No salón de actos o Aparthotel Arenteiro que se atopaba cheo, foi presentado Celso Carballal Gómez, coñecido empresario durante moitos anos no Carballiño, como número 2 da lista dos Populares.

Arroupado por Rosendo Fernández, secretario Xeral do PPOU, e por Argimiro Marnotes, presidente do PP do Carballiño, foi o propio Ricardo Perea, candidato á alcaldía, quen o presentou como “unha persoa honrada, traballadora e cercana, cunha experiencia e coñecemento de todo o territorio tanto urbano como rural, e das súas necesidades en infraestruturas".

“Non pode, un alcalde como no mandato actual, ser o propio concelleiro que xestione o día a día das melloras en obras, pois para iso necesítase unha dedicación especial, e xa non digamos coñecemento e oficio”, destacou Ricardo Perea, que ademáis aproveitou para dar uns avances sobre cales van a ser as líñas xerais do programa electoral do Partido Popular.

Celso Carballal advertiu que non se incorpora para dar grandes conferencias, senón que para traballar codo con codo, sendo un mais da brigada de obras, para transformala nunha ferramenta o mais moderna e útil posible e resolver xunto con eles, os problemas do pobo e dos veciños.

Traballará para que "no prazo dos 4 anos de mandato os 97 km de viais municipais esteen en perfecto estado de reposición e se garanta por parte do concello o seu mantemento alomenos durante os 10 anos seguintes, e todo sen distinción de barrio, parroquia ou pobo", subliñou.

Rosendo Fernández, dixo de Celso Carballal, que o coñece por agora “pola súa firme decisión de incorporarse activamente á política municipal, que xa non é pouco, ver que alguén se aparte dunha zona de confort persoal para dedicarse a mellorar a vida dos seus veciños”.

Varias localidades do rural masidao renovarán nos próximos meses a súa iluminación pública cunha primeira axuda que o Goberno de España lle acaba de conceder ó Concello de Maside.

O Goberno de España, a través do Instituto para la Diversificación y Ahorro de la Energía (IDAE) dependente do Ministerio para la Transición Ecológica, acáballe de conceder ó Concello de Maside unha subvención de 103.000 € para a renovación da iluminación pública exterior en varias zonas do municipio.

O proxecto consiste nunha actuación en máis de 300 puntos de luz existentes na que se substituirán as actuáis luminarias, de diferentes tecnoloxías convencionais, por luminarias LED, moito máis eficientes. Asemade este cambio irá acompañado da instalación de 7 cadros de mando e medida monofásicos. “Con esta actuación, afirma o rexedor municipal José Manuel Iglesias, vaise diminuír a potencia de 36,10 kW a 10,90 kW e imos conseguir un aforro enerxético estimado do 80%”.

Algunhas das localidades que recibirán esta actuación son O Mato, Bouzas, Garabás, As Quintás de Piñeiro, Canedo, San Paio, O Bolo ou A Carreira de Louredo. E para seleccionalas tivéronse en conta as diversas características das instalacións cuxa renovación permitise conseguir o maior aforro posible pois a finalidade deste proxecto é favorecer o paso a unha economía baixa en carbono, un dos obxectivos básicos da Unión Europea e dos países que a constitúen.

Sinala o alcalde que o aforro enerxético sempre foi unha constante preocupación ó longo destes anos do grupo de goberno que preside, chegando a conseguirse unha minoración no gasto dos recibos de luz moi importante, “a pesar da suba tremenda da enerxía nos últimos dez anos”. E acaba engadindo que “reducións de gasto en servizos coma este, sen mermar a calidade dos mesmos, son as que nos permiten destinar máis recursos a ofrecerlles ós veciños outros servizos dende a óptica social e mellorar a súa calidade de vida”.

A alcaldía está agardando a comunicación por parte do Goberno do Estado da segunda subvención destinada ó illamento térmico e á mellora do pavillón municipal da Alameda. Conclúe José Manuel que “hoxe ten máis que lle envexar un veciño da cidade a un de Maside que ó revés”.

A Semana Santa carballiñesa, ademáis das procesións e celebracións relixiosas que organiza a Cofradía da Veracruz, contará cun amplo e variado programa de cultura e deportes, que foi presentado esta mañá polos concelleiros de Cultura e Deportes, Diego Fernández e Manuel Dacal, respectivamente.

Arredor dunha trintena de actividades desenvolveranse ao longo da próxima semana no Carballiño co obxectivo de atraer ao turismo e ofrecer aos carballiñeses e visitantes unha variada gama de alternativas de entretemento.

No eido deportivo destacan tres grandes eventos, como son a recuperación da Subida á Saleta, que celebra a 21 edición e terá lugar o sábado 13 e o domingo 14. Por primeira vez na historia, haberá unha competición de piragüismo no río Arenteiro: Campionato Galego Xogade Piragüismo, en modalidade K1, onde participarán arredor de 400 palistas das categorías prebenxamin, benxamín e alevín, e que terá lugar entre a presa do parque municipal (pasarela do Hotel O Xardín) e a ponte de Toscaña. E o II Torneo Fútbol Sala Senior Feminino, que se disputará o sábado 20 no pavillon de deportes, con 14 equipos de toda Galicia inscritos.

