O Concello do Carballiño impulsa unha estratexia pioneira para consolidarse como destino gastronómico de referencia co polbo como elemento central e elemento identitario. Trátase dunha aposta por poñer en valor o produto estrela do municipio, ligado á historia, cultura e economía local, da man das pulpeiras e pulpeiros, embaixadores dun oficio transmitido de xeración en xeración.

O concelleiro de Turismo, Manuel Dacal, pon en valor a iniciativa, “un paso máis para reforzar o noso modelo turístico, que xa nos converteu na primeira localidade máis visitada da provincia despois da cidade”. O edil detalla o proxecto, que consistirá na elaboración dunha estratexia de comunicación dixital orientada a mellorar o coñecemento, a percepción e a proxección do destino nun contexto turístico cada vez máis hiperconectado. “O servizo permitirá definir unha folla de ruta clara na promoción do noso municipio”, apunta Dacal.

Por outra banda, o Concello tamén visibilizará o labor das pulpeiras e pulpeiros co obxectivo de recoñecer e promocionar un oficio fundamental para a dinamización económica e social do municipio. A través da colaboración directa co colectivo, lanzarase un proxecto piloto no que participarán as dez empresas máis destacadas vinculadas ao polbo. Entre outras actividades, está prevista a promoción do colectivo e a organización de accións de recoñecemento profesional, así como a difusión do oficio, das receitas e doutros elementos do patrimonio material e inmaterial asociados ao polbo.

Plan de sostibilidade turística

Cun investimento próximo aos 75.000 euros, o Concello reafirma o seu compromiso cun modelo de desenvolvemento turístico sostible, baseado nos recursos propios, na identidade local e no recoñecemento das persoas que fan posible que o polbo sexa moito máis ca un produto gastronómico: un sinal de identidade e un motor de futuro para o municipio.

Estas actuacións enmárcanse no Plan de sostibilidade turística do Carballiño e a gastronomía do polbo, que conta cun orzamento dun millón de euros financiado polos fondos europeos NextGenerationEU no marco do Plan de Recuperación, Transformación e Resiliencia, a través do convenio entre a Axencia de Turismo de Galicia e o Concello.

O Concello do Carballiño colabora no Festival Máxico San Xoán Bosco, unha cita moi especial que reunirá na vila a asociacións de magos de Ourense, Lugo e Portugal do 30 de xaneiro ao 1 de febreiro.

“Este ano continuamos co modelo exitoso das últimas edicións, que ofrece confraternización e tamén formación e obradoiros para os máis cativos”, detallou esta mañá Diego Fernández, concelleiro de Cultura, durante a presentación do evento.

O edil enxalzou o traballo realizado pola organización do festival, que xa supera os dez anos de historia. “Facemos un chamamento á poboación para que se achegue e desfrute das interesantes propostas que nos teñen preparadas”, engadiu.

Os impulsores do festival, Martín Domínguez (Le Grand Martin) e Santiago Cristóbal (Mago Ninou), puxeron en valor o encontro, que celebra ao patrón dos magos, San Juan Bosco, ao mesmo tempo que divulga e achega a maxia á poboación.

Nese sentido, puxeron en valor os beneficios da maxia para persoas de todas as idades e, en especial, para os máis pequenos. “Fomenta a creatividade, cultiva o pensamento crítico e matemático… É unha afección moi boa nun momento de saturación e sobreinformación como o actual”, resaltou Domínguez. “A maxia só funciona en comunidade, cando hai polo menos dúas persoas, polo que fomenta a socialización dos cativos”, apuntou Cristóbal.

Os organizadores agardan que o obradoiro infantil sexa un éxito de participación, como o foi no 2025. “É unha boa maneira de introducilos neste mundo e tamén de educalos como espectadores”, engadiu Cristóbal. A actividade levarase a cabo o sábado, día 31, de 16,30 a 18,00 horas no hotel O Xardín. As inscricións custan 15 euros e pódense formalizar a través do teléfono 607 248 799.

Galas e conferencia de Donald Lehn

O festival comeza o venres 30 de xaneiro ás 19,00 horas cunha misa na Igrexa da Veracruz na honra de San Juan Bosco, patrón dos magos. A partir das 20,30 horas, o café bar Lérida acollerá a Gala de apertura, na que participarán Magaldara, Mago Alvart e Mago Albert. “Son tres compañeiros do Ribeiro”, destacou Domínguez.

O sábado comezará co obradoiro de maxia infantil no hotel O Xardín, seguido da Gala familiar. “Estaremos Abel El Mago, Mago Chirleta e eu, Mago Ninou. A idea é pasalo ben e divertirnos en compañía de pequenos e maiores”, detallou Cristóbal. Xa pola noite, ás 00,00 horas, O Casino será o escenario da Gala hora máxica, na que participarán O Gran Mago, Guto e Aris Villarino.

