A Consellería do Medio Rural comprometeuse a estudar coa máxima atención a proposta do concello de Beariz para declarar o núcleo de Alvite, situado na parroquia de Santa María de Beariz, como “aldea modelo” para a prevención e defensa fronte os incendios forestais.

Así llo transmitiu o titular deste departamento, José González, ao alcalde do municipio, Manuel Prado, durante unha xuntanza de traballo na que tamén participaron os directores xerais de Desenvolvemento Rural, Miguel Pérez Dubois, e de Planificación e Ordenación Forestal, José Luis Chan.

Neste encontro, o rexedor de Beariz amosou un especial interese por integrar o devandito núcleo nesta iniciativa que está a desenvolver a consellería e que ten como principal obxectivo defender as persoas e os bens da ameaza dos incendios forestais, mediante diversas actuacións dirixidas á posta en marcha de actividade agrogandeira na franxa dos 50 metros próxima ás vivendas.

Precisamente, o conselleiro salientou o feito de que Beariz teña solicitada a súa adhesión ao convenio no que se enmarca esta actuación e que foi asinado pola consellería, a empresa pública Seaga e a Federación Galega de Municipios e Provincias, para a posta en marcha do sistema público de xestión da biomasa nas proximidades das vivendas, co fin de protexelas dos lumes.

A maiores, José González destacou que con esta proposta de Beariz xa son máis dunha ducia os concellos galegos interesados en incorporar algún dos seus núcleos a este proxecto de “aldea modelo” e que as candidaturas non deixan de medrar, polo que agradeceu a boa acollida que está a ter esta iniciativa entre os municipios.

Por último, neste encontro de traballo tratouse tamén sobre o pasteiro situado neste concello, precisamente nas proximidades do núcleo de Alvite, habilitado dentro dos plans impulsados pola consellería no marco das diferentes iniciativas postas en marcha para a recuperación e posta en valor de terras agrarias.

A Festa da Vendima de Leiro cumpre 30 edicións como escaparate do viño do Ribeiro, produto esencial na economía da comarca e particularmente do municipio de Leiro. A presentación desta tradicional celebración tivo lugar no Pazo Provincial, acto no que participou o vicepresidente da Deputación de Ourense, Rosendo Fernández; o alcalde e o concelleiro de Cultura de Leiro, Francisco José Fernández e Ramón Álvarez; e o presidente do Consello Regulador da D.O. Ribeiro, Juan Manuel Casares.

A Deputación de Ourense colabora con esta celebración que "transcende o aspecto puramente festivo para converterse nunha canle de divulgación e promoción económica dos recursos endóxenos do Concello de Leiro", dixo Rosendo Fernández, quen sinalou que "en Leiro o viño faise festa e a festa faise viño, pero sen a vendima non habería nin festa nin viño".

Así mesmo, Rosendo Fernández destacou o papel da veciñanza nesta celebración "participando de forma activa nesta festa de exaltación do proceso da vendima que ofrece aos asistentes un amplo e variado programa de actividades que conta cunha parte didáctica no desfile das carrozas, no que se escenifica todo ese proceso da vendima".

O alcalde de Leiro, quen agradeceu o apoio da Deputación de Ourense, lembrou que se trata dunha "festa de homenaxe á xente que vive por e para o viño" e explicou que a aposta do Concello con esta celebración ten como obxectivo "revitalizar o noso produto estrela e auténtico motor do municipio: o viño".

Neste mesmo sentido, Juan Manuel Casares felicitou ao municipio de Leiro por ser capaz de "innovar e manter a identidade do municipio" nesta celebración que "naceu no ano 1963 e que, polo tanto, é un ano máis antiga ca propia Feira do Viño do Ribeiro". Ademais, o presidente do Consello Regulador da D.O. Ribeiro dixo que "o futuro da comarca vitivinícola do Ribeiro baséase, en parte, na colaboración de tódolos axentes".

 A programación da festa comezará, segundo explicou o concelleiro de Cultura de Leiro, o sábado 24 de agosto, coas atraccións infantís ás 17.00 horas e, posteriormente, a partir das 22.30 horas celebrarase o "Vendima Rock" no Salgueiral. O domingo 25 de agosto, a festa dará comezo ás 10.00 horas coa recepción de acios a concurso que posteriormente serán expostos.

O concurso de Acios de tintos e brancos, que só admite variedades autóctonas do Ribeiro, outorgará premios dotados con 90 euros o primeiro, 60 euros o segundo e 30 euros o terceiro premio. Ás 11.30 horas será a benvida ás autoridades e convidados na Casa do Concello, para continuar ás 12.00 horas coa lectura do pregón na praza do Cruceiro que nesta edición correrá a cargo de Mariano Rajoy Brey.

Ás 12.30 horas terá lugar o tradicional desfile de Carrozas e Charangas desde a rúa Gabino Bugallal ata o Campo da Feira, así como a 3ª edición da Mostra de coches clásicos.