Manuel Dacal dixo que eran eventos de gran trascendencia deportiva e económica, pois a participación nos tres era moi elevada e atraerán a moita xente. Destacou o gran interese da Subida á Saleta, e o feito histórico de celebrarse unha proba de piragüismo no río Arenteiro, organizada pola Federación Galega. Por eso agradeceu á organización dos tres eventos estas iniciativas que situaban ao Carballiño no centro do deporte galego.

No ámbito cultural destacan, ademáis das excelentes proxeccións do Cine Club, o espectáculo Os Monicreques do Kukas, coa obra “Xan Perillán compra queixo, compra pan”, en colaboración coa Rede Galega de Teatros e Auditorios, que terá lugar no auditorio municipal o sábado 13 ás 18,00 h. E a obra de teatro “A leituga”, da compañía EME&DOUS, tamén dentro da Rede Galega de Teatros e Auditorios, que terá lugar o sábado 27 de abril, ás 21,00 h., no auditorio municipal.

Así mesmo, haberá un gran concerto de piano e canto, homenaxe ao Mestre Vide, autor da música da canción “Carballiño”, considerada como o Himno do Carballiño. Actuarán a pianista Noemí Salomón e a soprano Anaís Fernández, e a colaboración da Coral Polifónica Casino do Carballiño. Será o mércores 17, ás 20,00 h., no auditorio municipal, coa entrada totalmente libre.

Os outros concertos de interese son “Xan Curiel e Charo Pita. Homenaxe a Antonio Fraguas, dentro da Rede de dinamización lingüística “Canta miña pedra canta”, que será o xoves 18, ás 20,30 h., na Praza Maior. E o concerto do grupo carballiñés “The Impossiblues”, que actuarán o sábado 20, ás 23,30 na Praza Maior.

O sábado 13, a partir das 21,00 h., haberá unha foliada polas rúas que organiza a Agrupacion Cultural Avantar, e o domingo de Pascua, 21 de abril, haberá un baile-verbena na Praza Maior a cargo da orquestra Aramio. E o martes 16, día de feira, na que tamén haberá animación musical de rúa.

Finalmente, o domingo 21, ás 11,00 h., terá lugar unha ruta cultural entre a Ponte de Veiga e o Museo Etnográfico do Arenteiro, dirixida polo arqueólogo Jorge Lamas.

Diego Fernández destacou o amplo e variado programa cultural desta Semana Santa, no que tamén haberá tres obradoiros na biblioteca municipal os días 15, 16 e 17 de abril, e catro sesións de risoterapia nas parroquias. Dixo que atendía tanto o interese dos máis cativos como dos adultos, con actos dirixidos a dinamizar a vila e ofrecer alternativas culturais e de ocio aos visitantes e veciños.

Uxío Rodríguez volve asi as súas orixes, xa que comezara a súa traxectoria política nos anos 80 sendo concelleiro do PSOE no concello do Carballiño.

Tras abandonar as filas do PSOE por desavenencias con Pachi Vázquez, agora o camiño que siguen ambos é a inversa, igual que o exalcalde socialista de PIñor Francisco Fraga.

Mentres os exsocialistas están agora no Espazo Común, Uxío Rodríguez está de volta no PSOE, e será o seu candidato á alcaldia do Concello de Piñor.

Con él, integraránse na candidatura socialista a maior parte das persoas que fai catro anos concurriran coa candidatura de Veciños de Piñor, que obtivera dous concelleiros na corporación municipal piñorense.

Despois, no inicio do mandato propiciaron un cámbeo de ciclo político no concello de PIñor asinando un pacto de gobernanza co Partido Popular, que romperon fai agora ano e medio por discrepancias co alcalde José Luis González.

Os sociaslitas de Leiro lamentan a actuación da Deputación á que acusan "por motivos ecolóxicos e de dano o medio ambiente".

No ribeiro, concretamente nos concellos de Leiro e Cenlle, as brigadas de traballo do ente provincial comezaron os traballos de roces na estrada que une Carballiño con Cabanelas e na de San Clodio-Rioboo. Uns traballos que "se converteron nunha auténtica masacre a nivel ecolóxico, ca tala de piñeiros, salgueiros, carballos ou érbedos",critican os sociaslitas.

O PSdeG-PSOE da localidade de Leiro censura esta práctica, "a que se suma posteriormente, o uso de herbicida para queimar os restos dos roces, sen pensar no dano que se está facendo o ecosistema, xa que nas inmediacións hai ríos", subliñan.

O voceiro socialista en Leiro, Manuel Rodríguez non da creto o acontecido “non entendo como a Deputación de Ourense, un ente público, pode cometer atrocidades deste tipo contra o medio ambiente e causar estes estragos nun recuncho tan fermoso coma o Ribeiro”.

Os socialistas critican tamén que os restos desta tala indiscriminada queden tirados nas cunetas, sen retirar e co uso de herbicidas. “Non contentos con talar árbores centenarias e especies autóctonas, deixan a maleza toda nas cunetas e para rematar a faena, bótanlle herbicida co obxectivo de queimar a maleza, causando un severo problema nos ríos de arredores”, explica o voceiro socialista.

