A alcaldesa de Boborás, Patricia Torres, reuniuse co conselleiro de Presidencia, Xustiza e Deportes, Diego Calvo, e coa directora xeral de Administración Local, Natalia Prieto, para avaliar novas vías de colaboración entre a Xunta de Galicia e o Concello de Boborás, orientadas á mellora da eficiencia enerxética do alumeado público e á renovación das instalacións deportivas municipais, especialmente o pavillón e o polideportivo.

Durante o encontro tamén se abordou o convenio recentemente asinado coa Consellería, que supón un investimento de 40.000 euros para a renovación do alumeado público nos lugares de Sonelle, Pereiras, Porto Pereiras e Xendive, onde se substituirán 98 puntos de luz, ademais de tres cadros eléctricos e varios tramos de cableado.

Esta actuación permitirá mellorar a calidade lumínica e reducir o consumo enerxético, avanzando nun modelo de municipio máis sostible e eficiente, e mellorando tamén a seguridade da propia veciñanza.

Marco de actuación

O Concello de Boborás conta cun total de 2.245 puntos de luz, dos cales xa se renovaron 1.514, incluíndo esta última actuación. Quedan 731 puntos pendentes, que se irán renovando paulatinamente nas diferentes subvencións e convenio que o Concello vaia solicitando para este fin, co obxectivo de completar a modernización integral de toda a rede de iluminación pública con tecnoloxía LED.

As zonas que aínda quedan por renovar inclúen as parroquias de Xurenzás,e os lugares de Vecoña de Arriba e de Abaixo, O Gabián, Moldes (neste caso o núcleo, xa que o resto da parroquia foi renovado), Laxas, Vilachá, A Fenteira, Borraxas, Gontelle, Parada, A Granxa, San Bartolomeu, Vilanova, A Costa, Eiravedra, Lamela, Valdesensda, Saa, San Andrés e Sobredo.

A alcaldesa, Patricia Torres, agradeceu o apoio da Xunta de Galicia e destacou a importancia desta colaboración para continuar mellorando a eficiencia enerxética
e os servizos municipais, “nun momento no que os concellos precisan do respaldo institucional para avanzar en proxectos que melloran a calidade de vida e a seguridade da veciñanza”.

A Dirección do IES nº 1 do Carballiño remitíu a esta emisora de radio un comunicado no que sae ao paso dos comentarios feitos na tertulia de COPE O Carballiño, e nos que os participantes mostraban a súa extrañeza despóis de que se aludise á preocupación expresada por nais e pais do centro en relación á prohibición ao alumnado para ir ao baño durante as clases.

Ante os citados comentarios, a Directora do centro manifesta que "non está prohibido o uso dos aseos durante toda a xornada lectiva e non están pechados os aseos", e tamén aclara que "sí hai papel a disposición do alumnado".

Afirma a Directora que "no noso proxecto educativo de centro , entre outros puntos, está regulado o uso dos baños e a súa vixiancia durante toda a xornada lectiva sempre baixo criterios pedagóxicos e racionais, salvaguardando a intimidade e saúde do noso alumnado".

Engade como "todas as normas que atañen ao bo uso das instalacións do centro en xeral e os aseos en particular, son pensadas sempre no beneficio do alumnado e nunca atentando contra os seus dereitos".

"Dende a Dirección nunca se tivo constancia de ningunha queixa a través de ningún órgano colexiado no que teñen representación as familias", asegura.

Finalmente, a máxima responsable do IES Nº 1 mostra a súa confianza "na profesionalidade das tertulias de a Cope O Carballiño" e pide "que se contrastara esta información ou calquera outra referente ao IES Nº1 de O Carballiño coa Dirección do centro e solicitando, neste caso, unha rectificación pública da opinión vertida".

Sebas Lamazares, Gonzalo Rodríguez, María Luisa Rodríguez, e Manuel Nogueira debaten sobre a actualidade social e politica desta semana na tertulía deste venres 31 de outubro.

