O PSdeG denunciou hoxe as prácticas “caciquís e clientelares” do Goberno municipal do PP, ao convocar unha praza a medida para educadora de servizos sociais. Un feito que enmarcan na “desastrosa e pouco transparente política de contratacións que está a realizar o goberno de Marnotes”, que está a converter o Concello “nunha sorte de Deputación de Ourense, onde só traballan os familiares e amigos do PP”.

 No caso da praza de educadora de servizos sociais, os concelleiros Adolfo Nogueira e Iolanda Otero afirmaron que se pedían “especificidades sospeitosas, que non son necesarias para este posto, como o título de educación física, entre outros”.

 Ante a evidencia de que os requisitos da convocatoria estaban feitos para esa persoa en concreto, o 15 de abril, semanas antes de coñecerse o resultado do concurso, os socialistas rexistraron ante notario un documento no que deixaban constancia de a quen se lle ía adxudicar a praza, con nome e apelidos.

 “Trátase dunha certificación ante notario a xeito testimonial, simplemente para que quede constancia de que, á vista dos requisitos da convocatoria, era evidente que a praza estaba feita a medida”, explicou o concelleiro.

 Sinalou que esta persoa xa traballou para o Concello contratada pola Deputación provincial, e que a petición de títulos que non son necesarios para desenvolver este traballo é un xeito de colocala nese posto. “Isto cuestiona os principios de igualdade, mérito e capacidade que ten que ter todo concurso público” e fixo que moitas persoas xa nin se presentaran, apuntou Nogueira.

Non é a primeira vez que os socialistas denuncian a falla de transparencia nas contratacións municipais, xa que algo similar aconteceu coa praza de auxiliar da Biblioteca Municipal “onde houbo unha serie de irregularidades, dando puntos a quen non lle  correspondía e que tivo que ser denunciado polas aspirantes ao posto, e para que ao final a praza fose para unha persoa que ía nas listas do PP en Castro Caldelas”.

“Sen cuestionar a capacidade laboral destas persoas, é moi sospeitoso que en todos os procesos os que quedan coa praza teñan relación co PP”, sinalaron. Denunciron ademais que a oposición non só non participa en ningún tribunal de contratación, senón que non conta tampouco con documentación sobre o mesmo “como aconteceu co obradoiro de emprego, onde o Concello non nos facilitou nin un só documento do proceso, e que teremos que acabar pedindo no xulgado”.

“O Goberno de Marnotes leva a cabo unha política laboral desastrosa, que só vale para darlle traballo aos afíns ou para deixar tirados a traballadores mentres se lle prometen cousas que non se cumpren”, afirmaron. Puxeron como exemplo os traballadores do matadoiro “que seguen á espera de que tras os anuncios rimbombantes haxa algunha solución real para a súa situación”.

Lembraron tamén o caso de Protección Civil, xa que “a pesar das promesas do alcalde, a maior parte das contratacións feitas corresponden ao goberno socialista, mentres que O Carballiño segue a agardar polo parque de bombeiros que non se sabe cando estará en marcha e polo tanto cun servizo de seguridade que é insuficiente en caso dunha emerxencia”.

O mesmo coa Residencia do Tempo Libre, que soamente abriu uns meses para albergar ao equipo de rodaxe de A Esmorga, ou a Residencia do Cornuval, que ía xerar 80 postos de traballo e que segue pechada despois de investir máis de 5 millóns de euros nas instalacións.

A concelleira Iolanda Otero tamén resaltou que “a política laboral do Concello cambia moito cando se trata de traballadoras como as de axuda no fogar que cando se trata de reubicar a traballadores da deputación”.

Apuntou que “non se pode privatizar un servizo e deixar ás traballadoras en mans da empresa privadas” e acusou a Marnotes de “desentenderse da protección dos dereitos sociais e laborais das traballadoras”.

Dende o mes de Febreiro o servizo está únicamente cuberto por voluntarios "que chegaran a un acordo co concello para realizar gardas as 24 horas e cobrar dietas, pero a dia de hoxe aínda non percibiron un euro, polo que deixan de prestar o servizo", advirten.

O BNG demanda ao alcalde que dote a O Carballiño dun servizo de emerxencias dacorde a entidade do municipio, ademáis de "esixirlle a inmediata apertura do Parque de Bombeiros, unha vez que remataron as obras de construcción do edificio fai xa varios meses".

Os alcaldes da comarca manifestaran no pasado mes de marzo o compromiso de apoiar a proposta do rexedor municipal carballiñés para a creación dun servizo de Protección Civil de ámbito comarcal. Marnotes anunciara daquela que se levarían a cabo xestións coa Deputación e Xunta para buscar financiación para este servizo e comprometera o apoio municipal para fixar unha partida económica nos orzamentos de 2014 para destinar unha subvención específica a Protección Civil para o pagamento de axudas aos voluntarios.

