O Concello do Carballiño vén de inaugurar un novo espazo verde de lecer do que xa pode pode desfrutar a poboación e os visitantes, o xardín aromático da Piscifactoría. Este novo enclave, que conta cunha ampla variedade de plantas, arbustos e flores, ademais dun reloxo analemático (solar), foi realizado nos últimos meses polo alumnado do módulo de xardinaría do Programa de Emprego de Persoas Mozas.

Nesta liña, a concelleira de Comercio, Diana González, destaca a implicación dos participantes: “Realizaron un gran traballo, tanto os alumnos e alumnas como o equipo docente e directivo”. A edila de Comercio e a concelleira de Medioambiente, Elvira Torres, convidan á poboación a achegarse ao espazo, que nesta época se convirte nun perfecto refuxio climático fronte ás elevadas temperaturas.

Restauración da pasarela do Arenteiro na zona de Toscaña

Estes días, o Concello tamén inaugurou a pasarela do Arenteiro, restaurada e acondicionada nos últimos meses polo alumnado do módulo de carpintaría do Programa de Emprego de Persoas Mozas.

Diana González tamén pon en valor o traballo realizado, xa que a pasarela é moi frecuentada pola poboación do Carballiño. A intervención non só renova a súa imaxe, senón que mellora a seguridade dos peóns e facilita a mobilidade na zona.

O Concello do Carballiño e Sustinea, entidade sen ánimo de lucro de ámbito galego, comezan hoxe unha nova andaina conxunta. O concelleiro de Cultura, Diego Fernández, pon en valor este convenio de colaboración a través do que se impulsarán no municipio novos proxectos dinamizadores da vida cultural e social.

“Agradecemos moito que unha entidade como Sustinea escolla O Carballiño para realizar proxectos, para nós é un auténtico orgullo”, asegurou esta mañá, na presentación do programa “Galicia con alma”. Paulo Vázquez, coordinador de Sustinea, animou á mocidade do Carballiño a sumarse a esta iniciativa, financiada pola Xunta con fondos europeos.

O programa consiste na formación no estranxeiro de seis mozos e mozas desempregadas e beneficiarias de Garantía Xuvenil. “Sustinea promove prácticas laborais non remuneradas durante dous meses na cidade de Cork, Irlanda, e en Lisboa, Portugal. Encargámonos de buscar empresas adecuadas aos perfís, e facemos unha formación previa e un acompañamento de busca de emprego á volta”, apuntou Vázquez. Neste caso, a colaboración co Concello do Carballiño permitirá dar a coñecer este programa entre a mocidade do municipio.

A inscrición realízase a través das redes sociais de Sustinea, e o período para facelo remata o 31 de xullo. Os gastos da viaxe, a busca de aloxamento e os gastos de luz, auga e aluguer están cubertos. A persoa beneficiaria percibirá 500 euros ao mes. O programa levarase a cabo de setembro a novembro deste mesmo ano.

Diego Fernández convidou á mocidade do Carballiño a non perder a ocasión de formarse e vivir no estranxeiro: “Que a xente poida ir facer prácticas a espazos como Irlanda ou Portugal e enriquecerse do uso de linguas estranxeiras aporta ferramentas moi útiles para o eido profesional.

O Concello de Carballedo está situado entre a serra do Faro e o encoro dos Peares, entre a montaña e a Ribeira Sacra, no suroeste da provincia de Lugo, e ten a súa capitalidade municipal na Barrela.

Mantén unha gran interrelación económica e social coa comarca do Carballiño, trátase dun municipio no que se sitúa un dos primeiros testemuños  do cristianismo en Galicia, xa que nunha pequena igrexa na parroquia de Temes  foi localizado un sarcófago tardorromano  datado no século IV.

As pegadas da idade media tamén deixaron a súa impronta, por exemplo, na igrexas románicas de San Estevo de Chouzán e San Xoán da Cova. Ademáis, Carballedo destaca pola súa gran riqueza natural e paisaxística.

