Francisco José Fernández Pérez (Cortegada, 1959) revalidou a presidencia do Partido Popular de Leiro no congreso celebrado por esta agrupación local e que contou na clausura co presidente provincial, Luis Menor, e a secretaria xeral, Sandra Quintas. Un conclave no que Luis Menor puxo ao tamén alcalde e senador popular como exemplo de estabilidade municipal e política, característica que pediulle “exportar” para recuperar en 2027 máis alcaldías e a maioría absoluta na Deputación.

O presidente provincial explicou que con este congreso Francisco José Fernández non só revalida a presidencia da agrupación local, senón que “dálle un novo pulo á unidade e solidez do PP de Leiro”.

O partido, engadiu Luis Menor, é un instrumento para alcanzar o Goberno e así mellorar a calidade de vida da cidadanía, cun programa de actuacións e un equipo de persoas “que leve a cabo o noso modelo de territorio”.

Con todo, dixo Menor, Leiro tamén pode servir de exemplo coa súa estabilidade para sumar máis apoio en calquera convocatoria electoral, “por iso é absolutamente necesario que o partido estea perfectamente organizado”.

Francisco José Fernández, con trinta anos á fronte da alcaldía, agradeceu o apoio dos populares de Leiro e da dirección do partido por seguir confiando na súa persoa para esta nova etapa da agrupación local.

A vida local “é a maior escola da política”, dixo, comprometéndose a continuar traballando polo partido, “o que tamén significa seguir procurando o progreso do concello”.

A recuperación do río Avia o seu paso polo municipio e cuxa presenza marca a paisaxe e a cultura de Leiro é un dos logros dos que máis orgullo sinte o presidente da agrupación local, en tanto significa “apostar polas fortalezas do concello, como tamén polo termalismo ou o sector do viño”. É dicir, engadiu Francisco José Fernández , “ter un programa de obxectivos ben definido, ser rigorosos na xestión, e tender sempre pontes á colaboración con outras administración para o ben da nosa veciñanza”.

O servizo de orientación laboral do Concello do Carballiño realiza unha intensa labor de asesoramento e formación da poboación desempregada. No primeiro semestre deste ano, os profesionais da unidade atenderon a preto de 800 persoas en busca activa de traballo, entre as derivadas polo Servizo Público de Emprego de Galicia e aquelas que se achegaron voluntariamente en busca de información e asesoramento.

Diana González, concelleira de Comercio, destaca a importante función realizada polo equipo do servizo, que xestionou no que vai de ano 21 ofertas de emprego e axudou á inserción laboral de 75 persoas. As ofertas están vinculadas co eido da hostalaría, atención sociosanitaria, limpeza, atención ao cliente, forestal e fabricación-produción.

O servizo tamén se encarga de poñer en marcha distintos programas de formación e emprego público que facilitan a inserción laboral dos participantes. No último ano e medio, 130 persoas formaron parte da oferta formativa: 92 en cursos e 36 en obradoiros de emprego público de duración de 9 meses ou 1 ano. No eido dos obradoiros atópanse o Programa de Emprego de Persoas Mozas (menores de 30 anos), que se leva a cabo no Carballiño por primeira vez, e por outro, o obradoiro dual.

A programación deseñada inclúe cursos dixitais, prevención de riscos laborais para o sector da construción, madeira e metal, competencias clave para ter acceso aos certificados de profesionalidade e obradoiros de xardinaría, carpintería ou albanelaría.

Diana González destaca os bos datos de participación nos cursos e obradoiros,
“hoxe en día, a oferta pública de emprego é moi alta”, apunta.

Actualmente, hai dous programas en fase de selección e contratación: o Aprol Rural (inclúe tres contratos de nove meses) e as Brigadas Forestais (inclúe seis contratos de tres meses de duración).

Por outra banda, o servizo de orientación laboral do Concello do Carballiño tamén coopera con iniciativas públicas doutras institucións. Nesa liña, colabora co programa “Yo Emprego Galicia”, dirixido a persoas desempregadas interesadas en poñer en marcha o seu propio negocio, e participa no programa integrado de emprego xunto con outros concellos adxacentes.

Os 40 equipos participantes na Primeira RFEF votaron a distribución dos dous grupos da categoria para a próxima tempada entre as dúás propostas consensuadas pola Federación coas territoriais.

Por unha axustada votación de 21 e 19 votos, respectivamente, resultou gañadara a opción B, que deixa ao Arenteiro e o resto de galegos (Lugo, Celta Fortuna, Ourense, Racing Ferrol e Pontevedra) xunto aos 3 equipos castelán- leoneses (Ponferradina, Zamora e Unionistas de Salamanca), os 3 vascos (Barakaldo, Arenas de Getxo e Bilbao Atletic), ademáis do asturiano Avilés, os machego Guadalajara e Talavera, os extremeños Mérida e Cacereño) Osasuna B, Real Madrid-Castilla e Terenife.

O Concello do Carballiño aprobou hoxe en pleno a habilitación de preto de 1 millón de euros para destinar no que resta de ano á redacción e financiamento de novos proxectos, actuacións en todos os ámbitos de competencia municipal e actividades varias, especialmente culturais, educativas, deportivas, lúdicas e festivas, así como axudas sociais ou ao tecido empresarial.

As partidas máis importantes irán destinadas a proxectos e obras (450.000 euros), Medio Ambiente, en particular a actuacións no Parque Municipal (133.000 euros), inversións no rural (70.000 euros), deportes (70.000 euros) e Cultura (57.000 euros).

En total, serán 970.213 euros, que saen do remanente das arcas municipais, que era de 1,6 millóns de euros antes da aprobación desta modificación e do que agora aínda quedan 600.00 euros.

Alegacións á liña de alta tensión

O pleno da corporación municipal aprobou tamén unha declaración institucional, apoiada polo tanto por todos os grupos políticos, na que manifesta a súa “total oposición ao proxecto das infraestruturas de evacuación de alta tensión ao seu paso polo concello do Carballiño”.

Arguméntao en que “a veciñanza rexeita frontalmente o anteproxecto presentado por consideralo nocivo no ámbito da saúde, do patrimonio natural e arqueolóxico” ou en que ten “un impacto visual enorme” e anuncia que “o Concello do Carballiño presentará alegacións” e “asesorará á veciñanza para que defenda os seus intereses”.

Este manifesto será remitido agora á empresa promotora, á Deputación Provincial de Ourense, á Xunta de Galicia e á Subdelegación do Goberno.