O persoal de enfermeiría do Centro de Saúde do Carballiño organiza dous obradoiros os días 18 e 19 de decembro dirixidos ás persoas que teñen ao seu cargo o coidado de persoas inmobilizadas.

Trátase de aportar información e experiencia referidas á alimentación, vestido, hixiene, mobilizacións, exercicio físico, primeiros auxilios, prevención de úlceras por presión, axuda psicolóxica e outras circunstancias que acontezan nestes ámbitos.

Os obradoiros terán lugar no propio centro de saúde (Aula 101-Planta 1), nos seguintes horarios: O 18 de decembro, de 10,00 a 11,30 h., ou ben o 19 de decembro, de 16,30 a 18,00 h.

Para participar hai que cubrir un formulario e entregarllo ao persoal de enfermería do centro de saúde.

O vicepresidente da Xunta, Alfonso Rueda, visitou o concello de Leiro xunto co seu alcalde Francisco José Fernández, para coñecer de primeira man as actuacións levadas a cabo con axudas deste departamento autonómico. Á visita tamén acudiu a directora xeral de Administración Local, Marta Fernández-Tapias, e a delegada territorial da Xunta en Ourense, Marisol Díaz Mouteira.

Alfonso Rueda indicou que as axudas deste ano foron destinadas ao financiamento de actuacións do Fondo de Compensación Ambiental, grazas ao cal foron investidos 30.000 euros na adquisición dun vehículo co que levar a cabo traballos de protección do medio ambiente e do espazo natural do concello co obxectivo de previr situacións de risco derivadas da caída de follas, ramaxes e troncos de árbores nas áreas recreativos e espazos públicos. Ademais, destináronse outros 2.000 euros á mellora do alumeado público no núcleo de Vilaverde.

Ademais, o titular da Vicepresidencia resaltou que este concello ribeirán é un exemplo a seguir no que se refire á colaboración entre entidades locais, xa que pertence á Mancomunidade do Ribeiro e á Mancomunidade turística do Carballiño, Ribadavia, Boborás e Leiro, coas que opta a axudas de maneira conxunta. AsÍ, a Mancomunidade Turística xa ten recibido nos anos 2012, 2014 e 2016 aportacións da Administración autonómica para o mantemento e a mellora dos seus servizos medioambientais. Ao abeiro do Fondo de Compensación Ambiental tamén se levaron a cabo traballos de equipamento de espazos naturais, así como de mellora da eficiencia enerxética e do alumeado público.

Tamén no marco destas axudas a Mancomunidade Intermunicipal Voluntaria do Ribeiro, da que forma parte Leiro xunto cos concellos de Arnoia, Beade, Cenlle e Cortegada, recibiu este ano unha achega de 69.000 euros para a mellora dos servizos de recollida de lixo e lumes. O proxecto recolle a adecuación das instalación de tránsito e depósito en materia de residuos sólidos urbanos nas dependencias da mancomunidade.

Para este venres dia 13 de Decembro, ademáis da ruta das tapas na hostelería local, o programa de nadal da concellería de cultura tamén inclúe a película que nos ofrece o Cine Club Carballiño, ás 20:00 e 22:30 no auditorio, a película española "Los años que vendrán".

Ademáis, dous eventos culturais protagonizarán esta fin de semana no Carballiño: Trátase do Concerto de Nadal e da Gala de Circo, recomendados ambos para todos os públicos, e que terán lugar no auditorio municipal Manuel María.

O Concerto de Nadal, que ofrecerán o sábado 14 conxuntamente a Coral Polifónica do Casino do Carballiño e a Banda de Música de Vilatuxe, comezará ás 20,00 h., coa entrada totalmente libre e gratuita.

A Gran Gala de Circo da compañía Pistacatro, terá lugar o domingo 15 ás 18,00 h. A entrada para este evento, que se leva a cabo dentro da Rede de Teatros e Auditorios de Galicia, será de 3,50 euros. Un importante elenco de artistas porá en escena un dos mellores espectáculos da variedades que se poidan ver: malabares, acrobacias, sketchs de humor…

O Centro Comercial Aberto pon en marcha a campaña de Nadal 2019/2020, na que destaca un sorteo de 1.500 euros en vales de compra, percorridos en tren turístico pola vila, colchonetas para os nenos e animación de rúa, e que foi presentado esta mañá pola concelleira de Comercio, Silvia Baranda, e a xerente do CCA, Noelia Mares.

Esta campaña ten como lema “Este Nadal no Centro Comercial Aberto do Carballiño para mercar e regalar”.

Como nos últimos anos, as persoas que merquen durante estas datas en calquera dos 87 establecementos asociados ao CCA recibirán tiques para subir ao Tren do Nadal os días 21 e 22 de decembro, en horario de 12 a 14 e de 16,30 a 20,00 h; para que os cativos poidan disfrutar coas Colchonetas Divertidas o día 4 de xaneiro, nas prazas Emilia Pardo Bazán, San Ramón (Curros Enríquez) e Plaza de Abastos; e para estar con Papá Noel o día 23 de decembro en horario de 17,00 a 21,00 h., e o día 24 en horario de 17,00 a 19,00 h.

Ademais, o 21 de decembro entregaranse os diplomas do concurso de escaparates para os asociados, e os días 21, 22 e 23 de decembro tamén haberá animación de rúa con coreografías da Escola da Danzas e actividades programadas polo concello como MIKI&MINI, globoflexia, etc…
Silvia Baranda amosou o seu apoio ao comecio local animando a mercar no pobo, e resaltou o gran número de actividades de animación que están programadas para este Nadal tanto polo CCA como por parte do concello.

Noelia Mares dixo que esta campaña de Nadal do CCA intenta favorecer aos tres pilares nos que se sustenta o comercio local, e que son os propios comerciantes e a clientela, e os cativos. Engadiu que para o comercio do Carballiño o tempo de Nadal é sempre un dos máis importantes, e que eso desenvolven un programa de actividades extraordinario, e que esperan que teña tanto éxito como os dos últimos anos.

Con respecto ao sorteo de 1.5000 en euros en vales de compra, dixo que habería dous primeiros premios: un primero premio de 300 euros, coincidente co número do primeiro premio da Lotería de Reis; un segundo premio de 200 euros, coincidente co número do segundo premio da Lotería de Reis, e dezaoito premios de 50 euros, coincidentes coas catro últimas cifras do primeiro e segundo premio da Lotería de Reis.
Finalmente, animou a mercar no Carballiño e agradeceu á xente a confianza no comercio local.