O Partido Popular recorda que "o pasado día 13, presentouse por rexistro diversas preguntas sobre o que estaba a acontecer na Avda. De Julio Rodríguez Soto do Carballiño, sobre a substitución dunhas 20 camelias que foron retiradas do seu emprazamento por unha empresa privada".
Manifestan que a dia de hoxe continúan sen ter resposta da existencia dun proxecto medioambiental ou técnico que garanta a conveniencia do cámbeo destas árbores, nin tampouco do procedemento administrativo para a súa contratación a través dunha empresa privada.
"Non sabemos quen fixo o servizo e canto lle costou ao Concello, e por suposto, tampouco cal é o destino das camelias retiradas. Por declaracións públicas da concelleira de Medio Ambiente, Erika Paz, estaban buscando un lugar para reubicar estas camelias", manifestan.
E engaden "agora, temos constancia da aparición de destas camelias e macetas nunha finca privada no pobo de O Lago, no Municipio de Maside, na que se pode observar incluso un maltrato a estas árbores no seu traslado".
Consideran dende o Partido Popular que "o Concello do Carballiño ten espazo dabondo onde albergar-las provisionalmente en calquera das súas instalacións ou fincas, sen necesidades de levalas a unha finca privada dun Concello lindeiro".
Tamén afirman "descoñecer de quen é a finca e a súa actividade, descoñecemos o seu destino, e descoñecemos porqué esta ubicación, pero engadimos estas preguntas agora ás xa rexistradas anteriormente, pois queremos saber, de quen é a finca e a relación que pode ter co acontecido, así como quen lle levou ata alí as camelias e macetas, e con que fin".
Tamén tendo en conta que aquí non están a totalidade das camelia, esixen saber de forma inmediata a ubicación exacta de todas elas.
En todo caso, entenden que "estáse a demostrar as sospeitas de que todo o acontecido, non obedece mais que a unha TRAMA da concelleira de medio ambiente, e visto o visto, todo apunta incluso a unha improvisación que podería acarrear un delito medioambiental".
E finalmente, anuncian dende o Partido Popular que reservan "máis apreciacións ata ter aclaracións a todo o acontecido".
Oíamos fai pouco como os veciños de San Ciprián de Las se queixaban porque alguén talóu unha árbore significativa sen motivo aparente.
Parece que no concello de Maside se unen a esta práctica, cortando polo pe dúas das árbores que contribuían a que as instalacións de A Rañoa, sexan das máis visitadas da comarca en época estival. Xa o ano pasado se talaron outras tres. Independentemente de que dita barbaridade teña ou non xustificación, o certo é que se a Rañoa vai quedando sen arboleda, comenzará a perder o claro atractivo que fai da Rañoa unha das xoias da corona dos masidaos.
Esta desmedida afición pola motoserra que teñen os responsables municipáis , deberíase ver compensada pola plantación de novos exemplares, para así manter un lóxico equilibrio e impedir que ano tras ano, as piscinas e o seu entorno perdan o seu valor. É algo de caixón. O doado é cortar polo pe, pero a ninguén se lle ocurríu plantar. Non se lle escapa a ninguén que estas instalacións merecen unha especial atención por ser dende sempre un dos mellores espacios públicos de término municipal.
A Consellería de Infraestructuras ven de adxudicar as obras de reforzo do firme na estrada entre o concello de Cea e a localidade de A Barrela, no chamado Eixo do Riberio, cun investimento de 436.000 euros.
Estas actuacións comezarán no vindeiro mes de maio e foron adxudicadas á empresa Grupo Bascuas, cun prazo de execución de 4 meses.
Os traballos complementarán aso levados a cabo pola Xunta en 2016, mediante os que se ampliou a plataforma da estrada.
Fronte Común para esixir a execución da Autovia de Lugo
Alcaldes dos concellos das provincias de Lugo e Ourense, entre eles os de Cea e Carballedo, xunto a empresarios e outros axentes socias, reuniránse este mércores dia 25 en Chantada para acordar unha fronte común, esixindo dunha vez por todas que se reactive este proxecto que acumula varios anos de retraso.
Na actualidade, tan so está en obras un pequeno tramo nas inmediacións da Barrela, e no proxecto de orzamentos do Ministerio de Fomento para 2018 tan so se contempla unha partida de 10 millóns de euros para o tramo A Barrela-San Martiño.
En maio de 2016 o alcalde de Maside chamaba brazo político armado ao servizo do PP a 771 persoas que firmaran a súa vontade de participar nun asunto público de conformidade co artigo 23.1 da Constitución española e o artigo 70 bis da Lei reguladora de Bases do Réxime local.
No seguinte pleno cualificaba a estas mesmas 771 persoas como os da bola de cristal.
Debería este xenuino alcalde explicar o funcionamento da súa bola de cristal que é capaz de visionar un acordo de 29/12/2018.
Como descargo a esta inepcia hai que dicir que é a primeira vez na historia que publica no perfil do contratante un contrato público, contravindo a Lei. Cando eres novato cométense erros. Pero lembrarlle a este persoeiro que dende o 3 de marzo xa está en vigor a nova Lei de Contratos do Sector Público. E xa pode fiar máis fino se non quere que outras bolas de cristal chamadas códigos o poñan no seu sitio.
Esta chapuza é similar ás obras.
http://www.concellodemaside.es/contratante.php
Son tres actuacións que se incluirán no expediente de modificación orzamentaria da Deputación de Ourense, tan so pendente da súa aprobación no pleno da entida provincial previsto para o vindeiro dia 27 deste mes de abril.
O río Arenteiro e a Sociedade de Pescadores poderán contar cun novo equipamento, como é unha canle ictoxenética de troitas, un proxecto no que veñen traballando na Sociedade de Pesca Deportiva, e que estaba parado por falta de financiación. Agora recibirá un importante impulso, cunha aportación de 48.000 euros da Deputación de Ourense.
Na parroquia de Mesego, a Igrexa de Santa María sufríu recentemente importantes danos na súa cuberta que amenzan a integridade do patrimonio e mesmo a seguridade das persoas que acuden a ela. A obra ten un coste de 48.000 euros, dos que a Deputación achegará 24.000.
Tamén se incluirá nesta modificación orzamentaría da Deputación unha achega económica ao concello carballiñés por importe de 13.000 euros, para a instalación de asentos no Estadio de Espiñedo, unha actuación que fora comprometida polo presidente Manuel Baltar fai apenas unhos meses atrás na súa a visita a estas instalacións tras a reforma feita nos vestiarios, unha obra que tamén asumira integramente a Deputación Provincial cunha achega económica de 60.000 euros.
Dende o grupo municipal do Partido Popular no concello do Carballiño manifestan que "estas actuacións son unicamente méirto, tanto da Sociedade de Pesca Deportiva Arenteiro, como da Asociación de Veciños de Mesego e a directiva de CD Arenteiro, xa que o único que se fixo dende o PP do Carballiño foi trasladar estas inquietudes ao goberno provincial, onde foron perfectamente atendidas".
Unha vez posto de manifesto publicamente que o Concelleiro de persoal, Adolfo Nogueira, redacta en documento público que a súa compañeira do grupo municipal do PSdeG-PSOE Rosario González, exerce as súas funcións como concelleira de Medio Rural neste Concello tendo un horario de 8 a 15 horas de luns a venres, para que poida ser acollida en diversos programas de conciliación do Concello e mesmo no comedor escolar da Uceira, dende o Grupo Municipal do Partido Popular no Concello, denunciamos o seguinte:
1) Non é quen o Concelleiro Adolfo Nogueira, para poder informar sobre o traballo que desenvolve, ou non, unha compañeira súa de Goberno, pois si é dubidoso que o puidera facer sobre calquera traballador con contrato en vigor, o que si e certo que el, por moitas competencias que se queira atribuír, non pode facer o que fixo. Todo persoal contratado ou non, para xustificar a súa presenza no Concello, só ó pode facer por medio de certificado da propia Secretaria do Concello. E máis, nin o propio Alcalde sería quen de informar semellante cousa
. 2) Isto faise entre ambos concelleiros Adolfo e Rosario, a sabendas de que vai a ser utilizado para servizos de conciliación propios do Concello, como “Bo día Familia” e “Verán Divertido”, así como para o servizo de comedor da Uceira e sabedores ao mesmo tempo de que non existe contrato algún de traballo entre Rosario e Concello.
3) O feito de informar premeditadamente este documento, presentarse, e ser aceptado tanto nos programas de Conciliación do concello como no comedor, xera con toda seguridade, inxustizas con outras familiar do pobo que ven que con máis “dereitos reais e xustificado” se quedan fora, pasando a formar parte da lista de espera destes servizos. Os servizos de “Bo día Familia” e “Verán Divertido” que se organiza na área de Servizos Sociais e Igualdade do Concello, están expresamente planificados para familias que teñan a necesidade REAL de conciliar, xustificándose por medio dos contratos dos traballos, e exceptúase as familias que xa foran derivadas a servicios sociais por outras cuestións de emerxencias sociais ou similares. No caso do Comedor escolar “onde por certo o Concelleiro afirma que xa firmou este documento o ano pasado e serviu para ter praza no Comedor para este ano” requírese de igual forma a xustificación do traballo e a lista de reserva neste comedor é ampla cada ano e aquí o prexuízo para outras familias que están en lista de espera.
4) Pedimos explicacións do sucedido por rexistro, ante o que consideramos un intento de TRATO DE FAVOR entre compañeiros de Goberno municipal en detrimento doutras familias do pobo e que dean traslado ao Consello Escolar e ANPA da Uceira.
O Voceiro do Grupo Municipal Socialista do Concello do Irixo, Iago Fariñas Valiña, ven de presentar unha MOCIÓN DO GRUPO MUNICIPAL SOCIALISTA DO CONCELLO DE O IRIXO PARA RECUPERAR A TITULARIDADE DA CARBALLEIRA DO CAMPO PARA A VECIÑANZA DO IRIXO E NEGOCIAR Á CESIÓN DE DIESTROS EN SAN COSME, PARADA DE LABIOTE E OUTROS DE INTERESE PARA A VECIÑANZA, en base á seguinte Exposición de motivos:
PRIMEIRO.-Que é de lamentar que dende o goberno municipal non se teña protexido nin defendido a titularidade veciñal da carballeira do Campo en beneficio de toda a veciñanza permitindo que esta fose inmatriculada polo Bispado de Ourense sen oposición algunha por parte do Concello do Irixo.
SEGUNDO.-Que o pasado 14 de abril de 2015 o Bispado de Ourense rexistrou as dúas parcelas que compoñen a carballeira do Campo incluída nas parcelas catastrais 32036A001000250000PW e 32036A001003350000PI por titulo de certificación do artigo 206 da antiga Lei hipotecaria, punto 1 que di: “El Estado, la Provincia, el Municipio y las Corporaciones de Derecho público o servicios organizados que forman parte de la estructura política de aquél y las de la Iglesia Católica, cuando carezcan del título escrito de dominio, podrán inscribir el de los bienes inmuebles que les pertenezcan mediante la oportuna certificación librada por el funcionario a cuyo cargo esté la administración de los mismos, en la que se expresará el título de adquisición o el modo en que fueron adquiridos...”
TERCEIRO.-Que o grupo de goberno do concello do Irixo non dixo nin fixo nada para defender a titularidade da carballeira do Campo que ven sendo veciñal dende tempo inmemorial.
CUARTO.- Que a titularidade da Carballeira do Campo é veciñal dende tempo inmemorial ven acreditado polo uso que se ven facendo deste espazo, celebrando a parroquia do Campo as súas festas patronais, existindo sobre a mesma ademáis varias edificacións, a máis antiga unha antiga escola hoxe reconvertida en velorio municipal, un depósito da traída de auga dos veciños e incluso nos últimos anos unha edificación tamén de pedra que serve de bar das festas patronais.
QUINTO.- Que incluso os máis vellos do lugar recordan como fai moitos moitos anos, o párroco don David quixera decotar os carballos da carballeira e os veciños non llo permitiran atendendo a esta mesma titularidade veciñal, por este feito tivo que desistir nas súa teima.
SEXTO.- Que máis recentemente, fai uns anos, e atendendo ó sentimento de que dito espazo era veciñal, os veciños en asemblea acordaron e finalmente cortaron uns eucaliptos xa ben vellos nas cercanías do velorio.
SÉTIMO.- Que é lamentable que incluso o goberno municipal, se quixera, podería haberse adiantado ó Bispado e por este mesmo artigo 206 da antiga Lei hipotecaria puido no seu día rexistrar esta carballeira, polo menos como propiedade municipal, para desfrute e garantía de que sempre podería ser usada libremente por toda a veciñanza sen restricións.
OITAVO.- Que o único certo é que o goberno municipal , non fixo nada, nin antes nin despois do rexistro da carballeira do Campo por parte do Bispado, deixando que a veciñanza perdese a posesión dunha propiedade que ven posuíndo dende tempo inmemorial.
NOVENO.- Que para colmo de males, o grupo de goberno no pleno do pasado 21 de decembro aprobou a firma dun convenio co Bispado de Ourense, para a cesión da carballeira do Campo por un período de 15 anos recoñecendo así cos actos propios a titularidade da carballeira do Campo como do Bispado segundo a chamada doutrina dos actos propios ou regra que decreta a inadmisibilidade de “venire contra factum propium”, significa a vinculación do autor dunha declaración de vontade xeneralmente de carácter tácito ó sentido obxectivo da mesma e a imposibilidade de adoptar despois un comportamento contraditorio, o que encontra o seu fundamento último na protección que obxectivamente require a confianza que fundadamente se puidese haber depositado no comportamento axeno e a regra da boa fe que impón o deber de coherencia no comportamento e limita por elo o exercicio dos dereitos obxectivos” (STC 73/1988, de 21 de abril). Con posterioridade, o Tribunal Supremo, a través dunha extensa xurisprudencia, establecerá as bases, requisitos e contido desta regra, pero claro está que o propio grupo de goberno regalou ó Bispado a titularidade da carballeira do Campo por pasiva primeiro e por activa despois.
DÉCIMO.- Que o grupo de goberno, como anunciou o Sr. Alcalde nos medios de comunicación, ten previsto facer obras por valor de 150 mil euros na carballeira do Campo, inversión e obras que quedarían a beneficio do Bispado de Ourense sen ningún tipo de contraprestación pasados os 15 anos do convenio aprobado podendo vender ou ceder este espazo a un terceiro que desfrutaría da inversión realizada polo concello. Que como xa se dixo no pleno ó efecto, o grupo de goberno debería antes de facer ningún tipo de actuación inversión, estudar a posibilidade de reverter dalgunha forma a titularidade da carballeira do Campo en favor do Bispado de Ourense, xa que os únicos que posuíron este espazo dende tempo inmemorial foi o conxunto dos veciños. Ademáis de todo elo, o convenio limita os actos a celebrar neste espazo.
UNDÉCIMO.- Que entendemos a présa pola firma deste convenio sen reparar en defender a titularidade veciñal da carballeira do Campo, nin antes, dixo o Sr. Alcalde no pleno que non se enteraran, nin despois entendemos por motivos electorais, xa que se pretende facer unha actuación neste espazo antes das próximas eleccións do vindeiro ano, despois de máis de 31 anos sen facer nada, para gañar favor e o voto dalgún dos máis de 500 votantes que ten a parroquia do Campo no Irixo, cando nos máis de 31 anos nunca o goberno municipal tivo présa en actuar nin arranxar este espazo.
Que dito todo o anterior, para defender os intereses da veciñanza en xeral ademáis da titularidade veciñal da carballeira do Campo, o Grupo Municipal Socialista do Concello de O Irixo presenta para a súa consideración e aceptación polo Pleno Municipal a seguinte MOCIÓN instando ó Concello a:
1º.- Que o grupo de goberno estude e documente a viabilidade de reverter dalgunha forma a titularidade da carballeira do Campo en favor da veciñanza, xa que ela foi a única que posuíu este espazo dende tempo inmemorial.
2º.- Que chegado o caso, se garantice/compense a inversión a realizar na carballeira do Campo, entre outras coa cesión gratuíta dunha franxa no diestro do campo á altura da Lama para a construción de beirarrúas así como as cesións dos diestros de San Cosme, de Parada de Labiote así como outras parcelas de interese veciñal para uso e desfrute da veciñanza e no seu caso para a utilización como aparcadoiros segundo se ten solicitado nalgún caso xa en mocións anteriores.
3º.- Que se informe puntualmente e/ou consensúe a elaboración do proxecto de mellora dos espazos da carballeira do Campo con tódolos grupos da corporación para entre todos acadar o mellor proxecto para o noso concello e garantir así o éxito da iniciativa.
O presidente da Deputación de Ourense, Manuel Baltar, visitou Piñor e Punxín, onde comprobou in situ as actuacións que ten desenvolvido a institución provincial nestes concellos e analizou proxectos de futuro. Baltar estivo acompañado polos alcaldes destes municipios, José Luis González e Manuel Vázquez, respectivamente.
En Piñor, a visita centrouse no ámbito das infraestruturas viarias como a de Loeda, os accesos ao velorio, e en temas de colaboración social e cultural, mentres que en Punxín analizaron cuestións medioambientais e os accesos á área termal do Bañiño, actuación enmarcada no Plan Termal Provincial.
O presidente da Deputación Ourense Manuel Baltar recibíu en audiencia ao presidente da Entidade Local Menor de Berán na sede da entidade provincial.
Ambos, repasaron varios proxectos de colaboración entre as dúas entidades para executar nesta parroquia do concello de Leiro que conta coa única Entidade Local Menor existente na provincia de Ourense.
Entre os asuntos tratados estivo o "proxecto estrela" e que se agarda sexa unha realidade no transcurso deste ano 2018, o relativo a adecuación das instalacións termais do novo balneario, propiedade da Entidade Local Menor, con vistas á súa apertura ao público.
O PSdeG-PSOE no Concello de San Amaro queren trasladar o malestar que lles fixo chegar a veciñanza de San Cibrán de Las despois de que a deputación provincial decidira cortarlles o freixo de 60 anos que había ó pé da igrexa, sen explicarlles os motivos. Os socialistas entenden que esta incomprensible acción foi levada a cabo a instancias do alcalde do San Amaro, quen, en última instancia, é o responsable de solicitar da institución provincial que acometan as podas e cortas no termo municipal. O freixo, árbore autóctona de Galicia, estaba illado e era singular para os e as veciños/as de San Cibrán porque fora plantado polos nenos da aldea hai uns 60 anos, despois de que se cederan uns terreos particulares para uso da escola da época. Hoxe en día eses terreos úsanse como aparcadoiro das persoas que acoden ás celebracións relixiosas e o freixo era coñecido pola boa sombra que aportaba. Dáse tamén a casualidade, sinalan desde o PSOE, que a árbore estaba a 7 metros da estrada, polo que ó tratarse dunha especie frondosa caducifolia, non contraviña a normativa autonómica vixente.
“Polo que nos indican os e as veciños/as do lugar, non había problema algún co freixo histórico e por parte dos operarios da deputación que efectuaron a corta,
non lles deron explicacións convincentes, salvo que facían o que se lles pedira. En cuestión dun par de días pasaron de ir facer unha poda simple a volver ó sitio e levar por diante a árbore enteira. A veciñanza non entende as razóns que os levaron a este cambio de criterio e, por suposto, non saben nada do alcalde quen ten a responsabilidade de velar polo patrimonio natural do concello”, sinalan desde o grupo socialista. O desgusto pola perda do freixo é máis que xeralizado e por iso lle trasladaron ós socialistas o caso, para que reclamen explicacións ó alcalde por tan desafortunado atentado contra unha árbore que, ademais, non é moi habitual na provincia de Ourense.
En cambio, denuncian desde o grupo municipal socialista, hai, non moi lonxe do lugar dos feitos, unha zona inzada de piñeiros, especie que coa que si que hai que por especial coidado nos metros de distancia (10 metros en caso de plantacións ó pé dunha estrada) e ós que a deputación nin lles tocou. Neste caso ademais, hai que ter en conta o risco que supoñen tanto a nivel forestal, pola propagación do lume, coma pola altura e dobradura que alcanzan as súas pólas e, sen embargo, a pesar de ter pólas enriba de curvas pechadas, non tiveron orde de poda nin de corta. De feito, recalcan desde o PSOE municipal, esta plantación nin respecta os metros ós que obriga a normativa nin o sentido común ó estar ó pé mesmo da estrada.
Desde o PSOE cuestiónanse polas razóns que levan tanto ó goberno do concello como á deputación a perpetrar este agravio comparativo entre dúas zonas. “Preguntámoslle directamente ó alcalde se facer estas diferenzas entre árbores e plantacións non terá que ver coa propiedade duns terreos e doutros?”, indican os socialistas, “hai unha dobre vara de medir segundo sexan os casos e iso non se debe permitir. Os veciños están moi molestos con esta decisión de deitarlles abaixo o seu freixo, sen que ninguén tivese a decencia de lles ir explicar as razóns. Xogan co patrimonio natural ó seu antollo, coa singularidade da árbore que non molestaba a ninguén, coa historia compartida e liquidan o pasado e mailo futuro coas súas decisións caprichosas”.
Páxinas
- « primeira
- ‹ anterior
- …
- 487
- 488
- 489
- 490
- 491
- 492
- 493
- 494
- 495
- …
- seguinte ›
- última »
