O Portavoz do Grupo Municipal Socialista do Concello de O Irixo, Iago Fariñas Valiña, presentou unha MOCIÓN PARA UN PLAN DE ANÁLISE DE TÓDALAS FONTES PÚBLICAS E MANANCIAIS DE TRAIDAS DE AUGA DE CONSUMO HUMANO DO CONCELLO DE O IRIXO.

EXPOSICIÓN DE MOTIVOS

PRIMEIRO.- Que no noso Concello existen numerosas fontes e mananciais que subministran de auga a toda a veciñanza do Irixo, si ben moitas veces este consumo de auga carece de control sanitario e pode repercutir negativamente na saúde dos veciños e veciñas que fagan uso da mesma.
SEGUNDO.- Que o consumo de auga en mal estado pode ter unha incidencia directa sobre a saúde das persoas, son coñecidas por todos as enfermidades gastrointestinais sen obviar, as enfermidades crónicas por sustancias químicas presentes na auga que moitas veces nin sequera se vinculan ca mesma pasando inadvertida a orixe de dita enfermidade que realmente está na auga. Que incluso non é nada novo o feito de que en outros concellos se teñen detectado no pasado contaminacións de arsénico e outras sustancias nos mananciais de consumo humano co grave risco para a saúde das persoas.
TERCEIRO.- Que entendemos que as fontes son un ben de uso público e os mananciais de consumo humano dos distintos pobos un ben de primeira necesidade para a veciñanza, un ben indispensable e necesario para a vida, polo que o Concello de O Irixo debería atender a súa vixilancia, control, mantemento e sinalización, dando información da calidade sanitaria das augas que subministran.
CUARTO.- Que entendemos preciso que o concello realice un plan de autocontrol adecuado insistindo naquelas fontes nas que se teña constancia que son utilizadas para consumo de auga e que as sinalice de acordo ás características da auga.
QUINTO.- Que nas fontes e mananciais naturais nos que o concello teña constancia que son utilizadas para consumo de auga habitual deberíase realizar un autocontrol periódico dúas veces ó ano, no cal se deberían analizar os parámetros recomendados pola Xunta de Galicia: olor, color, turbidez, condutividade, PH, amonio, Escherichia coli e bacterias coliformes, nitritos, nitratos, enterococos, Clostridium perfringense e outros parámetros en función das características particulares da auga (aluminio, arsénico, manganeso ou ferro, por exemplo). Que segundo as recomendacións e/ou normativa legal se informe/sinalice os resultados dos mesmos e cando sexa posible se proceda a colocación da última análise de auga realizada.

Que dito todo o anterior, o Grupo Municipal Socialista do Concello de O Irixo presenta para a súa consideración, co fin de evitar riscos potenciais para a saúde, garantir a salubridade da auga e así asegurar a protección da saúde da veciñanza do Irixo, insta ó Pleno municipal á adopción dos seguintes ACORDOS:

1º.- Que o Concello de O Irixo encargue unha analítica exhaustiva de tódalas fontes e mananciais de consumo humano do municipio que se deberá repetir coa periodicidade recomendada pola normativa autonómica ó efecto.
2º.- Que o Concello de O Irixo faga públicos os resultados das analíticas co fin de que toda a veciñanza coñeza o estado da auga que están bebendo, e que se hai algún problema se tomen as medidas preventivas e correctoras necesarias.
3º.- Que no seu caso se informe insitu, cos carteis correspondentes e axustados ás recomendacións e/ou normativa legal, do estado da auga dos mananciais; “AUGA APTA PARA O CONSUMO HUMANO”, “AUGA SEN GARANTÍA SANITARIA” ou “AUGA NON APTA PARA O CONSUMO HUMANO”.

O presidente da Deputación de Ourense, Manuel Baltar, visitou o concello de Avión, onde se reuniu co alcalde do municipio, Antonio Montero, e con concelleiros do equipo de goberno local.

No encontro analizaron os investimentos que a Deputación de Ourense destina en cooperación co Concello de Avión a proxectos sociais e deportivos, como o centro de día e a piscina municipal, e tamén valoraron vindeiras iniciativas que se levarán a cabo entre ámbalas dúas administracións, referidas á mellora de infraestruturas viarias e de equipamentos comunitarios.