O domingo, último día do festival, arrancará coa conferencia de Donald Lehn, máis coñecido como “Malo malísimo”. “É especialista en maxia de rúa e malabares, foi director da escola de circo de Madrid… é unha persoa con moitísima experiencia. A súa conferencia axúdanos a seguir formándonos”, apuntou Cristóbal. De feito, é unha actividade dirixida unicamente para magos e magas. As inscricións teñen un custo de 20 euros e pódense realizar a través do teléfono 690 766 208.

Despois do encontro con “Malo malísimo” levarase a cabo o tradicional xantar de confraternización, no que os asistentes desfrutarán dun cocido “máxico”. “Normalmente ao acabar de comer facemos un pouco de maxia para prepararnos para a gala final”, detallou Domínguez. Aquelas persoas que queiran inscribirse pódeno facer a través do 690 766 208.

A Gala de clausura porá o broche final ao festival no Auditorio Municipal. A partir das 18,00 horas, o público poderá desfrutar dos espectáculos do Mago Cris, O Mago de Boina e Nami, e Malo malísimo. “Estará presentada por David Méndez, un dos mellores magos de Galicia, é todo un luxo telo aquí no Carballiño”, asegurou Domínguez.

Os deputados do Grupo Popular Noelia Pérez e Argimiro Marnotes destacaron hoxe o investimento de case 700.000 euros no concello de San Cristovo de Cea a través do Plan Hurbe, impulsado pola Xunta de Galicia, para a realización de melloras de humanización en varias rúas do casco histórico deste municipio.

Nunha visita realizada en compañía do alcalde de San Cristovo de Cea, Jose Luis Valladares, e co concelleiro de Turismo Turismo, Promoción Económica e Novas Tecnoloxías, José Dalama, os deputados populares destacaron o bo ritmo dos traballos e a importancia das intervencións que se están levando a cabo dentro do Plan Hurbe para mellorar espazos públicos e a calidade de vida da veciñanza. ““Estamos ante unhas obras moi necesarias, que permiten recuperar o corazón desta vila e adaptalo ás necesidades actuais dos veciños”, sinalou Argimiro Marnotes.

Estes traballos, que supoñen un investimento conxunto próximo aos 700.000 euros, inclúen a renovación do pavimento de varias rúas, a mellora da rede de saneamento e o soterramento do cableado aéreo de electricidade, telecomunicacións e alumeado público. O importe destas obras dentro do Plan Hurbe é financiado nun 70 por cento pola Xunta, mentres que o Concello aporta o 30 por cento restante.

REVITALIZACIÓN

Noelia Pérez puxo en valor o Plan Hurbe como “unha ferramenta clave para a revitalización das vilas galegas, a través do que a Xunta aposta por un urbanismo pensado para as persoas, que mellora a accesibilidade, impulsa a economía local e axuda a fixar poboación no interior de Galicia”.

Neste sentido, os deputados destacaron o impacto directo que esta actuación ten para o comercio, a hostalería e o turismo local, en especial no caso do concello de San Cristovo de Cea pola súa localización na Vía da Prata e pola súa proximidade ao Mosteiro de Oseira. “Investir en espazos públicos de calidade é tamén investir en oportunidades para os concellos rurais”, manifestaron.

Durante os meses de maio e outubro do pasado ano, os albergues de Cea e Oseira rexistraron máis de 4.400 persoas aloxadas, unha cifra que reflicte a alta capacidade de atracción desta zona e o bo funcionamento destas infraestruturas. “Estes datos poñen de manifesto a importancia do Camiño de Santiago e do turismo vencellado ao patrimonio, a natureza e a hospitalidade, así como o impacto positivo que ten na economía local e na proxección de Cea e Oseira como destinos vivos e dinámicos”, sinalou Noelia Pérez.

O Concello do Carballiño ultima os detalles da Festa da Cachucha, a celebración que congregará na vila a milleiros de persoas para desfrutar do Domingo de Piñata. O domingo 22 de febreiro, O Carballiño acollerá a trixesimo primeira edición da celebración, impulsada desde a Concellería de Turismo para enxalzar a gastronomía e calidade da hostalaría local.

“É unha cita que se está consolidando cunha afluencia cada vez maior e que converte ao Carballiño na gran cita do Domingo de Piñata en toda Galicia”, destaca Manuel Dacal, concelleiro de Turismo.

