Por segundo ano consecutivo o CCA propuxo este convenio ás asociacións de nais e pais de alumnos dos distintos centros educativos da comarca, que repercutirá en ventaxas de tipo económico para as familias asociadas ás ANPAS.

A finalidade do convenio é fomentar as compras no comercio local e fidelizar como clientes ás familias da comarca carballiñesa.

Das catro ANPAS que participaron desta iniciativa o pasado curso, pasamos ás 12 que suscribiron o convenio este novo curso.

Son as ANPAS dos colexios de Punxín, Maside, San Amaro, O Irixo, Boborás, Cea, asi como os centros carballiñeses Trastes, Sagrado Corazón, A Uceira, Vila do Arenteiro, IES nº 1 e IES Chamoso Lamas.

¿Cómo funciona?

Os establecentos terán nas súas portas unha pegatina identificativa como establecemento colaborador coas ANPAS. Os socios destas asociacións deberán presentar o carnét anpa/CCA xunto co seu DNI, e asi obterán descontos directos nas compras, que van dende o 5% ao 15% do total da compra.

O alcalde do Carballiño, Francisco Fumega, presentou hoxe o Plan de Mellora de Infraestruturas Viarias e Instalacións Deportivas e Culturáis, que se executarán neste último trimestre de 2017, e que suporán un investimento de caso 600.000 euros, que serán aportados polo concello, pola Deputación Provincial e por diversas Consellerías da Xunta de Galicia, a través de convenios xa asinados. Algunhas das obras anunciadas comezaron xa e o resto o fará nos próximos días e semanas.

Trátase dun total de doce obras, que se realizan no casco urbano e nas parroquias, e que son “proxectos prioritarios neste momento”, tal e como asegurou Francisco Fumega en rolda de prensa.

No medio rural inclúense os seguintes proxectos: Acceso ao balneario das Caldas de Partovia; Rúas Outeiriño e Xesteira, en Señorín; Estrada de circunvalación do Campo da Festa en Veiga e Acceso dende o Grupo Escolar a Partovia polo Penedo.

No casco urbano os proxectos son: Rúa Otero Pedrayo, Rúa Aquilino Sánchez e Camiño de Aquilino Sánchez e Beirarrúas da Avenida do Parque dende a antiga casa do Peón Caminero ao Instituto Chamoso Lamas.

As isntalacións deportivas que serán obxecto de mellora son: Substitución do parquet da pista do pavillón anexo do Pavillón de Deportes e Renovación dos vestiarios do estadio municipal de Espiñedo.

Finalmente, contémplase a renovación dos servizos da pranta baixa da Casa da Cultura.

O parque de bombeiros do Carballiño acolleu esta mañá unha clase práctica dun curso sobre drones para casos de emerxencia e no que participaron 21 persoas entre bombeiros, sanitarios do 061, ambulancias e grupos de emerxencia local.

Trátase do primeiro curso oficial deste tipo que se fai en España e Europa, e o Parque de Bombeiros do Carballiño será o primeiro de España que conte cunha unidade de drones.

O alcalde do Carballiño, Francisco Fumega, seguiu “in situ” a clase práctica dende o posto de mando.

Esta práctica consistiu no traslado por un dron dun botiquín de emerxencia a unha persoa ferida nun lugar inaccesible, tras dun accidente dun transporte de substancias perigosas.

A Deputación de Ourense toma a iniciativa para cooperar cos concellos e os veciños da provincia de Ourense, "con disposición e dispoñibilidade absolutas para colaborar con outras administracións públicas co obxectivo de atender os casos de necesidade, como a reconstrución de vivendas afectadas polo lume, traídas de auga e melloras en estradas e camiños", afirma Manuel Baltar.

O presidente do goberno provincial mantivo unha reunión co alcalde de Cea, José Luis Valladares, un dos municipios que sufriu na provincia de Ourense as consecuencias do lume, xuntanza na que analizou a afectación que tivo a vaga incendiaria en poboacións en montes deste concello. Baltar afirma que este "é o momento de actuar nunha situación de emerxencia diante das graves consecuencias provocadas polos incendios, non de perder o tempo en determinar as competencias das administracións. Cómpre efectividade, cooperación e solucións, sen pararse en escusas burocráticas, porque do que se trata é de asistir a persoas que están a necesitar servizos básicos e a concellos que demandan a posta en funcionamento de infraestruturas que resultaron danadas polos incendios. Diante diso non cabe máis determinación que actuar, axudar, cooperar e amosar a total dispoñibilidade, como fai a Deputación de Ourense, na procura de solucións que palíen na medida do posible esta emerxencia", remarca Manuel Baltar.

O presidente explicou que a Deputación de Ourense axudará na tramitación das solicitudes que lle fagan chegar os concellos afectados polos lumes, "para que no menor prazo de tempo posible se poida facer efectivo o trámite e se realicen as obras de reparación necesarias". Neste sentido, o presidente da Deputación xa ten disposto axudas para cuestións xa plantexadas por concellos e asociacións, como redacción de proxectos de rehabilitación de vivendas ou traídas de augas veciñais.

Manuel Baltar reitera a "total colaboración" da institución provincial cos operativos de extinción de incendios por medio da cesión de recursos humanos e materiais da propia institución e do consorcio provincial de incendios, así como outras accións como asumir o custo íntegro dos grupos de emerxencia supramunicipal ou a elaboración dun mapa provincial de emerxencias, e subliña a necesidade "de consolidar un modelo de participación, análise e avaliación da situación, perspectivas de mellora e coordinación ante os incendios forestais e emerxencias en xeral".

Nesta liña, avanza entre as propostas poñer en marcha un sistema de información a través de dispositivos móbiles "para que os cidadáns coñezan en tempo real os lumes activos, localización, nivel e os medios e persoal que colabora na extinción", ao que se engadiría "un plan de cooperación para que os concellos dispoñan de plans municipais de prevención e defensa contra incendios forestais e os integren nos plans de emerxencia municipais".

Unha delegación de corresponsais de medios de comunicación extranxeiros visitarán O Carballiño esta semana, dentro dunha iniciativa promovida polo concello, en colaboración coa Dirección Xeral de Turismo da Xunta de Galicia, dirixida á consecución da declaración da Festa do Pulpo como Festa de Interese Turístico Internacional.

A visita terá lugar do 26 ao 28 de outubro, o xoves, venres e sábado, respectivamente, e asistirán xornalistas de revistas de turismo, radios e axencias de diversos países como Francia, Alemaña, México, Brasil, Argentina, Uruguay, Canadá e China. A delegación estará integrada por oito xornalistas.

Durante os días de estancia, os xornalistas visitarán os principais recursos monumentais e turísticos do Carballiño, como os balnearios, o templo da Veracruz e o Parque Municipal, así como o mosteiro de Oseira, por estar na orixe da introducción do pulpo nas terras do Carballiño, especialmente en Arcos.

Ademáis, recibirán información alusiva á Festa do Pulpo, e participarán nun xantar no que se ofrecerá o menú característico desta festa: empanada, pulpo á feira, carne ao caldeiro, melindres, viños e licores do Ribeiro, e queimada final. O obxectivo é que se publiquen reportaxes sobre a Festa do Pulpo do Carballiño como unha das celebracións gastronómicas máis destacadas de Galicia, e poder contribuir así á declaración da Festa do Pulpo como Festa de Interese turístico Internacional.

Dentro desta mesma iniciativa, hai dous meses, medios de comunicación especializados en turismo de México, Arxentina, Uruguay, Canadá e Estados Unidos publicaron reportaxes sobre a Festa do Pulpo do Carballiño. Para levar a cabo esta campaña, o concello conta co patrocinio da Dirección Xeral de Turismo da Xunta de Galicia, e de feito, a directora de Promoción da Axencia de Turismo de Galicia, Mª Carmen Pita, asistirá o venres 24 ao xantar cos xornalistas.

A Festa do Pulpo cumpre prácticamente cos requisitos que se esixen para acadar a declaración de internacionalidade, pero quérese reforzar a solicitude incorporando unha serie de noticias e reportaxes publicados en medios de comunicados internacionais.

A Audiencia Provincial de Ourense desestima o recurso de apelación que fora interposto polos actúais concelleiros de MoveBoborás Eva Pardo e José Benito Trigás, asi como por exconcelleiros de PSOE e BNG e un veciño da Almuzara, en relación ao arquivo da querela contra o alcalde de Boborás, Cipriano Caamaño, polos presuntos delitos de prevaricación urbanística e contra a ordenación do territorio.

