral Galicia, a Federación que reúne as cinco asociacións desta discapacidade que hai na nosa comunidade autónoma, leva o 15 de abril ao Irixo unha charla que ten como obxectivos informar sobre as causas -como o ictus ou os traumatismos cranioencefálicos-, describir as secuelas, sensibilizar sobre a prevención, e achegar referencias sobre os recursos de atención ao dano cerebral adquirido dispoñibles.

Esta sesión informativa está organizada en colaboración co Concello do Irixo, e vai ter lugar o martes 15 de abril ás 10:30 Casa do Concello (Praza Manuel Penedo, 10). É unha actividade aberta a todo tipo de público, dunha duración estimada de hora e media.

Aínda que a asistencia é de balde, é preciso inscribirse. Este trámite pode realizarse chamando ao 988 287 282 (Concello do Irixo).

Identificación e prevención do dano cerebral adquirido

O dano cerebral adquirido é unha discapacidade que teñen en Galicia máis de 35.000 persoas e que está causada na maioría dos casos por un ictus ou por un traumatismo cranioencefálico (derivado sobre todo de accidentes de tráfico, pero tamén laborais, golpes, caídas...). A súa incidencia incrementouse nos últimos anos, e continúa a medrar, especialmente polo aumento de casos de ictus.

Ese aumento está motivado tanto polo envellecemento da poboación como polos cambios nos hábitos de vida (peor alimentación, máis sedentarismo, estrés, e moitos outros), ambos factores de risco do ictus. Ademais, o desenvolvemento da atención médica de emerxencias provoca que se salven vidas que continúan, pero con discapacidade adquirida.

Durante a sesión informativa achegaranse recomendacións para a prevención, así como nocións sobre como identificar un ictus, describiranse as secuelas -moitas delas invisibles, como as condutuais, emocionais ou as cognitivas-, detallando as principais necesidades das persoas e familias con dano cerebral adquirido, e ofrecerase todo o abano de recursos de atención dispoñibles.

Apoio institucional

Ademais do apoio do Concello do Irixo, Dano Cerebral Galicia conta para esta actividade co financiamento da Consellería de Política Social e Igualdade, dentro dos programas con cargo á asignación tributaria do 0,7% do IRPF; é dicir, que se organiza grazas ás persoas que marcan ‘X Solidaria’ na súa declaración da renda.

Este mes de abril, coincidindo coa celebración do primeiro ano do programa, “8M, mes a mes”, a Área de Igualdade da Deputación de Ourense quere realizar un recoñecemento especial á importancia de reunión e a sororidade entre mulleres para compartir vivencias, afeccións e pasar o tempo en boa compañía. Nesta ocasións as mulleres seleccionadas para ilustrar esta iniciativa son as “Supermulleres de Boborás” .

Son un grupo de cinco mulleres que se reúnen no concello de Boborás. Está composto por Leontina Vázquez, Mª Dolores González, Rosa Mª Pérez, Concepción García e Rocío Sobrado. Catro delas da parroquia de Sta. María de Xuvencos e unha de San Xulián de Antreses.

Este colectivo xurdiu a raíz de coincidir nun curso ofertado polo Concello de Boborás para as mulleres do rural, e co tempo consolidouse en reunións habituais. Nestas xuntanzas, fundamentalmente realizan diferentes manualidades (ganchillo, calceta, bonequiñas...), e todas elas son doadas á Asociación Española Contra o Cancro.

Ademáis da súa labor solidaria, elas mesmas comentan que usan este espazo para socializar, intercambiar ideas, libros, risas e apoio moral, creando dese xeito unha gran acción social na contorna.

Destaca tamén a Área de Igualdade que dirixe a deputada provincial Teresa Barge, que as agrupacións de mulleres, coma as “Supermulleres” de Boborás, “son moito máis que simples encontros; son fogares da alma onde o tempo se detén para dar paso á complicidade, ao apoio incondicional e á forza compartida. Nestes espazos, cada palabra, cada risa e cada man tendida entrelazan unha rede invisible pero poderosa que sostén a quen a precisa”.

Compartir vivencias, afeccións e momentos de vida converte estas reunións nun refuxio cálido onde o silencio nunca pesa e onde os soños, en lugar de esmorecer, multiplícanse, explica a deputada de Igualdade. “Son fíos invisibles que tecen lazos de sororidade, eses que fan que ningunha muller se sinta soa, que cada historia conte e que cada pequeno xesto de solidariedade transforme o mundo, un punto de ganchillo, unha aperta ou unha gargallada á vez”, conclúe Teresa Barge.