O Concello de Piñor informa da apertura do prazo de inscrición para o Programa PIÑOR CONCILIA “Familias Tardías” para o curso escolar 2021-2022, que será gratuito para tódalas familias. Trátase dunha medida de conciliación da vida familiar e laboral, validada pola Xunta de Galicia, e que pretende acadar as seguintes finalidades:
-Fomentar a incorporación á vida laboral das familias con membros en situación de desemprego.
-Potenciar a redución das dificultades de conciliación que comporta tamén unha vida familiar máis satisfactoria para todos os membros da unidade familiar.
-Ampliar o horario no que os nenos/as están baixo supervisión e apoio de educadores/as, dando tranquilidade e garantías as familias.
-Reducir o desaxuste existente entre o horario escolar cos horarios laborais.

Este servizo finánciase integramente pola Xunta de Galicia a través da Secretaría Xeral da Igualdade.

O servizo de Familias Tardías atende ós cativos dende a saída do colexio ata as 19:30h, de luns a venres no Centro Social (Albarona). Para elo, os participantes poderán cambiar a parada escolar para Albarona, onde o/a monitor/a os esperará para acompañalos ó Centro Social. Finalmente, deberán ser recollidos ás 19:30h polas familias no propio Centro Social. Como outros anos, ofrecerase apoio escolar diariamente ós cativos que cursen Primaria ou ESO, e o programa desenvolverase dende o luns 4 de outubro de 2021 ó 21 de xuño de 2022.
Seguirase o calendario escolar do colexio de referencia (CPI Virxe da Saleta), de maneira que os días non lectivos de carácter esporádico (ponte, etc) Familias Tardías pasará a ofrecerse en horario de mañá, de 10h a 14h. Por outra banda, nos períodos vacacionais (Nadal, Semana Santa e Entroido), o concello ofrecerá outras actividades de conciliación de carácter máis lúdico.

Destacar que, por mor do COVID19, haberá:
-Medidas preventivas hixiénicas e sanitarias, que serán dadas a coñecer ás familias usuarias.
-O alumnado participante deberá levar máscara en bo estado. Non obstante, na aula haberá máscaras para poder empregar de forma puntual, en casos de rotura ou extravío.
-Prazas limitadas: velando así polo mantemento da distancia de seguridade e medidas sanitarias por mor do COVID19. A orde de inscrición será por orde de entrada no rexistro municipal.

Por motivos organizativos, o prazo de inscrición será ata o 30 de setembro. Toda persoa interesada debe acudir a Servizos Sociais, onde obterá máis información.

A sala de exposicións do Museo do Pobo Galego, en Santiago de Compostela, acolle a mostra "Seica" de Xesús Carballido que ofrece un percorrido polos primeiros anos de traballo do artista, inaugurada coa presenza de diversas personalidades, entre elas o conselleiro de cultura, Román Rodríguez.

Trátase dunha exposición na que, tal e como explicou o titular de Cultura do Goberno galego, queda reflectida a voz “singular e propia de Carballido que soubo plasmar nas súas creacións a memoria emocional de toda unha xeración elevando aquilo que nos é cotiá a categoría de obxecto artístico”. Neste senso, engadiu que o autor do Carballiño é capaz de revitalizar o pasado para dar forma ao presente “abrindo un diálogo que conecta ambos marcos temporais”.

Así, a nova mostra do Museo do Pobo Galego reúne unha retrospectiva que permite descubrir a súa obra e comprobar como foi evolucionando ao longo dos anos. “Con esta exposición podemos viaxar desde os seus primeiros pasos, cara comezos da década dos 90, ata chegar á fase de madurez”, precisou Román Rodríguez.

En total, Seica está composta por máis dun cento de obras elaboradas por Carballido entre as que se inclúen colaxes, ensamblaxes, caixas e debuxos. Nos seus traballos, o autor bota man de todo tipo de pequenos obxectos, desde tipos de imprenta a ferros forxados, restos de xoias ou etiquetas de produtos comerciais, para conformar as súas pezas.