Victoria ante o Allariz, pero o Arenteiro queda fora das dúas prazas de ascenso, xa que tanto Nogueira como Verín non fallaron e gañaron os seus respectivos partidos. Os carballiñeses, con 74 puntos, rematan a liga como terceiros.

C.D. Arenteiro: Pachi, Prada, Dabarca, D.López, Lois, Gallego, Alex, Breogán, Bardelás, Martín e M. Sotelo. Tamén xogaron Quiroga, Óscar, Manu e Canexón.

Goles:

1-0. Minuto 30. Breogán, a media volta dentro da área.

1-1.Minuto 56. Juan Gallego, de cabeza, empata o partido.

2-1.Minuto 57. Breogán faise cun balón e bate por baixo ao porteiro visitante.

3-1.Minuto 74. Centro dende a dereita de Quiroga que Óscar remata impecablemente.

O Partido: O Arenteiro tiña a obrigación de gañar e esperar, tardou media hora en marcar e despois, aínda que o Allariz chegou a empatar, en ningún momento os verdes perderon a cara ao partido e acabaron vencendo con folgura. Ao final, durante varios minutos agardouse polo resultado no campo do Velle, onde o Nogueira marcou no minuto 90. Decepción na afección do Arenteiro, que en gran número volveu a estar en Espiñedo.

A Praza Maior do Carballiño foi o escenario dun acto público organizado pola Mesa pola normalización lingüística do Carballiño - O Ribeiro. Xentes de todas as idades, nenos, novos e maiores participaron nesta xornada, unidos pola nosa lingua.

Bando Municipal das Letras Galegas.

O concello do Carballiño publicou un Bando con motivo desta celebración, que pode verse nos edificios públicos, nos centros de ensinanza e nos locais das asociacións veciñais.

Exposición da vida e obra de Diaz castro.

Tratase dunha mostra dedicada ao escritor homenaxeado este ano no dia das letras galegas, cedida pola Secretaría xeral de Política Lingúística. Podemos vela nas escaleiras da casa do concello carballiñés.

Concurso de cuñas radifónicas

O Alumnado carballiñés de secundaria tivo ocasión de participar nun concurso de cuñas radiofónicas, co que colabora COPE O Carballiño, e no que se promove a reflexión sobre a lingua galega e sa súa valoración positiva entre a xuventude.

Os tres veciños do pobo de Santiso, que foron evacuados, xa regresaron as súas vivendas. O incendio deuse por controlado esta pasada madrugada.

O lume iniciouse, por causas descoñecidas, ás 14,40 horas en montes da parroquia de Reádigos, no concello do Irixo. O operativo desplegado está integrado por 9 brigadas, 3 motobombas, 3 helicopteros e 4 avións, coordenado por 1 técnico e 2 axentes forestais. A superficie afectada é de 57 hectáreas.

A Xunta recorda que está a disposición da cidadanía o teléfono 085, ao que debe chamarse no caso de detectarse lume forestal.

O CPI Terras de Maside do concello  de Maside acolle desde esta semana o proxecto Enredando, artesanía na escola, unha iniciativa impulsada pola Consellería de Economía e Industria a través da Fundación Centro Galego da Artesanía e do Deseño que ten por obxectivo achegar aos máis novos os oficios artesanais, contribuíndo así á promoción e posta en valor do sector artesán galego.

Dentro deste proxecto, hoxe presentouse no centro educativo ourensán a unidade didáctica O Gremio da seda, na que o alumnado participará no proceso de produción da seda, desde a cría e evolución dos vermes ata a extracción desta para a confección do fío na seguinte fase.

A actividade, na que os alumnos continuarán a traballar o curso que vén, chegará nas próximas semanas a un total de 16 centros educativos de toda Galicia. Na comarca do Carballiño celebrarase, ademais de en Maside, no CEIP de Beariz, no CEIP Virxe da Pena da Sela no Irixo e no CEIP Eulogio Gómez Franqueira en San Amaro.

Enredando, artesanía na escola conta tamén cunha unidade didáctica centrada na elaboración e encadernado de papel, Do papel ao libro, para alumnado de 3º ciclo de primaria e 1º ciclo de secundaria, cuxa segunda tempada continúa desenvolvéndose en diferentes centros educativos.

Os principais obxectivos deste proxecto, que conta coa colaboración da Consellería de Cultura, Educación e Ordenación Universitaria, son concienciar a sociedade do valor do produto feito á man así como presentarlle aos rapaces e rapazas que a artesanía pode ser tamén unha boa alternativa para o seu futuro laboral; atallar o problema da falta de relevo xeracional nos oficios máis tradicionais promovendo o desenvolvemento da artesanía galega a través da formación de futuros artesáns creadores; e amosar á sociedade o valor engadido da artesanía en canto á súa creatividade, patrimonio cultural e tradición.

