Chega a primeira fin de semana de Setembro e faino cargada de teatro e cine, con boas propostas para non perderse.

O Carballiño

A Banda Sinfónica Xuvenil Galega ofrece un concerto o sábado dia 4 ás 19 horas na Praza da Veracruz.

O FETEGA presenta dende o domingo a súa programación, para ese dia no auditorio ás 22 horas está programada a estrea da obra do CDG Serva me, servabo te.

Antes, tamén o domingo día 5 na Casa da Cultura ás 19 horas o monólogo de Patty Diphusa-Malala Ricoy, que presenta o seu traballo Sexo seguro, seguro?

Leiro

O Novocine de Leiro continúa proxectando durante toda a fin de semana a película de animación "Bebé Jefazo negocios de famila" en sesión ás 16 horas" e ademáis estrea a película "Descarrilados", en sesións ás 18:15 e 20:30 horas.

Cameixa (Boborás)

O concello de Boborás continúa coa súa programación estival, para este sábado dia 4 de Setembro nova sesión de autocine no campo da festa de Cameixa, cine de comedia  con Silvia Abril e Jordi sanchez en "Bajo el mismo techo". 

O concello de Piñor informa das actividades que se van realizar nos vindeiros dias e que foron propostas na mesa intersectorial no marco da Estratexia de Promoción da Saúde e Prevención (EPSP) no Sistema Nacional de Saúde á que o Concello de Piñor está adherido.

- Charla sobre o dano cerebral adquirido que será impartida pola Asociación de dano cerebral adquirido de Ourense e que terá lugar o luns 6 de setembro ás 19 horas no Centro social de Piñor.

- Charla sobre prantas medicinais que será impartida por Dna. Marina Diéguez Marín ( Farmacéutica en Piñor) e que terá lugar o xoves 9 de setembro ás 19 horas no Centro social de Piñor.

Outra actividade que se está realizando tamén no marco da Estratexia de Promoción da saúde e que foi proposta na mesa intersectorial de Piñor, consiste en facilitar un almorzo diario saudable nas actividades de Diververán: con esta actividade que se estivo realizando durante todo o verán dende o Concello de Piñor, tratouse de fomentar unha alimentación saudable entre os máis novos. Ademais, tamén se pretendeu que os nenos e nenas adquiran o hábito de tomar un almorzo saudable para que despois o apliquen á súa vida diaria.

Proximamente o concello de Piñor dará conta das novas actividades que se realizaran financiadas pola Rede Española de Cidades Saudables, á que tamén está adherido o Concello de Piñor.

Os deputados do Partido Popular pola provincia de Ourense, Ana Vázquez e Celso Delgado, rexistraron hoxe unha proposición non de lei no Congreso na que instan ao Goberno a repoñer e planificar novos servizos ferroviarios de calidade nas conexións co Carballiño, incluíndo a mellora do material móbil e atención presencial na estación, "para poñer fin á inaceptable diminución do dereito á mobilidade que sofren os habitantes desta comarca e que xa non se xustifica coa actual situación sanitaria".

Na súa iniciativa, os representantes populares destacan que O Carballiño, ademais de capital dunha importante comarca, é o segundo municipio da provincia de Ourense en poboación, con 14.089 habitantes. "Unha vila de gran tradición termal que experimentou grandes cambios e un deles derivouse da inauguración, en 1957, dunha estación de ferrocarril", lembra Celso Delgado.

Non obstante, e trala posta en servizo en decembro de 2011 da liña de alta velocidade entre Ourense-Santiago-A Coruña, operada por trens Avant e que por ser de novo trazado xa non pasa polo Carballiño, "Renfe iniciou unha paulatina redución de frecuencias dos servizos ferroviarios para os carballiñeses, tanto con Ourense como con Santiago de Compostela, agravada o pasado ano polas restricións de mobilidade impostas por motivo da pandemia da Covid-19".

"A situación a día de hoxe non pode ser máis deplorable", afirmou Delgado, explicando que Renfe só ofrece dous servizos con parada nesta vila: o tren rexional 12960 que sae de Ourense ás 15:30 e chega ao Carballiño ás 16:01 e a Santiago de Compostela ás 17:10. En sentido inverso, o mesmo tren sae de Santiago ás 17:25, chega ao Carballiño ás 18:41 e finalmente a Ourense ás 19:06.

Estes horarios, lamentou, "carecen de atractivo para a inmensa maioría dos potenciais usuarios, posto que un viaxeiro do Carballiño que salga ás 15:56 desa estación chega á capital de Galicia ás 17:10, o que imposibilita acudir a actividades laborais, asistenciais, educativas ou citas sanitarias". Ademais, "para acudir á capital da provincia, saír da vila ás 18:41 e chegar vinte e cinco minutos despois fai inviable calquera xestión similar".