Por un fallo informático tan so podes escoitar a segunda parte desta tertulia na seguinte ligazón:

https://copecarballino.es/content/mana-na-cope-1

Tiruleque, Grupo de Teatro, porá novamente este sábado dia 1 de novembro ás oito da tarde en escena a comedia "A CONSPIRACIÓN DA PIOLLA" que tivo na súa estrea, o pasado domingo, unnha extraordinaria acollida entre os asistentes, que practicamente encheron o Auditorio Manuel María do Carballliño.

Esta nova representación contará con algúns novos actores interpretando distintos personaxes da obra. Será o primeiro de novembro.

Ao remate da actuación entregarase o Premio Tiruleque, consistente nunha placa conmemorativa á mellor obra da Mostra do 2024, que correspondeu a "SOÑO DUNHA NOITE DE VERÁN" que na pasada mostra correu a cargo da Aula de Teatro da Universidade de Vigo, Campus de Vigo.

Ao acto oficial da entrega espérase a asistencia de dona Susana Reboredo Morilla, Vicerreitora da Extensión Universitaria, as dúas directoras da comedia, dona Casilda García e dona Sonia Rúa, así como sete dos acores e actrices, que tamén acudirán no nome de tódolos seus compañeiros de elenco.

O domingo, 2 de novembro, tamén as oito da tarde, Rebuldeira Teatro achegarase á vila cunha irreverente representación de "@S VELL@S NON DEBEN DE NAMORARSE", como homenaxe aos 75 anos do falecemento de Castelao.

Dúa mulleres xóvenes precisaron atención médica urxente tras sufrir unha intoxicación por monóxido de carbono.

Quedaron durmidas e cun braseiro encendido no interior dunha vivenda no Camiño da Revoltiña, na capitalidade municipal de Avión. Afortunadamente, unha delas despertouse mareada e con vómitos e pudo avisar a unha veciña, que foi a que de inmediato chamou ao 112 pedindo axuda.

O operativo mobilizou ao Grupo de Emerxencias Municipais do concello de Avión, á Garda Civil e aos profesionais de Urxencias Sanitarias de Galicia-061, que atenderon e trasladaron ás dúas mulleres afectadas.

Os efectivos do GES realizaron as medicións necesarias na vivenda afectada, procedendo a súa ventilación.

O Arenteiro Fotográfico despídese ata o próximo ano tras o éxito de participación desta edición, a primeira no Auditorio Manuel María. Desde o 13 de setembro e ata o pasado domingo, o público puido desfrutar de 17 exposicións de temática e perspectivas variadas.

O alcalde, Francisco Fumega, destacou no acto de peche da mostra a boa resposta do público, o que dá conta da importancia de apoiar as iniciativas culturais, “un eido no que O Carballiño sempre foi moi activo e mesmo pioneiro, con iniciativas coma esta, o festival de teatro ou as Xornadas de Cine e Video de Galicia (Xociviga), que precisamente comezarán o próximo 19 de novembro”.

Pola súa parte, Manuel Blanco, presidente da Asociación Fotográfica O Potiños, impulsora do Arenteiro Fotográfico, valora moi en positivo a edición deste 2025: “Estivemos nun local excepcional que creo que serviu para darlle unha maior amplitude e visibilidade á mostra”.

O Auditorio Manuel María do Carballiño favoreceu a gran afluencia de visitantes, que se achegaron para desfrutar de teatro ou cine e aproveitaron para descubrir as exposicións fotográficas. “Ao ter centralizada a cultura no Auditorio compartimos público co resto de actividades”, apunta Blanco. Nese sentido, agradece a colaboración do edil de Cultura, Diego Fernández, e do resto do goberno municipal, pola cesión do espazo. “Da edición deste ano tamén temos que salientar a presenza dun fotoxornalista de nivel mundial como é Gervasio Sánchez, quen nos ofreceu unha magnífica masterclass”, recorda Manuel Blanco, que asegura que O Potiños xa ten a mirada posta na edición de 2026.