A 56 Festa do Pulpo do Carballiño pode marcar un novo record de participación. Así, as tarxetas para o xantar no recinto oficial do parque municipal están xa agotadas, e as reservas nos establecementos hostaleiros da vila tamén se completaron.

Non obstante, tanto no parque municipal como como nos bares e mesóns da vila que non admiten reservas neste día, hai capacidade suficiente para acoller a varios miles de persoas durante o xantar.

Para satisfacer a forte demanda de pulpo neste día, haberá postos de abondo de pulpeiros e pulpeiras no parque municipal, e tamén na vila.

SÁBADO, 11
Pola mañá, ás 12,00 h. concerto de música tradicional co grupo Feitizo de Pau na Praza de Abastos.
FESTA DAS CAMISETAS
O sábado, 11 de agosto, víspera do día grande da Festa do Pulpo, é unha xornada na que os protagonistas son os mozos e mozas, e moitas familias e grupo de amigos, que elaboraron camisetas para presentarse ao Concurso de Camisetas da Festa do Pulpo. Arredor de 2.000 persoas repartidas en máis de 80 peñas apuntáronse este ano para o concurso.
As peñas comezan a chegar á Praza Maior a primeiras horas da tarde, pero o evento comeza ás 18,00 h., coa exposición das camisetas elaboradas con motivos alusivos á Festa do Pulpo.
Despois comeza a Festa das Camisetas, con animación musical de batucada, charangas e DJ. Desfile de peñas polas rúas céntricas da vila. Fallo do concurso e entrega de premios ás peñas coas mellores camisetas e ás peñas máis numerosas.
Pola noite, animación polas rúas e prazas da vila.

DOMINGO, 12
Pola mañá, unha salva de bombas anuncia o comezo da 56 Festa do Pulpo, que se celebra no parque municipal, pero tamén na vila.
Charangas e grupos de música tradicional animarán as rúas e o parque durante todo o día.
As pulpeiras e pulpeiros comezan a cocer o pulpo a primeiras horas da mañá, e a partir das 12,00 h., xa se pode comer pulpo nos máis de medio cento de postos de pulpo que hai no parque e nas rúas e establecementos hostaleiros da vila.
Ás 13,00 h., recepción de autoridades na carpa instalada na explanada da entrada do parque municipal. Ademáis das autoridades autonómicas, provinciais e locais, asistirá o presidente do Centro do Carballiño en Bos Aires, Emilio Nogueira, a quen se lle dedica este ano a Festa do Pulpo por cumprir cen anos da súa creación, así como a cónsul xeral de Arxentina en Vigo, Silvina Montenegro.
Ás 13,15 h., na pista do kiosko do parque, exhibición de música e baile tradicional, co Colectivo de Música e Baile Tradicional Puntapé, de A Coruña.
Pódese degustar o pulpo, a carne ao caldeiro, a empanada e demáis produtos da gastronomía galega en calquera dos múltiples bares instalados por todo o parque.
No recinto oficial do concello o xantar comezará ás 14,30 h. O menú consiste en empanada, pulpo á feira, carne ao caldeiro, caldo e postres típicos, ademáis de pan de Cea, viños e licores do Ribeiro, para finalizar cunha queimada.
A festa sigue no parque durante toda a tarde, e a partir das 21,00 h, haberá unha verbena na Praza Maior coa Orquestra VENEZIA.

OPERATIVO DE SEGURIDADE
Co obxectivo de favorecer o tráfico, e para que todo transcurra da mellor maneira posible, hai previsto un gran operativo de seguridade con axentes da Garda Civil, Policía Autonómica, Policía Local, Protección Civil, Bombeiros e emerxencias.

De todos modos recomendase aparcar nas estradas das aforas da vila, xa que as rúas do casco urbano quedan prácticamente colapsadas dende media mañá.

Continúa a conta atrás para chegar á 56 Festa do Pulpo deste próximo domingo dia 12 de Agosto, e facémolo con dous espectáculos musicais que terán como escenario a Praza Maior do Carballiño.

Este xoves dia 9 ás 11 da noite, con Andrea Pousa e o Bruxo Queiman, comandando Keltia O Musical, e o venres deia 10 á medianoite co concerto que ofrecerá Mikel Erentzun. Para o sábado quederá a música tradicional de Feitiche de Pau e a Festa das Camisetas das Peñas da Festa do Pulpo.