Escoita aquí o programa especial de verán de COPE O Carballiño dedicado ao concello de Carballedo:

O Concello do Carballiño participa este sábado na XVII Festa da Palabra da Insua dos Poetas, que nesta edición rende homenaxe ao legado cultural, político e literario de Alfonso R. Castelao (1886-1950), no 75 aniversario do seu pasamento.

O evento, impulsado pola Fundación Insua dos Poetas, converte cada verán A Esgueva (Madarnás) na capital da exaltación da cultura e lingua galegas.

“A xornada conta con moitas actividades, incluíndo a entrega dos galardóns que entregamos cada ano”, apuntou esta mañá Luis González Tosar, presidente da Fundación Insua dos Poetas, na presentación da Festa da Palabra no salón de plenos do Carballiño.

José Castro, alcalde en funcións, e Diego Fernández, concelleiro de Cultura e representante do Concello na Fundación, puxeron en valor a importancia da Festa da Palabra, así como da propia Insua dos Poetas, na conservación e divulgación da cultura galega. Nesa liña, convidaron á poboación a participar na xornada para coñecer o parque escultórico máis especial de toda Galicia.

A XVII Festa da Palabra arranca ás 11,30 horas, contará coas actuacións dos gaiteiros da Coral De Ruada e do Grupo Tres Pesos e finalizará cun xantar popular.

A porta de Castelao

Como cada ano, no transcurso da celebración descubrirase a nova instalación escultórica da Insua, neste caso realizada polo escultor ourensán Antón Pulido en homenaxe a Castelao. “Eu creo que esta peza vai ser moi significativa e distinta, non é que Castelao non teña imaxes icónicas ao longo de Galicia e Arxentina, pero son representacións realistas a maior parte dela, e o esforzo e o traballo de Antón Pulido deron como resultado outro tipo de imaxe”, explicou González Tosar.

O propio autor deu conta do proceso creativo, no que traballou conxuntamente coa Fundación Insua dos Poetas para lograr esa representación especial da figura do escritor e político galego. “Para nós, este monumento é unha metáfora da busca da identidade, da cultura ou da memoria de Galicia coa figura de Castelao como guía ou como a personificación desa meta. É unha invitación a un encontro significativo cunha parte fundamental do ser galego”, detallou Pulido.

O sábado realizarase o desvelamento da escultura por parte de autoridades políticas, dos membros da Fundación da Insua dos Poetas e do propio Pulido.

Sete galardóns

Luis González Tosar adiantou esta mañá os nomes dos sete galardoados na XVII Festa da Palabra, quenes recibirán unha escultura honorífica realizada polo escultor ourensán Acisclo Manzano. O novelista César Lorenzo recibirá o premio literario; a xornalista María Xosé Porteiro o premio lingua galega nos medios de comunicación; a Editorial Galaxia o galardón á defensa e impulso da cultura propia; o Cineclube Padre Feijóo recibirá o premio ao audiovisual en galego; a Irmandade da Sanidade Galega recollerá o galardón como colectivo destacado polo esforzo de galeguización; o CEIP Curros Enríquez de Celanova recibirá o premio protección da natureza, e Ramón Aguiño recollerá o galardón á cultura na emigración.

“Castelao escritor”

Os asistentes á XVII Festa da Palabra tamén poderán adquirir o libro “Castelao escritor”, recentemente publicado pola Editorial Galaxia con textos de Eduardo Blanco Amor editados por Luis González Tosar e Alexandre G. Corbillón. Trátase dun volume que recolle ensaios e análises que exploran a obra de Castelao e o seu papel como defensor do Estatuto de Autonomía de Galicia, como caricaturista crítico ou como autor de textos sobre a emigración e o exilio.

A deste ano 2025 é a terceira entrega desta publicación, detrás da mesma e como coordenador está o profesor e veciño de Feás, José Ramón Cerdeira.

Escoita aquí a súa entrevista en COPE O Carballiño: