Sebas Lamazares, Fátima Gómez, José Antonio Barge e Manuel Nogueira, comentan sobre algunhas das informacións relevantes da semana no ámbito comarcal, na tertulia de COPE O Carballiño conducida por Xan Pinal, correspondente ao venres 23 de maio de 2025.

Escóitaa aquí:

Dende o BNG de Maside expresan publicamente "a fonda preocupación pola falta de información clara e actualizada por parte do goberno municipal respecto á calidade da auga da traída e pola súa nefasta xestión da situación". O pasado 2 de maio de 2025 -recordan- o Concello de Maside fixo público un bando no que se advertía da presenza de parámetros non aptos na auga da billa, recomendando non consumila para uso alimentario.

Porén, manifestan, o contido do bando era vago e insuficiente, sen explicacións detalladas nin información sobre as causas nin as medidas adoptadas para protexer a saúde da veciñanza. Segundo consta na páxina oficial do Sistema de Información Nacional de Augas de Consumo (SINAC), a última analítica publicada, datada no 7 de febreiro de 2025, xa indicaba que a auga non era apta para o consumo humano, subliñan.

Engaden que "A veciñanza descoñece se daquela se produciu unha situación similar á actual, e non foi informada en ningún momento sobre esa circunstancia, polo que esiximos explicacións inmediatas". Ademais, a día de hoxe, non se emitiu ningún novo bando que informe da resolución do problema, nin se publicou ningunha nova analítica que acredite que a auga volve ser apta para o consumo,remarcan.

Pregúntanse desde o BNG, cal é o estado real da auga da traída neste momento,por qué non se informou á veciñanza da situación detectada xa en febreiro, e por qué non se está a garantir un subministro alternativo de auga potable mentres persiste o problema.

Recordan que desde o 2 de maio, día en que se publicou o bando municipal recomendando non consumir a auga, o Concello ten a obriga legal e moral de garantir que toda a veciñanza teña acceso a auga apta para o consumo, xa sexa mediante cistermas móbiles ou reparto de auga en garrafas. A día de hoxe non temos constancia de que se estea a facer nada diso, e a cidadanía segue sen respostas nin solucións claras.

Finalmente, manifestan que O BNG de Maside esixe a publicación inmediata dunha nova analítica oficial, a actualización da información no SINAC e a explicación pública das medidas adoptadas.

No próximos dias ambas partes, Xunta e Comuneiros, asinarán o acordo que pon fin a 14 anos de conflicto, incluída a vía xudicial.

O acordo contempla a cesión á Xunta de 142.000 m2 do Monte Veciñal en Man Común da Cidade, propiedade dos comuneiros dos lugares de Cristimil e A Torre, no concello de San Amaro. A cámbio da "expropiación amigable" a Xunta abonará aos comuneiros 241.962 euros.

Escoita aquí a historia do conflicto e cómo agora se chega a este acordo, nesta entrevista de COPE O Carballiño ao presidente da Xunta Rectora do MVMC de Cristimil e A Torre, José Modesto Rodríguez Alén:

A corporación municipal de Leiro ratificou a proposta da Entidade Local Menor de Berán para a licitación do contrato da explotación do novo balneario, 18 anos despóis de que rematase a súa construcción.

O acordo no seo da Entidade Local de Berán foi por unanimidade dos tres membros que a integran, dous do Partido Popular e un do PSOE.

No caso da ratificación por parte do pleno do concello, o acordo foi por maioria do Partido Popùlar, mentres que o BNG optou pola abstención e o PSOE pedíu que o asunto quedase sobre a mesa, especialmente críticos coa falta de participación veciñal neste procedemento.

O Pleno rematou cun enfrontamento verbal entre o alcalde Francisco Fernández e o concelleiro do PSOE Manuel Rodríguez, que foi expulsado da sesión por parte do alcalde tras chamarlle á orden por tres veces.

Escoita aquí a crónica do pleno:

O conselleiro de Emprego, Comercio e Emigración, José González, acompañado polo delegado territorial da Xunta en Ourense, Manuel Pardo, e o director xeral de Comercio e Consumo, Gabriel Alén, reuniuse esta semana co alcalde do Carballiño, Francisco José Fumega, e o concelleiro de Turismo deste municipio, Manuel Dacal, para concretar vías de colaboración que contribúan a difundir fóra de Galicia a Festa do Pulpo.

Os responsables da Xunta e concello carballiñés coincidiron na proposta de impulsar o gran potencial da Festa do Pulpo como motor socioeconómico para a contorna, así como accións para poñer en valor a contribución das persoas galegas emigrantes ao desenvolvemento do Carballiño.