Para Manuel Rodríguez é "un escándalo" a actuación da Deputación. “O que non pode ser é que a administración pídalle a veciñanza que limpe as súas fincas, propiedades e montes e despois, sexa o ente público o que fai todo o contrario, coa tala indiscriminada de érbedos, carballos, piñeiros ou salgueiros”, remarca

Os socialistas explican que están de acordo nas limpezas de cunetas, pero non nos traballos feitos pola Deputación, co rozado de máis de 5 metros exteriores a cuneta e que se introducen no monte.

Finalmente, manifestan que“foi un traballo feito de forma salvaxe e premeditada, sen pensar nas consecuencias que tería para o ecosistema”.

O cantautor arxentino -de 79 anos- faleceu en Madrid, onde residía nos últimos anos.

Alberto Cortez fora recoñecido como Fillo Adoptivo do concello de Punxín, a única persoa que conta con esta distinción neste concello, de onde era orixinario o seu abó, emigrante a Buenos Aires a principios do século XX, e a quen dedicou unha das súas grandes cancións "El Abuelo".

 En Punxín, aínda residen familiares do que é dos grandes cantautores argentinos de todos os tempos.

O Concello do Irixo vai celebrar o sábado 6 de abril, ás 12 h., no Salón de pleno, o acto no que se fará entrega á familia da declaración de Fillo Predilecto do Irixo, a título póstumo, a D. Elixio Villaverde García .

Elixo Villaverde finou o 14 de setembro de 2018, ós 64 anos de idade, e o vindeiro 6 de abril cúmprense os 65 anos do seu nacemento no Irixo. A concesión de tal distinción foi decidida recentemente polo Pleno do Concello do Irixo por unanimidade dos seu membros en base ós seus méritos como profesor, educador, animador sociocultural, historiador, ecoloxista e galeguista. A continuación deste acto descubrirase unha placa na fachada da casa onde naceu situada na praza do concello do Irixo.

Elixio Villaverde era licenciado en Xeografía e Historia pola Universidade de Santiago de Compostela e Doutor en Historia tamén pola USC. Autor de libros de relevancia no campo da investigación histórica como “A Terra de Orcellón”, “Heroes e Mártires. A II República e a Guerra Civil no Barbanza”, “Ramón Martínez López pola Universalide de Galicia”, “Pioneiros na Corrente do Golfo. A primeira emigración galega a México (1837-1936)” e “Galegos en México (1878-1936) Inmigración e sociedade no alén mar”. Está pendente de editar o seu derradeiro traballo, “Arrieiros somos, Viños do Ribeiro de Avia cara a Santiago e a A Coruña por camiños de mil anos”.

Escribiu tamén os limiares de varios libros, na Enciclopedia Galega, en diversas revistas científicas e de divulgación, en diversos periódicos do Estado Español e de América. Participou en numerosas conferencias e mesas redondas. Tamén tivo unha destacada participación no documental “Avión, el pueblo ausente”.

Este recoñecemento fíxose a proposta da asociación cultural Arracada do Irixo.

Arredor de 150 profesores, educadores sociais e estudantes participarán no XXXIII encontro Galego-Portugués pola Paz, que se desenvolverá na Residencia do Tempo Libre do Carballiño, do 3 ao 5 de maio. Así o manifestou o profesor da Facultade de Ciencias da Educación do campus universitario de Ourense e integrante do colectivo Nova Escola Galega, Xosé Manuel Cid Fernández, durante o acto de presentación deste evento ao que tamén asistiu o alcalde do Carballiño, Francisco Fumega; a profesora Alicia González Barreiro e a directora da Residencia do Tempo Libre, Pilar Sotelo.

Este encontro volve ao Carballiño tras trinta anos de terse celebrado na vila, e nesta edición o fai co lema “Reciclar, Reutilizar, Reducir, Repartir: Repensando a Non Violencia desde o Ecopacifismo”. Cid Fernández dixo ao respecto que traballar pola paz era facelo por un sistema máis xusto, no social, no educativo, no ecolóxico, e por eso no programa figuran temas e propostas que van neste sentido.

Francisco Fumega destacou a implicación do profesor Xosé Manuel Cid con moitas inciativas do Carballiño vencelladas coa educación e a cultura, como o Centro de Estudios Chamoso Lamas, e destacou o importante papel desenvolvido pola profesora carballiñesa Alicia González Barreiro e a directora da Residencia do Tempo Libre, Pilar Sotelo, para que este encontro se poidera celebrar no Carballiño.

A dinámica do encontro é horizontal e participativa, de modo que se impliquen todas as persoas matriculadas.

Como nas anteriores edicións, ao remate do encontro, o domingo 5 de maio ás 12,30 h., realizarase o Paseo e largada da pomba, que é a solta dunha pomba fabricada con poliexpán e atada a uns globos de helio, que se recollerá alí onde caia, sempre que sexa posible.
A organización ten fixado un prezo reducido de matrícula para estudantes, que tamén se fai extensivo para o profesorado do Carballiño.