KELTIA O MUSICAL, conta a historia do nacemento da Cultura Atlántica en terras galegas, cando Europa aínda estaba sobre unha capa de xeo e a vida humana só era permisible en terras de Keltia/Galicia.

Ante o desxeo dos mares, os descendentes de Breogán parten cara a terras do norte e colonizan os 6 países celtas, dando orixe á primeira civilización de Europa, os celtas.

As 3 deusas irlandesas, Eire, Fotla e Banba, que axudarán aos netos de Breogán á Conquista de Irlanda, viaxan a Keltia/Galicia e a beleza paisagística, cultural, gastronómica, fai que se acaben namorando duns Príncipes Celtas. Pero, o amor non virá só, acompáñano malos agoiros, invasións romanas, batallas…todo isto e máis co que os protagonistas desta Historia terán que aprender a vivir, loitar e soñar…

Todo isto transmitindo a espiritualidade do celta co romano e o seu contacto coa natureza, a súa tradición; a súa esencia. A historia contada a través de mitos e lendas que chegan ata os nosos días, que unidas co cristián forman parte da cultura dos pobos do Atlántico.

Obxectivos do Espectáculo:

Transmitir a historia da nosa cultura atlántica, os castros, os celtas e a cultura romana, dos pobos atlánticos.
Rescatar a esencia e sabedoría dunhas culturas esquecidas e ocultas no tempo, o seu contacto coa natureza, os seus símbolos sacros, as súas lendas e tradicións.
Proporcionar ao público un espectáculo dinámico, positivo, ameno, visual, interactivo, pleno de sentimento e enerxía.
Hermanar nosa cultura atlántica co resto das culturas do mundo, a través da música, o canto, a danza e a declamación.
Elenco artístico:

PRÍNCIPE CELTA BRANDAL: Bruxo Queiman.
DEUSA EIRE: Andrea Pousa.
DEUSA BANBA: Cristina Neto.
DEUSA FOTLA: Rosana Fernández.
GUERREIRO CELTA EVER: Andrés Lorenzo.
GUERREIRO CELTA EREMON: Miguel Lorenzo.
DRUÍDA: Sergio Gramary.
CELTA PERCUSIONISTA: Suso Feisón.
CELTA PIANISTA: Miro Míllara.
CELTA TECLISTA/EFECTOS: Carlos Mariño.
CELTA #BAIXISTA/ GUITARRISTA: Javier Fernández.
CELTA VIOLINISTA: María Jorge.
CELTA BOUZUKI: Samuel Soto.
CELTA FLAUTISTA/ GAITEIRO/ BAILARÍN: Andrés Lorenzo.
CELTA FLAUTISTA/ GAITEIRO: Abraham Fernández.
GUERREIRO DE LUZ: Joao Alvim
POBOADO CELTA: Banda de gaitas “Vos Coribantes” (Baile tradicional e gaitas).
ROMANOS: Garda Pretoriana de Lugo

O concello tributou hoxe unha emotiva homenaxe ao histórico grupo de gaitas “Airiños do Carballiño”, co gallo da celebración da semana grande dos actos da 56 Festa do Pulpo.

O acto, que estivo presidido polo alcalde, e ao que asistiron dous dos integrantes da formación primixenia do grupo, José María Álvarez Rabanillo e Eduardo Bernánder López, así como o integrante dunha formación posterior, Manuel Cendón, ademáis dos concelleiros de Turismo e Cultura, José Manuel Dacal e Diego Fernández, e dúas concelleiras representando ao grupo municipal do PP, Pilar Caride, e ao do BNG, Sofía Hermida, congregou no salón de plenos de concello a familiares dos integrantes.

No saúda, o alcalde explicou os motivos da homenaxe, e fixo fincapé na trascendencia deste grupo de gaitas na historia da música tradicional galega no Carballiño.

“O pasado ano, con motivo da presentación da cantiga dedicada á Festa do Pulpo por Xosé Luis Foxo co título de “A pulpeiriña do Arenteiro”, Felipe Senén escribiu un artigo titulado Músicas e Cantares Populares que resoan no Carballiño. Neste artículo citábase ao grupo de gaitas Airiños do Carballiño.