O obxectivo, segundo explicou Manuel Baltar é "seguir ofrecendo os niveis de máxima calidade na prestación de servizos públicos".

“A polémica sobre o proceso de replantación de novas árbores na Avenida Xullo R. Soto é estéril e infundada”, asegurou hoxe o alcalde do Carballiño, Francisco Fumega, durante unha rolda de prensa ofrecida conxuntamente coas concelleiras de Medio Ambiente, Érika Paz, e de Economía, Rita Soto, para informar do procedemento seguido no mesmo.

Este procedemento seguiu os pasos administrativos habituais na contratación do servizo, que se realizou dun xeito totalmente satisfactorio e dentro da legalidade, segundo dixo a concelleira de Medio Ambiente.

Érika Paz compareceu para "aportar toda a documentación que demostra a transparencia seguida en todo o proceso. Así, dixo que se realizou un informe a primeiros deste ano sobre a situación dos camelios e dos maceteiros, concluíndo que moitas árbores estaban secas e os maceteiros, moi deteriorados. Así mesmo, encargouse un informe técnico sobre o tipo de árbores máis axeitadas para esa rúa. E finalmente, elexíronse acebos de alta calidade, que son os que se colocaron", manifestou.

Engadíu que "despois pedíronse presupostos a tres empresas, como é preceptivo, seleccionando unha empresa de Mesego, que efectuou a mellor oferta económica e técnica".

"O encargo incluiu a totalidade do proceso: retirada dos camelios e dos maceteiros; preparación dos alcorques e plantación das novas árbores, así como a replantación dos camelios servibles nos terreos dos centros sociais das parroquias e a xestión dos inservibles, dos maceteiros e doutro tipo de refugallos derivados deste traballo", asegurou

"Esta empresa, tal e como o fai asiduamente, depositou temporalmente os camelios inservibles e os maceteiros nunha finca, chamando posteriormente a unha empresa de xestión de residuos da comarca para o seu transporte e reciclaxe" subliñou a concelleira.

Neste senso, a concelleira aportou unha carta da empresa onde explica este procedemento habitual, así como a recepción destes refugallos por parte dunha empresa de xestión de residuos da comarca. Mentras tanto, os camelios servibles foron replantados nos terreos dos centros sociais das parroquias.

Con estes documentos, que -según os responables municipais- "certifican a legalidade e transparencia de todo o proceso" Érika Paz criticou que o portavoz do principal partido da oposición puxese en cuestión o bo facer dunha empresa local, "que fixo un traballo de calidade, tal e como o manifestan os veciños da avenida Julio R. Soto, así como do concello, que diu solución a unha vella demanda veciñal para cambiar o que a todas luces era unha mala imaxe para esta céntrica rúa da vila",remarcou a concelleira.

Finalmente, Rita Soto, asegurou que "a finca na que se depositaron temporalmente os camelios e maceteiros retirados era propiedade súa e do seu marido, pero que este tipo de depósitos fano eventualmente moitas empresas da zona antes de que se fagan cargo deles outras empresas de xestión de residuos".

De feito, dixo que fora o seu marido o que lle dira o permiso, tal e como fai sempre coas empresas do sector, sen que haxa ningún tipo de interese particular nin calquera outro aproveitamento. Incluso, Rita Soto "asegurou que non se enterou deste depósito ata que o tema saiu publicado na prensa".

Por todo isto, dende o concello crese que o voceiro do PP "só busca obter certo protagonismo e rendimento político, incluso a costa de causar dano a unha empresa local que traballo con rigor".

E incluso o cominan a ir ao Xulgado, "se considera que se produciu algún tipo de ilegalidade, algo que é absolutamente falso".

A nova configuración da rúa Otero Pedrayo incrementa o número de prazas de aparcamento a case un centenar. En concreto, son 94 prazas máis outras 2 reservadas para vehículos de persoas con discapacidade.

Así mesmo, hai media ducia de prazas para aparcamento de motos.

Hoxe mesmo quedará rematado o traballo de pintado destes aparcamentos, pasos de peóns e demáis sinalización da calzada.

O establecemento da circulación nun sentido único, con entrada dende a rua Conde Vallellano e saída pola Avenida 25 de Xullo, supón unha mellora significativa da seguridade tanto para peóns como para vehículos, facilitando o acceso á avenida 25 de Xullo, en cuxa estrada queda eliminado o carril central que daba acceso ata agora á rúa Otero Pedrayo.

Así mesmo, adiántase uns metros o sinal de stop para a incorporación dos vehículos á avenida 25 de Xullo, mellorando a visibilidade dos conductores para acceder á mesma.

A adopción da dirección única nesta rúa está en consonancia coa que se aplica actualmente na maioría das cidades e vilas co obxectivo de elevar a seguridade, xa que ao circular os vehículos nun sentido único, tanto nos pasos de peóns como os vehículos que saen dos garaxes ou das prazas de aparcamento só hai que fixarse nun sentido para evitar calquera posible incidente.

O proxecto de reforma desta rúa tivo un custo de 84.000 euros, e foi financiado pola Deputación Provincial e o concello do Carballiño.

A reforma consistiu nun novo pavimento, con asfaltado en quente; un tramo de abastecemento de conexión entre a Avenida 25 de Xullo e a rúa Xosé Fariña Jamardo, e unha mellora no saneamento, co obxectivo de resolver un problema de anegamento que habia no cruce da rúa Otero Pedrayo coa Avenida 25 de Xullo; e, finalmente, o redeseño das prazas de aparcamento, que agora son en batería e se incrementan en máis de medio cento de novas prazas.

Cinco persoas resultaron feridas esta tarde -sobre as 17:30 horas- nunha colisión entre unha ambulancia e un coche en Boborás. Segundo os datos facilitados ao 112 Galicia, dúas das vítimas, que viaxaban no vehículo medicalizado, tiveron que ser excarceradas polos Bombeiros do Carballiño.

A ambulancia quedou envorcada tras o choque frontal co turismo, transportaba a dúas persoas enfermas.

Ata o lugar onde ocorreu o accidente, o punto quilométrico 31 da N-541, desprazouse o helicóptero medicalizado con base en Ourense, aínda que as persoas feridas foron finalmente evacuadas en ambulancia.

Unha persoa particular contactaba co 112 Galicia ás 17:35 horas para dar conta do accidente. Acto seguido, dende o CIAE 112 Galicia pasábase o aviso ao 061-Urxencias Sanitarias, aos Bombeiros do Carballiño, á Garda Civil de Tráfico e ao GES de Avión.

A praza de abastos, en colaboración co concello do Carballiño, organiza este próximo sábado, 19 de maio, unha gran festa na que haberá actividades infantís e concertos, e cuxo lema é: I FESTA PRAZA CON RITMO”.

O evento, que foi presentado hoxe polo concelleiro de Promoción Económica, Adolfo Nogueira, e o presidente da asociación de praceiros, Eligio González "Quini", comezará as 5 da tarde na praciña exterior da instalación municipal, recentemente reformada.

A esa hora actuará o DJ TIBU, animando aos nenos e nenas con coreografías e olimpiadas populares.

Ás 7 actuará o grupo 4 MAIL QUARTET JAZZ.

E ás 8 o fará ROBERTO SOBRADO GRUPO, para presentar o seu novo traballo discográfico: Proletarios do Rock&Roll.

Na presentación do evento, Adolfo Nogueira sinalou que se trata dunha nova iniciativa encamiñada a seguir promocionando a praza de abastos como lugar de compras pero tamén como lugar de lecer e encontro cultural. Destacou a calidade dos concertos, así como a animación infantil e xuvenil, e asegurou que á praza só lle queda completar os postos vacantes para converterse nunha das mellores prazas das vilas galegas. Ao respecto dixo que nas próximas semanas convocará unha reunión para analizar as posibles propostas de cara á convocatoria do concurso.

Pola súa parte, Eligio González destacou os cambios levados a cabo na praza nos últimos tres anos, así como as campañas de promoción e sorteos realizados con gran éxito, e coincidiu co concelleiro Nogueira que é unas das mellores prazas de Galicia, e que cando se ocupen todos os postos, o será con seguridade. Por iso agradeceu ao concello, e a Adolfo Nogueira en particular, o labor desenvolvido durante este tempo a prol da praza e a constante preocupación por seguir mellorando as instalacións e a colaboración na promoción de actividades como esta gran festa do próximo sábado.

A Conselleira de Medio Ambiente e Ordenación do Territorio comeza, co inicio da participación pública documento preliminar, os distintos trámites e procedementos para a elaboración do Plan de Conservación do Monumento Natural A Serra de Pena Corneira, que abrangue os concellos de Carballeda de Avia, Leiro e Avión.

O Diario Oficial de Galicia ven de publiciar o anuncio pola que se somete un documento preliminar ao trámite de participación pública por un prazo de 20 días hábiles, comezando a contar o dito prazo, mañá día 11 de maio.

Trátase da fase inicial da tramitación deste expediente sobre este monumento natural, a Serra de Pena Corneira, que constitúe unha prolongación ao nordés da serra do Suído e ten unha superficie aproximada de 988 hectáreas, entre as bacías dos ríos Avia e Miño; e que foi oi declarado monumento natural mediante o Decreto 264/2007, do 20 de decembro.

O documento exposto a participación pública constitúe a fase inicial do plan de conservación, onde se fai unha breve descrición da zona de actuación, así como das súas principais presións e ameazas, que será a base para que o público en xeral poida expresar as súas opinións.

Con posterioridade, en base ás alegacións e á información obtida pola Dirección Xeral de Patrimonio Natural, elaborarase un borrador de plan de conservación con todos os apartados establecidos pola Lei 9/2001, do 21 de agosto, que será sometido a un novo procedemento de información pública, audiencia aos interesados e consulta ás Administracións afectadas.

Durante o procedemento de tramitación do plan de conservación establécese un réxime de protección específica para o espazo, de xeito que, ademais de serlle de aplicación o previsto no Decreto da súa creación, estarase ao previsto no artigo 21 da Lei 9/2001, do 2 de agosto, de conservación da natureza.

Valores de Pena Corneira

A importancia da zona radica nunha masa plutónica que dá lugar a un batolito de 18 km en sentido meridiano e 7 km en sentido leste-oeste, froito dunha masa de magma que se solidificou a causa da estrutura profunda do antigo volcán, hai aproximadamente 300 millóns de anos. O dito batolito está constituído por rochas graníticas hercínicas poscinemáticas, de composición xeral calcoalcalina e subalcalina, aparecendo granitos biotíticos e granodioritas biotíticas anfibólicas, aínda que non todo o macizo presenta facies similares. A diferenciación cristalina deu lugar a diferenzas na evolución xeomorfolóxica que fixeron posible a existencia do macizo de Pena Corneira e as súas formacións asociadas: cristas graníticas, domo alvéolos, corredores deprimidos, caos de bolos, pías (pot holes, gnammas),...

No referente á vexetación, o bosque climático nas partes baixas do territorio correspóndese cunha carballeira pertencente á serie Ruscus aculeati-Quercetum ruboris, co carballo (Quercus robur) como especie arbórea dominante e a xibarda (Ruscus aculeatus) como diferencial da asociación. Coexistindo co carballo tamén aparecen outras árbores acompañantes como o castiñeiro (Castanea sativa) ou o cerquiño (Quercus pyrenaica). A influencia mediterránea é notable, aparecendo especies como o loureiro (Laurus nobilis) o érbedo (Arbutus unedo), etc.

Nas zonas de maior altitude da serra, máis frías e húmidas, desenvólvese unha carballeira acidófila montana con arando (serie Vaccinio myrtilli-Quercetum boboris), de carácter máis continental e relacionada coa comunidade anterior, destacando especies como o bidueiro (Betula celtiberica), o acivro (Ilex aquifolium) ou o castiñeiro (Castanea sativa).