Nesta liña, o Concello anima á poboación a realizar canto antes as súas reservas nos locais participantes, que se enchen semanas antes da festa. “O ano pasado superáronse as 2.500 reservas, e este ano a previsión é superalas”, asegura o edil. A clientela provén do municipio, pero tamén do resto da provincia e doutras zonas de Galicia.

Os restaurantes incluídos na Festa da Cachucha son preto dunha vintena, como en edicións anteriores, e o prezo do menú oscila entre os 20 e os 40 euros por persoa.
O listado está composto polos restaurantes Derby, Esclavo, Mesón O Noso Lar, Pulpería Carral, O Pituxo, A Maquia, Pulpería O Carballiño, Las Cubanitas, Fuchela, Parrillada San Andrés, Asador Veracruz, Soldado, Parrillada Os Amigos, Patio Bar Ernesto, O Pendello, Casa María, Pulpería Ruzo, Mesón O Arrabaldo e Os Álamos.

Cabe destacar que hai locais carballiñeses que tamén servirán cachucha ese día, pero xa teñen as reservas completas.

Ademais de poñer en valor a gastronomía, a Festa da Cachucha é unha xornada festiva que pon punto e final ao Entroido. Os diferentes restaurantes contarán con animación musical e charangas, e a poboación está convidada a participar cos seus mellores disfraces.

O presidente da Deputación de Ourense, Luis Menor, visitou hoxe o Concello do Carballiño para coñecer de primeira man algúns dos proxectos levados a cabo na vila grazas á colaboración da Deputación de Ourense. Na visita, Menor puxo en valor a aposta deste goberno provincial polo novo modelo de financiamento dos concellos onde demostramos “un marcado carácter municipalista” na nosa xestión.

Con este cambio, O Carballiño pasou de recibir medio millón de euros no anterior mandato a ter garantidos tres millóns de euros neste, afirmando que se trata dunha aposta que “multiplica por seis os recursos que recibe o Concello do Carballiño no período 2023-2027”.

En clave provincial, o presidente da Deputación asegurou que esa aposta polos concellos demóstrase con cifras. Proba dilo é que o Plan CooperOU comezou o mandato cun orzamento de 27 millóns de euros para os concellos da provincia, e agora é de practicamente 90 millóns, é dicir, “multiplicamos por tres o orzamento que destinamos aos municipios”.

Así mesmo, Luis Menor fixo unha valoración do investimento que destina a institución provincial a esta comarca que ascende aos preto de 15 millóns de euros que poden xestionar en cada territorio “con autonomía, priorizando os proxectos que consideren máis importantes, e sabendo con tempo co orzamento que contan para poder sacalos adiante”.

Polo tanto, o presidente da Deputación felicitouse por contar cun modelo de cooperación cos concellos que “naceu para quedarse porque é xusto e incrementa o investimento provincial nos municipios”.

Visita ao pavillón municipal e á casa do peón caminero

A visita ao Carballiño de Luis Menor co tentente de alcalde da vila, José Castro e representantes da corporación municipal, comezou no pavillón municipal “Paco Chao” do Carballiño, onde a través dunha axuda provincial de 108.837 euros puideron levarse a cabo obras diversas obras de mellora nas instalacións, como o arranxo da pista interior e o cambio de vestiarios.

Unhas obras, que como dixo o tenente de alcalde do Carballiño, José Castro, “son necesarias” para poder manter en boas condicións as infraestruturas deportivas do municipio.

Así mesmo, o tenente de alcalde agradeceu a colaboración da Deputación que este ano se materializará cun 527.000 euros a través do Plan CooperOU e que permitirá levar a cabo proxectos de mellora en instalacións deportivas, no rural e en vías do casco urbano, entre outros.

Posteriormente, desprazáronse ata a Casa do Peón Caminero, na estrada do parque carballiñés, onde se están a levar a cabo diversas actuacións como o cambio de tellado, arranxo dos servizos e mellora da aula co obxectivo de instalar alí un obradoiro e desenvolver diversas actividades.

Escoita aquí a entrevista a Luis Menor en COPE O Carballiño:

A Policía Local do Carballiño pechou o 2025 con 3.600 intervencións realizadas entre xaneiro e decembro. As incidencias relacionadas co tráfico seguen a ser un ano máis a causa máis común da mobilización dos axentes, cun total de 626 intervencións deste tipo (17% do total).

As asistencias a cidadáns por diversos motivos supoñen o segundo motivo máis frecuente das saídas dos policías, cun total de 502 (o 14%).

A Xefatura da Policía Local do Carballiño sinala o incremento dos avisos relacionados coa seguridade cidadá (como furtos, roubos, conflitos privados, violencia de xénero, identificación de sospeitosos, lesións, pelexas ou colaboracións coa Guardia Civil, entre outros).

