A Feira da Pepa Loba despedíuse na tardiña deste domingo cunha das novidades da edición deste ano, a "Pepa Loba infantil", na que un numeroso grupo de nenas e nenos recrearon as andanzas da famosa bandoleira e a súa gabilla. baixo a dirección artística da agrupación teatral "Dar Trela", que desde fai anos ven colaborando activamente coa asociación de veciñas e amigos de Flores, mantendo viva esta tradición no barrio máis xenuinamente carballiñés.

Como cada ano no setembro previo ás festas patronais, Flores volveu acoller a un bo número de artesáns, asi como as diversas actividades programadas aínda que todo elo bastante condicionado pola inestabilidade meteorolóxica, que trouxo chuvascos e treboadas durante os tres dias da celebración.

A organización dedicou a edición deste 2023 á lembranza de Rosa Núñez Muñoz, veciña deste barrio de Flores e falecida no úlitmo ano, como unha das grandes impulsoras e dinamizadoras tanto da Feira da Pepa Loba como doutras actividades culturais e sociais no propio barrio de Flores.

O concelleiro de Xuntos polo Irixo, e responsable da área de cultura, deporte, xuventude, turismo, voluntariado e educación, do goberno municipal bipartito que conforman Xuntos e PSOE, ven de estrearse esta semana na súa nova responsablidade no concello do Irixocoa organización dunha excursión-peregrinaxe ao santuario dos Milagres.

Nesta actividade participou un numeroso grupo de veciños e veciñas do Irixo, e Juan Manuel Villanueva califica como "un éxito" a mesma. Ademáis, o concelleiro avanzou a COPE O Carballiño que está a ultimar un ambicioso programa de actividades para o novo curso das que dará detallada información nos próximos dias.

Xa son 11.000 as persoas que na provincia de Ourense perciben o Ingreso Mínimo Vital (IMV) logo de que o Goberno de Pedro Sánchez aprobase esta renda en plena pandemia –primeiro por Real Decreto e despois certificando a súa seguridade xurídica por lei no 2021–. “Trátase dun dereito que ten como obxectivo loitar contra a pobreza infantil e a desigualdade”, lembrou a deputada no Congreso, Marga Martín. Nesta liña, a tamén secretaria de Políticas Sociais do PSdeG-PSOE, explicou que a axuda foi pensada para as persoas que viven soas ou que están integradas nunha unidade de convivencia que non ten os recursos precisos para facer fronte ás necesidades máis básicas.

“Deses 11.000 beneficiarios que están a rercibir a prestación en Ourense, 4.467 son menores de idade e o 55% son mulleres”, incidiu sobre a importancia dunha medida enfocada tamén en reducir a fenda de ingresos con respecto aos homes. Tendo en conta os datos poboacionais, do total dos 11.000 beneficiarios no ámbito provincial, unhas 1400 persoas residen nas comarcas do Carballiño-O Ribeiro.

Coas cifras na man, a deputada lamentou: “É importante facer un paralelismo entre como afronta as problemáticas o Executivo de España e como o fai a Xunta de Galicia, coa maioría absoluta do PP de Feijóo e Rueda. A Risga, que é a prestación galega, atende nestes intres, só a 600 persoas e leva 30 anos en funcionamento”. Rematou afirmando que, tanto a nivel autonómico como estatal, a dereita implementa políticas antisociais que “lle dan as costas ás persoas máis necesitadas”.

Ademais dos datos que sitúan ao Ingreso Mínimo Vital como unha ferramenta indiscutible para os sectores de poboación en risco de exclusión social, esta semana coñeceuse que máis de 8.000 ourensás e ourensáns solicitaron outra das axudas outorgadas polo Goberno de Sánchez. En concreto, 8.328 persoas xa cobraron os 200 euros destinados a mitigar os efectos da subida de prezos. Os e as beneficiarias desta iniciativa –aprobada a finais de decembro do pasado ano– son traballadores, por conta propia ou allea, e beneficiarios da prestación ou subsidio de desemprego en 2022, que ese mesmo ano non superasen unha renda de 27.000 euros brutos e cuxo patrimonio, descontando a vivenda habitual, non rebasase os 75.000 euros.

O presidente da Deputación de Ourense, Luis Menor, visitou esta mañá o concello de Piñor de Cea para continuar co seu percorrido polos diferentes municipios ourensáns, cumprindo co seu obxectivo de traballar pola veciñanza desde o propio territorio, para coñecer in situ as súas necesidades e abordar estratexias de colaboración institucional que dean resposta ás mesmas. Luis Menor comezou a súa visita a Piñor da man do seu alcalde, José Luis González, na Casa Consistorial, onde tivo a oportunidade de asinar no libro de honra.