Foi realmente un grupo histórico da nosa vila, nado no ano 1969 por mor dun grupo de amigos que xogaban cada día a partida no Bar Sobrino, e que colleitou moitísimos éxitos ata a primeira metade da década dos anos 70, cando deixaron de tocar xuntos porque eran tantas as actuacións que tiñan, que xa afectaba aos seus traballos, e había que elexir entre o un ou o outro.

O grupo estaba formado por José María Álvarez Rabanillo, José Carramal Bueno, Manuel “Chantada”, Ernesto Roo, José Villar Pereira, César Pereira Rodríguez, Angelino García Bravo “Geli” e Eduardo Bernárdez López.

Tiveron a primeira actuación na Festa do Pulpo do ano 1970, e nese mesmo ano formaron a Unión co Ballet Folklórico Orensano.

Pronto acadaron unha gran sona e actuaron en Oporto, Visseu, Liceo de Matosinhos, Liceo de Lugo, en Bilbao e en moitos outros lugares.

No ano 1971 foron invitados polo programa España en directo de TVE, grabando todo o contido musical do programa, cunha trascendencia extraordinaria.
Ademáis da calidade musical do grupo, “Airiños do Carballiño” caracterizouse por vestir traxes de gala de gaiteiro, sendo probablemente o primeiro grupo de gaitas ataviado co traxe de gala de gaiteiro con chaqueta.

Aqueles traxes foran confeccionados por unha modista de Toscaña, según un modelo copiado dun libro que se atopou na tamén histórica librería Soto, ubicada na rúa do Paseo do Carballiño.

Non cabe dúbida que Airiños do Carballiño marcaron unha época, e de aí esta homenaxe, que ten lugar nas vísperas da 56 Festa do Pulpo, lembrando a súa primeira actuación hai corenta e oito anos, nunha daquelas primeiras edicións da festa.

En memoria daquel acontecemento queremos lembrar hoxe a todos os compoñentes da formación, aos que lamentablemente xa non están con nós (José Carramal Bueno, Manuel “Chantada”, Ernesto Roo, José Villar Pereira e Angelino García Bravo “Geli”), e aos que sí están, José María Álvarez Rabanillo, César Pereira Rodríguez e Eduardo Bernarde López, por aquela iniciativa de recuperación da música tradicional galega e de promoción do nome da nosa vila.

Así mesmo, queremos render homenaxe a quenes conformaron dous anos despois outra formación co mesmo nome, e ao grupo de gaitas do Centro do Carballiño en Bos Aires, a quen lle dedicamos este ano a Festa do Pulpo, e que tamén leva o nome de “Airiños do Carballiño”.

E ademáis, queremos recoñecer o labor doutro grupo histórico de gaitas que xurdiu despois co mesmo nome de “Airiños do Carballiño”, d despois como “Os Renovados”, e do que hoxe temos aquí a un dos seus compoñentes, a Manuel Cendón.

Todos eles, xunto con outros grupos que se crearon máis adiante, como Eiras Nosas, Orcellón e o Grupo de Gaitas da Escola Municipal do Carballiño, que ten na actualidade grandes intérpretes, e que de feito un dos gaiteiros da nova xeración, Isidro Vidal, xunto co seu irmán e outros músicos, vainos interpretar unha composición súa dedicada á Festa do Pulpo, e que se chama “Muiñeira do Pulpo, conforman un grandísimo elenco de músicos carballiñeses que sempre mantiveron viva a nosa cultura, e que nos situaron nun lugar de privilexio en canto á recuperación e interpretación da música tradicional de Galicia.

A todos eles, gracias por espallar o nome do Carballiño por Galicia e polo mundo adiante con orgullo.
Todos sondes parte importante da historia do Carballiño, e temos que dar gracias por contar na actualidade con grandes intérpretes que siguen esta tradición e que garanten que a nosa música goza de boa saúde na vila do Arenteiro.”

A continuación, Francisco Fumega fixo entrega dunha placa conmemorativa desta homenaxe aos integrantes do grupo Airiños do Carballiño presentes no acto.

Por parte do grupo interveu Eduardo Bernárdez, que se referiu aos tempos da súa creación, a finais dos anos 60 e comezos dos 70.
Finalmente, o gaiteiro carballiñés Isidro Vidal fixo a estrea dunha composición súa titulada “Muiñeira do Pulpo”, creada por el mesmo para esta edición da Festa do Pulpo.