A querela foi presentada tras a polémica promovida pola oposición  municipal de Boborás  en relación á situación legal da vivenda construída pola esposa do rexedor, na localidade da Almuzara.

Neste auto, os 3 maxistrados da Audiencia que o asinan, desestiman o recurso de apelación contra o arquivo da querela, que anteriormente acordara o Xulgado de 1ª instancia e Instrucción do Carballiño, polos supostos delitos contra a ordenación do territorio e prevaricación urbanística, unha querela que os denunciantes presentaron contra Cipriano Caamaño, e que despois ampliaron contra a esposa do alcalde, Maria del Carmen Cives, e o redactor xefe do PXOM de Boborás.

Unicamente continúa aberta esta causa contra o alcalde de Boborás no que respecta ao presunto delito de falsedade documental, neste caso a causa está pendiente de informes caligráficos.

Este auto da Audiencia que desestima o resurso de apelación dos querelantes é firme, e contra o mesmo non cabe recurso.

Arredor de seiscentas persoas participarán na XIII edición do Día da Bici, que se desenvolverá este domingo, 22 de outubro, cun percorrido urbano de 9 km. Entres as máis de 400 persoas que xa están inscritas, figuran dende nenos de curta idade a un home de 84 anos.

A ruta partirá ás 11,30 h., dende a Praza da Veracruz e rematará sobre as 13,00 h., no mesmo lugar.

A previsión de bo tempo para o domingo fai albergar unha boa expectativa de participación, pois as persoas interesadas poderán inscribirse incluso antes de comezar a proba, dende as 10,00 h., ata as 11,30 h., no posto de información da Praza da Veracruz. Neste posto tamén se entregará o agasallo ás primeiras 400 persoas que se inscribiron.

O evento foi presentado esta mañá polo concelleiro de Deportes, José Manuel Dacal, e o directivo do Club Ciclista Carballiño e propietario de Sobre Rodas, Roberto Rodríguez.

Dacal explicou que se trata dunha iniciativa deportiva lúdica, non competitiva, que promove o uso da bicicleta como medio ecolóxico de desprazamento durante todo o ano, pero que se intenta que nesta xornada adquira maior importancia. Por iso, pediu disculpas aos veciños e conductores, xa que se cortarán moitas rúas da vila polo paso dos ciclistas.

Roberto Rodríguez agradeceu que se contase unha vez máis co Club Ciclista Carballiño para colaborar, e tamén animou aos carballiñeses e a toda a xente dos concellos da comarca ou de calquera outro lugar a que se acheguen ata O Carballiño e disfruten con esta ruta, que é totalmente lúdica e que de feito terá zonas e tramos de reagrupamento.

Asemade dixo que Sobre Rodas ofrecerá un servicio de asistencia mecánica antes do comezo para solventar calquera problema que xurda coas bicicletas.

A ruta terá un percorrido de 9 km e percorrerá as rúas Curros Enríquez, Conde Vallallano, Aldara, Principal, Martínez Avellanosa, Marcelino Larrondo, Avda. do Balneario, Pedriña, Canteiros, Astureses, Paseo do Arenteiro, Avda. de Vigo, zona Residencial, rúa Galicia, Calvo Sotelo, Principal, e remate na Praza da Veracruz.

Así mesmo, crearase un circuito na Praza da Veracruz para os máis pequenos, co obxectivo de que os que non poidan participar na marcha o fagan neste lugar mentres se desenvolva a ruta.

Ao remate do percorrido, previsto para as 13,00 h., realizaranse unha serie de sorteos entre os participantes, coa entrega dos agasallos correspondentes.

Finalmente, José Manuel Dacal agradeceu aos patrocinadores a súa colaboración, destacando á Deputación Provincial, Inorde, Coca Cola, Gadis, Megamo e Sobre Rodas, así como á Garda Civil, Policía Local e Protección Civil.

O poeta Victor Campio, fillo predilecto do concello de Maside, recibíu un tributo organizado polo PEN Galicia e o Ateneo de Ourense,ao que se sumou a Xunta de Galicia, representada neste acto polo secretario xeral de Política Lingüistica, Valentín García.

No marco deste tributo,no centro cultural Marcos Válcarcel, Valentín García loou o traballo a prol das letra galegas que Víctor Campio realizou “tanto desde o ámbito da creación como desde a prensa ou o ensino”; un traballo que, en palabras do secretario xeral, “ben merece o recoñecemento de todos cantos estamos aquí e, tamén, de todos os galegos que aman a súa lingua”.