Posteriormente, trasladáronse ata o parque infantil do Arenteiro onde recentemente se executaron obras de mellora e ao pobo de Casfigueiro no que se realizaron traballos de humanización, ambas actuacións financiadas ao 100 % pola institución provincial. “Piñor é para nós un modelo de concello do rural, dinámico e que traballa por fixar poboación e prestar aos seus veciños os mellores servizos”, dixo o presidente da Deputación. “O alcalde é unha persoa con acreditado coñecemento do concello e así o demostra coa súa xestión”, engadiu Menor, quen destacou a colaboración da Deputación “co obxectivo de favorecer o desenvolvemento do territorio e que permita asumir novos retos para dar resposta ás súas necesidades”.

Pola súa parte, o alcalde de Piñor afirmou que a cooperación da Deputación co seu concello “sempre foi moi importante”. De feito “sen ela os municipios do rural non poderíamos dar un bo servizo á veciñanza”, e destacou a especial sensibilidade que amosa Luis Menor coas necesidades dos pequenos concellos, grazas a súa condición tamén de alcalde. Luis Menor continuará visitando os concellos que integran a provincia de Ourense para revisar, de primeira man, os proxectos cos que colabora a Deputación, así como para coñecer as súas demandas no marco dun dos seus eixos de traballo que pasa por ter unha presenza continúa no territorio. Un labor que está a realizar conxuntamente coas reunións que mantén diariamente cos rexedores locais no Pazo Provincial.

O delegado territorial da Xunta en Ourense, Gabriel Alén, presentou a campaña Mercar no teu comercio ten premio, unha iniciativa impulsada pola Xunta de Galicia e a Federación Galega de Comercio, en colaboración coa Federación de Comercio de Ourense, asociacións de comerciantes locais e os concellos do Barco de Valdeorras, A Pobra de Trives, Xinzo de Limia, Ribadavia, Verín, O Carballiño, Allariz, Castro Caldelas e Maceda.

O delegado territorial explicou que esta é a segunda edición desta campaña, que busca reactivar o consumo e achegar ao consumidor os establecementos locais, poñendo en valor o comercio de proximidade ourensán. En cada unha destas vilas levaranse a cabo campañas dunha semana de duración. Os tickets das compras realizadas durante ese tempo poderán canxearse o día final da campaña por boletos para participar nun sorteo en directo de premios. En total, serán 1.000 euros por localidade, en forma de tarxetas prepago para volver mercar, co que repercutirán de novo no comercio minorista local.

Realizaranse tamén diferentes iniciativas de animación para completar a campaña. Mercar no teu comercio ten premio está organizada pola Xunta de Galicia, a través da Consellería de Economía, Industria e Innovación, e a Federación Galega de Comercio; coa colaboración de Abanca, as federacións provinciais de comercio e distintas asociacións de comerciantes de toda Galicia. Enmárcase dentro do impulso da Administración autonómica do tecido asociativo do sector, con especial atención a diferentes iniciativas de dinamización.

O delegado territorial da Xunta en Ourense, Gabriel Alén, desprazouse ao concello de Boborás para achegarse, acompañado da alcaldesa, Patricia Torres, ao Castro de Cameixa, onde supervisou as novas actuacións arqueolóxicas de investigación e posta en valor deste xacemento programadas para este ano e que son financiadas pola Consellería de Cultura, Educación, Formación Profesional e Universidades cunha achega de preto de 18.000 euros.

O delegado territorial significou a importancia destas accións que teñen por obxecto acadar as medidas necesarias que garantan a conservación do castro e permitan a súa visita e aproveitamento sociocultural; pois “o noso patrimonio cultural é unha parte fundamental da nosa identidade como comunidade e a nivel individual. Tamén – continuou o delegado- os bens arqueolóxicos poden ser unha importante fonte de recursos económicos, xerando unha serie de actividades económicas e oportunidades de emprego estable, ata o punto de converterse nunha panca para o desenvolvemento rural.

Para Gabriel Alén “o patrimonio implica un proceso de recoñecemento, habitualmente de varias xeracións, dalgúns elementos como parte da bagaxe cultura e a súa vinculación co sentimento de grupo; forma en que unha sociedade é recoñecida e presentada aos demais”. Por iso, “comprender o noso patrimonio cultural axúdanos a entender unha parte importante de quen somos e cal é a nosa posición no mundo e na vida en xeral”, recalcou Gabriel Alén.

A Consellería de Cultura, Educación, Formación Profesional e Universidades tamén está a levar a cabo o vén de rematar distintas intervencións arqueolóxicas na provincia; no castro de Sansón de Camba, en Castro Caldelas (17.600€); no Castro de Armeá, en Allariz, (20.000€); na mámoa de Maus de Salas e no Foxo do Lobo, en Muíños, (40.000€), no Castro de Garcián, en Beariz (15.984€) no antigo Mosteiro de San Xoán de Camba, en Castro Caldelas (14.507€) ou no xacemento romano de Río Caldo, en Lobios (17.908€).

As actuacións a desenvolver consisten na limpeza e roza, baixo control arqueolóxico, da vexetación da zona de actuación e a súa contorna máis inmediata, isto é, a parcela de actuación e acceso á mesma.

Posteriormente levarase a cabo a escavación con metodoloxía arqueolóxica dunha área entre os 80 e os 100 m2, sita no ángulo sueste do castro. Sería unha ampliación cara ao nordés do escavado en campañas anteriores, xunto con outros 6 metros de muralla. Deste xeito, efectuarase unha diagnose, consolidación e acondicionamento das estruturas arqueolóxicas que se localicen nesta nova campaña, garantido en todo caso unhas condicións de conservación axeitadas para a súa visita.

Así mesmo, estase a facer un levantamento topográfico xeorreferenciado, mediante fotogrametría 3D, da área de actuación e debuxo arqueolóxico das estruturas exhumadas, e recopilarase documentación exhaustiva fotográfica da escavación arqueolóxica. Incluída a realización de vídeo e fotografía aérea con tomas xerais do xacemento e de detalle dos seus elementos máis significativos e da área de actuación, para a actualización do panel interpretativo do xacemento arqueolóxico.

Tamén se están a ultimar accións de difusión da actuación realizada (charlas, visitas...) e sobre os valores propios do xacemento arqueolóxico na comunidade local, así como visitas guiadas, unha vez rematada a actuación; o mesmo que a elaboración dunha memoria técnica no que se recollan os traballos realizados e os seus resultados.

O Castro de Cameixa sitúase no concello de Boborás, en concreto, na parroquia de San Martiño de Cameixa, lugar de Cameixa. Trátase dun castro de obrigada referencia na bibliografía especializada debido a que foi un dos primeiros castros que se escavou con certa metodoloxía arqueolóxica (anos 40 do século XX) e que aportou datacións absolutas de C14 que permitiron reformular os distintos períodos da cultura castrexa. Presenta dous recintos amurallados e incluso outro antecastro máis exterior pero sen defensas ben definidas. Foi escavado nos anos corenta do século pasado por Florentino López Cuevillas e Xaquín Lorenzo Fernández deixando ao descuberto parte dun tramo de muralla xunto con dúas construcións circulares e unha cuadrangular. Froito da escavación exhumáronse restos cerámicos, pétreos, orgánicos (landras e legumes carbonizadas) e metálicos que abarcan un espectro cronolóxico que iría dende o século VI a.C. ata o I ou incluso II d.C.

Desde o ano 2018 estanse a levar a cabo campañas arqueolóxicas anuais para a posta en valor do dito xacemento: en 2018 procedeuse a seleccionar a zona de escavación partindo dos debuxos de Xaquín Lorenzo co gallo de localizar e exhumar os restos de estruturas que se rexistraron nas escavacións dos anos corenta, cuadriculando unha zona duns 100 m2. No ano 2019 procedeuse a seleccionar a zona de escavación cuadriculando unha zona duns 120 m2 (escavando unha superficie de 80 m2), e continuando coas xa escavadas no ano 2018. No ano 2020 procedeuse a cuadricular uns 80 m2 e continuouse cos restos estruturais atopados en 2019. O obxectivo era por un lado, completar o peche da estrutura cuadrangular que se superpón á circular no sector norte e por outro lado ampliar a escavación a unha zona non escavada por X. Lorenzo co fin de definir e comprobar datos estratigráficos e de materiais necesarios para seguir avanzando na investigación deste xacemento.
Imaxes relacionadas

O Grupo Provincial Socialista vai presentar unha moción para que a Deputación de Ourense poña en marcha un plan de axudas para a adquisición de libros de texto e material escolar este mesmo curso escolar 2023/2024. As achegas irán dirixidas ao alumnado de todos os níveis educativos empadroado en calquera concello da província de Ourense de menos de 20.000 habitantes, oscilando a súa contía entre os 100 e 250 euros. O voceiro socialista na Deputación, Álvaro Vila, en rolda de prensa cualificou a medida de "urxente", habida conta do inicio inmediato, o vindeiro 11 de setembro, do que é "o curso máis caro da historia para as familias", incidindo no "especial impacto da economía de nais e pais de alumnos nunha provincia onde o perfil socioeconómico se víu aínda máis fraxilizado no actual contexto".

O máis recente informe da Organización de Consumidores e Usuarios (OCU) conclúe que cada alumno de entre 3 e 18 anos gastou durante o pasado curso escolar 2.186 euros de media, situándose este custo en Galicia en 1.287 euros de media. Despois de ter falado con libreiros da provincia, que evocan subas dun 20-25% respecto ao pasado ano, só en libros de texto cada familia ourensá pode gastar entre 300-400 euros para un alumno de primaria, máis de 500 euros en secundaria e non menos de 200 euros en de infantil. A isto hai que engadir, segundo cifras da OCU, 95 euros material escolar, máis de 30 euros nas cotas das AMPA, uns 111 euros en actividades dos centros, 100 euros en conceptos de diversa índole e 161 euros en uniformes, alí onde estes son requiridos. "Na conxuntura actual de elevada inflación o inicio escolar supón un duro golpe para as xa de por si precarias economías domésticas", enfatizou Vila.

"A política de axudas do goberno autonómico é a todas luces insuficiente, a pesares do triunfalismo recentemente amosado por Alfonso Rueda, quen non cesa de arremeter contra o modelo de gratuidade total instaurado en 2009 polo goberno bipartito, con efectos certos sobre as familias", sostivo o voceiro socialista, arroupado polo groso dos deputados do grupo provincial. Amais, non se pode pasar por alto que, á luz dos datos da Axencia Tributaria relativos ás declaracións do IRPF da Provincia, un ourensán cobra 1.500 euros menos ao ano que a media de Galicia, non chegando os ingresos de case a metade dos contribuíntes aos 12.000 euros anuais, e ganando algo máis dun 30% dos ourensáns menos de 6.000 euros ao ano. Así as cousas, o Informe Europeo de Pagamento de Consumidores elaborado pola consultora Intrum, destaca que tres de cada catro fogares van endebedarse co inicio do curso.

Para Vila, "precísanse medidas urxentes para facer fronte aos gastos do curso escolar, que ameazan á estabilidade dun importante número de familias da nosa provincia, e de aí a necesidade, e urxencia, da nosa moción". A proposta socialista contempla que a contía destas axudas oscile entre os 100 e os 250 euros por alumno para as unidades familiares con ingresos inferiores ao 3 do IPREM, sendo este en 2023 de 8.400 euros anuais, resultando elixibles para as achegas as unidades de convivencia que non superen os 25.200 euros anuais. "O monto global das axudas é máis razoable, facilmente obtible pola Deputación, xa sexa a través da eliminación de gastos superfluos ou destinando parte do remanente orzamentario, que adoita ser repartido con criterios máis que dubidosos en partidas que non teñen un impacto tan directo na estabilidade e benestar das familias", recalcou Vila.

As festas patronais do Carballiño contarán con cinco orquestras, entre as que destacan a Orquestra Panorama e o grupo Assia, dúas das mellores formacións do momento, tanto en Galicia como en Asturias, respectivamente. Tamén estarán as orquestras Status, Ritmo Joven e fuerza Nueva.

Unha vez máis,dende a organización decidiuse que as actuacións comecen xa pola tarde, co fin de facilitar ó público infantil e ó de maior idade a oportunidade de disfrutar dos espectáculos.

Ademais, actuará o grupo galego The Tetas' Van, que realiza versións de clásicos do rock and roll, en inglés e en galego, reivindicando o papel da muller na escena galega.

No apartado de bandas de música, as festas contarán ca veciña Agrupación Musical de Boborás e, o día do patrón, ca premiada ( entre outros, no Certame Internacional da Cidade de Benavente) Agrupación Musical da Limia, que recuperará o espazo do Asilo para a súa actuación. Tamén estarán presentes charangas como Dr. Anchoa, CLK ou Castro Bello, ou grupos de música tradicional galega.

O día de feira, o 16, será o día da tradicional gran tirada de fogo fixo e voador, un evento que os últimos anos reuniu a milleiros de persoas e que este ano repite escenario, a explanada da entrada ó Parque Municipal, co fin de cumprir todos os requisitos legais e de asegurar a comodidade dos usuarios.