En relación coa dinamización da actividade económica e coa vertebración do territorio, na xuntanza destacouse o labor do Polo de emprendemento do Carballiño, que leva atendidos máis de 240 proxectos e máis de 620 titorías realizadas.

Os proxectos abranguen diferentes sectores, entre os que predominan os servizos (20%), a hostalaría (16%), e o comercio (14%). Das persoas atendidas neste polo preto do 60% son mulleres e nel lévanse realizado máis de 90 actividades entre reunións con entidades do territorio, accións de formación e eventos da rede.

O Boletín Oficial da Provincia de Ourense publicou o 7 de maio de 2025 as bases reguladoras para a concesión, en réxime de concorrencia competitiva, de subvencións para a construción de ecoaloxamentos e a súa convocatoria, no marco do Plan de Recuperación, Transformación e Resiliencia, financiado pola Unión Europea, NextGeneration EU, en colaboración coa Axencia de Turismo de Galicia e a Secretaría de Estado de Turismo.

A subvención conta cun orzamento de 212.000 euros pertencente á actuación 1.3 “Ecoaloxamento en Concellos con potencial termal ou con centros históricos, dentro do Eixo 1 “Transición verde e sostible” do PSTD.

O obxecto da subvención é a construción ou instalación de ecoaloxamentos en municipios con oferta reducida ou inexistente de infraestrutura turística, que conforman a área de intervención do Plan de Sustentabilidade Turística Ourense Colle Velocidade, Vilas Históricas e Termais, da provincia de Ourense, (Arnoia, Bande, Boborás, Baños de Molgas, Cortegada, Cenlle, Castrelo de Miño, Carballiño, Leiro, Lobios, Monterrei, Muíños, Punxín, Ribadavia, Verín, Allariz e Castro Caldelas).

A contía das subvencións obxecto desta convocatoria consistirá no 40% do prezo total neto do proxecto de construción de cada ecoaloxamento cun máximo de 40.000,00 €.

Os interesados poderán presentar un máximo de dúas solicitudes a condición de que os ecoaloxamentos atópense en municipios distintos dentro do ámbito de actuación. Para presentar a solicitude contan co prazo dun mes desde a publicación do BOP, que expira o vindeiro 9 de xuño.

O resto das condicións e criterios para a concesión da subvención atópanse recollidos nas bases reguladoras: https://www.depourense.gal/es/servizos/subvencions/relacion-concursos/co...

--

O alcalde Fumega pasou polos estudos de COPE O Carballiño para repasar a actualidade municipal e responder ás preguntas da audiencia.

O rexedor municipal avanzou unha modificación de crédito que deberá aprobarse nun dos próximos plenos da corporación que ascende a 900.000 euros, para financiar distitnos proxectos no concello do Carballiño.

Fumega asegurou que o pacto de goberno entre PSOE e PP goza de boa saúde e que está sendo beneficioso para O Carballiño, e proba delo -dixo- serán os máis de 30 millóns de euros que se investirán en proxectos claves para O Carballiño durante este mandato municipal.

O alcalde admitíu que "a dia de hoxe hai un noventa por cento de posibilidades" de que non vai presentarse á reelección á alcaldía en 2027, e tamén comentou sobre outros asuntos da actualidade municipal.

Podes escoitar a intervención íntegra do alcalde no PODCAST de COPE O Carballiño:

O conselleiro de Sanidade, Antonio Gómez Caamaño, informou esta mañá á alcaldesa de Boborás, Ana Patricia Torres, de que o Portal de Contratos Públicos da Xunta publica hoxe a licitación das obras do novo centro de saúde do municipio por importe de 1.951.250 millóns de euros.

Durante a xuntanza de traballo, na que tamén participou a directora xeral de Recursos Económicos do Servizo Galego de Saúde, Amparo Pousada, o titular de Sanidade apuntou que o novo centro de saúde permitirá ampliar en máis de 200 metros cadrados a superficie do actual inmoble.

En concreto, a nova infraestrutura sanitaria acadará os 786 metros cadrados de superficie, posibilitando a ampliación dos seus servizos. Permitirá, concretamente, dispor dunha consulta para a saúde da muller, unha consulta polivalente de urxencias e outra destinada aos pacientes respiratorios.

Así, o novo inmoble contará con dúas consultas de medicina, dúas consultas de enfermería e tamén unha novas sala de xuntas.

O deseño elixido para o novo centro de saúde busca a mellor integración coa contorna en todos os seus aspectos, empregando materiais característicos da zona, como a pedra e a madeira.

Unha vez se formalice o contrato de obra, a empresa adxudicataria disporá dun prazo de 16 meses para levar a cabo a súa construción.

As empresas interesadas en participar neste procedemento teñen de prazo ata o vindeiro 10 de xuño para enviar as súas ofertas.