Os deputados recollen na súa proposición non de lei o sentir da sociedade carballiñesa e da comarca, "onde as súas forzas políticas, organizacións sindicais, empresariais e a activa plataforma pola defensa do transporte público veñen expresando de forma reiterada o seu malestar e fastío por este abandono".

Para facer fronte a esta situación, reclaman como mínimo "a plena reposición de todos os servizos ferroviarios suprimidos con ocasión da pandemia, que se dispoñan trens de calidade e con capacidade suficiente para as persoas e as súas equipaxes, así como horarios racionais con trens á primeira hora en ambos os sentidos que permitan acudir ás cidades e aproveitar a xornada, facilitando o enlace con outras conexións que parten desde Ourense a diferentes destinos e cos futuros trens de alta velocidade, ademais de servizos especiais as fins de semana para facilitar a mobilidade dos estudantes".

"A segunda poboación en importancia de Ourense -abondou Celso Delgado- con atractivos turísticos de relevo, riqueza termal, patrimonio e co atractivo gastronómico do mellor polbo do mundo- ben merece ter na estación un servizo presencial de atención ao público que ofreza información aos viaxeiros, cando hoxe só hai a posibilidade de comprar billetes para o tren rexional nunha máquina de autovenda".

A proposición non de lei rexistrada polos deputados ourensáns inclúe os seguintes cinco puntos:

1.- Repoñer de inmediato todos os servizos ferroviarios de RENFE que tiñan parada na estación do Carballiño antes da pandemia da covid-19.

2.- Realizar unha nova planificación por parte de RENFE das frecuencias e dos horarios dos trens, de modo que haxa servizos que permitan viaxar á primeira hora en ambos os sentidos para acudir ás cidades e aproveitar a xornada, ademais de enlazar con outros que parten agora desde Ourense a diferentes destinos e cos futuros trens de alta velocidade.

3.- Establecer servizos especiais as fins de semana para posibilitar a mobilidade dos moitos estudantes de Carballiño e a súa comarca que retornan ou van ás universidades ou centros educativos das capitais.

4.- Mellorar o material móbil que opera nesta liña garantindo aos usuarios a calidade de servizos que merecen.

5.- Dotar á estación do Carballiño dun servizo de atención ao público presencial, acorde coa importancia desta poboación e os seus grandes atractivos turísticos.

A conselleira de Política Social, Fabiola Garcia, sinalou que máis de 800 persoas gozaron este verán dunhas vacacións en familia nas residencias públicas do Carballiño e de Panxón. Aproveitou a súa visita á residencia de tempo libre do Carballiño para conversar e coñecer as experiencias dalgunha das familias participantes.

Este programa emblemático tivo que ser suspendido o ano pasado por mor da covid-19. Neste 2021 retomouse con todas as precaucións e con máis facilidades ca nunca para as familias que máis o necesitan: as numerosas, as monoparentais, as de acollida e as vítimas de violencia de xénero. Como novidade todas elas tiveron prioridade en todas as quendas ofertadas.

Así mesmo, Fabiola García fixo fincapé en que os participantes contaron con todas as garantías e medidas de seguridade. Para iso, foi necesario facer reducións de aforo, ofertar a metade de prazas que durante un ano normal, realizar test aos usuarios á súa entrada á residencia e reforzar as medidas hixiénico-sanitarias.

A edición 2021 do Festival de Teatro Galego terá dous escenarios, o auditorio municipal, onde se presentarán as obras de teatro sempre a partir das 22.00 horas, e a Casa da Cultura, onde desde ás 19.00 horas o público poderá gozar dos monólogos. Así, o domingo 5 de setembro no auditorio está programada a estrea da obra do CDG Serva me, servabo te; o luns, día 6, será a quenda para a compañía Traspediante coa obra Bailar agora; e na última xornada, día 7, La Quintana Teatro estreará O Premio.

Polo que respecta aos monólogos, o día 5 na Casa da Cultura Patty Diphusa-Malala Ricoy presenta o seu traballo Sexo seguro, seguro? Seguro! A compañía O Chuso de Catoira interpretará o día 6 Un vikingo no Fetega; e no último día do festival, o martes 7, Marta Doviro falará das súas Memorias dunha rapasa na costa.

Como actividades paralelas haberá teatro de rúa con Barafunda, que ao longo do festival presentará os espectáculos titulados A rede social, Carballiño me gusta e O Mundo interactúa no Fetega. Na sala de exposicións do auditorio están programadas dúas mesas redondas que abordarán A violencia de xénero escondida na arte, e O amor versus a sexualidade: ferramentas de subxugación ao rol feminino.

O festival, reducido este ano a tres dias de programación, pecharase o martes día 7 coa entrega do citado premio de honra, así como dos galardóns á mellor actriz e actor, ao mellor espectáculo e monólogo cómico. As xornadas teatrais están organizadas pola asociación FETEGA,coa colaboración económica do concello carballiñés, Xunta e Deputación.