Os máis cativos tamén terán o seu oco particular cunha gran festa infantil o día 18, festivo local, pola mañá. Nesta xornada poderán desfrutar dun baile a cargo de DJ.Tibu e ademais, dende a organización, se apostou pola recuperación dos xogos tradicionais como poden ser a "carreira de sacos", a "pita cega", o "tira da corda", ou os xogos da "ferradura" e da "silla".

No caso das atraccións, que estarán abertas do día 14 ao 20, será este último día o tradicional "Día do Neno", no que se aplican descontos para os usuarios. Nesta edición tamén se conta con varias actividades como dúas concentracións de coches, actuacións das corais da vila, exposicións fotográficas, un torneo de xadrez, moito fútbol e a tradicional Romaría da Saleta.

Por parte da comisión de Festas que se fai cargo da organización queren agradecer as aportacións da veciñanza que, xunto co Concello do carballiño, fan posible que se podan celebrar unhas festas que pechan o verán na provincia. Recordan tamén que este sábado estarán na Praza Maior de 16:30h a 20:30h e o domingo de 10:30 a 14h, co fin de facilitar á veciñanza que poidan facer a súa aportación e levar o tradicional libro das festas, que este ano conta ca participación de varios escritores da vila que publicaron recentemente e con fotografías antigas de familias, "pandillas" e persoeiros históricos da vila grazas á colaboración de José Luís Diz, que foi o encargado de facer o cartel tamén. Os libros tamén estarán a disposición do público na Oficina de Xestión da Recaudación, que se atopa na rúa Faustino Santalices.

Venres 15 10:00 ALBORADA BOMBAS DE PALENQUE 11:30 PASARRÚAS CHARANGA CASTRO BELLO 18:00 PASARRÚAS CHARANGA DR. ANCHOA 21:00 A 22:00 1º PASE GRUPO ASSIA (Praza Maior) 00:00 A 02:00 2º PASE GRUPO ASSIA

Sábado 16 10:00 ALBORADA BOMBAS DE PALENQUE 11:00 MÚSICA GALEGA NA FEIRA 11:30 PASARRUAS AGRUPACION MUSICAL DE BOBORAS 12:30 CONCERTO AGRUPACION MUSICAL DE BOBORAS ( Praza Juan Corral) 18:00 CHARANGA CLK 19:30 PARTIDO C.D. ARENTEIRO- C.D. IRÚN 21:00 A 22:30 1º PASE ORQUESTRA STATUS (Praza Maior) 00:00 GRAN TIRADA DE “FOGO FIXO E VOADOR” (Parque Municipal) 00:30 CONCERTO THE TETAS’ VAN ( Rúa Calvo Sotelo) 02:00 a 03:30 2º PASE ORQUESTRA STATUS

Domingo 17 10:00 ALBORADA BOMBAS DE PALENQUE 10:00 1ª CONCENTRACIÓN DE COCHES ANTIGOS (Rúa Principal) 11:30 MISA SOLEMNE NA HONRA DE SAN CIBRAO Participan: AGRUPACIÓN MUSICAL DA LIMIA CORAL POLIFÓNICA DO CASINO 13:00 CONCERTO AGRUPACIÓN MUSICAL DA LIMIA ( Asilo do Carballiño) 20:00 a 22:00 1º PASE ORQUESTRA NUEVA FUERZA (Praza Maior) 23:00 a 01:00 1º PASE ORQUESTRA PANORAMA ( Veracruz) 01:00 A 02:00 2º PASE ORQUESTRA NUEVA FUERZA 02:00 A 03:00 2º PASE ORQUESTRA PANORAMA

Luns 18 11:30 OLIMPIADAS CO DJ.TIBU (Praza Maior) Xogos populares : Tira da corda Pita cega Xogo da Ferradura Xogo da silla Carreira de sacos 19.30 a 22:30 Tarde de baile ORQUESTRA RITMO JOVEN ( Praza Maior)

Martes 19: GRAN ROMARÍA DA SALETA

8, 9 e 10 de setembro, Feira Pepa a Loba

9 de setembro Festival Outros Países, Outras Músicas

9 de setembro 2º Concentración automovilística #no limits Automotive Crew

14 setembro, Misa de Santa Cruz ca Coral do Orfeón

15 setembro, Misa da Virxen dos Dolores co Coro de Cámara música Viva

23 de setembro estreo da obra “ Insubmisa” de Antagonista Teatro

30 de setembro Festival Galaico-Portugués