Con este resultado os carballiñeses deixan de depender de si mesmos para o ascenso a preferente. A falta de unha xornada para o remate da competición, ao Arenteiro so lle vale unha victoria en Espiñedo ante o Allariz e esperar unha derrota do Nogueira ou un empate do Verín.

C.D. Arenteiro: Pachi, Carlos, Lois, Dabarca, Oscar, Alex, V. Gallego, Breogán, Bardelás, Martin e Quiroga.Tamén xogaron Prada, M. Sotelo e Caneiro.

Goles:

0-1. Minuto 67. Penalti cometido sobre Martín, que tranforma en gol Quiroga.

1-1. Minuto 84. Centro sobre a área carballiñesa que remata Seo.

O Partido: Tras un tiro de Quiroga ao poste nos primeiros minutos, os verdes non deron sensación de perigo ante a portería local. Na segunda parte, o Arenteiro saíu con máis decisión e intensidade e fixose co dominio do partido, pero so acertou a marcar de penalti. Por si fora pouco, deixouse empatar na única aproximación do Monterrei ante a portería de Pachi.

Os 3 grupos políticos municipais presentaron e votaron a súa propia moción contra a supresión do Partido Xudicial, aínda que non foron capaces de chegar a un acordo que implique un respaldo institucional conxunto.

A única das tres mocións aprobada polo pleno foi a do Partido Popular, que contou co apoio dos socialistas. Os tres grupos, PP. PSdG, e BNG, coinciden en posicionarse en contra da desaparición do Partido Xudicial do Carballiño, pero as diferencias entre os tres grupos e sobre outros aspéctos do Anteproxecto Lei do Poder Xudicial impediron un pronunciamento conxunto.

Onde sí houbo unanimidade foi na moción socialista para posicionarse en contra do aumento do IVE para perruquerías e florerías, que pasou do tipo reducido do 8% ao xeral do 21%. Tamén, por unanimidade, o pleno aprobou unha proposta do BNG para apoiar as reinvindicacións dos emigrantes retornados, aos que a Axencia Tributaria impuxo sancións económicas por obrigas tributarias non satisfeitas.

Pola contra, o grupo maioritario rexeitou a moción do BNG sobre o apoio a ILP de medidas para a creación de emprego en Galicia, e outra do grupo socialista na que se pedía a rescisión do contrato coa empresa concesionaria do servizo de axuda no fogar. O Partido Popular propuxo, no seu lugar, a creación dunha comisión municipal de seguimento do contrato asinado coa empresa.

Fai meses que os sanitarios veñen denunciando a deixadez municipal en canto ao estado de conservación das instalacións, agora incluso apuntan á suciedade que está provocando situacións de insalubridade.

Os profesionais que exercen o seu traballo no centro de saúde de Piñor levan presentados varios escritos dirixidos ao alcalde da localidade Francisco Fraga, xa que é o concello o responsable do mantemento do edificio. Non obstante, as deficiencias non foron emendadas.

Ao deficiente estado de conservación engaden problemas de insalubridade, debido á falta de limpeza "unha situación inaceptable nun edificio sanitario, cheo de formigas e suciedade como consecuencia da deixadez por parte do concello", manifestan.

As actuacións son financiadas con fondos municipais ou ben por medio de convenios coas consellerías de Medio Rural e Medio Ambiente, Territorio e Infraestructuras.

A partir deste martes 6 de Maio comezan as obras na praza da Alameda do Carballiño, que consistirán na reposición da empedrada en toda a rúa Alameda, así como o lousado da zona peonil. Para iso, dende o luns, cortouse o tráfico na citada rúa. Corte que permanecerá mentres duren as obras.

 Inclúese neste proxecto municipal a conversión das fontes piramidais da praza en bancos, con xardineira na súa parte traseira, onde nun inicio había auga. Así mesmo limparase o monumento do Munten, situado na praza do Emigrante, e repoñerase o recubrimento do estanque que o rodea.

Tamén comezaron as obras incluídas no plan marco asinado da consellería de medio Rural para mellora de camiños de titularidade municipal, e no que se van investir no municipio do Carballiño máis de 50.000 euros. Os proxectos incluídos neste plan marco son o afirmado dos accesos a Mosteiro- Paradela, Mesego-Corrredoira, Mesego- Corval, Sagra-Fraga, Gouxiña e Señorín.

Por outro lado o edil de Obras Magin Daparte mantivo unha reunión co responsable de servizo da Consellería de Medio Ambiente, Territorio e Infraestructuras, para iniciar a formulación da obra de mellora da avenida de Julio Rodríguez Soto, Rotonda da Alameda, Conde Vallellano e Martínez Avellanosa.

Finalmente, o concello do Carballiño anuncia para os próximos dias a licitación da obra de mellora na rúa Alberto Vilanova, que inclúe a construcción da beirarrúa da marxe dereita no tramo entra a rúa Carreira e o centro de saúde, cun investimento de 50.000 euros.