Ao longo do 2025, rexistráronse 397 avisos deste tipo en todo o concello, é dicir, un 11% do total. En materia de violencia de xénero, no 2025 rexistráronse 16 alertas, un 15% máis que durante o 2023. As actuacións da Policía Local durante o pasado ano saldáronse con seis persoas detidas e oito acusados de diversos delitos, instruíndo por tanto dilixencias xudiciais.

Alberto Otero, concelleiro de Persoal, Seguridade e Emerxencias, pon en valor o esforzo e traballo realizado polos axentes, “que dan cobertura e atenden con eficacia ás necesidades da poboación”.

Como é habitual, a fin de semana grande da Festa do Pulpo foi a de maior actividade de todo o ano, con máis de medio centenar de avisos atendidos. Ás alertas é necesario engadir as tarefas de vixilancia propias do operativo, o que supón un esforzo extra para os axentes da Xefatura.

Para este 2026, os policías locais afrontan un novo reto ante o incremento de uso no Carballiño de vehículos persoais lixeiros como patinetes eléctricos. A xefatura lanzou en decembro unha campaña de concienciación e información á poboación sobre a nova lexislación estatal que regula o seu uso na vía pública.

Nestas primeiras semanas do ano, os axentes incrementarán os controis sobre este tipo de vehículos para reforzar a seguridade viaria e garantir a correcta convivencia cos peóns e cos vehículos a motor.

O primeiro tenente alcalde do Carballiño, Pepe Castro Gil pasou por esta emisora de radio para comentar o máis destacado da actualidade municipal deste inicio de ano.

Referíuse de forma concreta á reunión que os resposables municipais veñen de manter coa conselleira dd vivenda e planificación de infraestructuras, María Martínez Allegue, e na que se avanzou sobre un proxecto para a construcción de vivenda de promoción pública no Carballiño, asi como a humanización da Praza Maior e a rúa Ribadavia. Tamén confirmou o tenente alcalde que xa se presentou aos praceiros o proxecto, xa redactado, para a modernización da praza de abastos do Carballiño:

Escoita aquí a entrevista de Xan Pinal a Pepe Castro-Gil en COPE O Carballiño:

As obras de mantemento do viaduto da autoestrada Dozón-Ourense (AG-53) sobre a A-52 farán necesarias afeccións ao tráfico a partir deste luns, día 12 de xaneiro. Trátase de acometer traballos de renovación e mellora dos apoios do taboleiro sobre as pilas do viaduto, os cales requirirán o izado do taboleiro.

Estes traballos, que constarán de dúas fases diferenciadas, centraranse na primeira fase na colocación dunha estrutura metálica auxiliar, necesaria para dispoñer sobre ela os equipos de izado do taboleiro. Durante esta primeira fase, cuxa duración inicial se estima de entre 3 e 5 días laborables, só será necesario cortar un dos dous carrís da calzada da autoestrada AG-53 (sentido Ourense), que deberá manterse cortado durante todo o período de execución das obras.

Na segunda fase da intervención, procederase ao izado do taboleiro do viaduto e á execución dos traballos de renovación e mellora de apoios do taboleiro sobre os capiteis das pilas. Durante esta fase, cuxa duración se estima entre 2 e 4 días laborables, será necesario realizar o corte total da calzada e a habilitación do correspondente desvío está previsto para o seguinte luns, día 19 de xaneiro.

Así, ambas as fases deberán repetirse para cada un dos 5 apoios do viaduto, polo que se estima que as obras remataran ao longo desta próxima primavera.

Segundo a planificación dos traballos, durante todo o período de execución dos traballos manterase cortado o carril da AG-53 entre o quilómetro 86,5 e a conexión da AG-53 coa A-52 e a OU-402, e estímase que cada 2 semanas producirase un corte de calzada de 3 a 4 días de duración cada un deles, para o que se habilitarán os correspondentes desvíos.

Debido a que resulta inviable transferir o tráfico pola calzada contraria, ao situarse a zona de traballos onde non existe calzada no sentido contrario, o corte de calzada afectará ao tramo da AG-53 entre o enlace coa AG-54 (punto quilométrico 78,5) e a conexión coa A-52 e a OU-402 (quilómetro 87,2), e será necesario desviar o tráfico da AG-53 en sentido Ourense pola AG-54, N-541 (a través da saída 1 da AG-54 - enlace de Maside - e variante de Maside), e a estrada N-120, desde a cal poderá incorporarse á autovía A-52 para continuar en dirección Ourense ou en dirección Vigo.

Durante a execución das obras, tanto na AG-53 como na AG-54 e no enlace de Maside dispoñerase da sinalización oportuna para orientar aos usuarios da vía a través do itinerario alternativo indicado.