Neste sentido, o artista traballa cunha linguaxe profundamente persoal, recuperando obxectos da vida cotiá para integralos e compoñer dunha maneira equilibrada unha nova obra de arte. Trátase de obxectos que deixaron de empregarse, que xa non teñen utilidade, e que adquiren de novo vida propia dentro da peza, evocando lembranzas, recordos e ideas.

Exposicións en Galicia, Francia ou Cuba
Xesús Carballido (O Carballiño, 1954) comezou a expoñer individualmente en 1992, en Noia, aínda que na actualidade as súas obras xa foron exhibidas na meirande parte das cidades e principais vilas galegas así como noutras urbes españolas e do resto do mundo.

De feito, colectivamente apareceu na terceira Mostra Unión Fenosa de 1993 e posteriormente a súa obra estivo presente en mostras de Ourense, A Coruña, Vigo, Castela A Mancha, Madrid, Francia e Santiago de Cuba. Do mesmo xeito, atópase representado na Colección de Unión Fenosa da Coruña, na Colección de Arte Abanca e na Fundación Granell de Compostela, así como noutras coleccións de Galicia e Cuba.

No patio exterior da entrada principal podemos ver a exposición "O Asilo en tempos de pandemia", unha escolma fotográfica que mostra distintas esceas cotiáns por parte de residentes e persoal do centro durante o último ano e medio que levamos de pandemia do coronavirus.

Este mércores 15 de Setembro tivo lugar o acto central de celebración deste 120 aniversario da gran obra dos irmáns Prieto Pereira, a apertura do Asilo do Carballiño, que 120 anos despóis xestiona a Fundación que leva o nome dos filántropos carballiñeses, un xeriátrico que acolle hoxendía a 105 residentes. Celebrouse unha misa solemne na capela do Asilo e presentouse o documental "Cando o fogar é sentimento" con intervención de varios dos residentes, e no marco dunha xornada na que houbo un aperitivo especial nas propias instalacións da residencia.

As actividades continúan no resto da semana, o xoves 16 en horario matinal desenvolveránse as "Olimpiadas Irmáns Prieto", unha xornada de divertimento e deporte, e ás 18 horas o Orfeón do Carballiño ofrecerá un concerto. Xa finalmente, o venres 17 coincidiendo coa festividade do patrón do Carballiño serviráse un xantar especial e actuará a Banda de Gaitas.

No arquivo do programa local de COPE O Carballiño, correspondente ao dia 15 de Setembro de 2021, podes escoitar a entrevista con Nuria Iglesias, actúal directora do Asilo-Residencia dos Irmáns Prieto.

O terreo edificable deberá ter unha superficie mínima de 4.000 m2 compatible con usos sanitarios no Plan Xeral de Ordenación Municipal, calquera propietario poderá presentar as súas ofertas. Para elo, o concello do Carballiño convocará un concurso público para "elixir o terreo que mellor se adapte o que piden os técnicos do Sergas, tan pronto secretaría redacte as bases, publicaráse a convocatoria deste concurso", esto foi o que avanzou o alcalde Francisco Fumega durante a súa intervención hoxe en COPE O Carballiño.

Desta maneira, o rexedor municipal saía ao paso das críticas a este procedemento por parte de Espazo Común, ao considerar falta de transparencia por parte da alcaldía. Fumega admitía que baralla dúas posibles ubicacións no entorno do actúal centro de saúde "nun dos terreos sería necesario desenvolver unha área de reparto urbanístico", en todo caso, asegurou que se considerá calquera outra posible opción noutras zonas do Carballiño.

Asi mesmo, dixo que na resolución deste concurso "participarán todos os grupos políticos e calquera veciño do Carballiño, xa que como en calquera outra adxudicación que fai o concello, será a porta aberta".

Fumega tamén desvelou algúns aspéctos técnicos do que será o futuro centro de saúde, según avanzaronlle os técnicos ao propio alcalde, o edificio terá unha superfice construída de 4.000 m2 repartida en dúas plantas, polo que quedarían 2.000 m2 dispoñibles para zona de parking e outros posibles usos.

O grupo municipal de Espazo Común considera que o anunciado "ofrecemento á Xunta de tres soares de particulares sen facilitar máis información, desprende un nauseabundo cheiro a cacicada". Manifestan que "Fumega ignora por completo o acordo plenario de tomar esta decisión nunha comisión municipal integrada por representantes de todos os grupos" un acordo que "baseouse na indiscutible idea de que este proxecto é esencial e vai máis alá do mandato dun goberno puntual e, polo tanto, debería levarse a termo buscando o maior consenso posible".

Asemade, dende Espazo Común, tildan o procedemento como un exemplo máis da "aberrante ausencia de transparencia do goberno municipal do Carballiño", e mesmo o cualifican como "o goberno totalitario de Francisco José Fumega".

Ante a non convocatoria da citada comisión municipal, Espazo común anuncia que trasladará varias preguntas en pleno ao rexedor municipal, ao que interrogará sobre os motivos polos que o non informa de cales son eses soares, e qué motivos están tras esta actitude, tamén por qué a única opción que se contempla é o entorno do actúal centro de saúde cando ao plantexarse que sexa un edificio de nova construcción non poden contemplarse outras alternativas e, finalmente se "ten alguén do goberno un interese persoal en que se revalorice esa zona concreta".

O delegado territorial da Xunta en Ourense, Gabriel Alén, desprazouse esta mañá ao concello de Beariz para visitar, da man do director xeral de Gandería, Agricultura e Industrias Agroalimentarias, José Balseiros, e do alcalde, Manuel Prado, o pasteiro situado no monte veciñal mancomuniado común de Penias, Pico, Rego de Couto e Lomba.

Este espazo foi acondicionado dentro do Plan de pastos da Xunta, cun investimento de 132.319 euros. A actuación desenvolveuse nun total de 16,8 hectáreas de terreo, nas que ademais de acondicionar o propio pasteiro procedeuse á colocación dunha manga de manexo de gando, á construción dun bebedoiro, un galpón, dúas unidades de paso canadense, captación e condución de auga (85 metros lineais) e peche cinexético (900 metros lineais).

Nesta visita, o delegado e o director xeral destacaron que só na primeira fase do Plan de pastos de Galicia investiuse máis dun millón de euros na provincia de Ourense, para executar seis pastos noutros tantos concellos dunhas 170 hectáreas en total. Na segunda fase, engadiron, están programados 10 pasteiros nos concellos da Veiga, Allariz, Xunqueira de Espadanedo, Lobeira, Laza, Maceda, Vilariño de Conso, O Irixo e Bande, abarcando case 530 hectáreas e un orzamento de case 1,2 millóns.

O delegado territorial da Xunta en Ourense, Gabriel Alén, desprazouse ao concello de Boborás para comprobar da man da súa alcaldesa, Patricia Torres, o final dos traballos de escavación e consolidación do Castro de Cameixa, nos que a Consellería de Cultura, Educación e Universidade investiu na edición deste ano 12.705 euros.

Gabriel Alén explicou que os traballos consistiron na limpeza e roza, baixo control arqueolóxico, da vexetación da zona de actuación e a súa contorna máis inmediata, isto é, a parcela de actuación e acceso á mesma.

Tamén se desenvolveron traballos de escavación –destacou o representante do Goberno galego- con metodoloxía arqueolóxica dunha área de aproximadamente duns 100 m2 que permitiu exhumar parte dos restos arqueolóxicos descubertos nas escavacións dos anos 40 do século pasado que posteriormente se diagnosticaron e as estruturas exhumadas foron debidamente consolidadas.

Por último tamén levaron a cabo traballos de documentación fotográfica e planimétrica da área de actuación e das diferentes fases.

O Castro de Cameixa

O Castro de Cameixa sitúase no concello ourensán de Boborás, en concreto, na parroquia de San Martiño de Cameixa, lugar de Cameixa. Trátase dun castro de obrigada referencia na bibliografía especializada debido a que foi un dos primeiros castros que se escavou con certa metodoloxía arqueolóxica (anos 40 do século XX) e que achegou datacións absolutas de C14 que permitiron reformular os distintos períodos da cultura castrexa. Presenta dous recintos amurallados e mesmo outro antecastro máis exterior pero sen defensas ben definidas. Foi escavado nos anos corenta do século pasado por Florentino López Cuevillas e Xaquín Lorenzo Fernández deixando ao descuberto parte dun tramo de muralla xunto con dúas construcións circulares e unha cuadrangular. Froito da escavación exhumáronse restos cerámicos, pétreos, orgánicos (landras e legumes carbonizadas) e metálicos que abarcan un espectro cronolóxico que iría desde o século VI A. C. ata o I ou mesmo II D. C.

Desde o ano 2018 están a levarse a cabo campañas arqueolóxicas anuais para a posta en valor do devandito xacemento: en 2018 procedeuse a seleccionar a zona de escavación partindo dos debuxos de Xaquín Lorenzo con motivo de localizar e exhumar os restos de estruturas que se rexistraron nas escavacións dos anos corenta, cuadriculando unha zona duns 100 m2. No ano 2019 procedeuse a seleccionar a zona de escavación cuadriculando unha zona duns 120 m2 (escavando unha superficie de 80 m2), e continuando coas xa escavadas no ano 2018. No ano 2020 procedeuse a cuadricular uns 80 m2 e continuouse cos restos estruturais atopados en 2019. O obxectivo era por unha banda, completar o peche da estrutura cuadrangular que se superpón á circular no sector norte e doutra banda ampliar a escavación a unha zona non escavada por X. Lorenzo co fin de definir/comprobar datos estratigráficos e de materiais necesarios para seguir avanzando na investigación deste xacemento.

O mosteiro de Santa María A Real de Oseira acolleu este sábado o acto de entrega do título a Marisa Crespo Leiro como Filla Predilecta do concello de San Cristovo de Cea, a doutora é todo un referente internacional no ámbito da insuficiencia cardíaca e do transplante de corazón.

A corporación municipal de San Cristovo de Cea aprobou no pleno celebrado en xuño de 2020 o inicio do expediente para nomear á Marisa Crespo como Filla Predilecta do Concello, “tendo en conta –sinala a acta- os valores persoais, os méritos profesionais e o recoñecemento xeral que obtivo a doutora, ligada ao concello coa súa vivenda familiar no lugar de Santrós". Unha traxectoria que para o alcalde, José Luis Valladares, “cumpre sobradamente as calidades para o seu recoñecemento pola corporación municipal”.

Marisa Crespo, que ademais de lembrar aos seus pais fixo na súa intervención “un exercicio de gratitude, que a nai de todas as virtudes, dirixe a Unidade de Insuficiencia Cardíaca e Transplante de Corazón no servizo de cardioloxía do Complexo Hospitalario Universitario da Coruña (CHUAC). Profesora titular de Medicina na Universidade da Coruña, forma parte do Comité de Educación da Sociedade Europea de Cardioloxía e ten publicados máis de 250 traballos científicos. Elixida pola revista científica Circulation como unha das mulleres líderes no mundo en transplante cardíaco, en 2020 recibiu a medalla de Ouro e Brillantes do Colexio Oficial de Médicos da Coruña, que destacou as súas calidades humanas e a súa entrega e dedicación aos pacientes, así como a súa contribución á mellora da organización da asistencia da insuficiencia cardíaca, tanto en Galicia como no resto de España.

Na súa intervención, o presidente da Deputación de Ourense, Manuel Baltar,referíuse a“un máis que merecido recoñecemento a unha traxectoria profesional de indubidable proxección mundial, pero tamén a unha muller que destaca polo seus valores persoais e a súa calidade humana”, asegurou Baltar. Tralo acto, ao que ademais do alcalde, José Luis Valladores, e membros da corporación tamén asistiron o presidente do Parlamento de Galicia, Miguel Santalices, e o delegado territorial da Xunta en Ourense, Gabriel Alén, o presidente provincial felicitou ao concello e á veciñanza de San Cristovo de Cea “por unha homenaxe que contribúe a visibilizar a enorme riqueza humana e profesional de mulleres que, ben por nacemento ou por ascendencia, levan o nome de Ourense e dos seus distintos territorios polo mundo”.