Tomaron a palabra no acto a presidenta do Ateneo de Ourense, Isabel Salgado Parada; o presidente do Centro PEN Galicia, Luís González Tosar; o académico da lingua galega Xesús Alonso Montero e os poetas Edelmiro Vázquez Naval e Manuel Outeiriño. Durante o encontro púidose escoitar o acordeón de Celia Adrián Rodríguez, así como poemas de Víctor Campio recitados por Marisa Calvo e por Carmen e Isabel Pereira Nolasco.

O docente xubilado e escritor Víctor Campio Pereira González (Maside, 1928) ten publicados catro poemarios (O ar que nos leva; Perdida luz, O aire, a luz e o canto. Poesía reunida 1987-2006 e Quince sonetos de amor e once poemas máis), así como unha novela (Baixo o sol do Magreb) e ensaio (Escritos en do menor). Colaborou ademais en obras colectivas como Sete poetas ourensáns, Poesía dos aléns e Poetas e narradores nas súas voces. II.

Colaborador habitual das actividades culturais da Cidade das Burgas nos últimos anos da ditadura e na democracia, escribiu en revistas e en xornais, nomeadamente en La Región. Foi nomeado membro correspondente da Real Academia Galega no 2010, fillo predilecto de Maside no mesmo ano e membro de honra da Asociación de Escritores en Lingua Galega no 2011. No 2012 obtivo o Premio Sete Carballas da Insua dos Poetas.

Victor Campio naceu e vivíu a súa infancia na parroquia de Garabás, onde a súa nai exercía como mestra.

Un total de 80 persoas participaron o pasado domingo no Roteiro Cultural pola parroquia de Astureses guiados coma sempre polo Centro de Estudios Chamoso Lamas, e o Grupo Ecoloxista Outeiro e acompañados pola portavoz do grupo de goberno; Patricia Torres.

Desta maneira e dan man dos mellores especialistas na materia, os participantes puideron coñecer o patrimonio natural milenario agochado desta parroquia.

O inicio da visita foi onde a Capela da Saleta, nun marco de gran valor natural, así o historiador Xosé Luís Sobrado explicou a devoción a esta Virxe, procedente de Francia, e que veu da man dunha familia do lugar os Taboada. No lugar, explicou o biólogo Diego Reboredo sobre as especies alí existentes, de gran valor e que foran plantadas na súa maior parte hai moitos anos por nenos e os seus mestres. Hoxe é despois da do “Pulpo”, a maior romaría da comarca.

Xa na entrada do pobo de Astureses, Xaime Nogueira, explicou a toponimia do lugar e de todos os núcleos que a conforma. Dentro do mesmo foron coñecendo diferentes edificacións de grande porte como o Pazo dos Taboada, que aínda conserva o seu escudo.

Xa no lugar do Outeiro, Xosé Luís Sobrado falou sobre a capela alí existente, hoxe sen culto. Nun lateral hai unha inscrición na que se fai referencia a súa construción por parte de Francisco de Soto, pertencente á familia do Cervela de Pazos de Arenteiro. Antigamente tiña un escudo da familia, que logo da venta trasladouse o camposanto de Pazos. Nese mesmo lugar, Diego Reboredo explicou sobre o carballo centenario que da sombra ao espazo.

Continuaron na monumental e espectacular igrexa románica de San Xulián de Astureses, que explicou Severino Ferreiro, historiador, quen estudiou o templo. Era a igrexa da Orde do Santo Sepulcro, ata que pasou a Pazos de Arenteiro. Os entendidos cualificaron dun dos mellores expoñentes do románico en toda a provincia de Ourense. No seu interior, comprobamos mediante a interpretación dun tema musical tradicional a acústicaque posiblemente sexa a mellor das igrexas de Boborás, isto débese a súa altura e que está feita en pedra.

A visita rematou na Fábrica do Papel de Fondo de Vila, onde tamén hai un muiño, e alí o arqueólogo Jorge Lamas explicou como era o funcionamento da mesma. Durante a visita a este núcleo tamén se viron diferentes casas con inscricións e construcións importantes.

O próximo e último roteiro deste ano, será o 5 de novembro a Coto Molín, Brués.