Un dos actos máis populares da festa é o concurso e desfile de carrozas, unha exposición que mostra as tarefas propias da vendima. O concurso recolle, na categoría de adultos, un primeiro premio dotado con 1.000 euros, o segundo premio de 750 euros, o terceiro premio é de 600 euros, e 400 euros por participar no concurso. Na categoría infantil, os premios van dos 400 euros ó primeiro, 300 euros ó segundo, 200 euros ó terceiro e aos 50 euros por participar.

A partir das 14.00 horas haberá varias actividades instaladas no Salgueiral como o XVI Mercado Artesanal e a 2ª Mostra dos Viños de Leiro e, ás 14.30 horas, comezará o xantar popular.

Pola tarde retomaranse as actividades ás 16.30 horas coa entrega de premios aos gañadores dos concursos de Acios e Carrozas e continuarán as actividades infantís e a festa no Salgueiral.

O deporte chegará ás 17.45 horas co partido de presentación do C.F. Leiro.

Ás 20.00 horas será o concerto de Corais da Vendima e ás 21.00 horas pechará a xornada festiva unha actuación musical.

Os vinte alumnos e alumnas que formaron parte do obradoiro de emprego “Carbosan 2018/19” recibiron hoxe os diplomas que acreditan a súa asistencia aos respectivos módulos de albanelería e forestal nos concellos do Carballiño, Maside, Boborás e San Amaro.

O acto tivo lugar no salón de plenos do concello do Carballiño, e celebrouse coa asistencia dos alcaldes do Carballiño e Maside, Francisco Fumega e Manuel Cadaviz, respectivamente; da alcaldesa de San Amaro, Mª del Carmen Pérez, e da concelleira de Emprego de boborás, Rosa Pérez, así como do director e moitores do obradoiro.

Neste evento confirmouse a solicitude polos catro concellos participantes dun novo obradoiro para o período 2019/20, que terá os mesmos módulos e número de alumnos que o que se clausurou hoxe.

Os catro representantes municipais agradeceron o traballo desenvolto tanto pola dirección e os monitores como polo alumnado, e que tivo como resultado práctico, ademáis da formación, a realización de importantes obras nos catro concellos.

Neste sentido, amosaron a súa satisfacción polo obradoiro, e destacaron a importancia de ofrecer a posibilidade de que persoas desempregadas poidesen formarse e teñan a oportunidade de atopar traballo.

Un total de vinte persoas participaron neste obradoiro, que conformaron os concellos do Carballiño, Maside, Boborás e San Amaro, e que estiveron distribuidos en módulos de albanelería e forestal. Así mesmo, contou con cinco persoas máis para as labores administrativas e técnicas

Cinco espectáculos teatrais e dous obradoiros forman parte do programa do xa clásico veraniego "Festival de Títeres do Carballiño" que organiza a concellería de cultura coa colaboración da Deputación de Ourense, con representacións a diario ás 19:30 horas na Praza Emilia Pardo Bazán.

Abre a programación este lúns 19 de Agosto a compañía "Os contos de Pablismo" coa obra "O Paroleiro", recomendada para un público entre os 4 e os 9 anos.

O martes 20, "Larraiz Urruzola" presenta "Dona Barriga Verde", para nen@s a partir dos 6 anos.

O mércores 21,  "Títeres Babaluba" trae a O Carballiño a súa producción "Lume" para un público entre os 2 e os 10 anos.

O xoves 22, "Fantoches Baj" representará "Auga que non vas beber", apta para todos os publicos, incluido o adulto.

O vernes 23, na xornada de clausura, "Viravolta Títeres" presenta "Marionetas de Papel", recomenndado para maiores de 6 anos.

Os dous obradoiros desenvólvense ás 12:30 horas, o lúns 19 sobre a creación de títeres con elementos de reciclaxe, e o vernres 23 sobre a creación de monicreques de papel.

Espazo Común denuncia “o afán recadador do Concello” que, tras perdoar débedas antes das eleccións municipais, reclama agora ós veciños o pago de tasas “pola recollida do lixo nos anos 2016, 2017, 2018 e 2019 que nunca antes foran remitidos aos interesados”.

Sen explicación algunha nin comunicación previa, dáselle a estes cidadáns tratamento de morosos ao reclamarlle débedas de catro anos atrás, aseguran dende ESCO.

O grupo municipal Espazo Común en O Carballiño denuncia que, antes das eleccións municipais, “tramitáronse unha morea de expedientes de cancelación de débedas para moitos particulares e empresas por non ter sido notificados en tempo e forma”. Espazo Común precisa que “foron beneficiados negocios e persoas moi coñecidas do Carballiño incluíndo, por exemplo, a exconcelleiros” ó non ter que pagar “multas e impostos municipais por non ser a empresa de recadación quen de localizalos durante cinco anos”.

Sinalan que, tras as eleccións, “cambia radicalmente a actitude e comezan a chegarlle a veciños de Arcos, Veiga, rúas do Carballiño e algunhas outras parroquias cartas nas que se lles esixe o pago con carácter retroactivo da taxa da lixo da que ata hai pouco estaban exentos”. Espazo Común salienta que “é certamente curiosa a transformación da política económica deste alcalde e a súa aplicación moito máis que reprobable por parte da empresa de recadación e os seus responsables.”

Espazo Común considera “unha tomadura de pelo que algo así se ocultara ata pasado o proceso electoral” e tamén considera que se trata “dunha nova proba da mentira masiva urdida por Fumega antes do 26 de maio”. O grupo municipal precisa que “é evidente que un expediente de regularización deste tipo non se elabora en dous meses e resulta aínda máis sospeitoso que se pase ao cobro no segundo semestre deste ano 2019 e non no primeiro” e conclúe que “a única explicación é que esta cuestión permanecera agachada nun caixón ata despois das eleccións para non enfadar aos votantes”.

Finalmente, esta formación política esixe a convocatoria dunha xunta de voceiros para que se dean explicacións satisfactorias para a cidadanía e que se “rectifique esta política interesada e caciquil na que se está sumindo o Concello do Carballiño”.

De non ser así, engade Espazo Común,“falaremos co resto de grupos da oposición e valoraremos forzar a convocatoria dun pleno extraordinario.”

Os populares consideran que "a consecución da declaración de festa de interese turístico e raíz do feito de que se organice entorno ao día grande da Festa do Pulpo unha semana forte de actividades, queda claro que contribúe a que sexa coñecida como a semana grande do Carballiño e se potencia con máis forza unha maior presenza de xente no segundo domingo de agosto".

Non obstante, o Partido Popular matiza quedébese "ter coidado con que non se perda o equilibrio necesario para manter a Festa do pulpo en niveis altos e para elo" e poñen de manifesto os seguintes aspéctos:

A Festa do Pulpo débeselle dedicar a aquel lugar ou entidade que tamén garantan alomenos unha mínima presencia e respecto institucional. Referímonos a isto, toda vez que sendo unha edición dedicada a Asturias, na presentación só tivo presenza o concello de Gijón, representado pola súa alcaldesa. E o día da nosa festa, nin sequera isto, xa que o concello de Gijón estivo representado por un só concelleiro, e nin Oviedo, nin outras poboacións e moito menos o Principado de Asturias, tiveron representación algunha, polo que se fai preciso comezar dende xa a organizar a dedicatoria do ano seguinte, para planificar con tempo estas cuestións e ir a onde sexamos ben recibidos e se entenda a nosa dedicación.

A Festa do Pulpo, debe de recuperar as súas tradicións, que sempre fixeron dela unha gran romaría, polo que se ten que recuperar o Festival folclórico no Parque, que se eliminou fai 5 anos, e que era do gusto de moita xente que nos visitaba ese día, sendo tamén un dos elementos clave da nosa actual declaración de interese turístico nacional.

Débese de ter coidado co feito de que sexa o casco urbano quen lle gañe a partida ao parque Municipal en canto a asistencia, pois cando se detecte que a Festa do Pulpo, pase a ser mais urbanita que romaría, correse o risco de que deixe de ter o empuxe que ten.
O acontecido este ano, pasando de unha a dúas as zonas de minibares, fixo que no parque sonasen máis os decibelios dos grandes equipos de música que a propia música tradicional. Débese de marcar un criterio novo de adxudicación deste espazo para disfrute dos mais novos, e por suposto que, pudendo ser, que se aproveiten os locais do pobo, sen ter que “remendar” da forma que se fixo, pois alomenos podemos dicir que foi de forma “alegal”.

Tamén no parque Municipal, se debería de recuperar a instalación do sistema de megafonía que tradicionalmente existía, para trasladar algún aviso de importancia, que tanto podería ser de emerxencia como de perda dalgunha persoa.

De igual forma, baixo ningún concepto debería de permitirse no parque a presencia de vehículos que non fose os precisos de emerxencia e seguridade, nin sequera nas pistas existentes de terra, pois teñen lugares non moi lonxe onde poder estacionar. Di pouco da festa ver como coches e furgóns circulan para recoller os seus postos de volta sobre as 17 horas polo medio da xente que aínda quere disfrutar da festa.

E por descartado, para a xornada do día grande da Festa do Pulpo, se debe de organizar o tránsito de persoas e vehículos con máis seguridade e máis operativo, facendo estacionamentos en zonas máis alonxadas e organizando un transporte público que funcione todo o día, e transformando nun sendeiro mais peonil a unión do centro da vila co Parque municipal.

Respecto do concurso de camisetas do sábado, débese de organizar mellor o desfile, pois moitos mozos dos que desfilaron din facelo sen saber moi ben o que fan, e teñen a sensación de que desfilan máis para poder ser vistos polos que están sentados nas terrazas que para divertimento propio, cando é a eles, aos que se organizan en peñas, aos que se lles debe facer pasar unhas horas agradables.

Por último, algo que piden as nosas pulpeiras e que non se debería deixar de lado, e a posibilidade de que se habiliten puntos de auga e desaugadoiros repartidos pola zona onde se colocan no Parque, para evitar facer barrizais e que quen nos visita non teña que preocuparse en exceso por ver onde pisa.

O grupo popular do Concello do Carballiño afirma que sempre estará pendente desta festa, estamos e estaremos sempre participativos e colaboradores, e deixamos as nosas recomendacións sobre diversos aspectos que consideramos se deberían de mellorar ou rectificar en posteriores edicións.